໕. ຫຕ຺ຖກສຸຕ຺ຕວຓ຺ຓນາ

໓໕. ປຎ຺ຈເມ ອາຬວິຍນ຺ຕິ ອາຬວິຣຏ຺ເຐ. ໂຄມຄ຺ເຄຕິ ຄຸນ຺ນໍ ຄມນມຄ຺ເຄ. ປຓ຺ຓສນ຺ຖເຣຕິ ສຍໍ ປຕິຕປຓ຺ຓສນ຺ຖເຣ. ອຖາຕິ ເອວໍ ຄຸນ຺ນໍ ຄມນມຄ຺ຄໍ ອຸຊຸໍ ມຫາປຖໍ ນິສ຺ສາຍ ສິໍສປາວເນ ສຍໍ ປຕິຕປຓ຺ຓານິ ສງ຺ກຑ຺ຒິຕ຺ວາ ກຕສນ຺ຖເຣ ສຸຄຕມຫາຈີວຣໍ ປຕ຺ຖຣິຕ຺ວາ ປລ຺ລງ຺ກໍ ອາຠຸຊິຕ຺ວາ ນິສິນ຺ເນ ຕຖາຄເຕ. ຫຕ຺ຖໂກ ອາຬວໂກຕິ ຫຕ຺ຖໂຕ ຫຕ຺ຖໍ ຄຕຕ຺ຕາ ເອວໍລທ຺ຘນາໂມ ອາຬວໂກ ຣາຊປຸຕ຺ໂຕ. ເອຕທໂວຈາຕິ ເອຕໍ ‘‘ກຈ຺ຈິ, ຠນ຺ເຕ, ຠຄວາ’’ຕິອາທິວຈນໍ ອໂວຈ. ກສ຺ມາ ປນ ສມ຺ມາສມ຺ພຸທ຺ໂຘ ຕໍ ຐານໍ ຄນ຺ຕ຺ວາ ນິສິນ຺ໂນ, ກສ຺ມາ ຣາຊກຸມາໂຣ ຕຕ຺ຖ ຄໂຕຕິ? ສມ຺ມາສມ຺ພຸທ຺ໂຘ ຕາວ ອຏ຺ຐຸປ຺ປຕ຺ຕິກາຍ ຘມ຺ມເທສນາຍ ສມຸຏ຺ຐານໍ ທິສ຺ວາ ຕຕ຺ຖ ນິສິນ຺ໂນ, ຣາຊກຸມາໂຣປິ ປາໂຕວ ອຸຏ຺ຐາຍ ປຎ຺ຈຫິ ອຸປາສກສເຕຫິ ປຣິວຸໂຕ ພຸທ຺ຘຸປຏ຺ຐານໍ ຄຈ຺ຉນ຺ໂຕ ມຫາມຄ຺ຄາ ໂອກ຺ກມ຺ມ ໂຄປຖໍ ຄເຫຕ຺ວາ ‘‘ພຸທ຺ຘານໍ ປູຊນຕ຺ຖາຍ ມິສ຺ສກມາລໍ ໂອຈິນິສ຺ສາມີ’’ຕິ ຄຈ຺ຉນ຺ໂຕ ສຕ຺ຖາຣໍ ທິສ຺ວາ ອຸປສງ຺ກມິຕ຺ວາ ວນ຺ທິຕ຺ວາ ເອກມນ຺ຕໍ ນິສີທິ, ເອວໍ ໂສ ຕຕ຺ຖ ຄໂຕຕິ. ສຸຂມສຍິຕ຺ຖາຕິ ສຸຂໍ ສຍິຕ຺ຖ.

