໔. ນິຄຓ຺ຐສຸຕ຺ຕວຓ຺ຓນາ

໗໕. ຈຕຸຕ຺ເຖ ກູຏາຄາຣສາລາຍນ຺ຕິ ທ຺ເວ ກຓ຺ຓິກາ ຄເຫຕ຺ວາ ຫໍສວຏ຺ຏກຈ຺ຉນ຺ເນນ ກຕາຍ ຄນ຺ຘກຸຏິຍາ. ອປຣິເສສໍ ຎາຓທສ຺ສນໍ ປຏິຊານາຕີຕິ ອປ຺ປມຕ຺ຕກມ຺ປິ ອເສເສຕ຺ວາ ສພ຺ພໍ ຎາຓທສ຺ສນໍ ປຏິຊານາຕິ. ສຕຕໍ ສມິຕນ຺ຕິ ສພ຺ພກາລໍ ນິຣນ຺ຕຣໍ. ຎາຓທສ຺ສນໍ ປຈ຺ຈຸປຏ຺ຐິຕນ຺ຕິ ສພ຺ພຎ຺ຎຸຕຎ຺ຎາຓໍ ມຍ຺ຫໍ ອຸປຏ຺ຐິຕເມວາຕິ ທສ຺ເສຕິ. ປຸຣາຓານໍ ກມ຺ມານນ຺ຕິ ອາຍູຫິຕກມ຺ມານໍ. ຕປສາ ພ຺ຍນ຺ຕີຠາວນ຺ຕິ ທຸກ຺ກຣຕເປນ ວິຄຕນ຺ຕກຣຓໍ. ນວານໍ ກມ຺ມານນ຺ຕິ ອິທານິ ອາຍູຫິຕພ຺ພກມ຺ມານໍ. ອກຣຓາຕິ ອນາຍູຫເນນ. ເສຕຸຆາຕນ຺ຕິ ປທຆາຕໍ ປຈ຺ຈຍຆາຕໍ ກເຖຕິ. ກມ຺ມກ຺ຂຍາ ທຸກ຺ຂກ຺ຂໂຍຕິ ກມ຺ມວຏ຺ຏກ຺ຂເຍນ ທຸກ຺ຂກ຺ຂໂຍ. ທຸກ຺ຂກ຺ຂຍາ ເວທນາກ຺ຂໂຍຕິ ທຸກ຺ຂວຏ຺ຏກ຺ຂເຍນ ເວທນາກ຺ຂໂຍ. ທຸກ຺ຂວຏ຺ຏສ຺ມິຎ຺ຫິ ຂີເຓ ເວທນາວຏ຺ຏມ຺ປິ ຂີຓເມວ ໂຫຕິ. ເວທນາກ຺ຂຍາ ສພ຺ພໍ ທຸກ຺ຂໍ ນິຊ຺ຊິຓ຺ຓໍ ຠວິສ຺ສຕີຕິ ເວທນາກ຺ຂເຍນ ປນ ສກລວຏ຺ຏທຸກ຺ຂໍ ນິຊ຺ຊິຓ຺ຓເມວ ຠວິສ຺ສຕິ. ສນ຺ທິຏ຺ຐິກາຍາຕິ ສາມໍ ປສ຺ສິຕພ຺ພາຍ ປຈ຺ຈກ຺ຂາຍ. ນິຊ຺ຊຣາຍ ວິສຸທ຺ຘິຍາຕິ ກິເລສຊີຣຓກປຏິປທາຍ ກິເລເສ ວາ ນິຊ຺ຊີຣຓໂຕ ນິຊ຺ຊຣາຍ ສຕ຺ຕານໍ ວິສຸທ຺ຘິຍາ. ສມຕິກ຺ກໂມ ໂຫຕີຕິ ສກລສ຺ສ ວຏ຺ຏທຸກ຺ຂສ຺ສ ອຕິກ຺ກໂມ ໂຫຕິ. ອິຘ, ຠນ຺ເຕ, ຠຄວາ ກິມາຫາຕິ, ຠນ຺ເຕ, ຠຄວາ ອິມາຍ ປຏິປຕ຺ຕິຍາ ກິມາຫ, ກິໍ ເອຕໍເຍວ ກິເລສນິຊ຺ຊີຣຓກປຏິປທໍ ປຎ຺ຎເປຕິ, ອຸທາຫຸ ອຎ຺ຎນ຺ຕິ ປຸຈ຺ຉຕິ.

