(໑໗) ໒. ປຏິປທາວຄ຺ໂຄ

໑. ສໍຂິຕ຺ຕສຸຕ຺ຕວຓ຺ຓນາ

໑໖໑. ທຸຕິຍສ຺ສ ປຐເມ ສຸຂປຏິກ຺ເຂເປນ ທຸກ຺ຂາ ປຏິປຊ຺ຊິຕພ຺ພໂຕ ປຏິປທາ ເອຕິສ຺ສາຕິ ທຸກ຺ຂາປຏິປທາ. ອສີຆປ຺ປວຕ຺ຕິຕາຍ ຄຣຸຠາເວນ ທນ຺ຘາ ອຠິຎ຺ຎາ ເອຕິສ຺ສາຕິ ທນ຺ຘາຠິຎ຺ຎາ. ອິມິນາວ ນເຍນ ສພ຺ພປເທສຸ ອຕ຺ໂຖ ເວທິຕພ຺ໂພ.

໒. ວິຕ຺ຖາຣສຸຕ຺ຕວຓ຺ຓນາ

໑໖໒. ທຸຕິເຍ ອຠິກ຺ຂຓນ຺ຕິ ອຠິຓ຺ຫໍ. ອານນ຺ຕຣິຍນ຺ຕິ ອນນ຺ຕຣວິປາກທາຍກໍ ມຄ຺ຄສມາຘິໍ. ອາສວານໍ ຂຍາຍາຕິ ອຣຫຕ຺ຕຜລຕ຺ຖາຍ. ປຎ຺ຈິນ຺ທ຺ຣິຍານີຕິ ວິປສ຺ສນາປຎ຺ຈມການິ ປຎ຺ຈິນ຺ທ຺ຣິຍານິ. ປຎ຺ຎິນ຺ທ຺ຣິຍນ຺ຕິ ຫິ ເອຕ຺ຖ ວິປສ຺ສນາປຎ຺ຎາວ ປຎ຺ຎິນ຺ທ຺ຣິຍນ຺ຕິ ອຘິປ຺ເປຕໍ. ເສສເມຕ຺ຖ ປາຬິວເສນ ອຸຕ຺ຕານເມວ.

ອິມາສໍ ປນ ປຏິປທານໍ ອຍໍ ອາວິຠາວກຖາ – ອິຘ ຠິກ຺ຂຸ ປຸພ຺ເພ ອກຕາຠິນິເວໂສ ປຸພ຺ພຠາເຄ ຣູປປຣິຄ຺ຄເຫ ກິລມຕິ, ອຣູປປຣິຄ຺ຄເຫ ກິລມຕິ, ປຈ຺ຈຍປຣິຄ຺ຄເຫ ກິລມຕິ, ຕີສຸ ອທ຺ຘາສຸ ກິລມຕິ, ມຄ຺ຄາມຄ຺ເຄ ກິລມຕິ. ເອວໍ ປຎ຺ຈສຸ ຐາເນສຸ ກິລມນ຺ໂຕ ວິປສ຺ສນໍ ປາປຸຓາຕິ. ວິປສ຺ສນໍ ປຕ຺ວາປິ ອຸທຍພ຺ພຍານຸປສ຺ສເນ, ຠງ຺ຄານຸປສ຺ສເນ, ຠຍຕຸປຏ຺ຐາເນ, ອາທີນວານຸປສ຺ສເນ, ນິພ຺ພິທານຸປສ຺ສເນ, ມຸຈ຺ຈິຕຸກມ຺ຍຕາຎາເຓ, ສງ຺ຂາຣຸເປກ຺ຂາຎາເຓ, ອນຸໂລມຎາເຓ, ໂຄຕ຺ຣຠຸຎາເຓຕິ ອິເມສຸ ນວສຸ ວິປສ຺ສນາຎາເຓສຸປິ ກິລມິຕ຺ວາວ ໂລກຸຕ຺ຕຣມຄ຺ຄໍ ປາປຸຓາຕິ. ຕສ຺ສ ໂສ ໂລກຸຕ຺ຕຣມຄ຺ໂຄ ເອວໍ ທຸກ຺ເຂນ ຄຣຸຠາເວນ ສຈ຺ຉິກຕຕ຺ຕາ ທຸກ຺ຂປຏິປໂທ ທນ຺ຘາຠິຎ຺ໂຎ ນາມ ຊາໂຕ. ໂຍ ປນ ປຸພ຺ພຠາເຄ ປຎ຺ຈສຸ ຎາເຓສຸ ກິລມນ຺ໂຕ ອປຣຠາເຄ ນວສຸ ວິປສ຺ສນາຎາເຓສຸ ອກິລມິຕ຺ວາວ ມຄ຺ຄໍ ສຈ຺ຉິກໂຣຕິ, ຕສ຺ສ ໂສ ມຄ຺ໂຄ ເອວໍ ທຸກ຺ເຂນ ອຄຣຸຠາເວນ ສຈ຺ຉິກຕຕ຺ຕາ ທຸກ຺ຂປຏິປໂທ ຂິປ຺ປາຠິຎ຺ໂຎ ນາມ ຊາໂຕ. ອິມິນາ ອຸປາເຍນ ອິຕຣາປິ ທ຺ເວ ເວທິຕພ຺ພາ.