ອນ຺ຕຣຏ຺ຐໂກຕິ ມາຆຜຄ຺ຄຸຓານໍ ອນ຺ຕເຣ ອຏ຺ຐທິວສປຣິມາໂຓ ກາໂລ. ມາຆສ຺ສ ຫິ ອວສາເນ ຈຕ຺ຕາໂຣ ທິວສາ, ຜຄ຺ຄຸຓສ຺ສ ອາທິມ຺ຫິ ຈຕ຺ຕາໂຣຕິ ອຍໍ ‘‘ອນ຺ຕຣຏ຺ຐໂກ’’ຕິ ວຸຈ຺ຈຕິ. ຫິມປາຕສມໂຍຕິ ຫິມສ຺ສ ປຕນສມໂຍ. ຂຣາຕິ ຜຣຸສາ ກກ຺ຂຬາ ວາ. ໂຄກຓ຺ຏກຫຕາຕິ ນວວຸຏ຺ເຐ ເທເວ ຄາວີນໍ ອກ຺ກນ຺ຕກ຺ກນ຺ຕຏ຺ຐາເນ ຂຸຣນ຺ຕເຣຫິ ກທ຺ທໂມ ອຸຄ຺ຄນ຺ຕ຺ວາ ຕິຏ຺ຐຕິ, ໂສ ວາຕາຕເປນ ສຸກ຺ໂຂ ກກຈທນ຺ຕສທິໂສ ໂຫຕິ ທຸກ຺ຂສມ຺ຜສ຺ໂສ. ຕໍ ສນ຺ຘາຍາຫ – ‘‘ໂຄກຓ຺ຏກຫຕາ ຠູມີ’’ຕິ. ຄຸນ຺ນໍ ຂຸຣນ຺ຕເຣຫິ ຉິນ຺ນາຕິປິ ອຕ຺ໂຖ. ເວຣມ຺ໂຠ ວາໂຕ ວາຍຕີຕິ ຈຕູຫິ ທິສາຫິ ວາຍນ຺ໂຕ ວາໂຕ ວາຍຕິ. ເອກາຍ ທິສາຍ ວາ ທ຺ວີຫິ ວາ ທິສາຫິ ຕີຫິ ວາ ທິສາຫິ ວາຍນ຺ໂຕ ວາໂຕ ເວຣມ຺ໂຠຕິ ນ ວຸຈ຺ຈຕິ.

ເຕນ ຫິ ຣາຊກຸມາຣາຕິ ອິທໍ ສຕ຺ຖາ ‘‘ອຍໍ ຣາຊກຸມາໂຣ ໂລກສ຺ມິໍ ເນວ ສຸຂວາສິໂນ, ນ ທຸກ຺ຂວາສິໂນ ຊານາຕິ, ຊານາເປສ຺ສາມິ ນ’’ນ຺ຕິ ອຸປຣິ ເທສນໍ ວຑ຺ເຒນ຺ໂຕ ອາຫ. ຕຕ຺ຖ ຍຖາ ເຕ ຂເມຍ຺ຍາຕິ ຍຖາ ຕຸຍ຺ຫໍ ຣຸຈ຺ເຈຍ຺ຍ. ອິຘສ຺ສາຕິ ອິມສ຺ມິໍ ໂລເກ ອສ຺ສ. ໂຄນກຕ຺ຖໂຕຕິ ຈຕຸຣງ຺ຄຸລາຘິກໂລເມນ ກາຬໂກຊເວນ ອຕ຺ຖໂຕ. ປຏິກຕ຺ຖໂຕຕິ ອຸຓ຺ຓາມເຍນ ເສຕຕ຺ຖຣເຓນ ອຕ຺ຖໂຕ. ປຏລິກຕ຺ຖໂຕຕິ ຆນປຸປ຺ເຜນ ອຸຓ຺ຓາມຍອຕ຺ຖຣເຓນ ອຕ຺ຖໂຕ. ກທລິມິຄປວຣປຈ຺ຈຕ຺ຖຣໂຓຕິ ກທລິມິຄຈມ຺ມມເຍນ ອຸຕ຺ຕມປຈ຺ຈຕ຺ຖຣເຓນ ອຕ຺ຖໂຕ. ຕໍ ກິຣ ປຈ຺ຈຕ຺ຖຣຓໍ ເສຕວຕ຺ຖສ຺ສ ອຸປຣິ ກທລິມິຄຈມ຺ມໍ ອຕ຺ຖຣິຕ຺ວາ ສິພ຺ພິຕ຺ວາ ກໂຣນ຺ຕິ. ສອຸຕ຺ຕຣຈ຺ຉໂທຕິ ສຫ ອຸຕ຺ຕຣຈ຺ຉເທນ, ອຸປຣິ ພທ຺ເຘນ ຣຕ຺ຕວິຕາເນນ ສທ຺ຘິນ຺ຕິ ອຕ຺ໂຖ. ອຸຠໂຕໂລຫິຕກູປຘາໂນຕິ ສີສູປຘານຎ຺ຈ ປາທູປຘານຎ຺ຈາຕິ ປລ຺ລງ຺ກສ຺ສ ອຸຠໂຕ ຐປິຕໂລຫິຕກູປຘາໂນ. ປຊາປຕິໂຍຕິ ຠຣິຍາໂຍ. ມນາເປນ ປຈ຺ຈຸປຏ຺ຐິຕາ ອສ຺ສູຕິ ມນາເປນ ອຸປຏ຺ຐານວິຘາເນນ ປຈ຺ຈຸປຏ຺ຐິຕາ ຠເວຍ຺ຍຸໍ.

