໗. ຈຕຸມຫາຣາຊສຸຕ຺ຕວຓ຺ຓນາ

໓໗. ສຕ຺ຕເມ ອມຈ຺ຈາ ປາຣິສຊ຺ຊາຕິ ປຣິຈາຣິກເທວຕາ. ອິມໍ ໂລກໍ ອນຸວິຈຣນ຺ຕີຕິ ອຏ຺ຐມີທິວເສ ກິຣ ສກ຺ໂກ ເທວຣາຊາ ຈຕ຺ຕາໂຣ ມຫາຣາຊາໂນ ອາຓາເປຕິ – ‘‘ຕາຕາ, ອຊ຺ຊ ອຏ຺ຐມີທິວເສ ມນຸສ຺ສໂລກໍ ອນຸວິຈຣິຕ຺ວາ ປຸຎ຺ຎານິ ກໂຣນ຺ຕານໍ ນາມໂຄຕ຺ຕໍ ອຸຄ຺ຄຓ຺ຫິຕ຺ວາ ອາຄຈ຺ຉຖາ’’ຕິ. ເຕ ຄນ຺ຕ຺ວາ ອຕ຺ຕໂນ ປຣິຈາຣເກ ເປເສນ຺ຕິ – ‘‘ຄຈ຺ຉຖ, ຕາຕາ, ມນຸສ຺ສໂລກໍ ວິຈຣິຕ຺ວາ ປຸຎ຺ຎກາຣການໍ ນາມໂຄຕ຺ຕານິ ສຸວຓ຺ຓປຏ຺ເຏ ລິຂິຕ຺ວາ ອາເນຖາ’’ຕິ. ເຕ ຕຖາ ກໂຣນ຺ຕິ. ເຕນ ວຸຕ຺ຕໍ – ‘‘ອິມໍ ໂລກໍ ອນຸວິຈຣນ຺ຕີ’’ຕິ. ກຈ຺ຈິ ພຫູຕິອາທິ ເຕສໍ ອຸປປຣິກ຺ຂາກາຣທສ຺ສນຕ຺ຖໍ ວຸຕ຺ຕໍ. ເອວໍ ອຸປປຣິກ຺ຂນ຺ຕາ ຫິ ເຕ ອນຸວິຈຣນ຺ຕິ. ຕຕ຺ຖ ອຸໂປສຖໍ ອຸປວສນ຺ຕີຕິ ມາສສ຺ສ ອຏ຺ຐວາເຣ ອຸໂປສຖງ຺ຄານິ ອຘິຏ຺ຐຫນ຺ຕິ. ປຏິຊາຄໂຣນ຺ຕີຕິ ປຏິຊາຄຣອຸໂປສຖກມ຺ມໍ ນາມ ກໂຣນ຺ຕິ. ຕໍ ກໂຣນ຺ຕາ ເອກສ຺ມິໍ ອທ຺ຘມາເສ ຈຕຸນ຺ນໍ ອຸໂປສຖທິວສານໍ ປຈ຺ຈຸຄ຺ຄມນານຸຄ຺ຄມນວເສນ ກໂຣນ຺ຕິ. ປຎ຺ຈມີອຸໂປສຖໍ ປຈ຺ຈຸຄ຺ຄຈ຺ຉນ຺ຕາ ຈຕຸຕ຺ຖິຍໍ ອຸໂປສຖິກາ ໂຫນ຺ຕິ, ອນຸຄຈ຺ຉນ຺ຕາ ຉຏ຺ຐິຍໍ. ອຏ຺ຐມີອຸໂປສຖໍ ປຈ຺ຈຸຄ຺ຄຈ຺ຉນ຺ຕາ ສຕ຺ຕມິຍໍ, ອນຸຄຈ຺ຉນ຺ຕາ ນວມິຍໍ. ຈາຕຸທ຺ທສິໍ ປຈ຺ຈຸຄ຺ຄຈ຺ຉນ຺ຕາ ເຕຣສິຍໍ, ປນ຺ນຣສີອຸໂປສຖໍ ອນຸຄຈ຺ຉນ຺ຕາ ປາຏິປເທ ອຸໂປສຖິກາ ໂຫນ຺ຕິ. ປຸຎ຺ຎານິ ກໂຣນ຺ຕີຕິ ສຣຓຄມນນິຈ຺ຈສີລປຸປ຺ຜປູຊາຘມ຺ມສ຺ສວນປທີປສຫສ຺ສອາໂຣປນວິຫາຣກຣຓາທີນິ ນານປ຺ປກາຣານິ ປຸຎ຺ຎານິ ກໂຣນ຺ຕິ. ເຕ ເອວໍ ອນຸວິຈຣິຕ຺ວາ ປຸຎ຺ຎກມ຺ມກາຣການໍ ນາມໂຄຕ຺ຕານິ ໂສວຓ຺ຓມເຍ ປຏ຺ເຏ ລິຂິຕ຺ວາ ອາຫຣິຕ຺ວາ ຈຕຸນ຺ນໍ ມຫາຣາຊານໍ ເທນ຺ຕິ. ປຸຕ຺ຕາ ອິມໍ ໂລກໍ ອນຸວິຈຣນ຺ຕີຕິ ຈຕູຫິ ມຫາຣາເຊຫິ ປຸຣິມນເຍເນວ ປຫິຕຕ຺ຕາ ອນຸວິຈຣນ຺ຕິ. ຕທຫູຕິ ຕໍທິວສໍ. ອຸໂປສເຖຕິ ອຸໂປສຖທິວເສ.

