໑໐. ສງ຺ຄາຣວສຸຕ຺ຕວຓ຺ຓນາ

໖໑. ທສເມ ສງ຺ຄາຣໂວຕິ ເອວໍນາມໂກ ຣາຊຄຫນຄເຣ ຊິຓ຺ຓປຏິສງ຺ຂຣຓກາຣໂກ ອາຍຸຕ຺ຕກພ຺ຣາຫ຺ມໂຓ. ອຸປສງ຺ກມີຕິ ຠຸຕ຺ຕປາຕຣາໂສ ຫຸຕ຺ວາ ມຫາຊນປຣິວຸໂຕ ອຸປສງ຺ກມິ. ມຍມສ຺ສູຕິ ເອຕ຺ຖ ອສ຺ສູຕິ ນິປາຕມຕ຺ຕໍ, ມຍໍ, ໂຠ ໂຄຕມ, ພ຺ຣາຫ຺ມຓາ ນາມາຕິ ອິທເມວ ອຕ຺ຖປທໍ. ຍຎ຺ຎໍ ຍຊາມາຕິ ພາຫິຣສມເຍ ສພ຺ພຈຕຸກ຺ເກນ ສພ຺ພຏ຺ຐເກນ ສພ຺ພໂສຬສເກນ ສພ຺ພທ຺ວຕ຺ຕິໍສາຍ ສພ຺ພຈຕຸສຏ຺ຐິຍາ ສພ຺ພສເຕນ ສພ຺ພປຎ຺ຈສເຕນາຕິ ຈ ເອວໍ ປາຓຆາຕປຏິສໍຍຸຕ຺ໂຕ ຍຎ຺ໂຎ ນາມ ໂຫຕິ. ຕໍ ສນ຺ຘາເຍວມາຫ. ອເນກສາຣີຣິກນ຺ຕິ ອເນກສຣີຣສມ຺ຠວໍ. ຍທິທນ຺ຕິ ຍາ ເອສາ. ຍຎ຺ຎາຘິກຣຓນ຺ຕິ ຍຊນກາຣຓາ ເຈວ ຍາຊນກາຣຓາ ຈາຕິ ອຕ຺ໂຖ. ເອກສ຺ມິຎ຺ຫິ ພຫູນໍ ທທນ຺ເຕປິ ທາເປນ຺ເຕປິ ພຫູສຸປິ ພຫູນໍ ເທນ຺ເຕສຸປິ ທາເປນ຺ເຕສຸປິ ປຸຎ຺ຎປຏິປທາ ອເນກສາຣີຣິກາ ນາມ ໂຫຕິ. ຕໍ ສນ຺ຘາເຍຕໍ ວຸຕ຺ຕໍ. ຕຸຍ຺ຫຎ຺ຈ ຕຸຍ຺ຫຎ຺ຈ ຍຊາມີຕິ ວທນ຺ຕສ຺ສາປິ ຕ຺ວຎ຺ຈ ຕ຺ວຎ຺ຈ ຍຊາຫີຕິ ອາຓາເປນ຺ຕສ຺ສາປິ ຈ ອເນກສາຣີຣິກາວ ໂຫຕິ. ຕມ຺ປິ ສນ຺ຘາເຍຕໍ ວຸຕ຺ຕໍ. ຍສ຺ສ ວາ ຕສ຺ສ ວາຕິ ຍສ຺ມາ ວາ ຕສ຺ມາ ວາ. ເອກມຕ຺ຕານໍ ທເມຕີຕິ ອຕ຺ຕໂນ ອິນ຺ທ຺ຣິຍທມນວເສນ ເອກໍ ອຕ຺ຕານເມວ ທເມຕິ. ເອກມຕ຺ຕານໍ ສເມຕີຕິ ອຕ຺ຕໂນ ຣາຄາທິສມນວເສນ ເອກໍ ອຕ຺ຕານເມວ ສເມຕິ. ປຣິນິພ຺ພາເປຕີຕິ ຣາຄາທິປຣິນິພ຺ພາເນເນວ ປຣິນິພ຺ພາເປຕິ. ເອວມສ຺ສາຍນ຺ຕິ ເອວໍ ສນ຺ເຕປິ ອຍໍ.

