໖. ປໂລກສຸຕ຺ຕວຓ຺ຓນາ

໕໗. ຉຏ຺ເຐ ອາຈຣິຍປາຈຣິຍານນ຺ຕິ ອາຈຣິຍານຎ຺ເຈວ ອາຈຣິຍາຈຣິຍານຎ຺ຈ. ອວີຈິ ມຎ຺ເຎ ຜຸໂຏ ອໂຫສີຕິ ຍຖາ ອວີຈິ ມຫານິຣໂຍ ນິຣນ຺ຕຣຜຸໂຏ ເນຣຍິກສຕ຺ເຕຫິ ປຣິປຸຓ຺ໂຓ, ມນຸສ຺ເສຫິ ເອວໍ ປຣິປຸຓ຺ໂຓ ໂຫຕິ. ກຸກ຺ກຸຏສໍປາຕິກາຕິ ເອກຄາມສ຺ສ ຉທນປິຏ຺ຐິໂຕ ອຸປ຺ປຕິຕ຺ວາ ອິຕຣຄາມສ຺ສ ຉທນປິຏ຺ເຐ ປຕນສງ຺ຂາໂຕ ກຸກ຺ກຸຏສໍປາໂຕ ເອຕາສຸ ອຕ຺ຖີຕິ ກຸກ຺ກຸຏສໍປາຕິກາ. ກຸກ຺ກຸຏສໍປາທິກາຕິປິ ປາໂຐ, ຄາມນ຺ຕຣໂຕ ຄາມນ຺ຕຣໍ ກຸກ຺ກຸຏານໍ ປທສາ ຄມນສງ຺ຂາໂຕ ກຸກ຺ກຸຏສໍປາໂທ ເອຕາສຸ ອຕ຺ຖີຕິ ອຕ຺ໂຖ. ອຸຠຍມ຺ເປຕໍ ຆນນິວາສຕໍເຍວ ທີເປຕິ. ອຘມ຺ມຣາຄຣຕ຺ຕາຕິ ຣາໂຄ ນາມ ເອກນ຺ເຕເນວ ອຘມ຺ໂມ, ອຕ຺ຕໂນ ປຣິກ຺ຂາເຣສຸ ປນ ອຸປ຺ປຊ຺ຊມາໂນ ນ ອຘມ຺ມຣາໂຄຕິ ອຘິປ຺ເປໂຕ, ປຣປຣິກ຺ຂາເຣສຸ ອຸປ຺ປຊ຺ຊມາໂນວ ອຘມ຺ມຣາໂຄຕິ. ວິສມໂລຠາຠິຠູຕາຕິ ໂລຠສ຺ສ ສມກາໂລ ນາມ ນຕ຺ຖິ, ເອກນ຺ຕໍ ວິສໂມວ ເອສ. ອຕ຺ຕນາ ປຣິຄ຺ຄຫິຕວຕ຺ຖຸມ຺ຫິ ປນ ອຸປ຺ປຊ຺ຊມາໂນ ສມໂລໂຠ ນາມ, ປຣປຣິຄ຺ຄຫິຕວຕ຺ຖຸມ຺ຫິ ອຸປ຺ປຊ຺ຊມາໂນວ ວິສໂມຕິ ອຘິປ຺ເປໂຕ. ມິຈ຺ຉາຘມ຺ມປເຣຕາຕິ ອວຕ຺ຖຸປຏິເສວນສງ຺ຂາເຕນ ມິຈ຺ຉາຘມ຺ເມນ ສມນ຺ນາຄຕາ. ເທໂວ ນ ສມ຺ມາ ຘາຣໍ ອນຸປ຺ປເວຈ຺ຉຕີຕິ ວສ຺ສິຕພ຺ພຍຸຕ຺ເຕ ກາເລ ວສ຺ສໍ ນ ວສ຺ສຕິ. ທຸພ຺ຠິກ຺ຂນ຺ຕິ ທຸລ຺ລຠຠິກ຺ຂໍ. ທຸສ຺ສສ຺ສນ຺ຕິ ວິວິຘສສ຺ສານໍ ອສມ຺ປຊ຺ຊເນນ ທຸສ຺ສສ຺ສໍ. ເສຕຏ຺ຐິກນ຺ຕິ ສສ຺ເສ ສມ຺ປຊ຺ຊມາເນ ປາຓກາ ປຕນ຺ຕິ, ເຕຫິ ທຏ຺ຐຕ຺ຕາ ນິກ຺ຂນ຺ຕນິກ຺ຂນ຺ຕານິ ສາລິສີສານິ ເສຕວຓ຺ຓານິ ໂຫນ຺ຕິ ນິສ຺ສາຣານິ. ຕໍ ສນ຺ຘາຍ ວຸຕ຺ຕໍ ‘‘ເສຕຏ຺ຐິກ’’ນ຺ຕິ. ສລາກາວຸຕ຺ຕນ຺ຕິ ວປິຕໍ ວປິຕໍ ສສ຺ສໍ ສລາກາມຕ຺ຕເມວ ສມ຺ປຊ຺ຊຕິ, ຜລໍ ນ ເທຕີຕິ ອຕ຺ໂຖ. ຍກ຺ຂາຕິ ຍກ຺ຂາຘິປຕິໂນ. ວາເຬ ອມນຸສ຺ເສ ໂອສ຺ສຊ຺ຊນ຺ຕີຕິ ຈຓ຺ຑຍກ຺ເຂ ມນຸສ຺ສປເຖ ວິສ຺ສຊ຺ເຊນ຺ຕິ, ເຕ ລທ຺ໂຘກາສາ ມຫາຊນໍ ຊີວິຕກ຺ຂຍໍ ປາເປນ຺ຕິ.