໕. ນິເວສກສຸຕ຺ຕວຓ຺ຓນາ

໗໖. ປຎ຺ຈເມ ອມຈ຺ຈາຕິ ສຸຫຊ຺ຊາ. ຎາຕີຕິ ສສ຺ສຸສສຸຣປກ຺ຂິກາ. ສາໂລຫິຕາຕິ ສມານໂລຫິຕາ ຠາຕິຠຄິນິອາທໂຍ. ອເວຈ຺ຈປ຺ປສາເທຕິ ຄຸເຓ ອເວຈ຺ຈ ຊານິຕ຺ວາ ອຸປ຺ປນ຺ເນ ອຈລປ຺ປສາເທ. ອຎ຺ຎຖຕ຺ຕນ຺ຕິ ຠາວຎ຺ຎຖຕ຺ຕໍ. ປຖວີຘາຕຸຍາຕິອາທີສຸ ວີສຕິຍາ ໂກຏ຺ຐາເສສຸ ຖທ຺ຘາກາຣຠູຕາຍ ປຖວີຘາຕຸຍາ, ທ຺ວາທສສຸ ໂກຏ຺ຐາເສສຸ ຍູສຄຕາຍ ອາພນ຺ຘນຠູຕາຍ ອາໂປຘາຕຸຍາ, ຈຕູສຸ ໂກຏ຺ຐາເສສຸ ປຣິປາຈນຠູຕາຍ ເຕໂຊຘາຕຸຍາ, ຉສຸ ໂກຏ຺ຐາເສສຸ ວິຕ຺ຖມ຺ຠນຠູຕາຍ ວາໂຍຘາຕຸຍາ ສິຍາ ອຎ຺ຎຖຕ຺ຕໍ. ນ ຕ຺ເວວາຕິ ອິເມສໍ ຫິ ຈຕຸນ຺ນໍ ມຫາຠູຕານໍ ອຎ຺ຎມຎ຺ຎຠາວູປຄມເນນ ສິຍາ ອຎ຺ຎຖຕ຺ຕໍ, ອຣິຍສາວກສ຺ສ ປນ ນ ຕ຺ເວວ ສິຍາຕິ ທສ຺ເສຕິ. ເອຕ຺ຖ ຈ ອຎ຺ຎຖຕ຺ຕນ຺ຕິ ປສາທຎ຺ຎຖຕ຺ຕຎ຺ຈ ຄຕິອຎ຺ຎຖຕ຺ຕຎ຺ຈ. ຕຎ຺ຫິ ຕສ຺ສ ນ ໂຫຕິ, ຠາວຎ຺ຎຖຕ຺ຕໍ ປນ ໂຫຕິ. ອຣິຍສາວໂກ ຫິ ມນຸສ຺ໂສ ຫຸຕ຺ວາ ເທໂວປິ ໂຫຕິ ພ຺ຣຫ຺ມາປິ. ປສາໂທ ປນສ຺ສ ຠວນ຺ຕເຣປິ ນ ວິຄຈ຺ຉຕິ, ນ ຈ ອປາຍຄຕິສງ຺ຂາຕໍ ຄຕິອຎ຺ຎຖຕ຺ຕໍ ປາປຸຓາຕິ. ສຕ຺ຖາປິ ຕເທວ ທສ຺ເສນ຺ໂຕ ຕຕ຺ຣິທໍ ອຎ຺ຎຖຕ຺ຕນ຺ຕິອາທິມາຫ. ເສສເມຕ຺ຖ ອຸຕ຺ຕານຕ຺ຖເມວາຕິ.