ເອວມິທໍ ພ຺ຣາຫ຺ມຓສ຺ສ ກຖໍ ສຸຕ຺ວາ ສຕ຺ຖາ ຈິນ຺ເຕສິ – ‘‘ອຍໍ ພ຺ຣາຫ຺ມໂຓ ປສຸຆາຕກສໍຍຸຕ຺ຕໍ ມຫາຍຎ຺ຎໍ ອເນກສາຣີຣິກໍ ປຸຎ຺ຎປຏິປທໍ ວເທຕິ, ປພ຺ພຊ຺ຊາມູລກໍ ປນ ປຸຎ຺ຎຸປ຺ປຕ຺ຕິປຏິປທໍ ເອກສາຣີຣິກນ຺ຕິ ວເທຕິ. ເນວາຍໍ ເອກສາຣີຣິກໍ ຊານາຕິ, ນ ອເນກສາຣີຣິກໍ, ຫນ຺ທສ຺ສ ເອກສາຣີຣິກຎ຺ຈ ອເນກສາຣີຣິກຎ຺ຈ ປຏິປທໍ ເທເສສ຺ສາມີ’’ຕິ ອຸປຣິ ເທສນໍ ວຑ຺ເຒນ຺ໂຕ ເຕນ ຫິ ພ຺ຣາຫ຺ມຓາຕິອາທິມາຫ. ຕຕ຺ຖ ຍຖາ ເຕ ຂເມຍ຺ຍາຕິ ຍຖາ ຕຸຍ຺ຫໍ ຣຸຈ຺ເຈຍ຺ຍ. ອິຘ ຕຖາຄໂຕ ໂລເກ ອຸປ຺ປຊ຺ຊຕີຕິອາທິ ວິສຸທ຺ຘິມຄ຺ເຄ ວິຕ຺ຖາຣິຕເມວ. ເອຖາຍໍ ມຄ຺ໂຄຕິ ເອຖ ຕຸມ຺ເຫ, ອຫມນຸສາສາມິ, ອຍໍ ມຄ຺ໂຄ. ອຍໍ ປຏິປທາຕິ ຕສ຺ເສວ ເວວຈນໍ. ຍຖາ ປຏິປນ຺ໂນຕິ ເຍນ ມຄ຺ເຄນ ປຏິປນ຺ໂນ. ອນຸຕ຺ຕຣໍ ພ຺ຣຫ຺ມຈຣິໂຍຄຘນ຺ຕິ ອຣຫຕ຺ຕມຄ຺ຄສງ຺ຂາຕສ຺ສ ພ຺ຣຫ຺ມຈຣິຍສ຺ສ ອນຸຕ຺ຕຣໍ ໂອຄຘໍ ອຸຕ຺ຕມປຕິຏ຺ຐາຠູຕໍ ນິພ຺ພານໍ. ອິຈ຺ຈາຍນ຺ຕິ ອິຕິ ອຍໍ.

ອປ຺ປຏ຺ຐຕຣາຕິ ຍຕ຺ຖ ພຫູຫິ ເວຍ຺ຍາວຈ຺ຈກເຣຫິ ວາ ອຸປກຣເຓຫິ ວາ ອຕ຺ໂຖ ນຕ຺ຖິ. ອປ຺ປສມາຣມ຺ຠຕຣາຕິ ຍຕ຺ຖ ພຫູນໍ ກມ຺ມຈ຺ເຉທວເສນ ປີຬາສງ຺ຂາໂຕ ສມາຣມ຺ໂຠ ນຕ຺ຖິ. ເສຍ຺ຍຖາປິ ຠວໍ ໂຄຕໂມ, ຠວໍ ຈານນ຺ໂທ, ເອເຕ ເມ ປຸຊ຺ຊາຕິ ຍຖາ ຠວໍ ໂຄຕໂມ, ຠວຎ຺ຈານນ຺ໂທ, ເອວຣູປາ ມມ ປູຊິຕາ, ຕຸມ຺ເຫເຍວ ທ຺ເວ ຊນາ ມຍ຺ຫໍ ປຸຊ຺ຊາ ຈ ປາສໍສາ ຈາຕິ ອິມມຕ຺ຖໍ ສນ຺ຘາເຍຕໍ ວທຕິ. ຕສ຺ສ ກິຣ ເອວໍ ອໂຫສິ – ‘‘ອານນ຺ທຕ຺ເຖໂຣ ມໍເຍວ ອິມໍ ປຎ຺ຫໍ ກຖາເປຕຸກາໂມ, ອຕ຺ຕໂນ ໂຂ ປນ ວຓ຺ເຓ ວຸຕ຺ເຕ ປທຸສ຺ສນໂກ ນາມ ນຕ຺ຖີ’’ຕິ. ຕສ຺ມາ ປຎ຺ຫໍ ອກເຖຕຸກາໂມ ວຓ຺ຓຠຓເນນ ວິກ຺ເຂປໍ ກໂຣນ຺ໂຕ ເອວມາຫ.

