໓. ສາຣິປຸຕ຺ຕສຸຕ຺ຕວຓ຺ຓນາ

໓໓. ຕຕິເຍ ສໍຂິຕ຺ເຕນາຕິ ມາຕິກາຐປເນນ. ວິຕ຺ຖາເຣນາຕິ ຐປິຕມາຕິກາວິຠຊເນນ. ສໍຂິຕ຺ຕວິຕ຺ຖາເຣນາຕິ ກາເລ ສໍຂິຕ຺ເຕນ ກາເລ ວິຕ຺ຖາເຣນ. ອຎ຺ຎາຕາໂຣ ຈ ທຸລ຺ລຠາຕິ ປຏິວິຊ຺ຌນກປຸຄ຺ຄລາ ປນ ທຸລ຺ລຠາ. ອິທໍ ຠຄວາ ‘‘ສາຣິປຸຕ຺ຕຕ຺ເຖຣສ຺ສ ຎາຓໍ ຆຏ຺ເຏມີ’’ຕິ ອຘິປ຺ປາເຍນ ກເຖສິ. ຕໍ ສຸຕ຺ວາ ເຖໂຣ ກິຎ຺ຈາປິ ‘‘ອຫໍ, ຠນ຺ເຕ, ອາຊານິສ຺ສາມີ’’ຕິ ນ ວທຕິ, ອຘິປ຺ປາເຍນ ປນ ‘‘ວິສ຺ສຕ຺ຖາ ຕຸມ຺ເຫ, ຠນ຺ເຕ, ເທເສຖ, ອຫໍ ຕຸມ຺ເຫຫິ ເທສິຕໍ ຘມ຺ມໍ ນຍສເຕນ ນຍສຫສ຺ເສນ ປຏິວິຊ຺ຌິສ຺ສາມິ, ມເມສ ຠາໂຣ ໂຫຕູ’’ຕິ ສຕ຺ຖາຣໍ ເທສນາຍ ອຸສ຺ສາເຫນ຺ໂຕ ເອຕສ຺ສ ຠຄວາ ກາໂລຕິອາທິມາຫ.

ອຖສ຺ສ ສຕ຺ຖາ ຕສ຺ມາຕິຫາຕິ ເທສນໍ ອາຣຠິ. ຕຕ຺ຖ ອິມສ຺ມິຎ຺ຈ ສວິຎ຺ຎາຓເກຕິອາທິ ວຸຕ຺ຕນຍເມວ. ອຈ຺ເຉຈ຺ຉິ ຕຓ຺ຫນ຺ຕິ ມຄ຺ຄຎາຓສຕ຺ເຖນ ຕຓ຺ຫໍ ຉິນ຺ທິ. ວິວຕ຺ຕຍິ ສໍໂຍຊນນ຺ຕິ ທສວິຘມ຺ປິ ສໍໂຍຊນໍ ສມູລກໍ ອຸພ຺ພຕ຺ເຕຕ຺ວາ ຉຑ຺ເຑສິ. ສມ຺ມາ ມານາຠິສມຍາ ອນ຺ຕມກາສິ ທຸກ຺ຂສ຺ສາຕິ ສມ຺ມາ ອຸປາເຍນ ສມ຺ມາ ປຏິປຕ຺ຕິຍາ ນວວິຘສ຺ສ ມານສ຺ສ ປຫານາຠິສມເຍນ ວຏ຺ຏທຸກ຺ຂສ຺ສ ອນ຺ຕມກາສິ. ອິທຎ຺ຈ ປນ ເມຕໍ, ສາຣິປຸຕ຺ຕ, ສນ຺ຘາຍ ຠາສິຕນ຺ຕິ, ສາຣິປຸຕ຺ຕ, ມຍາ ປາຣາຍເນ ອຸທຍປຎ຺ເຫ ອິທໍ ຜລສມາປຕ຺ຕິເມວ ສນ຺ຘາຍ ເອຕໍ ຠາສິຕໍ.

