໒. ຠຍສຸຕ຺ຕວຓ຺ຓນາ

໖໓. ທຸຕິເຍ ອມາຕາປຸຕ຺ຕິການີຕິ ມາຕາ ຈ ປຸຕ຺ໂຕ ຈ ມາຕາປຸຕ຺ຕໍ, ປຣິຕ຺ຕາຕຸໍ ສມຕ຺ຖຠາເວນ ນຕ຺ຖິ ເອຕ຺ຖ ມາຕາປຸຕ຺ຕນ຺ຕິ ອມາຕາປຸຕ຺ຕິການິ. ຍນ຺ຕິ ຍສ຺ມິໍ ສມເຍ. ຕຕ຺ຖ ມາຕາປິ ປຸຕ຺ຕໍ ນປ຺ປຏິລຠຕີຕິ ຕສ຺ມິໍ ອຄ຺ຄິຠເຍ ອຸປ຺ປນ຺ເນ ມາຕາປິ ປຸຕ຺ຕໍ ປສ຺ສິຕຸໍ ນ ລຠຕິ, ປຸຕ຺ໂຕປິ ມາຕຣໍ ປສ຺ສິຕຸໍ ນ ລຠຕີຕິ ອຕ຺ໂຖ. ຠຍໍ ໂຫຕີຕິ ຈິຕ຺ຕຸຕ຺ຣາສຠຍໍ ໂຫຕິ. ອຏວິສງ຺ໂກໂປຕິ ອຏວິຍາ ສງ຺ໂກໂປ. ອຏວີຕິ ເຈຕ຺ຖ ອຏວິວາສິໂນ ໂຈຣາ ເວທິຕພ຺ພາ. ຍທາ ຫິ ເຕ ອຏວິໂຕ ຊນປທໍ ໂອຕຣິຕ຺ວາ ຄາມນິຄມຣາຊຘານິໂຍ ປຫຣິຕ຺ວາ ວິລຸມ຺ປນ຺ຕິ, ຕທາ ອຏວິສງ຺ໂກໂປ ນາມ ໂຫຕິ, ຕໍ ສນ຺ຘາເຍຕໍ ວຸຕ຺ຕໍ. ຈກ຺ກສມາຣູຬ຺ຫາຕິ ເອຕ຺ຖ ອິຣິຍາປຖຈກ຺ກມ຺ປິ ວຏ຺ຏຕິ ຍານຈກ຺ກມ຺ປິ. ຠຍສ຺ມິໍ ຫິ ສມ຺ປຕ຺ເຕ ເຍສໍ ຍານການິ ອຕ຺ຖິ, ເຕ ອຕ຺ຕໂນ ປຣິກ຺ຂາຣຠຓ຺ຑໍ ເຕສຸ ອາໂຣເປຕ຺ວາ ປລາຍນ຺ຕິ. ເຍສໍ ນຕ຺ຖິ, ເຕ ກາເຊນ ວາ ອາທາຍ ສີເສນ ວາ ອຸກ຺ຂິປິຕ຺ວາ ປລາຍນ຺ຕິເຍວ. ເຕ ຈກ຺ກສມາຣູຬ຺ຫາ ນາມ ໂຫນ຺ຕິ. ປຣິຍາຍນ຺ຕີຕິ ອິໂຕ ຈິໂຕ ຈ ຄຈ຺ຉນ຺ຕິ. ກທາຈີຕິ ກິສ຺ມິຎ຺ຈິເທວ ກາເລ. ກຣຫຈີຕິ ຕສ຺ເສວ ເວວຈນໍ. ມາຕາປິ ປຸຕ຺ຕໍ ປຏິລຠຕີຕິ ອາຄຈ຺ຉນ຺ຕໍ ວາ ຄຈ຺ຉນ຺ຕໍ ວາ ເອກສ຺ມິໍ ຐາເນ ນິລີນໍ ວາ ປສ຺ສິຕຸໍ ລຠຕິ. ອຸທກວາຫໂກຕິ ນທີປູໂຣ. ມາຕາປິ ປຸຕ຺ຕໍ ປຏິລຠຕີຕິ ກຸລ຺ເລ ວາ ອຸຬຸມ຺ເປ ວາ ມຕ຺ຕິກາຠາຊເນ ວາ ທາຣຸກ຺ຂຓ຺ເຑ ວາ ລຄ຺ຄໍ ວຸຍ຺ຫມານໍ ປສ຺ສິຕຸໍ ປຏິລຠຕິ, ໂສຕ຺ຖິນາ ວາ ປຸນ ອຸຕ຺ຕຣິຕ຺ວາ ຄາເມ ວາ ອຣຎ຺ເຎ ວາ ຐິຕໍ ປສ຺ສິຕຸໍ ລຠຕີຕິ.

ເອວໍ ປຣິຍາຍໂຕ ອມາຕາປຸຕ຺ຕິການິ ຠຍານິ ທສ຺ເສຕ຺ວາ ອິທານິ ນິປ຺ປຣິຍາເຍນ ທສ຺ເສນ຺ໂຕ ຕີຓິມານີຕິອາທິມາຫ. ຕຕ຺ຖ ຊຣາຠຍນ຺ຕິ ຊຣໍ ປຏິຈ຺ຈ ອຸປ຺ປຊ຺ຊນກຠຍໍ. ອິຕເຣສຸປິ ເອເສວ ນໂຍ. ວຸຕ຺ຕມ຺ປິ ເຈຕໍ – ‘‘ຊຣໍ ປຏິຈ຺ຈ ອຸປ຺ປຊ຺ຊຕິ ຠຍໍ ຠຍານກໍ ຉມ຺ຠິຕຕ຺ຕໍ ໂລມຫໍໂສ ເຈຕໂສ ອຸຕ຺ຣາໂສ. ພ຺ຍາຘິໍ ປຏິຈ຺ຈ, ມຣຓໍ ປຏິຈ຺ຈ ອຸປ຺ປຊ຺ຊຕິ ຠຍໍ ຠຍານກໍ ຉມ຺ຠິຕຕ຺ຕໍ ໂລມຫໍໂສ ເຈຕໂສ ອຸຕ຺ຣາໂສ’’ຕິ (ວິຠ. ໙໒໑). ເສສໍ ສພ຺ພຕ຺ຖ ອຸຕ຺ຕານເມວາຕິ.