ໂຄຓປຣິເຍສກອຸປມາຫິ ເຈຕາ ວິຠາເວຕພ຺ພາ – ເອກສ຺ສ ຫິ ປຸຣິສສ຺ສ ຈຕ຺ຕາໂຣ ໂຄຓາ ປລາຍິຕ຺ວາ ອຏວິໍ ປວິຏ຺ຐາ. ໂສ ສກຓ຺ຏເກ ສຄຫເນ ວເນ ເຕ ປຣິເຍສນ຺ໂຕ ຄຫນມຄ຺ເຄເນວ ກິຈ຺ເຉນ ກສິເຣນ ຄນ຺ຕ຺ວາ ຄຫນຏ຺ຐາເນເຍວ ນິລີເນ ໂຄເຓປິ ກິຈ຺ເຉນ ກສິເຣນ ອທ຺ທສ. ເອໂກ ກິຈ຺ເຉນ ຄນ຺ຕ຺ວາ ອພ຺ໂຠກາເສ ຐິເຕ ຂິປ຺ປເມວ ອທ຺ທສ. ອປໂຣ ອພ຺ໂຠກາສມຄ຺ເຄນ ສຸເຂນ ຄນ຺ຕ຺ວາ ຄຫນຏ຺ຐາເນ ນິລີເນ ກິຈ຺ເຉນ ກສິເຣນ ອທ຺ທສ. ອປໂຣ ອພ຺ໂຠກາສມຄ຺ເຄເນວ ສຸເຂນ ຄນ຺ຕ຺ວາ ອພ຺ໂຠກາເສ ຐິເຕເຍວ ຂິປ຺ປໍ ອທ຺ທສ. ຕຕ຺ຖ ຈຕ຺ຕາໂຣ ໂຄຓາ ວິຍ ຈຕ຺ຕາໂຣ ອຣິຍມຄ຺ຄາ ທຏ຺ຐພ຺ພາ, ໂຄຓປຣິເຍສໂກ ປຸຣິໂສ ວິຍ ໂຍຄາວຈໂຣ, ຄຫນມຄ຺ເຄນ ກິຈ຺ເຉນ ກສິເຣນ ຄມນໍ ວິຍ ປຸພ຺ພຠາເຄ ປຎ຺ຈສຸ ຎາເຓສຸ ກິລມໂຕ ທຸກ຺ຂາປຏິປທາ. ຄຫນຏ຺ຐາເນ ນິລີນານໍ ກິຈ຺ເຉເນວ ທສ຺ສນໍ ວິຍ ອປຣຠາເຄ ນວສຸ ຎາເຓສຸ ກິລມນ຺ຕສ຺ສ ອຣິຍມຄ຺ຄານໍ ທສ຺ສນໍ. ອິມິນາ ອຸປາເຍນ ເສສອຸປມາປິ ໂຍເຊຕພ຺ພາ.