ອິທານິ ຍໍ ຕໍ ຠຄວຕາ ຠາສິຕໍ, ຕໍ ທສ຺ເສນ຺ໂຕ ປຫານໍ ກາມສຎ຺ຎານນ຺ຕິອາທິ ອາຣທ຺ຘໍ. ອຸທຍປຎ຺ເຫ ຈ ເອຕໍ ປທໍ ‘‘ປຫານໍ ກາມຈ຺ຉນ຺ທານ’’ນ຺ຕິ (ສຸ. ນິ. ໑໑໑໒; ຈູຬນິ. ອຸທຍມາຓວປຸຈ຺ຉານິທ຺ເທໂສ ໗໕) ອາຄຕໍ, ອິຘ ປນ ອງ຺ຄຸຕ຺ຕຣຠາຓເກຫິ ‘‘ກາມສຎ຺ຎານ’’ນ຺ຕິ ອາໂຣປິຕໍ. ຕຕ຺ຖ ພ຺ຍຎ຺ຊນເມວ ນານໍ, ອຕ຺ໂຖ ປນ ເອໂກເຍວ. ກາມສຎ຺ຎານນ຺ຕິ ກາເມ ອາຣພ຺ຠ ອຸປ຺ປນ຺ນສຎ຺ຎານໍ, ອຏ຺ຐຫິ ວາ ໂລຠສຫຄຕຈິຕ຺ເຕຫິ ສຫຊາຕສຎ຺ຎານໍ. ໂທມນສ຺ສານ ຈູຠຍນ຺ຕິ ເອຕາສຎ຺ຈ ກາມສຎ຺ຎານໍ ເຈຕສິກໂທມນສ຺ສານຎ຺ຈາຕິ ອຸຠິນ຺ນມ຺ປິ ປຫານໍ ປຏິປ຺ປສ຺ສທ຺ຘິປຫານສງ຺ຂາຕໍ ອຣຫຕ຺ຕຜລໍ ອຎ຺ຎາວິໂມກ຺ຂໍ ປພ຺ຣູມີຕິ ອຕ຺ໂຖ. ນິທ຺ເທເສ ປນ ‘‘ກາມຈ຺ຉນ຺ທສ຺ສ ຈ ໂທມນສ຺ສສ຺ສ ຈ ອຸຠິນ຺ນໍ ປຫານໍ ວູປສມໍ ປຏິນິສ຺ສຄ຺ຄໍ ປຏິປ຺ປສ຺ສທ຺ຘິໍ ອມຕໍ ນິພ຺ພານ’’ນ຺ຕິ (ຈູຬນິ. ອຸທຍມາຓວປຸຈ຺ຉານິທ຺ເທໂສ ໗໕) ວຸຕ຺ຕໍ, ຕໍ ອຕ຺ຖຸທ຺ຘາຣວເສນ ວຸຕ຺ຕໍ. ປຫານນ຺ຕິ ຫິ ຂີຓາກາຣສງ຺ຂາໂຕ ວູປສໂມປິ ວຸຈ຺ຈຕິ, ກິເລເສ ປຏິນິສ຺ສຊ຺ຊນ຺ໂຕ ມຄ຺ໂຄປິ, ກິເລສປຏິປ຺ປສ຺ສທ຺ຘິສງ຺ຂາຕໍ ຜລມ຺ປິ, ຍໍ ອາຄມ຺ມ ກິເລສາ ປຫີຍນ຺ຕິ, ຕໍ ອມຕໍ ນິພ຺ພານມ຺ປິ. ຕສ຺ມາ ຕຕ຺ຖ ຕານິ ປທານິ ອາຄຕານິ. ‘‘ອຎ຺ຎາວິໂມກ຺ຂໍ ປພ຺ຣູມີ’’ຕິ ວຈນໂຕ ປນ ອຣຫຕ຺ຕຜລເມວ ອຘິປ຺ເປຕໍ. ຖິນສ຺ສ ຈ ປນູທນນ຺ຕິປິ ຖິນສ຺ສ ຈ ປນູທນນ຺ເຕ ອຸປ຺ປນ຺ນຕ຺ຕາ ອຣຫຕ຺ຕຜລເມວ ອຘິປ຺ເປຕໍ. ກຸກ຺ກຸຈ຺ຈານໍ ນິວາຣຓນ຺ຕິ ກຸກ຺ກຸຈ຺ຈນິວາຣຓສ຺ສ ມຄ຺ຄສ຺ສ ອນນ຺ຕຣໍ ອຸປ຺ປນ຺ນຕ຺ຕາ ຜລເມວ ອຘິປ຺ເປຕໍ.

ອຸເປກ຺ຂາສຕິສໍສຸທ຺ຘນ຺ຕິ ຈຕຸຕ຺ຖຊ຺ຌານິເກ ຜເລ ອຸປ຺ປນ຺ນາຍ ອຸເປກ຺ຂາຍ ຈ ສຕິຍາ ຈ ສໍສຸທ຺ຘໍ. ຘມ຺ມຕກ຺ກປຸເຣຊວນ຺ຕິ ຘມ຺ມຕກ຺ໂກ ວຸຈ຺ຈຕິ ສມ຺ມາສງ຺ກປ຺ໂປ, ໂສ ອາທິໂຕ ໂຫຕິ, ປຸຣໂຕ ໂຫຕິ, ປຸພ຺ພງ຺ຄໂມ ໂຫຕິ ອຎ຺ຎາວິໂມກ຺ຂສ຺ສາຕິ ຘມ຺ມຕກ຺ກປຸເຣຊໂວ. ຕໍ ຘມ຺ມຕກ຺ກປຸເຣຊວໍ. ອຎ຺ຎາວິໂມກ຺ຂນ຺ຕິ ອຎ຺ຎິນ຺ທ຺ຣິຍປຣິໂຍສາເນ ອຸປ຺ປນ຺ນໍ ວິໂມກ຺ຂໍ, ອຎ຺ຎາຍ ວາ ວິໂມກ຺ຂໍ ອຎ຺ຎາວິໂມກ຺ຂໍ, ປຎ຺ຎາວິມຸຕ຺ຕນ຺ຕິ ອຕ຺ໂຖ. ອວິຊ຺ຊາຍ ປເຠທນນ຺ຕິ ອວິຊ຺ຊາຍ ປເຠທນນ຺ເຕ ອຸປ຺ປນ຺ນຕ຺ຕາ, ອວິຊ຺ຊາຍ ປເຠທນສງ຺ຂາຕໍ ວາ ນິພ຺ພານໍ ອາຣພ຺ຠ ອຸປ຺ປນ຺ນຕ຺ຕາ ເອວໍລທ຺ຘນາມໍ ອຣຫຕ຺ຕຜລເມວ. ອິຕິ ສພ຺ເພຫິປິ ອິເມຫິ ປຫານນ຺ຕິອາທີຫິ ປເທຫິ ອຣຫຕ຺ຕຜລເມວ ປກາສິຕນ຺ຕິ ເວທິຕພ຺ພໍ.