ນ ໂຂ ຕ຺ຍາຫນ຺ຕິ ນ ໂຂ ເຕ ອຫໍ. ເຖໂຣປິ ກິຣ ຈິນ຺ເຕສິ – ‘‘ອຍໍ ພ຺ຣາຫ຺ມໂຓ ປຎ຺ຫໍ ອກເຖຕຸກາໂມ ປຣິວຕ຺ຕຕິ, ອິມໍ ປຎ຺ຫໍ ເອຕໍເຍວ ກຖາເປສ຺ສາມີ’’ຕິ. ຕສ຺ມາ ນໍ ເອວມາຫ.

ສຫຘມ຺ມິກນ຺ຕິ ສກາຣຓໍ. ສໍສາເທຕີຕິ ສໍສີທາເປຕິ. ໂນ ວິສ຺ສຊ຺ເຊຕີຕິ ນ ກເຖຕິ. ຍໍນູນາຫໍ ປຣິໂມເຈຍ຺ຍນ຺ຕິ ຍໍນູນາຫໍ ອຸໂຠເປເຕ ວິເຫສໂຕ ປຣິໂມເຈຍ຺ຍໍ. ພ຺ຣາຫ຺ມໂຓ ຫິ ອານນ຺ເທນ ປຸຈ຺ຉິຕໍ ປຎ຺ຫໍ ອກເຖນ຺ໂຕ ວິເຫເສຕິ, ອານນ຺ໂທປິ ພ຺ຣາຫ຺ມຓໍ ອກເຖນ຺ຕໍ ກຖາເປນ຺ໂຕ. ອິຕິ ອຸໂຠເປເຕ ວິເຫສໂຕ ໂມເຈສ຺ສາມີຕິ ຈິນ຺ເຕຕ຺ວາ ເອວມາຫ. ກາ ນ຺ວຊ຺ຊາຕິ ກາ ນຸ ອຊ຺ຊ. ອນ຺ຕຣາກຖາ ອຸທປາທີຕິ ອຎ຺ຎິສ຺ສາ ກຖາຍ ອນ຺ຕຣນ຺ຕເຣ ກຕຣາ ກຖາ ອຸປ຺ປຊ຺ຊີຕິ ປຸຈ຺ຉຕິ. ຕທາ ກິຣ ຣາຊນ຺ເຕປຸເຣ ຕີຓິ ປາຏິຫາຣິຍານິ ອາຣພ຺ຠ ກຖາ ອຸທປາທິ, ຕໍ ປຸຈ຺ຉາມີຕິ ສຕ຺ຖາ ເອວມາຫ. ອຖ ພ຺ຣາຫ຺ມໂຓ ‘‘ອິທານິ ວຕ຺ຕຸໍ ສກ຺ຂິສ຺ສາມີ’’ຕິ ຣາຊນ຺ເຕປຸເຣ ອຸປ຺ປນ຺ນໍ ກຖໍ ອາໂຣເຈນ຺ໂຕ ອຍໍ ຂ຺ວຊ຺ຊ, ໂຠ ໂຄຕມາຕິອາທິມາຫ. ຕຕ຺ຖ ອຍໍ ຂ຺ວຊ຺ຊາຕິ ອຍໍ ໂຂ ອຊ຺ຊ. ປຸພ຺ເພ ສຸທນ຺ຕິ ເອຕ຺ຖ ສຸທນ຺ຕິ ນິປາຕມຕ຺ຕໍ. ອຸຕ຺ຕຣິ ມນຸສ຺ສຘມ຺ມາຕິ ທສກຸສລກມ຺ມປຖສງ຺ຂາຕາ ມນຸສ຺ສຘມ຺ມາ ອຸຕ຺ຕຣິໍ. ອິທ຺ຘິປາຏິຫາຣິຍໍ ທສ຺ເສສຸນ຺ຕິ ຠິກ຺ຂາຈາຣໍ ຄຈ຺ຉນ຺ຕາ ອາກາເສເນວ ຄມິໍສຸ ເຈວ ອາຄມິໍສຸ ຈາຕິ ເອວໍ ປຸພ຺ເພ ປວຕ຺ຕໍ ອາກາສຄມນໍ ສນ຺ຘາເຍວມາຫ. ເອຕຣຫິ ປນ ພຫຸຕຣາ ຈ ຠິກ຺ຂູຕິ ອິທໍ ໂສ ພ຺ຣາຫ຺ມໂຓ ‘‘ປຸພ຺ເພ ຠິກ຺ຂູ ‘ຈຕ຺ຕາໂຣ ປຈ຺ຈເຍ ອຸປ຺ປາເທສ຺ສາມາ’ຕິ ມຎ຺ເຎ ເອວມກໍສຸ, ອິທານິ ປຈ຺ຈຍານໍ ອຸປ຺ປນ຺ນຠາວໍ ຎຕ຺ວາ ໂສປ຺ເປນ ເຈວ ປມາເທນ ຈ ວີຕິນາເມນ຺ຕີ’’ຕິ ລທ຺ຘິຍາ ເອວມາຫ.

