໗. ວຈ຺ຉໂຄຕ຺ຕສຸຕ຺ຕວຓ຺ຓນາ

໕໘. ສຕ຺ຕເມ ມຫປ຺ຜລນ຺ຕິ ມຫາວິປາກໍ. ຘມ຺ມສ຺ສ ຈານຸຘມ຺ມໍ ພ຺ຍາກໂຣນ຺ຕີຕິ ເອຕ຺ຖ ຘມ຺ໂມ ນາມ ກຖິຕກຖາ, ອນຸຘມ຺ໂມ ນາມ ກຖິຕສ຺ສ ປຏິກຖນໍ. ສຫຘມ຺ມິໂກຕິ ສກາຣໂຓ ສເຫຕຸໂກ. ວາທານຸປາໂຕຕິ ວາທສ຺ສ ອນຸປາໂຕ, ອນຸປຕນໍ ປວຕ຺ຕີຕິ ອຕ຺ໂຖ. ຄາຣຍ຺ຫໍ ຐານນ຺ຕິ ຄຣຫິຕພ຺ພຍຸຕ຺ຕໍ ກາຣຓໍ. ອິທໍ ວຸຕ຺ຕໍ ໂຫຕິ – ໂຠຕາ ໂຄຕເມນ ວຸຕ຺ຕາ ສກາຣຓາ ວາທປ຺ປວຕ຺ຕິ ກິຎ຺ຈິປິ ຄາຣຍ຺ຫໍ ກາຣຓໍ ນ ອາຄຈ຺ຉຕີຕິ. ອຖ ວາ ເຕຫິ ປເຣຫິ ວຸຕ຺ຕາ ສກາຣຓາ ວາທປ຺ປວຕ຺ຕິ ກິຎ຺ຈິ ຄາຣຍ຺ຫໍ ກາຣຓໍ ນ ອາຄຈ຺ຉຕີຕິ ປຸຈ຺ຉຕິ.

ອນ຺ຕຣາຍກໂຣ ໂຫຕີຕິ ອນ຺ຕຣາຍໍ ວິນາສໍ ກິຈ຺ຉລາຠກໍ ວິໂລມກໍ ກໂຣຕິ. ປາຣິປນ຺ຖິໂກຕິ ປນ຺ຖທູຫນໂຈໂຣ. ຂໂຕ ຈ ໂຫຕີຕິ ຄຸຓຂນເນນ ຂໂຕ ໂຫຕິ. ອຸປຫໂຕຕິ ຄຸຓຸປຆາເຕເນວ ອຸປຫໂຕ.

ຈນ຺ທນິກາຍາຕິ ອສຸຈິກລລກູເປ. ໂອລິຄລ຺ເລຕິ ນິທ຺ຘມນກລເລ. ໂສ ຈາຕິ ໂສ ສີລວາຕິ ວຸຕ຺ຕຂີຓາສໂວ. ສີລກ຺ຂນ຺ເຘນາຕິ ສີລຣາສິນາ. ເສສປເທສຸປິ ເອເສວ ນໂຍ. ເອຕ຺ຖ ຈ ວິມຸຕ຺ຕິຎາຓທສ຺ສນໍ ວຸຈ຺ຈຕິ ປຈ຺ຈເວກ຺ຂຓຎາຓໍ, ຕໍ ອເສກ຺ຂສ຺ສ ປວຕ຺ຕຕ຺ຕາ ອເສກ຺ຂນ຺ຕິ ວຸຕ຺ຕໍ. ອິຕຣານິ ສິກ຺ຂາປຣິໂຍສານປ຺ປຕ຺ຕຕາຍ ສຍມ຺ປິ ອເສກ຺ຂາເນວ. ຕານິ ຈ ປນ ໂລກຸຕ຺ຕຣານິ, ປຈ຺ຈເວກ຺ຂຓຎາຓໍ ໂລກິຍໍ.

ໂຣຫິຓີສູຕິ ຣຕ຺ຕວຓ຺ຓາສຸ. ສຣູປາສູຕິ ອຕ຺ຕໂນ ວຈ຺ຉເກຫິ ສມານຣູປາສຸ. ປາເຣວຕາສູຕິ ກໂປຕວຓ຺ຓາສຸ. ທນ຺ໂຕຕິ ນິພ຺ພິເສວໂນ. ປຸງ຺ຄໂວຕິ ອຸສໂຠ. ໂຘຣຍ຺ໂຫຕິ ຘຸຣວາໂຫ. ກລ຺ຍາຓຊວນິກ຺ກໂມຕິ ກລ຺ຍາເຓນ ອຸຊຸນາ ຊເວນ ຄນ຺ຕາ. ນາສ຺ສ ວຓ຺ຓໍ ປຣິກ຺ຂເຣຕິ ອສ຺ສ ໂຄຓສ຺ສ ສຣີຣວຓ຺ຓໍ ນ ອຸປປຣິກ຺ຂນ຺ຕິ, ຘຸຣວຫນກມ຺ມເມວ ປນ ອຸປປຣິກ຺ຂນ຺ຕິ. ຍສ຺ມິໍ ກສ຺ມິຎ຺ຈິ ຊາຕິເຍຕິ ຍຕ຺ຖ ກຕ຺ຖຈິ ກຸລຊາເຕ. ຍາສຸ ກາສຸຈິ ເອຕາສູຕິ ເອຕາສຸ ຂຕ຺ຕິຍາທິປ຺ປເຠທາສຸ ຍາສຸ ກາສຸຈິ ຊາຕີສຸ.