໓. ອສຸຠສຸຕ຺ຕວຓ຺ຓນາ

໑໖໓. ຕຕິເຍ ອສຸຠານຸປສ຺ສີ ກາເຍ ວິຫຣຕີຕິ ອຕ຺ຕໂນ ກຣຊກາເຍ ‘‘ຍຖາ ເອຕໍ, ຕຖາ ອິທ’’ນ຺ຕິ ອິມິນາ ນເຍນ ພຫິທ຺ຘາ ທິຏ຺ຐານໍ ທສນ຺ນໍ ອສຸຠານໍ ອຸປສໍຫຣຓວເສນ ອສຸຠານຸປສ຺ສີ ວິຫຣຕິ, ອຕ຺ຕໂນ ກາຍໍ ອສຸຠໂຕ ປຏິກູລໂຕ ຎາເຓນ ປສ຺ສຕີຕິ ອຕ຺ໂຖ. ອາຫາເຣ ປຏິກູລສຎ຺ຎີຕິ ນວນ຺ນໍ ປາຏິກຸລ຺ຍານໍ ວເສນ ກພຬີກາຣາຫາເຣ ປຏິກູລສຎ຺ຎີ. ສພ຺ພໂລເກ ອນຠິຣຕິສຎ຺ຎີຕິ ສພ຺ພສ຺ມິມ຺ປິ ເຕຘາຕຸເກ ໂລກສນ຺ນິວາເສ ອນຠິຣຕາຍ ອຸກ຺ກຓ຺ຐິຕສຎ຺ຎາຍ ສມນ຺ນາຄໂຕ. ສພ຺ພສງ຺ຂາເຣສຸ ອນິຈ຺ຈານຸປສ຺ສີຕິ ສພ຺ເພປິ ເຕຠູມກສງ຺ຂາເຣ ອນິຈ຺ຈໂຕ ອນຸປສ຺ສນ຺ໂຕ. ມຣຓສຎ຺ຎາຕິ ມຣຓໍ ອາຣພ຺ຠ ອຸປ຺ປນ຺ນສຎ຺ຎາ. ອຊ຺ຌຕ຺ຕໍ ສູປຏ຺ຐິຕາ ໂຫຕີຕິ ນິຍກຊ຺ຌຕ຺ເຕ ສຸຏ຺ຐຸ ອຸປຏ຺ຐິຕາ ໂຫຕິ. ເອຕ຺ຕາວຕາ ພລວວິປສ຺ສນາ ກຖິຕາ. ເສຂພລານີຕິ ສິກ຺ຂນການໍ ພລານິ. ເສສເມຕ຺ຖ ປາຬິວເສນ ອຸຕ຺ຕານເມວ. ‘‘ອສຸຠານຸປສ຺ສີ’’ຕິອາທີນິ ປນ ທຸກ຺ຂາຍ ປຏິປທາຍ ທສ຺ສນຕ຺ຖໍ ວຸຕ຺ຕານິ, ປຐມຊ຺ຌານາທີນິ ສຸຂາຍ. ອສຸຠາທີນິ ຫິ ປຏິກູລາຣມ຺ມຓານິ, ເຕສຸ ປນ ປກຕິຍາວ ສມ຺ປິຍາຍມານໍ ຈິຕ຺ຕໍ ອລ຺ລີຍຕິ. ຕສ຺ມາ ຕານິ ຠາເວນ຺ໂຕ ທຸກ຺ຂປຏິປທໍ ປຏິປນ຺ໂນ ນາມ ໂຫຕິ. ປຐມຊ຺ຌານາທີນິ ປຓີຕສຸຂານິ, ຕສ຺ມາ ຕານິ ປຏິປນ຺ໂນ ສຸຂປຏິປທໍ ປຏິປນ຺ໂນ ນາມ ໂຫຕິ.

