໖. ເທວທູຕສຸຕ຺ຕວຓ຺ຓນາ

໓໖. ຉຏ຺ເຐ ເທວທູຕານີຕິ ເທວທູຕາ. ອຍໍ ປເນຕ຺ຖ ວຈນຕ຺ໂຖ – ເທໂວຕິ ມຈ຺ຈຸ, ຕສ຺ສ ທູຕາຕິ ເທວທູຕາ. ຊິຓ຺ຓພ຺ຍາຘິມຕາ ຫິ ສໍເວຄຊນນຏ຺ເຐນ ‘‘ອິທານິ ເຕ ມຈ຺ຈຸສມີປໍ ຄນ຺ຕພ຺ພ’’ນ຺ຕິ ໂຈເທນ຺ຕິ ວິຍ, ຕສ຺ມາ ເທວທູຕາຕິ ວຸຈ຺ຈນ຺ຕິ. ເທວາ ວິຍ ທູຕາຕິປິ ເທວທູຕາ. ຍຖາ ຫິ ອລງ຺ກຕປຏິຍຕ຺ຕາຍ ເທວຕາຍ ອາກາເສ ຐຕ຺ວາ ‘‘ຕ຺ວໍ ອສຸກທິວເສ ມຣິສ຺ສສີ’’ຕິ ວຸຕ຺ເຕ ຕສ຺ສາ ວຈນໍ ສທ຺ຘາຕພ຺ພໍ ໂຫຕິ; ເອວເມວໍ ຊິຓ຺ຓພ຺ຍາຘິມຕາປິ ທິສ຺ສມານາ ‘‘ຕ຺ວມ຺ປິ ເອວໍຘມ຺ໂມ’’ຕິ ໂຈເທນ຺ຕິ ວິຍ, ເຕສຎ຺ຈ ຕໍ ວຈນໍ ອນຎ຺ຎຖາຠາວິຕາຍ ເທວຕາຍ ພ຺ຍາກຣຓສທິສເມວ ໂຫຕີຕິ ເທວາ ວິຍ ທູຕາຕິ ເທວທູຕາ. ວິສຸທ຺ຘິເທວານໍ ທູຕາຕິປິ ເທວທູຕາ. ສພ຺ພໂພຘິສຕ຺ຕາ ຫິ ຊິຓ຺ຓພ຺ຍາຘິມຕປພ຺ພຊິເຕ ທິສ຺ວາວ ສໍເວຄໍ ອາປຊ຺ຊິຕ຺ວາ ນິກ຺ຂມ຺ມ ປພ຺ພຊິໍສຸ. ເອວໍ ວິສຸທ຺ຘິເທວານໍ ທູຕາຕິປິ ເທວທູຕາ. ອິຘ ປນ ລິງ຺ຄວິປລ຺ລາເສນ ‘‘ເທວທູຕານີ’’ຕິ ວຸຕ຺ຕໍ.

ກາເຍນ ທຸຈ຺ຈຣິຕນ຺ຕິອາທິ ກສ຺ມາ ອາຣທ຺ຘໍ? ເທວທູຕານຸຍຸຎ຺ຊນຏ຺ຐານຸປກ຺ກມກມ຺ມທສ຺ສນຕ຺ຖໍ. ອິມິນາ ຫິ ກມ຺ເມນ ອຍໍ ສຕ຺ໂຕ ນິຣເຍ ນິພ຺ພຕ຺ຕຕິ, ອຖ ນໍ ຕຕ຺ຖ ຍໂມ ຣາຊາ ເທວທູເຕ ສມນຸຍຸຎ຺ຊຕິ. ຕຕ຺ຖ ກາເຍນ ທຸຈ຺ຈຣິຕໍ ຈຣຕີຕິ ກາຍທ຺ວາເຣນ ຕິວິຘໍ ທຸຈ຺ຈຣິຕໍ ຈຣຕິ. ວາຈາຍາຕິ ວຈີທ຺ວາເຣນ ຈຕຸພ຺ພິຘໍ ທຸຈ຺ຈຣິຕໍ ຈຣຕິ. ມນສາຕິ ມໂນທ຺ວາເຣນ ຕິວິຘໍ ທຸຈ຺ຈຣິຕໍ ຈຣຕິ.