ຊານຕາຕິ ອນາວຣຓຎາເຓນ ຊານນ຺ເຕນ. ປສ຺ສຕາຕິ ສມນ຺ຕຈກ຺ຂຸນາ ປສ຺ສນ຺ເຕນ. ວິສຸທ຺ຘິຍາຕິ ວິສຸທ຺ຘິສມ຺ປາປນຕ຺ຖາຍ. ສມຕິກ຺ກມາຍາຕິ ສມຕິກ຺ກມນຕ຺ຖາຍ. ອຕ຺ຖງ຺ຄມາຍາຕິ ອຕ຺ຖໍ ຄມນຕ຺ຖາຍ. ຎາຍສ຺ສ ອຘິຄມາຍາຕິ ສຫ ວິປສ຺ສນາຍ ມຄ຺ຄສ຺ສ ອຘິຄມນຕ຺ຖາຍ. ນິພ຺ພານສ຺ສ ສຈ຺ຉິກິຣິຍາຍາຕິ ອປຈ຺ຈຍນິພ຺ພານສ຺ສ ສຈ຺ຉິກຣຓຕ຺ຖາຍ. ນວຎ຺ຈ ກມ຺ມໍ ນ ກໂຣຕີຕິ ນວໍ ກມ຺ມໍ ນາຍູຫຕິ. ປຸຣາຓຎ຺ຈ ກມ຺ມນ຺ຕິ ປຸພ຺ເພ ອາຍູຫິຕກມ຺ມໍ. ຜຸສ຺ສ ຜຸສ຺ສ ພ຺ຍນ຺ຕີ ກໂຣຕີຕິ ຜຸສິຕ຺ວາ ຜຸສິຕ຺ວາ ວິຄຕນ຺ຕໍ ກໂຣຕິ, ວິປາກຜສ຺ສໍ ຜຸສິຕ຺ວາ ຜຸສິຕ຺ວາ ຕໍ ກມ຺ມໍ ເຂເປຕີຕິ ອຕ຺ໂຖ. ສນ຺ທິຏ຺ຐິກາຕິ ສາມໍ ປສ຺ສິຕພ຺ພາ. ອກາລິກາຕິ ນ ກາລນ຺ຕເຣ ກິຈ຺ຈກາຣິກາ. ເອຫິປສ຺ສິກາຕິ ‘‘ເອຫິ ປສ຺ສາ’’ຕິ ເອວໍ ທສ຺ເສຕຸໍ ຍຸຕ຺ຕາ. ໂອປເນຍ຺ຍິກາຕິ ອຸປນເຍ ຍຸຕ຺ຕາ ອລ຺ລີຍິຕພ຺ພຍຸຕ຺ຕາ. ປຈ຺ຈຕ຺ຕໍ ເວທິຕພ຺ພາ ວິຎ຺ຎູຫີຕິ ປຓ຺ຑິເຕຫິ ອຕ຺ຕໂນ ອຕ຺ຕໂນ ສນ຺ຕາເນເຍວ ຊານິຕພ຺ພາ, ພາເລຫິ ປນ ທຸຊ຺ຊານາ. ອິຕິ ສີລວເສນ ທ຺ເວ ມຄ຺ຄາ, ທ຺ເວ ຈ ຜລານິ ກຖິຕານິ. ໂສຕາປນ຺ນສກທາຄາມິໂນ ຫິ ສີເລສຸ ປຣິປູຣກາຣິໂນຕິ. ວິວິຈ຺ເຈວ ກາເມຫີຕິອາທິກາຍ ປນ ສມາຘິສມ຺ປທາຍ ຕໂຍ ມຄ຺ຄາ, ຕີຓິ ຈ ຜລານິ ກຖິຕານິ. ອນາຄາມີ ອຣິຍສາວໂກ ຫິ ສມາຘິມ຺ຫິ ປຣິປູຣກາຣີຕິ ວຸຕ຺ໂຕ. ອາສວານໍ ຂຍາຕິອາທີຫິ ອຣຫຕ຺ຕຜລໍ ກຖິຕໍ. ເກຈິ ປນ ສີລສມາຘໂຍປິ ອຣຫຕ຺ຕຜລສມ຺ປຍຸຕ຺ຕາວ ອິຘ ອຘິປ຺ເປຕາ. ເອເກກສ຺ສ ປນ ວເສນ ປຏິປຕ຺ຕິທສ຺ສນຕ຺ຖໍ ວິສຸໍ ວິສຸໍ ຕນ຺ຕິ ອາໂຣປິຕາຕິ.