ສເຈ, ຠິກ຺ຂເວ, ອປ຺ປກາ ໂຫນ຺ຕີຕິ ຈຕຸນ຺ນໍ ມຫາຣາຊານໍ ອມຈ຺ຈາ ປາຣິສຊ຺ຊາ ຕາ ຕາ ຄາມນິຄມຣາຊຘານິໂຍ ອຸປສງ຺ກມນ຺ຕິ, ຕໂຕ ຕໍ ອຸປນິສ຺ສາຍ ອຘິວຕ຺ຖາ ເທວຕາ ‘‘ມຫາຣາຊານໍ ອມຈ຺ຈາ ອາຄຕາ’’ຕິ ປຓ຺ຓາກາຣໍ ຄເຫຕ຺ວາ ເຕສໍ ສນ຺ຕິກໍ ຄຈ຺ຉນ຺ຕິ. ເຕ ປຓ຺ຓາກາຣໍ ຄເຫຕ຺ວາ ‘‘ກຈ຺ຈິ ນຸ ໂຂ ມາຣິສາ ພຫູ ມນຸສ຺ສາ ມຕ຺ເຕຍ຺ຍາ’’ຕິ ວຸຕ຺ຕນເຍນ ມນຸສ຺ສານໍ ປຸຎ຺ຎປຏິປຕ຺ຕິໍ ປຸຈ຺ຉິຕ຺ວາ ‘‘ອາມ, ມາຣິສ, ອິມສ຺ມິໍ ຄາເມ ອສຸໂກ ຈ ອສຸໂກ ຈ ປຸຎ຺ຎານິ ກໂຣນ຺ຕີ’’ຕິ ວຸຕ຺ເຕ ເຕສໍ ນາມໂຄຕ຺ຕໍ ລິຂິຕ຺ວາ ອຎ຺ຎຕ຺ຖ ຄຈ຺ຉນ຺ຕິ. ອຖ ຈາຕຸທ຺ທສິຍໍ ຈຕຸນ຺ນໍ ມຫາຣາຊານໍ ປຸຕ຺ຕາປິ ຕເມວ ສຸວຓ຺ຓປຏ຺ຏໍ ຄເຫຕ຺ວາ ເຕເນວ ນເຍນ ອນຸວິຈຣນ຺ຕາ ນາມໂຄຕ຺ຕານິ ລິຂນ຺ຕິ. ຕທຫຸໂປສເຖ ປນ຺ນຣເສ ຈຕ຺ຕາໂຣປິ ມຫາຣາຊາໂນ ເຕເນວ ນເຍນ ຕສ຺ມິໍເຍວ ສຸວຓ຺ຓປຏ຺ເຏ ນາມໂຄຕ຺ຕານິ ລິຂນ຺ຕິ. ເຕ ສຸວຓ຺ຓປຏ຺ຏປຣິມາເຓເນວ – ‘‘ອິມສ຺ມິໍ ກາເລ ມນຸສ຺ສາ ອປ຺ປກາ, ອິມສ຺ມິໍ ກາເລ ພຫຸກາ’’ຕິ ຊານນ຺ຕິ. ຕໍ ສນ຺ຘາຍ ‘‘ສເຈ, ຠິກ຺ຂເວ, ອປ຺ປກາ ໂຫນ຺ຕິ ມນຸສ຺ສາ’’ຕິອາທິ ວຸຕ຺ຕໍ. ເທວານໍ ຕາວຕິໍສານນ຺ຕິ ປຐມໍ ອຠິນິພ຺ພຕ຺ເຕ ເຕຕ຺ຕິໍສ ເທວປຸຕ຺ເຕ ອຸປາທາຍ ເອວໍລທ຺ຘນາມານໍ. ເຕສໍ ປນ ອຸປ຺ປຕ຺ຕິກຖາ ທີຆນິກາເຍ ສກ຺ກປຎ຺ຫສຸຕ຺ຕວຓ຺ຓນາຍ ວິຕ຺ຖາຣິຕາ. ເຕນາຕິ ເຕນ ອາໂຣຈເນນ, ເຕນ ວາ ປຸຎ຺ຎກາຣການໍ ອປ຺ປກຠາເວນ. ທິພ຺ພາ ວຕ, ໂຠ, ກາຍາ ປຣິຫາຍິສ຺ສນ຺ຕີຕິ ນວນວານໍ ເທວປຸຕ຺ຕານໍ ອປາຕຸຠາເວນ ເທວກາຍາ ປຣິຫາຍິສ຺ສນ຺ຕິ, ຣມຓີຍໍ ທສໂຍຊນສຫສ຺ສໍ ເທວນຄຣໍ ສຸຎ຺ຎໍ ຠວິສ຺ສຕິ. ປຣິປູຣິສ຺ສນ຺ຕິ ອສຸຣກາຍາຕິ ຈຕ຺ຕາໂຣ ອປາຍາ ປຣິປູຣິສ຺ສນ຺ຕິ. ອິມິນາ ‘‘ມຍໍ ປຣິປຸຓ຺ເຓ ເທວນຄເຣ ເທວສງ຺ຆມຊ຺ເຌ ນກ຺ຂຕ຺ຕໍ ກີຬິຕຸໍ ນ ລຠິສ຺ສາມາ’’ຕິ ອນຕ຺ຕມນາ ໂຫນ຺ຕິ. ສຸກ຺ກປກ຺ເຂປິ ອິມິນາວ ອຸປາເຍນ ອຕ຺ໂຖ ເວທິຕພ຺ໂພ.

ຠູຕປຸພ຺ພໍ, ຠິກ຺ຂເວ, ສກ຺ໂກ ເທວານມິນ຺ໂທຕິ ອຕ຺ຕໂນ ສກ຺ກເທວຣາຊກາລໍ ສນ຺ຘາຍ ກເຖຕິ. ເອກສ຺ສ ວາ ສກ຺ກສ຺ສ ອຊ຺ຌາສຍໍ ຄເຫຕ຺ວາ ກເຖຕີຕິ ວຸຕ຺ຕໍ. ອນຸນຍມາໂນຕິ ອນຸໂພຘຍມາໂນ. ຕາຍໍ ເວລາຍນ຺ຕິ ຕສ຺ມິໍ ກາເລ.