ຕເມນໍ, ຠິກ຺ຂເວ, ນິຣຍປາລາຕິ ເອຕ຺ຖ ເອກຈ຺ເຈ ເຖຣາ ‘‘ນິຣຍປາລາ ນາມ ນຕ຺ຖິ, ຍນ຺ຕຣູປໍ ວິຍ ກມ຺ມເມວ ກາຣຓໍ ກາເຣຕີ’’ຕິ ວທນ຺ຕິ. ຕໍ ‘‘ອຕ຺ຖິ ນິຣເຍ ນິຣຍປາລາຕິ, ອາມນ຺ຕາ. ອຕ຺ຖິ ຈ ກາຣຓິກາ’’ຕິອາທິນາ ນເຍນ ອຠິຘມ຺ເມ (ກຖາ. ໘໖໖) ປຏິເສຘິຕເມວ. ຍຖາ ຫິ ມນຸສ຺ສໂລເກ ກມ຺ມກາຣຓກາຣກາ ອຕ຺ຖິ, ເອວເມວ ນິຣເຍ ນິຣຍປາລາ ອຕ຺ຖີຕິ. ຍມສ຺ສ ຣຎ຺ໂຎຕິ ຍມຣາຊາ ນາມ ເວມານິກເປຕຣາຊາ. ເອກສ຺ມິໍ ກາເລ ທິພ຺ພວິມາເນ ທິພ຺ພກປ຺ປຣຸກ຺ຂທິພ຺ພອຸຍ຺ຍານທິພ຺ພນາຏກາທິສພ຺ພສມ຺ປຕ຺ຕິໍ ອນຸຠວຕິ, ເອກສ຺ມິໍ ກາເລ ກມ຺ມວິປາກໍ, ຘມ຺ມິໂກ ຣາຊາ, ນ ເຈສ ເອໂກວ ໂຫຕິ, ຈຕູສຸ ປນ ທ຺ວາເຣສຸ ຈຕ຺ຕາໂຣ ຊນາ ໂຫນ຺ຕິ. ອມຕ຺ເຕຍ຺ໂຍຕິ ມາຕຸ ຫິໂຕ ມຕ຺ເຕຍ຺ໂຍ, ມາຕຣິ ສມ຺ມາ ປຏິປນ຺ໂນຕິ ອຕ຺ໂຖ. ນ ມຕ຺ເຕຍ຺ໂຍຕິ ອມຕ຺ເຕຍ຺ໂຍ, ມາຕຣິ ມິຈ຺ຉາ ປຏິປນ຺ໂນຕິ ອຕ຺ໂຖ. ເສສປເທສຸປິ ເອເສວ ນໂຍ. ອພ຺ຣຫ຺ມຎ຺ໂຎຕິ ເອຕ຺ຖ ຈ ຂີຓາສວາ ພ຺ຣາຫ຺ມຓາ ນາມ, ເຕສຸ ມິຈ຺ຉາ ປຏິປນ຺ໂນ ອພ຺ຣຫ຺ມຎ຺ໂຎ ນາມ.

ສມນຸຍຸຎ຺ຊຕີຕິ ອນຸໂຍຄວຕ຺ຕໍ ອາໂຣເປນ຺ໂຕ ປຸຈ຺ຉຕິ, ລທ຺ຘິໍ ປຕິຏ຺ຐາເປນ຺ໂຕ ປນ ສມນຸຄ຺ຄາຫຕິ ນາມ, ກາຣຓໍ ປຸຈ຺ຉນ຺ໂຕ ສມນຸຠາສຕິ ນາມ. ນາທ຺ທສນ຺ຕິ ອຕ຺ຕໂນ ສນ຺ຕິເກ ປຫິຕສ຺ສ ກສ຺ສຈິ ເທວທູຕສ຺ສ ອຠາວໍ ສນ຺ຘາຍ ເອວໍ ວທຕິ.

