໕. ເກສມຸຕ຺ຕິສຸຕ຺ຕວຓ຺ຓນາ

໖໖. ປຎ຺ຈເມ ກາລາມານໍ ນິຄໂມຕິ ກາລາມາ ນາມ ຂຕ຺ຕິຍາ, ເຕສໍ ນິຄໂມ. ເກສມຸຕ຺ຕິຍາຕິ ເກສມຸຕ຺ຕນິຄມວາສິໂນ. ອຸປສງ຺ກມິໍສູຕິ ສປ຺ປິນວນີຕາທິເຠສຊ຺ຊານິ ເຈວ ອຏ຺ຐວິຘປານການິ ຈ ຄາຫາເປຕ຺ວາ ອຸປສງ຺ກມິໍສຸ. ສກໍເຍວ ວາທໍ ທີເປນ຺ຕີຕິ ອຕ຺ຕໂນເຍວ ລທ຺ຘິໍ ກເຖນ຺ຕິ. ໂຊເຕນ຺ຕີຕິ ປກາເສນ຺ຕິ. ຂຸໍເສນ຺ຕີຕິ ຆຏ຺ເຏນ຺ຕິ. ວມ຺ເຠນ຺ຕີຕິ ອວຊານນ຺ຕິ. ປຣິຠວນ຺ຕີຕິ ລາມກໍ ກໂຣນ຺ຕິ. ໂອມກ຺ຂິໍ ກໂຣນ຺ຕີຕິ ອຸກ຺ຂິຕ຺ຕກໍ ກໂຣນ຺ຕິ, ອຸກ຺ຂິປິຕ຺ວາ ຉຑ຺ເຑນ຺ຕິ. ອປເຣປິ, ຠນ຺ເຕຕິ ໂສ ກິຣ ອຏວິມຸເຂ ຄາໂມ, ຕສ຺ມາ ຕຕ຺ຖ ອຏວິໍ ອຕິກ຺ກນ຺ຕາ ຈ ອຕິກ຺ກມິຕຸກາມາ ຈ ວາສໍ ກປ຺ເປນ຺ຕິ. ເຕສຸປິ ປຐມໍ ອາຄຕາ ອຕ຺ຕໂນ ລທ຺ຘິໍ ທີເປຕ຺ວາ ປກ຺ກມິໍສຸ, ປຈ຺ຉາ ອາຄຕາ ‘‘ກິໍ ເຕ ຊານນ຺ຕິ, ອມ຺ຫາກໍ ອນ຺ເຕວາສິກາ ເຕ, ອມ຺ຫາກໍ ສນ຺ຕິເກ ກິຎ຺ຈິ ກິຎ຺ຈິ ສິປ຺ປໍ ອຸຄ຺ຄຓ຺ຫິໍສູ’’ຕິ ອຕ຺ຕໂນ ລທ຺ຘິໍ ທີເປຕ຺ວາ ປກ຺ກມິໍສຸ. ກາລາມາ ເອກລທ຺ຘິຍມ຺ປິ ສຓ຺ຐຫິຕຸໍ ນ ສກ຺ຂິໍສຸ. ເຕ ເອຕມຕ຺ຖໍ ທີເປຕ຺ວາ ຠຄວໂຕ ເອວມາໂຣເຈຕ຺ວາ ເຕສໍ ໂນ, ຠນ຺ເຕຕິອາທິມາຫໍສຸ. ຕຕ຺ຖ ໂຫເຕວ ກງ຺ຂາຕິ ໂຫຕິເຍວ ກງ຺ຂາ. ວິຈິກິຈ຺ຉາຕິ ຕສ຺ເສວ ເວວຈນໍ. ອລນ຺ຕິ ຍຸຕ຺ຕໍ.

ມາ ອນຸສ຺ສເວນາຕິ ອນຸສ຺ສວກຖາຍປິ ມາ ຄຓ຺ຫິຕ຺ຖ. ມາ ປຣມ຺ປຣາຍາຕິ ປຣມ຺ປຣກຖາຍປິ ມາ ຄຓ຺ຫິຕ຺ຖ. ມາ ອິຕິກິຣາຍາຕິ ເອວໍ ກິຣ ເອຕນ຺ຕິ ມາ ຄຓ຺ຫິຕ຺ຖ. ມາ ປິຏກສມ຺ປທາເນນາຕິ ອມ຺ຫາກໍ ປິຏກຕນ຺ຕິຍາ ສທ຺ຘິໍ ສເມຕີຕິ ມາ ຄຓ຺ຫິຕ຺ຖ. ມາ ຕກ຺ກເຫຕູຕິ ຕກ຺ກຄ຺ຄາເຫນປິ ມາ ຄຓ຺ຫິຕ຺ຖ. ມາ ນຍເຫຕູຕິ ນຍຄ຺ຄາເຫນປິ ມາ ຄຓ຺ຫິຕ຺ຖ. ມາ ອາກາຣປຣິວິຕກ຺ເກນາຕິ ສຸນ຺ທຣມິທໍ ກາຣຓນ຺ຕິ ເອວໍ ກາຣຓປຣິວິຕກ຺ເກນປິ ມາ ຄຓ຺ຫິຕ຺ຖ. ມາ ທິຏ຺ຐິນິຊ຺ຌານກ຺ຂນ຺ຕິຍາຕິ ອມ຺ຫາກໍ ນິຊ຺ຌາຍິຕ຺ວາ ຂມິຕ຺ວາ ຄຫິຕທິຏ຺ຐິຍາ ສທ຺ຘິໍ ສເມຕີຕິປິ ມາ ຄຓ຺ຫິຕ຺ຖ. ມາ ຠພ຺ພຣູປຕາຍາຕິ ອຍໍ ຠິກ຺ຂຸ ຠພ຺ພຣູໂປ, ອິມສ຺ສ ກຖໍ ຄເຫຕຸໍ ຍຸຕ຺ຕນ຺ຕິປິ ມາ ຄຓ຺ຫິຕ຺ຖ. ມາ ສມໂຓ ໂນ ຄຣູຕິ ອຍໍ ສມໂຓ ອມ຺ຫາກໍ ຄຣຸ, ອິມສ຺ສ ກຖໍ ຄເຫຕຸໍ ຍຸຕ຺ຕນ຺ຕິປິ ມາ ຄຓ຺ຫິຕ຺ຖ. ສມຕ຺ຕາຕິ ປຣິປຸຓ຺ຓາ. ສມາທິນ຺ນາຕິ ຄຫິຕາ ປຣາມຏ຺ຐາ. ຍໍສ ໂຫຕີຕິ ຍໍ ກາຣຓໍ ຕສ຺ສ ປຸຄ຺ຄລສ຺ສ ໂຫຕິ. ອໂລຠາທໂຍ ໂລຠາທິປຏິປກ຺ຂວເສນ ເວທິຕພ຺ພາ. ວິຄຕາຠິຊ຺ໂຌຕິອາທີຫິ ເມຕ຺ຕາຍ ປຸພ຺ພຠາໂຄ ກຖິໂຕ.

ອິທານິ ເມຕ຺ຕາທິກໍ ກມ຺ມຏ຺ຐານໍ ກເຖນ຺ໂຕ ເມຕ຺ຕາສຫຄເຕນາຕິອາທິມາຫ. ຕຕ຺ຖ ກມ຺ມຏ຺ຐານກຖາຍ ວາ ຠາວນານເຍ ວາ ປາຬິວຓ຺ຓນາຍ ວາ ຍໍ ວຕ຺ຕພ຺ພໍ ສິຍາ, ຕໍ ສພ຺ພໍ ວິສຸທ຺ຘິມຄ຺ເຄ (ວິສຸທ຺ຘິ. ໑.໒໔໐) ວຸຕ຺ຕເມວ. ເອວໍ ອເວຣຈິຕ຺ໂຕຕິ ເອວໍ ອກຸສລເວຣສ຺ສ ຈ ປຸຄ຺ຄລເວຣິໂນ ຈ ນຕ຺ຖິຕາຍ ອເວຣຈິຕ຺ໂຕ. ອພ຺ຍາພຊ຺ຌຈິຕ຺ໂຕຕິ ໂກຘຈິຕ຺ຕສ຺ສ ອຠາເວນ ນິທ຺ທຸກ຺ຂຈິຕ຺ໂຕ. ອສໍກິລິຏ຺ຐຈິຕ຺ໂຕຕິ ກິເລສສ຺ສ ນຕ຺ຖິຕາຍ ອສໍກິລິຏ຺ຐຈິຕ຺ໂຕ. ວິສຸທ຺ຘຈິຕ຺ໂຕຕິ ກິເລສມລາຠາເວນ ວິສຸທ຺ຘຈິຕ຺ໂຕ ໂຫຕີຕິ ອຕ຺ໂຖ. ຕສ຺ສາຕິ ຕສ຺ສ ເອວຣູປສ຺ສ ອຣິຍສາວກສ຺ສ. ອສ຺ສາສາຕິ ອວສ຺ສຍາ ປຕິຏ຺ຐາ. ສເຈ ໂຂ ປນ ອຕ຺ຖິ ປໂຣ ໂລໂກຕິ ຍທິ ອິມມ຺ຫາ ໂລກາ ປຣໂລໂກ ນາມ ອຕ຺ຖິ. ອຖາຫໍ ກາຍສ຺ສ ເຠທາ ປຣມ຺ມຣຓາ…ເປ… ອຸປປຊ຺ຊິສ຺ສາມີຕິ ອຕ຺ເຖຕໍ ກາຣຓໍ, ເຍນາຫໍ ກາຍສ຺ສ ເຠທາ ປຣມ຺ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊິສ຺ສາມີຕິ ເອວໍ ສພ຺ພຕ຺ຖ ນໂຍ ເວທິຕພ຺ໂພ. ອນີຆນ຺ຕິ ນິທ຺ທຸກ຺ຂໍ. ສຸຂິນ຺ຕິ ສຸຂິຕໍ. ອຸຠເຍເນວ ວິສຸທ຺ຘໍ ອຕ຺ຕານໍ ສມນຸປສ຺ສາມີຕິ ຍຎ຺ຈ ປາປໍ ນ ກໂຣມິ, ຍຎ຺ຈ ກໂຣໂຕປິ ນ ກຣີຍຕິ, ອິມິນາ ອຸຠເຍນາປິ ວິສຸທ຺ຘໍ ອຕ຺ຕານໍ ສມນຸປສ຺ສາມິ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.