ປາຏິຫາຣິຍປກ຺ຂຎ຺ຈາຕິ ເອຕ຺ຖ ປາຏິຫາຣິຍປກ຺ໂຂ ນາມ ອນ຺ໂຕວສ຺ເສ ເຕມາສໍ ນິພທ຺ຘຸໂປສໂຖ, ຕໍ ອສກ຺ໂກນ຺ຕສ຺ສ ທ຺ວິນ຺ນໍ ປວາຣຓານໍ ອນ຺ຕເຣ ເອກມາສໍ ນິພທ຺ຘຸໂປສໂຖ, ຕມ຺ປິ ອສກ຺ໂກນ຺ຕສ຺ສ ປຐມປວາຣຓໂຕ ປຏ຺ຐາຍ ເອໂກ ອທ຺ຘມາໂສ ປາຏິຫາຣິຍປກ຺ໂຂເຍວ ນາມ. ອຏ຺ຐງ຺ຄສຸສມາຄຕນ຺ຕິ ອຏ຺ຐຫິ ຄຸຓງ຺ເຄຫິ ສມນ຺ນາຄຕໍ. ໂຍປິສ຺ສ ມາທິໂສ ນໂຣຕິ ໂຍປິ ສຕ຺ໂຕ ມາທິໂສ ຠເວຍ຺ຍ. ສກ຺ໂກປິ ກິຣ ວຸຕ຺ຕປ຺ປກາຣສ຺ສ ອຸໂປສຖກມ຺ມສ຺ສ ຄຸຓໍ ຊານິຕ຺ວາ ທ຺ເວ ເທວໂລກສມ຺ປຕ຺ຕິໂຍ ປຫາຍ ມາສສ຺ສ ອຏ຺ຐ ວາເຣ ອຸໂປສຖໍ ອຸປວສຕິ. ຕສ຺ມາ ເອວມາຫ. ອປໂຣ ນໂຍ – ໂຍປິສ຺ສ ມາທິໂສ ນໂຣຕິ ໂຍປິ ສຕ຺ໂຕ ມາທິໂສ ອສ຺ສ, ມຍາ ປຕ຺ຕໍ ສມ຺ປຕ຺ຕິໍ ປາປຸຓິຕຸໍ ອິຈ຺ເຉຍ຺ຍາຕິ ອຕ຺ໂຖ. ສກ຺ກາ ຫິ ເອວຣູເປນ ອຸໂປສຖກມ຺ເມນ ສກ຺ກສມ຺ປຕ຺ຕິໍ ປາປຸຓິຕຸນ຺ຕິ ອຍເມຕ຺ຖ ອຘິປ຺ປາໂຍ.

ວຸສິຕວາຕິ ວຸຕ຺ຖວາໂສ. ກຕກຣຓີໂຍຕິ ຈຕູຫິ ມຄ຺ເຄຫິ ກຕ຺ຕພ຺ພກິຈ຺ຈໍ ກຕ຺ວາ ຐິໂຕ. ໂອຫິຕຠາໂຣຕິ ຂນ຺ຘຠາຣກິເລສຠາຣອຠິສງ຺ຂາຣຠາເຣ ໂອຕາເຣຕ຺ວາ ຐິໂຕ. ອນຸປ຺ປຕ຺ຕສທຕ຺ໂຖຕິ ສທຕ຺ໂຖ ວຸຈ຺ຈຕິ ອຣຫຕ຺ຕໍ, ຕໍ ອນຸປ຺ປຕ຺ໂຕ. ປຣິກ຺ຂີຓຠວສໍໂຍຊໂນຕິ ເຍນ ສໍໂຍຊເນນ ພທ຺ໂຘ ຠເວສຸ ອາກຑ຺ຒີຍຕິ, ຕສ຺ສ ຂີຓຕ຺ຕາ ປຣິກ຺ຂີຓຠວສໍໂຍຊໂນ. ສມ຺ມທຎ຺ຎາ ວິມຸຕ຺ໂຕຕິ ເຫຕຸນາ ນເຍນ ກາຣເຓນ ຊານິຕ຺ວາ ວິມຸຕ຺ໂຕ. ກລ຺ລໍ ວຈນາຍາຕິ ຍຸຕ຺ຕໍ ວຕ຺ຕຸໍ.

ໂຍປິສ຺ສ ມາທິໂສ ນໂຣຕິ ໂຍປິ ມາທິໂສ ຂີຓາສໂວ ອສ຺ສ, ໂສປິ ເອວຣູປໍ ອຸໂປສຖໍ ອຸປວເສຍ຺ຍາຕິ ອຸໂປສຖກມ຺ມສ຺ສ ຄຸຓໍ ຊານນ຺ໂຕ ເອວໍ ວເທຍ຺ຍ. ອປໂຣ ນໂຍ ໂຍປິສ຺ສ ມາທິໂສ ນໂຣຕິ ໂຍປິ ສຕ຺ໂຕ ມາທິໂສ ອສ຺ສ, ມຍາ ປຕ຺ຕໍ ສມ຺ປຕ຺ຕິໍ ປາປຸຓິຕຸໍ ອິຈ຺ເຉຍ຺ຍາຕິ ອຕ຺ໂຖ. ສກ຺ກາ ຫິ ເອວຣູເປນ ອຸໂປສຖກມ຺ເມນ ຂີຓາສວສມ຺ປຕ຺ຕິໍ ປາປຸຓິຕຸນ຺ຕິ ອຍເມຕ຺ຖ ອຘິປ຺ປາໂຍ. ອຏ຺ຐມໍ ອຸຕ຺ຕານຕ຺ຖເມວ.