ອຖ ນໍ ຍໂມ ‘‘ນາຍໍ ຠາສິຕສ຺ສ ອຕ຺ຖໍ ສລ຺ລກ຺ເຂຕີ’’ຕິ ຎຕ຺ວາ ອຕ຺ຖໍ ສລ຺ລກ຺ຂາເປຕຸກາໂມ ອມ຺ໂຠຕິອາທິມາຫ. ຕຕ຺ຖ ຊິຓ຺ຓນ຺ຕິ ຊຣາຊິຓ຺ຓໍ. ໂຄປານສິວງ຺ກນ຺ຕິ ໂຄປານສີ ວິຍ ວງ຺ກໍ. ໂຠຄ຺ຄນ຺ຕິ ຠຄ຺ຄໍ. ອິມິນາປິສ຺ສ ວງ຺ກຠາວເມວ ທີເປຕິ. ທຓ຺ຑປຣາຍຓນ຺ຕິ ທຓ຺ຑປຏິສຣຓໍ ທຓ຺ຑທຸຕິຍໍ. ປເວຘມານນ຺ຕິ ກມ຺ປມານໍ. ອາຕຸຣນ຺ຕິ ຊຣາຕຸຣໍ. ຂຓ຺ຑທນ຺ຕນ຺ຕິ ຊຣານຸຠາເວນ ຂຓ຺ຑິຕທນ຺ຕໍ. ປລິຕເກສນ຺ຕິ ປຓ຺ຑຣເກສໍ. ວິລູນນ຺ຕິ ລຸຎ຺ຈິຕ຺ວາ ຄຫິຕເກສໍ ວິຍ ຂລ຺ລາຏໍ. ຂລິຕສິຣນ຺ຕິ ມຫາຂລ຺ລາຏສີສໍ. ວລິຕນ຺ຕິ ສຎ຺ຊາຕວລິໍ. ຕິລກາຫຕຄຕ຺ຕນ຺ຕິ ເສຕຕິລກກາຬຕິລເກຫິ ວິກິຓ຺ຓສຣີຣໍ. ຊຣາຘມ຺ໂມຕິ ຊຣາສຠາໂວ, ອປຣິມຸຕ຺ໂຕ ຊຣາຍ, ຊຣາ ນາມ ມຍ຺ຫໍ ອພ຺ຠນ຺ຕເຣເຍວ ປວຕ຺ຕຕີຕິ. ປຣໂຕ ພ຺ຍາຘິຘມ຺ໂມ ມຣຓຘມ຺ໂມຕິ ປທທ຺ວເຍປິ ເອເສວ ນໂຍ.

ປຐມໍ ເທວທູຕໍ ສມນຸຍຸຎ຺ຊິຕ຺ວາຕິ ເອຕ຺ຖ ຊຣາຊິຓ຺ຓສຕ຺ໂຕ ອຕ຺ຖໂຕ ເອວໍ ວທຕິ ນາມ – ‘‘ປສ຺ສຖ, ໂຠ, ອຫມ຺ປິ ຕຸມ຺ເຫ ວິຍ ຕຣຸໂຓ ອໂຫສິໍ ອູຣຸພລີ ພາຫຸພລີ ຊວສມ຺ປນ຺ໂນ, ຕສ຺ສ ເມ ຕາ ພລຊວສມ຺ປຕ຺ຕິໂຍ ອນ຺ຕຣຫິຕາ, ວິຊ຺ຊມານາປິ ເມ ຫຕ຺ຖປາທາ ຫຕ຺ຖປາທກິຈ຺ຈໍ ນ ກໂຣນ຺ຕິ, ຊຣາຍມ຺ຫິ ອປຣິມຸຕ຺ຕຕາຍ ເອທິໂສ ຊາໂຕ. ນ ໂຂ ປນາຫເມວ, ຕຸມ຺ເຫປິ ຊຣາຍ ອປຣິມຸຕ຺ຕາວ. ຍເຖວ ຫິ ມຍ຺ຫໍ, ເອວໍ ຕຸມ຺ຫາກມ຺ປິ ຊຣາ ອາຄມິສ຺ສຕິ. ອິຕິ ຕສ຺ສາ ປຸເຣ ອາຄມນາວ ກລ຺ຍາຓໍ ກໂຣຖາ’’ຕິ. ເຕເນເວສ ເທວທູໂຕ ນາມ ຊາໂຕ. ອາພາຘິກນ຺ຕິ ພາຘິກໍ. ທຸກ຺ຂິຕນ຺ຕິ ທຸກ຺ຂປ຺ປຕ຺ຕໍ. ພາຬ຺ຫຄິລານນ຺ຕິ ອຘິມຕ຺ຕຄິລານໍ.

ທຸຕິຍໍ ເທວທູຕນ຺ຕິ ເອຕ຺ຖປິ ຄິລານສຕ຺ໂຕ ອຕ຺ຖໂຕ ເອວໍ ວທຕິ ນາມ – ‘‘ປສ຺ສຖ, ໂຠ, ອຫມ຺ປິ ຕຸມ຺ເຫ ວິຍ ນິໂຣໂຄ ອໂຫສິໍ, ໂສມ຺ຫິ ເອຕຣຫິ ພ຺ຍາຘິນາ ອຠິຫໂຕ, ສເກ ມຸຕ຺ຕກຣີເສ ປລິປນ຺ໂນ, ອຸຏ຺ຐາຕຸມ຺ປິ ນ ສກ຺ໂກມິ. ວິຊ຺ຊມານາປິ ເມ ຫຕ຺ຖປາທາ ຫຕ຺ຖປາທກິຈ຺ຈໍ ນ ກໂຣນ຺ຕິ, ພ຺ຍາຘິໂຕມ຺ຫິ ອປຣິມຸຕ຺ຕຕາຍ ເອທິໂສ ຊາໂຕ. ນ ໂຂ ປນາຫເມວ, ຕຸມ຺ເຫປິ ພ຺ຍາຘິໂຕ ອປຣິມຸຕ຺ຕາວ. ຍເຖວ ຫິ ມຍ຺ຫໍ, ເອວໍ ຕຸມ຺ຫາກມ຺ປິ ພ຺ຍາຘິ ອາຄມິສ຺ສຕິ. ອິຕິ ຕສ຺ສ ປຸເຣ ອາຄມນາວ ກລ຺ຍາຓໍ ກໂຣຖາ’’ຕິ. ເຕເນເວສ ເທວທູໂຕ ນາມ ຊາໂຕ.

ເອກາຫມຕນ຺ຕິອາທີສຸ ເອກາຫໍ ມຕສ຺ສ ອສ຺ສາຕິ ເອກາຫມໂຕ, ຕໍ ເອກາຫມຕໍ. ປຣໂຕ ປທທ຺ວເຍປິ ເອເສວ ນໂຍ. ຠສ຺ຕາ ວິຍ ວາຍຸນາ ອຸທ຺ຘໍ ຊີວິຕປຣິຍາທານາ ຍຖາກ຺ກມໍ ສມຸຄ຺ຄເຕນ ສູນຠາເວນ ອຸທ຺ຘຸມາຕຕ຺ຕາ ອຸທ຺ຘຸມາຕກໍ. ວິນີໂລ ວຸຈ຺ຈຕິ ວິປຣິຠິນ຺ນວຓ຺ໂຓ, ວິນີໂລວ ວິນີລໂກ, ຕໍ ວິນີລກໍ. ປຏິກູລຕ຺ຕາ ວາ ກຸຈ຺ຉິຕໍ ວິນີລນ຺ຕິ ວິນີລກໍ. ວິປຸພ຺ພກນ຺ຕິ ວິສ຺ສນ຺ທມານປຸພ຺ພກໍ, ປຣິຠິນ຺ນຏ຺ຐາເນ ຫິ ປຄ຺ຆຣິເຕນ ປຸພ຺ເພນ ປລິມກ຺ຂິຕນ຺ຕິ ອຕ຺ໂຖ.