ອຍໍ ປເນຕ຺ຖ ສພ຺ພສາຘາຣຓາ ອຸປມາ – ສງ຺ຄາມາວຈຣປຸຣິໂສ ຫິ ຜລກໂກຏ຺ຐກໍ ກຕ຺ວາ ປຎ຺ຈາວຸຘານິ ສນ຺ນຍ຺ຫິຕ຺ວາ ສງ຺ຄາມໍ ປວິສຕິ, ໂສ ອນ຺ຕຣາ ວິສ຺ສມິຕຸກາໂມ ຜລກໂກຏ຺ຐກໍ ປວິສິຕ຺ວາ ວິສ຺ສມຕິ ເຈວ ປານໂຠຊນາທີນິ ຈ ປຏິເສວຕິ. ຕໂຕ ປຸນ ສງ຺ຄາມໍ ປວິສິຕ຺ວາ ກມ຺ມໍ ກໂຣຕິ. ຕຕ຺ຖ ສງ຺ຄາໂມ ວິຍ ກິເລສສງ຺ຄາໂມ ທຏ຺ຐພ຺ໂພ, ຜລກໂກຏ຺ຐໂກ ວິຍ ປຎ຺ຈນິສ຺ສຍພລານິ, ສງ຺ຄາມປວິສນປຸຣິໂສ ວິຍ ໂຍຄາວຈໂຣ, ປຎ຺ຈາວຸຘສນ຺ນາໂຫ ວິຍ ວິປສ຺ສນາປຎ຺ຈມານິ ອິນ຺ທ຺ຣິຍານິ, ສງ຺ຄາມໍ ປວິສນກາໂລ ວິຍ ວິປສ຺ສນາຍ ກມ຺ມກຣຓກາໂລ, ວິສ຺ສມິຕຸກາມສ຺ສ ຜລກໂກຏ຺ຐກໍ ປວິສິຕ຺ວາ ວິສ຺ສມນປານໂຠຊນານິ ປຏິເສວນກາໂລ ວິຍ ວິປສ຺ສນາຍ ກມ຺ມໍ ກໂຣນ຺ຕສ຺ສ ຈິຕ຺ຕຸປ຺ປາທສ຺ສ ນິຣສ຺ສາທກ຺ຂເຓ ປຎ຺ຈ ພລານິ ນິສ຺ສາຍ ຈິຕ຺ຕໍ ສມ຺ປຫໍສນກາໂລ, ວິສ຺ສມິຕ຺ວາ ຂາທິຕ຺ວາ ປິວິຕ຺ວາ ຈ ປຸນ ສງ຺ຄາມສ຺ສ ປວິສນກາໂລ ວິຍ ປຎ຺ຈຫິ ພເລຫິ ຈິຕ຺ຕໍ ສມ຺ປຫໍເສຕ຺ວາ ປຸນ ວິປສ຺ສນາຍ ກມ຺ມໍ ກໂຣນ຺ຕສ຺ສ ວິວຏ຺ເຏຕ຺ວາ ອຣຫຕ຺ຕຄ຺ຄຫຓກາໂລ ເວທິຕພ຺ໂພ. ອິມສ຺ມິໍ ປນ ສຸຕ຺ເຕ ພລານິ ເຈວ ອິນ຺ທ຺ຣິຍານິ ຈ ມິສ຺ສກາເນວ ກຖິຕານີຕິ.

໔. ປຐມຂມສຸຕ຺ຕວຓ຺ຓນາ

໑໖໔. ຈຕຸຕ຺ເຖ ອກ຺ຂມາຕິ ອນຘິວາສິກປຏິປທາ. ຂມາຕິ ອຘິວາສິກປຏິປທາ. ທມາຕິ ອິນ຺ທ຺ຣິຍທມນປຏິປທາ. ສມາຕິ ອກຸສລວິຕກ຺ການໍ ວູປສມນປຏິປທາ. ໂຣສນ຺ຕໍ ປຏິໂຣສຕີຕິ ຆຏ຺ເຏນ຺ຕໍ ປຏິຆຏ຺ເຏຕິ. ຠຓ຺ຑນ຺ຕໍ ປຏິຠຓ຺ຑຕີຕິ ປຫຣນ຺ຕໍ ປຏິປຫຣຕິ. ປຎ຺ຈມຉຏ຺ຐານິ ອຸຕ຺ຕານຕ຺ຖາເນວ.

໗. ມຫາໂມຄ຺ຄລ຺ລານສຸຕ຺ຕວຓ຺ຓນາ

໑໖໗. ສຕ຺ຕເມ ມຫາໂມຄ຺ຄລ຺ລານຕ຺ເຖຣສ຺ສ ເຫຏ຺ຐິມາ ຕໂຍ ມຄ຺ຄາ ສຸຂປຏິປທາ ທນ຺ຘາຠິຎ຺ຎາ ອເຫສຸໍ, ອຣຫຕ຺ຕມຄ຺ໂຄ ທຸກ຺ຂປຏິປໂທ ຂິປ຺ປາຠິຎ຺ໂຎ. ຕສ຺ມາ ເອວມາຫ – ‘‘ຍາຍໍ ປຏິປທາ ທຸກ຺ຂາ ຂິປ຺ປາຠິຎ຺ຎາ, ອິມໍ ເມ ປຏິປທໍ ອາຄມ຺ມ ອນຸປາທາຍ ອາສເວຫິ ຈິຕ຺ຕໍ ວິມຸຕ຺ຕ’’ນ຺ຕິ.

