໖. ສາຬ຺ຫສຸຕ຺ຕວຓ຺ຓນາ

໖໗. ຉຏ຺ເຐ ມິຄາຣນຕ຺ຕາຕິ ມິຄາຣເສຏ຺ຐິໂນ ນຕ຺ຕາ. ເສຂຸນິຍນຕ຺ຕາຕິ ເສຂຸນິຍເສຏ຺ຐິໂນ ນຕ຺ຕາ. ອຸປສງ຺ກມິໍສູຕິ ຠຸຕ຺ຕປາຕຣາສາ ທາສກມ຺ມກຣປຣິວຸຕາ ອຸປສງ຺ກມິໍສຸ. ເຕສໍ ກິຣ ປຸເຣຠຕ຺ເຕ ປຸພ຺ພຓ຺ຫສມເຍເຍວ ເຄເຫ ເອໂກ ປຎ຺ໂຫ ສມຸຏ຺ຐິໂຕ, ຕໍ ປນ ກເຖຕຸໍ ໂອກາໂສ ນາໂຫສິ. ເຕ ‘‘ຕໍ ປຎ຺ຫໍ ໂສສ຺ສາມາ’’ຕິ ເຖຣສ຺ສ ສນ຺ຕິກໍ ຄນ຺ຕ຺ວາ ວນ຺ທິຕ຺ວາ ຕຸຓ຺ຫີ ນິສີທິໍສຸ. ເຖໂຣ ‘‘ຄາເມ ຕໍ ສມຸຏ຺ຐິຕໍ ປຎ຺ຫໍ ໂສຕຸໍ ອາຄຕາ ຠວິສ຺ສນ຺ຕີ’’ຕິ ເຕສໍ ມນໍ ຎຕ຺ວາ ຕເມວ ປຎ຺ຫໍ ອາຣຠນ຺ໂຕ ເອຖ ຕຸມ຺ເຫ ສາຬ຺ຫາຕິອາທິມາຫ. ຕຕ຺ຖ ອຕ຺ຖິ ໂລໂຠຕິ ລຸພ຺ຠນສຠາໂວ ໂລໂຠ ນາມ ອຕ຺ຖີຕິ ປຸຈ຺ຉຕິ. ອຠິຊ຺ຌາຕິ ໂຂ ອຫໍ ສາຬ຺ຫາ ເອຕມຕ຺ຖໍ ວທາມີຕິ ເອຕໍ ໂລຠສງ຺ຂາຕໍ ອຕ຺ຖໍ ອຫໍ ‘‘ອຠິຊ຺ຌາ’’ຕິ ວທາມິ, ‘‘ຕຓ຺ຫາ’’ຕິ ວທາມີຕິ ສມຸຏ຺ຐິຕປຎ຺ຫສ຺ສ ອຕ຺ຖໍ ທີເປນ຺ໂຕ ອາຫ. ເອວໍ ສພ຺ພວາເຣສຸ ນໂຍ ເນຕພ຺ໂພ.

ໂສ ເອວໍ ປຊານາຕີຕິ ໂສ ຈຕ຺ຕາໂຣ ພ຺ຣຫ຺ມວິຫາເຣ ຠາເວຕ຺ວາ ຐິໂຕ ອຣິຍສາວໂກ ສມາປຕ຺ຕິໂຕ ວຸຏ຺ຐາຍ ວິປສ຺ສນໍ ອາຣຠນ຺ໂຕ ເອວໍ ປຊານາຕິ. ອຕ຺ຖິ ອິທນ຺ຕິ ອຕ຺ຖິ ທຸກ຺ຂສຈ຺ຈສງ຺ຂາຕໍ ຂນ຺ຘປຎ຺ຈກໍ ນາມຣູປວເສນ ປຣິຈ຺ຉິນ຺ທິຕ຺ວາ ປຊານນ຺ໂຕ ເອສ ‘‘ເອວໍ ປຊານາຕິ ອຕ຺ຖິ ອິທ’’ນ຺ຕິ ວຸຕ຺ໂຕ. ຫີນນ຺ຕິ ສມຸທຍສຈ຺ຈໍ. ປຓີຕນ຺ຕິ ມຄ຺ຄສຈ຺ຈໍ. ອິມສ຺ສ ສຎ຺ຎາຄຕສ຺ສ ອຸຕ຺ຕຣິ ນິສ຺ສຣຓນ຺ຕິ ອິມສ຺ສ ວິປສ຺ສນາສຎ຺ຎາສງ຺ຂາຕສ຺ສ ສຎ຺ຎາຄຕສ຺ສ ອຸຕ຺ຕຣິ ນິສ຺ສຣຓໍ ນາມ ນິພ຺ພານໍ, ຕມຕ຺ຖີຕິ ອິມິນາ ນິໂຣຘສຈ຺ຈໍ ທສ຺ເສຕິ. ວິມຸຕ຺ຕສ຺ມິໍ ວິມຸຕ຺ຕມິຕິ ຎາຓນ຺ຕິ ເອກູນວີສຕິວິຘໍ ປຈ຺ຈເວກ຺ຂຓຎາຓໍ ກຖິຕໍ. ອຫຸ ປຸພ຺ເພ ໂລໂຠຕິ ປຸພ຺ເພ ເມ ໂລໂຠ ອໂຫສິ. ຕທຫຸ ອກຸສລນ຺ຕິ ຕໍ ອກຸສລໍ ນາມ ອໂຫສິ, ຕທາ ວາ ອກຸສລໍ ນາມ ອໂຫສິ. ອິຈ຺ເຈຕໍ ກຸສລນ຺ຕິ ອິຕິ ເອຕໍ ກຸສລໍ, ຕສ຺ເສວ ອກຸສລສ຺ສ ນຕ຺ຖິຠາວໍ ກຸສລໍ ເຂມນ຺ຕິ ສນ຺ຘາຍ ວທຕິ. ນິຈ຺ຉາໂຕຕິ ນິຕ຺ຕຓ຺ໂຫ. ນິພ຺ພຸໂຕຕິ ອພ຺ຠນ຺ຕເຣ ສນ຺ຕາປກຣານໍ ກິເລສານໍ ອຠາເວນ ນິພ຺ພຸໂຕ. ສີຕິຠູໂຕຕິ ສີຕລີຠູໂຕ. ສຸຂປ຺ປຏິສໍເວທີຕິ ກາຍິກເຈຕສິກສ຺ສ ສຸຂສ຺ສ ປຏິສໍເວທິຕາ. ພ຺ຣຫ຺ມຠູເຕນາຕິ ເສຏ຺ຐຠູເຕນ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.