ຕຕິຍໍ ເທວທູຕນ຺ຕິ ເອຕ຺ຖ ມຕກສຕ຺ໂຕ ອຕ຺ຖໂຕ ເອວໍ ວທຕິ ນາມ – ‘‘ປສ຺ສຖ, ໂຠ, ມໍ ອາມກສຸສາເນ ຉຑ຺ຑິຕໍ ອຸທ຺ຘຸມາຕກາທິຠາວປ຺ປຕ຺ຕໍ, ມຣຓໂຕມ຺ຫິ ອປຣິມຸຕ຺ຕຕາຍ ເອທິໂສ ຊາໂຕ. ນ ໂຂ ປນາຫເມວ, ຕຸມ຺ເຫປິ ມຣຓໂຕ ອປຣິມຸຕ຺ຕາ. ຍເຖວ ຫິ ມຍ຺ຫໍ, ເອວໍ ຕຸມ຺ຫາກມ຺ປິ ມຣຓໍ ອາຄມິສ຺ສຕິ. ອິຕິ ຕສ຺ສ ປຸເຣ ອາຄມນາວ ກລ຺ຍາຓໍ ກໂຣຖາ’’ຕິ. ເຕເນວສ຺ສ ເທວທູໂຕ ນາມ ຊາໂຕ.

ອິມໍ ປນ ເທວທູຕານຸໂຍຄໍ ໂກ ລຠຕິ, ໂກ ນ ລຠຕິ? ເຍນ ຕາວ ພຫຸໍ ປາປໍ ກຕໍ, ໂສ ຄນ຺ຕ຺ວາ ນິຣເຍ ນິພ຺ພຕ຺ຕຕິເຍວ. ເຍນ ປນ ປຣິຕ຺ຕໍ ປາປໍ ກຕໍ, ໂສ ລຠຕິ. ຍຖາ ຫິ ສຠຓ຺ຑໍ ໂຈຣໍ ຄເຫຕ຺ວາ ກຕ຺ຕພ຺ພເມວ ກໂຣນ຺ຕິ ນ ວິນິຈ຺ຉິນນ຺ຕິ. ອນຸວິຊ຺ຊິຕ຺ວາ ຄຫິຕໍ ປນ ວິນິຈ຺ຉຍຏ຺ຐານໍ ນຍນ຺ຕິ, ໂສ ວິນິຈ຺ຉຍໍ ລຠຕິ. ເອວໍສມ຺ປທເມຕໍ. ປຣິຕ຺ຕປາປກມ຺ມາ ຫິ ອຕ຺ຕໂນ ຘມ຺ມຕາຍປິ ສຣນ຺ຕິ, ສາຣີຍມານາປິ ສຣນ຺ຕິ.

ຕຕ຺ຖ ທີຆຊຍນ຺ຕທມິໂຬ ນາມ ອຕ຺ຕໂນ ຘມ຺ມຕາຍ ສຣິ. ໂສ ກິຣ ທມິໂຬ ສຸມນຄິຣິມຫາວິຫາເຣ ອາກາສເຈຕິຍໍ ຣຕ຺ຕປເຏນ ປູເຊສິ, ອຖ ນິຣເຍ ອຸສ຺ສທສາມນ຺ເຕ ນິພ຺ພຕ຺ໂຕ ອຄ຺ຄິຊາລສທ຺ທໍ ສຸຕ຺ວາວ ອຕ຺ຕນາ ປູຊິຕປຏໍ ອນຸສ຺ສຣິ, ໂສ ຄນ຺ຕ຺ວາ ສຄ຺ເຄ ນິພ຺ພຕ຺ໂຕ. ອປໂຣປິ ປຸຕ຺ຕສ຺ສ ທຫຣຠິກ຺ຂຸໂນ ຂລິສາຏກໍ ເທນ຺ໂຕ ປາທມູເລ ຐເປສິ, ມຣຓກາລມ຺ຫິ ປຏປຏາຕິ ສທ຺ເທ ນິມິຕ຺ຕໍ ຄຓ຺ຫິ, ໂສປິ ອຸສ຺ສທສາມນ຺ເຕ ນິພ຺ພຕ຺ໂຕ ຊາລສທ຺ເທນ ຕໍ ສາຏກໍ ອນຸສ຺ສຣິຕ຺ວາ ສຄ຺ເຄ ນິພ຺ພຕ຺ໂຕ. ເອວໍ ຕາວ ອຕ຺ຕໂນ ຘມ຺ມຕາຍ ກຸສລໍ ກມ຺ມໍ ສຣິຕ຺ວາ ສຄ຺ເຄ ນິພ຺ພຕ຺ຕຕີຕິ.