ພ຺ຣຫ຺ມຈຣິຍສ຺ສ ເກວລີຕິ ພ຺ຣຫ຺ມຈຣິຍສ຺ສ ເກວເລນ ສມນ຺ນາຄໂຕ, ປຣິປຸຓ຺ຓຠາເວນ ຍຸຕ຺ໂຕຕິ ອຕ຺ໂຖ. ຂີຓາສໂວ ຫິ ສກລພ຺ຣຫ຺ມຈາຣີ ນາມ ໂຫຕິ. ເຕເນຕໍ ວຸຕ຺ຕໍ. ປນ຺ນຠາໂຣຕິ ໂອໂຣປິຕຠາໂຣ, ຂນ຺ຘຠາຣໍ ກິເລສຠາຣໍ ກາມຄຸຓຠາຣຎ຺ຈ ໂອໂຣເປຕ຺ວາ ຐິໂຕຕິ ອຕ຺ໂຖ. ກຕກິຈ຺ໂຈຕິ ຈຕູຫິ ມຄ຺ເຄຫິ ກິຈ຺ຈໍ ກຕ຺ວາ ຐິໂຕ. ປາຣຄູ ສພ຺ພຘມ຺ມານນ຺ຕິ ສພ຺ພຘມ຺ມາ ວຸຈ຺ຈນ຺ຕິ ປຎ຺ຈກ຺ຂນ຺ຘາ ທ຺ວາທສາຍຕນານິ ອຏ຺ຐາຣສ ຘາຕຸໂຍ, ເຕສໍ ສພ຺ພຘມ຺ມານໍ ອຠິຎ຺ຎາປາຣໍ, ປຣິຎ຺ຎາປາຣໍ, ປຫານປາຣໍ, ຠາວນາປາຣໍ, ສຈ຺ຉິກິຣິຍາປາຣໍ, ສມາປຕ຺ຕິປາຣຎ຺ຈາຕິ ຉພ຺ພິຘໍ ປາຣໍ ຄຕຕ຺ຕາ ປາຣຄູ. ອນຸປາທາຍາຕິ ອຄ຺ຄເຫຕ຺ວາ. ນິພ຺ພຸໂຕຕິ ກິເລສສນ຺ຕາປຣຫິໂຕ. ວິຣເຊຕິ ຣາຄໂທສໂມຫຣຊຣຫິເຕ.

ອວິຊານນ຺ຕາຕິ ເຂຕ຺ຕໍ ອຊານນ຺ຕາ. ທຸມ຺ເມຘາຕິ ນິປ຺ປຎ຺ຎາ. ອສ຺ສຸຕາວິໂນຕິ ເຂຕ຺ຕວິນິຈ຺ຉຍສວເນນ ຣຫິຕາ. ພຫິທ຺ຘາຕິ ອິມມ຺ຫາ ສາສນາ ພຫິທ຺ຘາ. ນ ຫິ ສນ຺ເຕ ອຸປາສເຣຕິ ພຸທ຺ຘປຈ຺ເຈກພຸທ຺ຘຂີຓາສເວ ອຸຕ຺ຕມປຸຣິເສ ນ ອຸປສງ຺ກມນ຺ຕິ. ຘີຣສມ຺ມເຕຕິ ປຓ຺ຑິເຕຫິ ສມ຺ມເຕ ສມ຺ຠາວິເຕ. ມູລຊາຕາ ປຕິຏ຺ຐິຕາຕິ ອິມິນາ ໂສຕາປນ຺ນສ຺ສ ສທ຺ຘໍ ທສ຺ເສຕິ. ກຸເລ ວາ ອິຘ ຊາຍເຣຕິ ອິຘ ວາ ມນຸສ຺ສໂລເກ ຂຕ຺ຕິຍພ຺ຣາຫ຺ມຓເວສ຺ສກຸເລ ຊາຍນ຺ຕິ. ອຍເມວ ຫິ ຕິວິຘາ ກຸລສມ຺ປຕ຺ຕິ ນາມ. ອນຸປຸພ຺ເພນ ນິພ຺ພານໍ, ອຘິຄຈ຺ຉນ຺ຕີຕິ ສີລສມາຘິປຎ຺ຎາຕິ ອິເມ ຄຸເຓ ປູເຣຕ຺ວາ ອນຸກ຺ກເມນ ນິພ຺ພານໍ ອຘິຄຈ຺ຉນ຺ຕີຕິ.