໘. ສາຣິປຸຕ຺ຕສຸຕ຺ຕວຓ຺ຓນາ

໑໖໘. ອຏ຺ຐເມ ຘມ຺ມເສນາປຕິຕ຺ເຖຣສ຺ສ ເຫຏ຺ຐິມາ ຕໂຍ ມຄ຺ຄາ ສຸຂປຏິປທາ ທນ຺ຘາຠິຎ຺ຎາ, ອຣຫຕ຺ຕມຄ຺ໂຄ ສຸຂປຏິປໂທ ຂິປ຺ປາຠິຎ຺ໂຎ. ຕສ຺ມາ ‘‘ຍາຍໍ ປຏິປທາ ສຸຂາ ຂິປ຺ປາຠິຎ຺ຎາ’’ຕິ ອາຫ. ອິເມສຸ ປນ ທ຺ວີສຸປິ ສຸຕ຺ເຕສຸ ມິສ຺ສິກາວ ປຏິປທາ ກຖິຕາຕິ ເວທິຕພ຺ພາ.

໙. ສສງ຺ຂາຣສຸຕ຺ຕວຓ຺ຓນາ

໑໖໙. ນວເມ ປຐມທຸຕິຍປຸຄ຺ຄລາ ສຸກ຺ຂວິປສ຺ສກາ ສສງ຺ຂາເຣນ ສປ຺ປໂຍເຄນ ສງ຺ຂາຣນິມິຕ຺ຕໍ ອຸປຏ຺ຐເປນ຺ຕິ. ເຕສຸ ເອໂກ ວິປສ຺ສນິນ຺ທ຺ຣິຍານໍ ພລວຕ຺ຕາ ອິເຘວ ກິເລສປຣິນິພ຺ພາເນນ ປຣິນິພ຺ພາຍຕິ, ເອໂກ ອິນ຺ທ຺ຣິຍານໍ ທຸພ຺ພລຕາຍ ອິຘ ອສກ຺ໂກນ຺ໂຕ ອນນ຺ຕເຣ ອຕ຺ຕຠາເວ ຕເທວ ມູລກມ຺ມຏ຺ຐານໍ ປຏິລຠິຕ຺ວາ ສສງ຺ຂາເຣນ ສປ຺ປໂຍເຄນ ສງ຺ຂາຣນິມິຕ຺ຕໍ ອຸປຏ຺ຐເປຕ຺ວາ ກິເລສປຣິນິພ຺ພາເນນ ປຣິນິພ຺ພາຍຕິ, ຕຕິຍຈຕຸຕ຺ຖາ ສມຖຍານິກາ. ເຕສໍ ເອໂກ ອສງ຺ຂາເຣນ ອປ຺ປໂຍເຄນ ອິນ຺ທ຺ຣິຍານໍ ພລວຕ຺ຕາ ອິເຘວ ກິເລເສ ເຂເປຕິ, ເອໂກ ອິນ຺ທ຺ຣິຍານໍ ທຸພ຺ພລຕ຺ຕາ ອິຘ ອສກ຺ໂກນ຺ໂຕ ອນນ຺ຕເຣ ອຕ຺ຕຠາເວ ຕເທວ ມູລກມ຺ມຏ຺ຐານໍ ປຏິລຠິຕ຺ວາ ອສງ຺ຂາເຣນ ອປ຺ປໂຍເຄນ ກິເລເສ ເຂເປຕີຕິ ເວທິຕພ຺ໂພ.

໑໐. ຍຸຄນທ຺ຘສຸຕ຺ຕວຓ຺ຓນາ

໑໗໐. ທສເມ ສມຖປຸພ຺ພງ຺ຄມນ຺ຕິ ສມຖໍ ປຸພ຺ພງ຺ຄມໍ ປຸເຣຈາຣິກໍ ກຕ຺ວາ. ມຄ຺ໂຄ ສຎ຺ຊາຍຕີຕິ ປຐໂມ ໂລກຸຕ຺ຕຣມຄ຺ໂຄ ນິພ຺ພຕ຺ຕຕິ. ໂສ ຕໍ ມຄ຺ຄນ຺ຕິ ເອກຈິຕ຺ຕກ຺ຂຓິກມຄ຺ຄສ຺ສ ອາເສວນາທີນິ ນາມ ນຕ຺ຖິ, ທຸຕິຍມຄ຺ຄາທໂຍ ປນ ອຸປ຺ປາເທນ຺ໂຕ ຕເມວ ອາເສວຕິ ຠາເວຕິ ພຫຸລີກໂຣຕີຕິ ວຸຈ຺ຈຕິ. ວິປສ຺ສນາປຸພ຺ພງ຺ຄມນ຺ຕິ ວິປສ຺ສນໍ ປຸພ຺ພງ຺ຄມໍ ປຸເຣຈາຣິກໍ ກຕ຺ວາ ສມຖໍ ຠາເວຕິ, ປກຕິຍາ ວິປສ຺ສນາລາຠີ ວິປສ຺ສນາຍ ຐຕ຺ວາ ສມາຘິໍ ອຸປ຺ປາເທຕີຕິ ອຕ຺ໂຖ.