ອຕ຺ຕໂນ ຘມ຺ມຕາຍ ອສຣນ຺ເຕ ປນ ຕໂຍ ເທວທູເຕ ປຸຈ຺ຉຕິ. ຕຕ຺ຖ ໂກຈິ ປຐເມນ ເທວທູເຕນ ສຣຕິ, ໂກຈິ ທຸຕິຍຕຕິເຍຫິ, ໂກຈິ ຕີຫິປິ ນສ຺ສຣຕິ. ຕໍ ຍໂມ ຣາຊາ ທິສ຺ວາ ສຍໍ ສາເຣຕິ. ເອໂກ ກິຣ ອມຈ຺ໂຈ ສຸມນປຸປ຺ຜກຸມ຺ເຠນ ມຫາເຈຕິຍໍ ປູເຊຕ຺ວາ ຍມສ຺ສ ປຕ຺ຕິໍ ອທາສິ, ຕໍ ອກຸສລກມ຺ເມນ ນິຣເຍ ນິພ຺ພຕ຺ຕໍ ຍມສ຺ສ ສນ຺ຕິກໍ ນຍິໍສຸ. ຕສ຺ມິໍ ຕີຫິປິ ເທວທູເຕຫິ ກຸສລໍ ອສຣນ຺ເຕ ຍໂມ ສຍໍ ໂອໂລເກນ຺ໂຕ ທິສ຺ວາ – ‘‘ນນຸ ຕ຺ວໍ ມຫາເຈຕິຍໍ ສຸມນປຸປ຺ຜກຸມ຺ເຠນ ປູເຊຕ຺ວາ ມຍ຺ຫໍ ປຕ຺ຕິໍ ອທາສີ’’ຕິ ສາເຣສິ, ໂສ ຕສ຺ມິໍ ກາເລ ສຣິຕ຺ວາ ເທວໂລກໍ ຄໂຕ. ຍໂມ ປນ ສຍໍ ໂອໂລເກຕ຺ວາປິ ອປສ຺ສນ຺ໂຕ – ‘‘ມຫາທຸກ຺ຂໍ ນາມ ອນຸຠວິສ຺ສຕິ ອຍໍ ສຕ຺ໂຕ’’ຕິ ຕຸຓ຺ຫີ ອໂຫສິ.

ຕຕ຺ຕໍ ອໂຍຂິລນ຺ຕິ ຕິຄາວຸຕໍ ອຕ຺ຕຠາວໍ ສມ຺ປຊ຺ຊລິຕາຍ ໂລຫປຖວິຍາ ອຸຕ຺ຕານກໍ ນິປຊ຺ຊາເປຕ຺ວາ ທກ຺ຂິຓຫຕ຺ເຖ ຕາລປ຺ປມາຓໍ ອຍສູລໍ ປເວເສນ຺ຕິ, ຕຖາ ວາມຫຕ຺ຖາທີສຸ. ຍຖາ ຈ ຕໍ ອຸຕ຺ຕານກໍ ນິປຊ຺ຊາເປຕ຺ວາ, ເອວໍ ອຸເຣນປິ ວາມປສ຺ເສນປິ ທກ຺ຂິຓປສ຺ເສນປິ ນິປຊ຺ຊາເປຕ຺ວາ ເຕ ຕໍ ກມ຺ມກາຣຓໍ ກໂຣນ຺ຕິເຍວ. ສໍເວເສຕ຺ວາຕິ ຊລິຕາຍ ໂລຫປຖວິຍາ ຕິຄາວຸຕໍ ອຕ຺ຕຠາວໍ ນິປຊ຺ຊາເປຕ຺ວາ. ກຸຐາຣີຫີຕິ ມຫຕີຫິ ເຄຫສ຺ສ ເອກປກ຺ຂຈ຺ຉທນມຕ຺ຕາຫິ ກຸຐາຣີຫິ ຕຈ຺ຉນ຺ຕິ, ໂລຫິຕໍ ນທີ ຫຸຕ຺ວາ ສນ຺ທຕິ, ໂລຫປຖວິໂຕ ຊາລາ ອຸຏ຺ຐຫິຕ຺ວາ ຕຈ຺ຉິຕຏ຺ຐານໍ ຄຓ຺ຫາຕິ, ມຫາທຸກ຺ຂໍ ອຸປ຺ປຊ຺ຊຕິ. ຕຈ຺ຉນ຺ຕາ ປນ ສຸຕ຺ຕາຫຕໍ ກຣິຕ຺ວາ ທາຣຸໍ ວິຍ ອຏ຺ຐໍສມ຺ປິ ຉຬໍສມ຺ປິ ກໂຣນ຺ຕິ. ວາສີຫີຕິ ມຫາສຸປ຺ປປ຺ປມາຓາຫິ ວາສີຫິ. ຣເຖ ໂຍເຊຕ຺ວາຕິ ສທ຺ຘິໍ ຍຸຄໂຍຕ຺ຕປກ຺ຂຣຖຈກ຺ກກຸພ຺ພຣປາຊເນຫິ ສພ຺ພໂຕ ປຊ຺ຊລິເຕ ຣເຖ ໂຍເຊຕ຺ວາ. ມຫນ຺ຕນ຺ຕິ ມຫາກູຏາຄາຣປ຺ປມາຓໍ. ອາໂຣເປນ຺ຕີຕິ ສມ຺ປຊ຺ຊລິເຕຫິ ອຍມຸຄ຺ຄເຣຫິ ໂປເຖນ຺ຕາ ອາໂຣເປນ຺ຕິ. ສກິມ຺ປິ ອຸທ຺ຘນ຺ຕິ ສຸປກ຺ກຸຖິຕາຍ ອຸກ຺ຂລິຍາ ປກ຺ຂິຕ຺ຕຕຓ຺ຑຸລາ ວິຍ ອຸທ຺ຘມໂຘຕິຣິຍຎ຺ຈ ຄຈ຺ຉຕິ. ມຫານິຣເຍຕິ ອວີຈິມຫານິຣຍມ຺ຫິ.