ປາຏິຫາຣິຍານີຕິ ປຈ຺ຈນີກປຏິຫຣຓວເສນ ປາຏິຫາຣິຍານິ. ອິທ຺ຘິປາຏິຫາຣິຍນ຺ຕິ ອິຊ຺ຌນວເສນ ອິທ຺ຘິ, ປຏິຫຣຓວເສນ ປາຏິຫາຣິຍໍ, ອິທ຺ຘິເຍວ ປາຏິຫາຣິຍໍ ອິທ຺ຘິປາຏິຫາຣິຍໍ. ອິຕເຣສຸປິ ເອເສວ ນໂຍ. ອເນກວິຫິຕໍ ອິທ຺ຘິວິຘນ຺ຕິອາທີນໍ ອຕ຺ໂຖ ເຈວ ຠາວນານໂຍ ຈ ວິສຸທ຺ຘິມຄ຺ເຄ (ວິສຸທ຺ຘິ. ໒.໓໖໕) ວິຕ຺ຖາຣິໂຕວ.

ນິມິຕ຺ເຕນ ອາທິສຕີຕິ ອາຄຕນິມິຕ຺ເຕນ ວາ ຄຕນິມິຕ຺ເຕນ ວາ ຐິຕນິມິຕ຺ເຕນ ວາ ‘‘ອິທໍ ນາມ ຠວິສ຺ສຕີ’’ຕິ ກເຖຕິ. ຕຕ຺ຣິທໍ ວຕ຺ຖຸ – ເອໂກ ກິຣ ຣາຊາ ຕິສ຺ໂສ ມຸຕ຺ຕາ ຄເຫຕ຺ວາ ປຸໂຣຫິຕໍ ປຸຈ຺ຉິ ‘‘ກິໍ ເມ, ອາຈຣິຍ, ຫຕ຺ເຖ’’ຕິ. ໂສ ອິໂຕ ຈິໂຕ ຈ ໂອໂລເກສິ, ເຕນ ຈ ສມເຍນ ເອກາ ສຣພູ ‘‘ມກ຺ຂິກໍ ຄເຫສ຺ສາມີ’’ຕິ ປກ຺ຂນ຺ຕາ, ຄຫຓກາເລ ມກ຺ຂິກາ ປລາຕາ. ໂສ ມກ຺ຂິກາຍ ມຸຕ຺ຕຕ຺ຕາ ‘‘ມຸຕ຺ຕາ ມຫາຣາຊາ’’ຕິ ອາຫ. ມຸຕ຺ຕາ ຕາວ ໂຫນ຺ຕຸ, ກຕິ ມຸຕ຺ຕາຕິ. ໂສ ປຸນ ນິມິຕ຺ຕໍ ໂອໂລເກສິ. ອຖາວິທູເຣ ກຸກ຺ກຸໂຏ ຕິກ຺ຂຕ຺ຕຸໍ ສທ຺ທໍ ນິຈ຺ຉາເຣສິ. ພ຺ຣາຫ຺ມໂຓ ‘‘ຕິສ຺ໂສ ມຫາຣາຊາ’’ຕິ ອາຫ. ເອວໍ ເອກຈ຺ໂຈ ອາຄຕນິມິຕ຺ເຕນ ກເຖຕິ. ເອເຕນຸປາເຍນ ຄຕຐິຕນິມິຕ຺ເຕຫິປິ ກຖນໍ ເວທິຕພ຺ພໍ. ເອວມ຺ປິ ເຕ ມໂນຕິ ເອວໍ ຕວ ມໂນ ໂສມນສ຺ສິໂຕ ວາ ໂທມນສ຺ສິໂຕ ວາ ກາມວິຕກ຺ກາທິສໍຍຸຕ຺ໂຕ ວາຕິ. ທຸຕິຍໍ ຕສ຺ເສວ ເວວຈນໍ. ອິຕິປິ ເຕ ຈິຕ຺ຕນ຺ຕິ ອິຕິປິ ຕວ ຈິຕ຺ຕໍ, ອິມຎ຺ຈ ອິມຎ຺ຈ ອຕ຺ຖໍ ຈິນ຺ຕຍມານໍ ປວຕ຺ຕຕີຕິ ອຕ຺ໂຖ. ພຫຸໍ ເຈປິ ອາທິສຕີຕິ ພຫຸໍ ເຈປິ ກເຖຕິ. ຕເຖວ ຕໍ ໂຫຕີຕິ ຍຖາ ກຖິຕໍ, ຕເຖວ ໂຫຕິ.

ອມນຸສ຺ສານນ຺ຕິ ຍກ຺ຂປິສາຈາທີນໍ. ເທວຕານນ຺ຕິ ຈາຕຸມຫາຣາຊິກາທີນໍ. ສທ຺ທໍ ສຸຕ຺ວາຕິ ອຎ຺ຎສ຺ສ ຈິຕ຺ຕໍ ຎຕ຺ວາ ກເຖນ຺ຕານໍ ສຸຕ຺ວາ. ວິຕກ຺ກວິປ຺ຜາຣສທ຺ທນ຺ຕິ ວິຕກ຺ກວິປ຺ຜາຣວເສນ ອຸປ຺ປນ຺ນໍ ວິປ຺ປລປນ຺ຕານໍ ສຸຕ຺ຕປ຺ປມຕ຺ຕາທີນໍ ສທ຺ທໍ. ສຸຕ຺ວາຕິ ຕໍ ສຸຕ຺ວາ. ຍໍ ວິຕກ຺ກຍໂຕ ຕສ຺ສ ໂສ ສທ຺ໂທ ອຸປ຺ປນ຺ໂນ, ຕສ຺ສ ວເສນ ‘‘ເອວມ຺ປິ ເຕ ມໂນ’’ຕິອາທິສຕິ.

ຕຕ຺ຣິມານິ ວຕ຺ຖູນິ – ເອໂກ ກິຣ ມນຸສ຺ໂສ ‘‘ອຏ຺ຏໍ ກຣິສ຺ສາມີ’’ຕິ ຄາມາ ນຄຣໍ ຄຈ຺ຉນ຺ໂຕ ນິກ຺ຂນ຺ຕຏ຺ຐານໂຕ ປຏ຺ຐາຍ ‘‘ວິນິຈ຺ຉຍສຠາຍໍ ຣຎ຺ໂຎ ຈ ຣາຊມຫາມຕ຺ຕານຎ຺ຈ ອິທໍ ກເຖສ຺ສາມິ ອິທໍ ກເຖສ຺ສາມີ’’ຕິ ວິຕກ຺ເກນ຺ໂຕ ຣາຊກຸລໍ ຄໂຕ ວິຍ ຣຎ຺ໂຎ ປຸຣໂຕ ຐິໂຕ ວິຍ ອຏ຺ຏກາຣເກນ ສທ຺ຘິໍ ກເຖນ຺ໂຕ ວິຍ ຈ ອໂຫສິ, ຕສ຺ສ ຕໍ ວິຕກ຺ກວິປ຺ຜາຣວເສນ ນິຈ຺ຉຣນ຺ຕໍ ສທ຺ທໍ ສຸຕ຺ວາ ເອໂກ ປຸຣິໂສ ‘‘ເກນຏ຺ເຐນ ຄຈ຺ຉສີ’’ຕິ ອາຫ. ອຏ຺ຏກມ຺ເມນາຕິ. ຄຈ຺ຉ, ຊໂຍ ເຕ ຠວິສ຺ສຕີຕິ. ໂສ ຄນ຺ຕ຺ວາ ອຏ຺ຏໍ ກຕ຺ວາ ຊຍເມວ ປາປຸຓິ.

