໑໐. ປຣິພ຺ພາຊກສຸຕ຺ຕວຓ຺ຓນາ

໓໐. ທສເມ ອຠິຎ຺ຎາຕາຕິ ຎາຕາ ປາກຏາ. ອນ຺ນຠາໂຣຕິອາທີນິ ເຕສໍ ນາມານິ. ປຏິສລ຺ລານາ ວຸຏ຺ຐິໂຕຕິ ຜລສມາປຕ຺ຕິໂຕ ວຸຏ຺ຐິໂຕ. ສາ ຫິ ອິຘ ປຏິສລ຺ລານນ຺ຕິ ອຘິປ຺ເປຕາ. ປຈ຺ຈກ຺ຂາຍາຕິ ປຏິກ຺ຂິປິຕ຺ວາ. ອຠິຊ຺ຌາລຸນ຺ຕິ ສຕຓ຺ຫໍ. ກາເມສຸ ຕິພ຺ພສາຣາຄນ຺ຕິ ວຕ຺ຖຸກາເມສຸ ພຫລຣາຄໍ. ຕມຫໍ ຕຕ຺ຖ ເອວໍ ວເທຍ຺ຍນ຺ຕິ ຕໍ ອຫໍ ຕສ຺ມິໍ ກາຣເຓ ເອວໍ ວເທຍ຺ຍໍ. ປຏິກ຺ໂກສິຕພ຺ພໍ ມຎ຺ເຎຍ຺ຍາຕິ ປຏິກ຺ໂກສິຕພ຺ພານິ ປຏິພາຫິຕພ຺ພນິ ວາ ມຎ຺ເຎຍ຺ຍ. ສຫຘມ຺ມິກາຕິ ສກາຣຓາ. ວາທານຸປາຕາຕິ ຘມ຺ມິກວາເທ ຆຏ຺ຏຍມານາ ອຘມ຺ມິກວາທານຸປາຕາ, ວາທປ຺ປວຕ຺ຕິໂຍຕິ ອຕ຺ໂຖ. ຄາຣຍ຺ຫາ ຐານາຕິ ຄຣຫິຕພ຺ພຍຸຕ຺ຕກາ ປຈ຺ຈຍາ. ອາຄຈ຺ຉນ຺ຕີຕິ ອຸປຄຈ຺ຉນ຺ຕິ.

ອຸກ຺ກລາຕິ ອຸກ຺ກລຊນປທວາສິໂນ. ວສ຺ສຠຎ຺ຎາຕິ ວສ຺ໂສ ຈ ຠຎ຺ໂຎ ຈາຕິ ທ຺ເວ ຊນາ. ອເຫຕຸກວາທາຕິ ‘‘ນຕ຺ຖິ ເຫຕຸ ນຕ຺ຖິ ປຈ຺ຈໂຍ ສຕ຺ຕານໍ ວິສຸທ຺ຘິຍາ’’ຕິເອວມາທິວາທິໂນ. ອກິຣິຍວາທາຕິ ‘‘ກໂຣໂຕ ນ ກຣີຍຕິ ປາປ’’ນ຺ຕິ ເອວໍ ກິຣິຍປຏິກ຺ເຂປວາທິໂນ. ນຕ຺ຖິກວາທາຕິ ‘‘ນຕ຺ຖິ ທິນ຺ນ’’ນ຺ຕິອາທິວາທິໂນ. ເຕ ອິເມສຸ ຕີສຸປິ ທສ຺ສເນສຸ ໂອກ຺ກນ຺ຕນິຍາມາ ອເຫສຸໍ. ກຖໍ ປນ ເຕສຸ ນິຍາໂມ ໂຫຕີຕິ? ໂຍ ຫິ ເອວຣູປໍ ລທ຺ຘິໍ ຄເຫຕ຺ວາ ຣຕ຺ຕິຏ຺ຐານທິວາຏ຺ຐາເນສຸ ນິສິນ຺ໂນ ສຊ຺ຌາຍຕິ ວີມໍສຕິ, ຕສ຺ສ ‘‘ນຕ຺ຖິ ເຫຕຸ ນຕ຺ຖິ ປຈ຺ຈໂຍ ກໂຣໂຕ ນ ກຣີຍຕິ ປາປໍ…ເປ… ນຕ຺ຖິ ທິນ຺ນໍ…ເປ… ກາຍສ຺ສ ເຠທາ ອຸຈ຺ຉິຊ຺ຊຕີ’’ຕິ ຕສ຺ມິໍ ອາຣມ຺ມເຓ ມິຈ຺ຉາສຕິ ສນ຺ຕິຏ຺ຐຕິ, ຈິຕ຺ຕໍ ເອກຄ຺ຄໍ ໂຫຕິ, ຊວນານິ ຊວນ຺ຕິ. ປຐມຊວເນ ສເຕກິຈ຺ໂຉ ໂຫຕິ, ຕຖາ ທຸຕິຍາທີສຸ, ສຕ຺ຕເມ ພຸທ຺ຘານມ຺ປິ ອເຕກິຈ຺ໂຉ ອນິວຕ຺ຕິ ອຣິຏ຺ຐກຓ຺ຏກສທິໂສ ໂຫຕິ. ຕຕ຺ຖ ໂກຈິ ເອກໍ ທສ຺ສນໍ ໂອກ຺ກມຕິ, ໂກຈິ ທ຺ເວ, ໂກຈິ ຕີຓິປິ. ນິຍຕມິຈ຺ຉາທິຏ຺ຐິໂກວ ໂຫຕິ, ປຕ຺ໂຕ ສຄ຺ຄມຄ຺ຄາວຣຓຎ຺ເຈວ ໂມກ຺ຂມຄ຺ຄາວຣຓຎ຺ຈ, ອຠພ຺ໂພ ຕສ຺ສ ອຕ຺ຕຠາວສ຺ສ ອນນ຺ຕຣໍ ສຄ຺ຄມ຺ປິ ຄນ຺ຕຸໍ, ປເຄວ ໂມກ຺ຂໍ. ວຏ຺ຏຂາຓຸໂກ ນາເມສ ສຕ຺ໂຕ ປຖວິໂຄປໂກ, ເຍຠຸຍ຺ເຍນ ເອວຣູປສ຺ສ ຠວໂຕ ວຸຏ຺ຐານໍ ນຕ຺ຖິ. ວສ຺ສຠຎ຺ຎາປິ ເອທິສາ ອເຫສຸໍ. ນິນ຺ທາພ຺ຍາໂຣສນອຸປາຣມ຺ຠຠຍາຕິ ອຕ຺ຕໂນ ນິນ຺ທຠເຍນ ຆຏ຺ຏນຠເຍນ ອຸປວາທຠເຍນ ຈາຕິ ອຕ຺ໂຖ. ອຠິຊ຺ຌາວິນເຍ ສິກ຺ຂນ຺ຕິ ອຠິຊ຺ຌາວິນໂຍ ວຸຈ຺ຈຕິ ອຣຫຕ຺ຕໍ, ອຣຫຕ຺ເຕ ສິກ຺ຂມາໂນ ອປ຺ປມຕ຺ໂຕ ນາມ ວຸຈ຺ຈຕີຕິ ສຸຕ຺ຕນ຺ເຕ ວຏ຺ຏວິຏ຺ຏໍ ກເຖຕ຺ວາ ຄາຖາຍ ຜລສມາປຕ຺ຕິ ກຖິຕາຕິ.

ອຸຣຸເວລວຄ຺ໂຄ ຕຕິໂຍ.