ຠາຄໂສ ມິໂຕຕິ ຠາເຄ ຐເປຕ຺ວາ ວິຠຕ຺ໂຕ. ປຣິຍນ຺ໂຕຕິ ປຣິກ຺ຂິຕ຺ໂຕ. ອຍສາຕິ ອຸປຣິ ອຍປຏ຺ເຏນ ຉາທິໂຕ. ສມນ຺ຕາ ໂຍຊນສຕໍ, ຜຣິຕ຺ວາ ຕິຏ຺ຐຕີຕິ ເອວໍ ຜຣິຕ຺ວາ ຕິຏ຺ຐຕິ, ຍຖາ ຕໍ ສມນ຺ຕາ ໂຍຊນສເຕ ຐຕ຺ວາ ໂອໂລເກນ຺ຕສ຺ສ ອກ຺ຂີນິ ຍມກໂຄຬກາ ວິຍ ນິກ຺ຂມນ຺ຕິ.

ຫີນກາຍູປຄາຕິ ຫີນໍ ກາຍໍ ອຸປຄຕາ ຫຸຕ຺ວາ. ອຸປາທາເນຕິ ຕຓ຺ຫາທິຏ຺ຐິຄ຺ຄຫເຓ. ຊາຕິມຣຓສມ຺ຠເວຕິ ຊາຕິຍາ ຈ ມຣຓສ຺ສ ຈ ກາຣຓຠູເຕ. ອນຸປາທາຕິ ຈຕູຫິ ອຸປາທາເນຫິ ອນຸປາທິຍິຕ຺ວາ. ຊາຕິມຣຓສງ຺ຂເຍຕິ ຊາຕິມຣຓສງ຺ຂຍສງ຺ຂາເຕ ນິພ຺ພາເນ ວິມຸຈ຺ຈນ຺ຕິ. ທິຏ຺ຐຘມ຺ມາຠິນິພ຺ພຸຕາຕິ ທິຏ຺ຐຘມ຺ເມ ອິມສ຺ມິໍເຍວ ອຕ຺ຕຠາເວ ສພ຺ພກິເລສນິພ຺ພາເນນ ນິພ຺ພຸຕາ. ສພ຺ພທຸກ຺ຂໍ ອຸປຈ຺ຈຄຸນ຺ຕິ ສກລວຏ຺ຏທຸກ຺ຂໍ ອຕິກ຺ກນ຺ຕາ.