໗. ສນ຺ຕຸຏ຺ຐິສຸຕ຺ຕວຓ຺ຓນາ

໒໗. ສຕ຺ຕເມ ອປ຺ປານີຕິ ປຣິຕ຺ຕານິ. ສຸລຠານີຕິ ສຸເຂນ ລທ຺ຘພ຺ພານິ, ຍຕ຺ຖ ກຕ຺ຖຈິ ສກ຺ກາ ໂຫນ຺ຕິ ລຠິຕຸໍ. ອນວຊ຺ຊານີຕິ ນິທ຺ໂທສານິ. ປິຓ຺ຑິຍາໂລປໂຠຊນນ຺ຕິ ຊງ຺ຆາປິຓ຺ຑິຍພເລນ ຈຣິຕ຺ວາ ອາໂລປມຕ຺ຕໍ ລທ຺ຘໍ ໂຠຊນໍ. ປູຕິມຸຕ຺ຕນ຺ຕິ ຍໍກິຎ຺ຈິ ມຸຕ຺ຕໍ. ຍຖາ ຫິ ສຸວຓ຺ຓວຓ຺ໂຓປິ ກາໂຍ ປູຕິກາໂຍຕິ ວຸຈ຺ຈຕິ, ເອວໍ ອຠິນວມ຺ປິ ມຸຕ຺ຕໍ ປູຕິມຸຕ຺ຕເມວ.

ວິຆາໂຕຕິ ວິຄຕຆາໂຕ, ຈິຕ຺ຕສ຺ສ ທຸກ຺ຂໍ ນ ໂຫຕີຕິ ອຕ຺ໂຖ. ທິສາ ນປ຺ປຏິຫຎ຺ຎຕີຕິ ຍສ຺ສ ຫິ ‘‘ອສຸກຏ຺ຐານໍ ນາມ ຄໂຕ ຈີວຣາທີນິ ລຠິສ຺ສາມີ’’ຕິ ຈິຕ຺ຕໍ ອຸປ຺ປຊ຺ຊຕິ, ຕສ຺ສ ທິສາ ປຏິຫຎ຺ຎຕິ ນາມ. ຍສ຺ສ ເອວໍ ນ ອຸປ຺ປຊ຺ຊຕິ, ຕສ຺ສ ນປ຺ປຏິຫຎ຺ຎຕິ ນາມ. ຘມ຺ມາຕິ ປຏິປຕ຺ຕິຘມ຺ມາ. ສາມຎ຺ຎສ຺ສານຸໂລມິກາຕິ ສມຓຘມ຺ມສ຺ສ ອນຸໂລມາ. ອຘິຄ຺ຄຫິຕາຕິ ສພ຺ເພເຕ ຕຸຏ຺ຐຈິຕ຺ຕສ຺ສ ຠິກ຺ຂຸໂນ ອຘິຄ຺ຄຫິຕາ ໂຫນ຺ຕິ ອນ຺ໂຕຄຕາ ນ ປຣິພາຫິຣາຕິ.