ກາຍິກາຕິ ປຎ຺ຈທ຺ວາຣກາຍໍ ໂຂຠຍມານາ. ເຈຕສິກາຕິ ມໂນທ຺ວາຣໍ ໂຂຠຍມານາ. ໂສ ຣາໂຄ ຕຖາຄຕສ຺ສ ປຫີໂນຕິ ຕຖາຣູໂປ ຣາໂຄ ຕຖາຄຕສ຺ສ ປຫີໂນຕິ ອຕ຺ໂຖ. ໂຍ ປນ ຕສ຺ສ ຣາໂຄ, ນ ໂສ ຕຖາຄຕສ຺ສ ປຫີໂນ ນາມ. ໂທສໂມເຫສຸປິ ເອເສວ ນໂຍ.

ພ຺ຣາຫ຺ມໂຓຕິ ພາຫິຕປາໂປ ຂີຓາສວພ຺ຣາຫ຺ມໂຓ. ປຣິນິພ຺ພຸໂຕຕິ ກິເລສປຣິນິພ຺ພາເນນ ປຣິນິພ຺ພຸໂຕ. ນ ລິມ຺ປຕິ ກາເມສູຕິ ວຕ຺ຖຸກາເມສຸ ຈ ກິເລສກາເມສຸ ຈ ຕຓ຺ຫາທິຏ຺ຐິເລເປຫິ ນ ລິມ຺ປຕິ. ສີຕິຠູໂຕຕິ ອພ຺ຠນ຺ຕເຣ ຕາປນກິເລສານໍ ອຠາເວນ ສີຕິຠູໂຕ. ນິຣູປຘີຕິ ກິເລສູປຘີນໍ ອຠາເວນ ນິຣູປຘິ. ສພ຺ພາ ອາສຕ຺ຕິໂຍ ເຉຕ຺ວາຕິ ອາສຕ຺ຕິໂຍ ວຸຈ຺ຈນ຺ຕິ ຕຓ຺ຫາໂຍ, ຕາ ສພ຺ພາປິ ຣູປາທີສຸ ອາຣມ຺ມເຓສຸ ອາສຕ຺ຕວິສຕ຺ຕາ ອາສຕ຺ຕິໂຍ ຉິນ຺ທິຕ຺ວາ. ວິເນຍ຺ຍ ຫທເຍ ທຣນ຺ຕິ ຫທຍນິສ຺ສິຕໍ ທຣຖໍ ວິນຍິຕ຺ວາ ວູປສເມຕ຺ວາ. ສນ຺ຕິໍ ປປ຺ປຸຍ຺ຍ ເຈຕໂສຕິ ຈິຕ຺ຕສ຺ສ ກິເລສນິພ຺ພານໍ ປາປຸຓິຕ຺ວາ. ກຣຓວຈນໍ ວາ ເອຕໍ ‘‘ສພ຺ພເຈຕໂສ ສມນ຺ນາຫຣິຕ຺ວາ’’ຕິອາທີສຸ ວິຍ, ເຈຕສາ ນິພ຺ພານໍ ປາປຸຓິຕ຺ວາຕິ ອຕ຺ໂຖ.