ອປໂຣປິ ເຖໂຣ ໂມຬິຍຄາເມ ປິຓ຺ຑາຍ ຈຣິ. ອຖ ນໍ ນິກ຺ຂມນ຺ຕໍ ເອກາ ທາຣິກາ ອຎ຺ຎວິຫິຕາ ນ ອທ຺ທສ. ໂສ ຄາມທ຺ວາເຣ ຐຕ຺ວາ ນິວຕ຺ຕິຕ຺ວາ ໂອໂລເກຕ຺ວາ ຕໍ ທິສ຺ວາ ວິຕກ຺ເກນ຺ໂຕ ອຄມາສິ. ຄຈ຺ຉນ຺ໂຕເຍວ ຈ ‘‘ກິໍ ນຸ ໂຂ ກຸຣຸມານາ ທາຣິກາ ນ ອທ຺ທສາ’’ຕິ ວຈີເຠທໍ ອກາສິ. ປສ຺ເສ ຐິໂຕ ເອໂກ ປຸຣິໂສ ສຸຕ຺ວາ ‘‘ຕຸມ຺ເຫ, ຠນ຺ເຕ, ໂມຬິຍຄາເມ ຈຣິຕ຺ຖາ’’ຕິ ອາຫ.

ມໂນສງ຺ຂາຣາ ປຓິຫິຕາຕິ ຈິຕ຺ຕສງ຺ຂາຣາ ສຸຏ຺ຐປິຕາ. ວິຕກ຺ເກສ຺ສຕີຕິ ວິຕກ຺ກຍິສ຺ສຕິ ປວຕ຺ຕຍິສ຺ສຕີຕິ ປຊານາຕິ. ປຊານນ຺ໂຕ ຈ ອາຄມເນນ ຊານາຕິ, ປຸພ຺ພຠາເຄນ ຊານາຕິ, ອນ຺ໂຕສມາປຕ຺ຕິຍໍ ຈິຕ຺ຕໍ ອປໂລເກຕ຺ວາ ຊານາຕິ. ອາຄມເນນ ຊານາຕິ ນາມ ກສິຓປຣິກມ຺ມກາເລເຍວ ‘‘ເຍນາກາເຣເນສ ກສິຓຠາວນໍ ອາຣທ຺ໂຘ ປຐມຊ຺ຌານໍ ວາ…ເປ… ຈຕຸຕ຺ຖຊ຺ຌານໍ ວາ ອຏ຺ຐ ວາ ສມາປຕ຺ຕິໂຍ ນິພ຺ພຕ຺ເຕສ຺ສຕີ’’ຕິ ຊານາຕິ. ປຸພ຺ພຠາເຄນ ຊານາຕິ ນາມ ປຐມວິປສ຺ສນາຍ ອາຣທ຺ຘາຍເຍວ ຊານາຕິ, ‘‘ເຍນາກາເຣນ ເອສ ວິປສ຺ສນໍ ອາຣທ຺ໂຘ ໂສຕາປຕ຺ຕິມຄ຺ຄໍ ວາ ນິພ຺ພຕ຺ເຕສ຺ສຕິ…ເປ… ອຣຫຕ຺ຕມຄ຺ຄໍ ວາ ນິພ຺ພຕ຺ເຕສ຺ສຕີ’’ຕິ ຊານາຕິ. ອນ຺ໂຕສມາປຕ຺ຕິຍໍ ຈິຕ຺ຕໍ ໂອໂລເກຕ຺ວາ ຊານາຕິ ນາມ – ‘‘ເຍນາກາເຣນ ອິມສ຺ສ ມໂນສງ຺ຂາຣາ ສຸຏ຺ຐປິຕາ, ອິມສ຺ສ ນາມ ຈິຕ຺ຕສ຺ສ ອນນ຺ຕຣາ ອິມໍ ນາມ ວິຕກ຺ກໍ ວິຕກ຺ເກສ຺ສຕິ, ອິໂຕ ວຸຏ຺ຐິຕສ຺ສ ເອຕສ຺ສ ຫານຠາຄິໂຍ ວາ ສມາຘິ ຠວິສ຺ສຕິ ຐິຕິຠາຄິໂຍ ວາ ວິເສສຠາຄິໂຍ ວາ ນິພ຺ເພຘຠາຄິໂຍ ວາ, ອຠິຎ຺ຎາໂຍ ວາ ນິພ຺ພຕ຺ເຕສ຺ສຕີ’’ຕິ ຊານາຕິ. ຕຕ຺ຖ ປຸຖຸຊ຺ຊໂນ ເຈໂຕປຣິຍຎາຓລາຠີ ປຸຖຸຊ຺ຊນານໍເຍວ ຈິຕ຺ຕໍ ຊານາຕິ, ນ ອຣິຍານໍ. ອຣິເຍສຸປິ ເຫຏ຺ຐິໂມ ອຸປຣິມສ຺ສ ຈິຕ຺ຕໍ ນ ຊານາຕິ, ອຸປຣິໂມ ປນ ເຫຏ຺ຐິມສ຺ສ ຊານາຕິ. ເອເຕສຸ ຈ ໂສຕາປນ຺ໂນ ໂສຕາປຕ຺ຕິຜລສມາປຕ຺ຕິໍ ສມາປຊ຺ຊຕິ…ເປ… ອຣຫາ ອຣຫຕ຺ຕຜລສມາປຕ຺ຕິໍ ສມາປຊ຺ຊຕິ. ອຸປຣິໂມ ເຫຏ຺ຐິມໍ ນ ສມາປຊ຺ຊຕິ. ເຕສຎ຺ຫິ ເຫຏ຺ຐິມາ ເຫຏ຺ຐິມາ ສມາປຕ຺ຕິ ຕຕ຺ຣວຕ຺ຕິເຍວ ໂຫຕິ. ຕເຖວ ຕໍ ໂຫຕີຕິ ເອຕໍ ເອກໍເສນ ຕເຖວ ໂຫຕິ. ເຈໂຕປຣິຍຎາຓວເສນ ຎາຕຎ຺ຫິ ອຎ຺ຎຖາຠາວິ ນາມ ນຕ຺ຖິ.

ເອວໍ ວິຕກ຺ເກຖາຕິ ເອວໍ ເນກ຺ຂມ຺ມວິຕກ຺ກາທໂຍ ປວຕ຺ເຕນ຺ຕາ ວິຕກ຺ເກຖ. ມາ ເອວໍ ວິຕກ຺ກຍິຕ຺ຖາຕິ ເອວໍ ກາມວິຕກ຺ກາທໂຍ ປວຕ຺ເຕນ຺ຕາ ມາ ວິຕກ຺ກຍິຕ຺ຖ. ເອວໍ ມນສິ ກໂຣຖາຕິ ເອວໍ ອນິຈ຺ຈສຎ຺ຎເມວ, ທຸກ຺ຂສຎ຺ຎາທີສຸ ວາ ອຎ຺ຎຕຣໍ ມນສິ ກໂຣຖ. ມາ ເອວນ຺ຕິ ນິຈ຺ຈນ຺ຕິອາທິນາ ນເຍນ ມາ ມນສາ ກຣິຕ຺ຖ. ອິທນ຺ຕິ ອິທໍ ປຎ຺ຈກາມຄຸຓຣາຄໍ ປຊຫຖ. ອິທຎ຺ຈ ອຸປສມ຺ປຊ຺ຊາຕິ ອິທໍ ຈຕຸມຄ຺ຄຜລປ຺ປເຠທໍ ໂລກຸຕ຺ຕຣຘມ຺ມເມວ ອຸປສມ຺ປຊ຺ຊ ປາປຸຓິຕ຺ວາ ນິປ຺ຜາເທຕ຺ວາ ວິຫຣຖ.