ຍຸຄນທ຺ຘໍ ຠາເວຕີຕິ ຍຸຄນທ຺ຘໍ ກຕ຺ວາ ຠາເວຕິ. ຕຕ຺ຖ ເຕເນວ ຈິຕ຺ເຕນ ສມາປຕ຺ຕິໍ ສມາປຊ຺ຊິຕ຺ວາ ເຕເນວ ສງ຺ຂາເຣ ສມ຺ມສິຕຸໍ ນ ສກ຺ກາ. ອຍໍ ປນ ຍາວຕາ ສມາປຕ຺ຕິໂຍ ສມາປຊ຺ຊຕິ, ຕາວຕາ ສງ຺ຂາເຣ ສມ຺ມສຕິ. ຍາວຕາ ສງ຺ຂາເຣ ສມ຺ມສຕິ, ຕາວຕາ ສມາປຕ຺ຕິໂຍ ສມາປຊ຺ຊຕິ. ກຖໍ? ປຐມຊ຺ຌານໍ ສມາປຊ຺ຊຕິ, ຕໂຕ ວຸຏ຺ຐາຍ ສງ຺ຂາເຣ ສມ຺ມສຕິ, ສງ຺ຂາເຣ ສມ຺ມສິຕ຺ວາ ທຸຕິຍຊ຺ຌານໍ ສມາປຊ຺ຊຕິ. ຕໂຕ ວຸຏ຺ຐາຍ ປຸນ ສງ຺ຂາເຣ ສມ຺ມສຕິ. ສງ຺ຂາເຣ ສມ຺ມສິຕ຺ວາ ຕຕິຍຊ຺ຌານໍ…ເປ… ເນວສຎ຺ຎານາສຎ຺ຎາຍຕນສມາປຕ຺ຕິໍ ສມາປຊ຺ຊຕິ, ຕໂຕ ວຸຏ຺ຐາຍ ສງ຺ຂາເຣ ສມ຺ມສຕິ. ເອວມຍໍ ສມຖວິປສ຺ສນໍ ຍຸຄນທ຺ຘໍ ຠາເວຕິ ນາມ.

ຘມ຺ມຸທ຺ຘຈ຺ຈວິຄ຺ຄຫິຕນ຺ຕິ ສມຖວິປສ຺ສນາຘມ຺ເມສຸ ທສວິປສ຺ສນຸປກ຺ກິເລສສງ຺ຂາເຕນ ອຸທ຺ຘຈ຺ເຈນ ວິຄ຺ຄຫິຕໍ, ສຸຄ຺ຄຫິຕນ຺ຕິ ອຕ຺ໂຖ. ໂສ, ອາວຸໂສ, ສມໂຍຕິ ອິມິນາ ສຕ຺ຕນ຺ນໍ ສປ຺ປາຍານໍ ປຏິລາຠກາໂລ ກຖິໂຕ. ຍໍ ຕໍ ຈິຕ຺ຕນ຺ຕິ ຍສ຺ມິໍ ສມເຍ ຕໍ ວິປສ຺ສນາວີຖິໍ ໂອກ຺ກມິຕ຺ວາ ປວຕ຺ຕໍ ຈິຕ຺ຕໍ. ອຊ຺ຌຕ຺ຕເມວ ສນ຺ຕິຏ຺ຐຕີຕິ ວິປສ຺ສນາວີຖິໍ ປຈ຺ໂຈຕ຺ຖຣິຕ຺ວາ ຕສ຺ມິໍເຍວ ໂຄຈຣຊ຺ຌຕ຺ຕສງ຺ຂາເຕ ອາຣມ຺ມເຓ ສນ຺ຕິຏ຺ຐຕິ. ສນ຺ນິສີທຕີຕິ ອາຣມ຺ມຓວເສນ ສມ຺ມາ ນິສີທຕິ. ເອໂກທິ ໂຫຕີຕິ ເອກຄ຺ຄໍ ໂຫຕິ. ສມາຘິຍຕີຕິ ສມ຺ມາ ອາຘິຍຕິ ສຸຏ຺ຐປິຕໍ ໂຫຕິ. ເສສເມຕ຺ຖ ອຸຕ຺ຕານຕ຺ຖເມວ.

ປຏິປທາວຄ຺ໂຄ ທຸຕິໂຍ.