໒. ວິຠຕ຺ຕິສຸຕ຺ຕວຓ຺ຓນາ

໑໗໒. ທຸຕິເຍ ອຕ຺ຖປຏິສມ຺ຠິທາຕິ ປຎ຺ຈສຸ ອຕ຺ເຖສຸ ປເຠທຄຕໍ ຎາຓໍ. ໂອຘິໂສຕິ ກາຣຓໂສ. ພ຺ຍຎ຺ຊນໂສຕິ ອກ຺ຂຣໂສ. ອເນກປຣິຍາເຍນາຕິ ອເນເກຫິ ກາຣເຓຫິ. ອາຈິກ຺ຂາມີຕິ ກເຖມິ. ເທເສມີຕິ ປາກຏໍ ກຕ຺ວາ ກເຖມິ. ປຎ຺ຎາເປມີຕິ ຊານາເປມິ. ປຏ຺ຐເປມີຕິ ປຏ຺ຐເປຕ຺ວາ ປວຕ຺ເຕຕ຺ວາ ກເຖມິ. ວິວຣາມີຕິ ວິວຏໍ ກຕ຺ວາ ກເຖມິ. ວິຠຊາມີຕິ ວິຠຊິຕ຺ວາ ກເຖມິ. ອຸຕ຺ຕານີກໂຣມີຕິ ຄມ຺ຠີຣໍ ອຸຕ຺ຕານກໍ ກຕ຺ວາ ກເຖມິ. ໂສ ມໍ ປຎ຺ເຫນາຕິ ໂສ ມໍ ປຎ຺ເຫນ ອຸປຄຈ຺ຉຕຸ. ອຫໍ ເວຍ຺ຍາກຣເຓນາຕິ ອຫມສ຺ສ ປຎ຺ຫກຖເນນ ຈິຕ຺ຕໍ ອາຣາເຘສ຺ສາມິ. ໂຍ ໂນ ຘມ຺ມານໍ ສຸກຸສໂລຕິ ໂຍ ອມ຺ຫາກໍ ອຘິຄຕຘມ຺ມານໍ ສຸກຸສໂລ ສຕ຺ຖາ, ໂສ ເອສ ສມ຺ມຸຂີຠູໂຕ. ຍທິ ມຍາ ອຕ຺ຖປຏິສມ຺ຠິທາ ນ ສຈ຺ຉິກຕາ, ‘‘ສຈ຺ຉິກໂຣຫິ ຕາວ ສາຣິປຸຕ຺ຕາ’’ຕິ ວຕ຺ວາ ມໍ ປຏິພາຫິສ຺ສຕີຕິ ສຕ຺ຖຸ ປຸຣໂຕ ນິສິນ຺ນໂກວ ສີຫນາທໍ ນທຕິ. ອິມິນາ ອຸປາເຍນ ສພ຺ພຕ຺ຖ ອຕ຺ໂຖ ເວທິຕພ຺ໂພ. ອິມາສຸ ຈ ປນ ປຏິສມ຺ຠິທາສຸ ຕິສ຺ໂສ ປຏິສມ຺ຠິທາ ໂລກິຍາ, ອຕ຺ຖປຏິສມ຺ຠິທາ ໂລກິຍໂລກຸຕ຺ຕຣາຕິ.