ມາຍາສຫຘມ຺ມຣູປໍ ວິຍ ຂາຍຕີຕິ ມາຍາຍ ສມານກາຣຓຊາຕິກໍ ວິຍ ຫຸຕ຺ວາ ອຸປຏ຺ຐາຕິ. ມາຍາກາໂຣປິ ຫິ ອຸທກໍ ຄເຫຕ຺ວາ ເຕລໍ ກໂຣຕິ, ເຕລໍ ຄເຫຕ຺ວາ ອຸທກນ຺ຕິ ເອວໍ ອເນກຣູປໍ ມາຍໍ ທສ຺ເສຕິ. ອິທມ຺ປິ ປາຏິຫາຣິຍໍ ຕຖາຣູປເມວາຕິ. ອິທມ຺ປິ ເມ, ໂຠ ໂຄຕມ, ປາຏິຫາຣິຍໍ ມາຍາສຫຘມ຺ມຣູປໍ ວິຍ ຂາຍຕີຕິ ຈິນ຺ຕາມຓິກວິຊ຺ຊາສຣິກ຺ຂກຕໍ ສນ຺ຘາຍ ເອວໍ ອາຫ. ຈິນ຺ຕາມຓິກວິຊ຺ຊໍ ຊານນ຺ຕາປິ ຫິ ອາຄຈ຺ຉນ຺ຕເມວ ທິສ຺ວາ ‘‘ອຍໍ ອິທໍ ນາມ ວິຕກ຺ເກນ຺ໂຕ ອາຄຈ຺ຉຕີ’’ຕິ ຊານນ຺ຕິ. ຕຖາ ‘‘ອິທໍ ນາມ ວິຕກ຺ເກນ຺ໂຕ ຐິໂຕ, ອິທໍ ນາມ ວິຕກ຺ເກນ຺ໂຕ ນິສິນ຺ໂນ, ອິທໍ ນາມ ວິຕກ຺ເກນ຺ໂຕ ນິປນ຺ໂນ’’ຕິ ຊານນ຺ຕິ.

ອຠິກ຺ກນ຺ຕຕຣນ຺ຕິ ສຸນ຺ທຣຕຣໍ. ປຓີຕຕຣນ຺ຕິ ອຸຕ຺ຕມຕຣໍ. ຠວຎ຺ຫິ ໂຄຕໂມ ອວິຕກ຺ກໍ ອວິຈາຣນ຺ຕິ ອິຘ ພ຺ຣາຫ຺ມໂຓ ອວເສສໍ ອາເທສນາປາຏິຫາຣິຍໍ ພາຫິຣກນ຺ຕິ ນ ຄຓ຺ຫິ. ອິທຎ຺ຈ ປນ ສພ຺ພໍ ໂສ ພ຺ຣາຫ຺ມໂຓ ຕຖາຄຕສ຺ສ ວຓ຺ຓໍ ກເຖນ຺ໂຕເຍວ ອາຫ. ອທ຺ຘາ ໂຂ ຕ຺ຍາຍນ຺ຕິ ເອກໍເສເນວ ຕຍາ ອຍໍ. ອາສຊ຺ຊ ອຸປນີຍ ວາຈາ ຠາສິຕາຕິ ມມ ຄຸເຓ ຆຏ຺ເຏຕ຺ວາ ມເມວ ຄຸຓານໍ ສນ຺ຕິກໍ ອຸປນີຕາ ວາຈາ ຠາສິຕາ. ອປິຈ ຕ຺ຍາຫໍ ພ຺ຍາກຣິສ຺ສາມີຕິ ອປິຈ ເຕ ອຫເມວ ກເຖສ຺ສາມີຕິ. ເສສໍ ອຸຕ຺ຕານຕ຺ຖເມວາຕິ.

ພ຺ຣາຫ຺ມຓວຄ຺ໂຄ ປຐໂມ.