໗. ຣາຫຸລສຸຕ຺ຕວຓ຺ຓນາ

໑໗໗. ສຕ຺ຕເມ ອຊ຺ຌຕ຺ຕິກາຕິ ເກສາທີສຸ ວີສຕິຍາ ໂກຏ຺ຐາເສສຸ ຖທ຺ຘາກາຣລກ຺ຂຓາ ປຖວີຘາຕຸ. ພາຫິຣາຕິ ພຫິທ຺ຘາ ອນິນ຺ທ຺ຣິຍພທ຺ເຘສຸ ປາສາຓປພ຺ພຕາທີສຸ ຖທ຺ຘາກາຣລກ຺ຂຓາ ປຖວີຘາຕຸ. ອິມິນາວ ນເຍນ ເສສາປິ ຘາຕຸໂຍ ເວທິຕພ຺ພາ. ເນຕໍ ມມ, ເນໂສຫມສ຺ມິ, ນ ເມໂສ ອຕ຺ຕາຕິ ອິທໍ ຕຍໍ ຕຓ຺ຫາມານທິຏ຺ຐິຄ຺ຄາຫປຏິກ຺ເຂປວເສນ ວຸຕ຺ຕໍ. ສມ຺ມປ຺ປຎ຺ຎາຍ ທຏ຺ຐພ຺ພນ຺ຕິ ເຫຕຸນາ ກາຣເຓນ ມຄ຺ຄປຎ຺ຎາຍ ປສ຺ສິຕພ຺ພໍ. ທິສ຺ວາຕິ ສຫວິປສ຺ສນາຍ ມຄ຺ຄປຎ຺ຎາຍ ປສ຺ສິຕ຺ວາ. ອຈ຺ເຉຈ຺ຉິ ຕຓ຺ຫນ຺ຕິ ມຄ຺ຄວຊ຺ຌຕຓ຺ຫໍ ສມູລກໍ ຉິນ຺ທິ. ວິວຕ຺ຕຍິ ສໍໂຍຊນນ຺ຕິ ທສວິຘມ຺ປິ ສໍໂຍຊນໍ ວິວຕ຺ຕຍິ ອຸພ຺ພຕ຺ເຕຕ຺ວາ ປຊຫິ. ສມ຺ມາ ມານາຠິສມຍາຕິ ເຫຕຸນາ ກາຣເຓນ ນວວິຘສ຺ສ ມານສ຺ສ ປຫານາຠິສມຍາ. ອນ຺ຕມກາສິ ທຸກ຺ຂສ຺ສາຕິ ວຏ຺ຏທຸກ຺ຂໍ ປຣິຈ຺ຉິນ຺ນໍ ປຣິວຏຸມໍ ອກາສິ, ກຕ຺ວາ ຐິໂຕຕິ ອຕ຺ໂຖ. ອິຕິ ສຕ຺ຖາຣາ ສໍຍຸຕ຺ຕມຫານິກາເຍ ຣາຫຸໂລວາເທ (ສໍ. ນິ. ໓.໙໑ ອາທໂຍ) ວິປສ຺ສນາ ກຖິຕາ, ຈູຬຣາຫຸໂລວາເທປິ (ມ. ນິ. ໓.໔໑໖ ອາທໂຍ) ວິປສ຺ສນາ ກຖິຕາ, ອມ຺ພລຏ຺ຐິກຣາຫຸໂລວາເທ (ມ. ນິ. ໒.໑໐໗ ອາທໂຍ) ທຫຣສ຺ເສວ ສໂຕ ມຸສາວາທາ ເວຣມຓີ ກຖິຕາ, ມຫາຣາຫຸໂລວາເທ (ມ. ນິ. ໒.໑໑໓ ອາທໂຍ) ວິປສ຺ສນາ ກຖິຕາ. ອິມສ຺ມິໍ ອງ຺ຄຸຕ຺ຕຣມຫານິກາເຍ ອຍໍ ຈຕຸໂກຏິກສຸຎ຺ຎຕາ ນາມ ກຖິຕາຕິ.