໒. ອານນ຺ທສຸຕ຺ຕວຓ຺ຓນາ

໓໒. ທຸຕິເຍ ຕຖາຣູໂປຕິ ຕຖາຊາຕິໂກ. ສມາຘິປຏິລາໂຠຕິ ຈິຕ຺ເຕກຄ຺ຄຕາລາໂຠ. ອິມສ຺ມິໍ ຈ ສວິຎ຺ຎາຓເກຕິ ເອຕ຺ຖ ອຕ຺ຕໂນ ຈ ປຣສ຺ສ ຈາຕິ ອຸຠເຍສມ຺ປິ ກາໂຍ ສວິຎ຺ຎາຓກຏ຺ເຐນ ເອກໂຕ ກຕ຺ວາ ອິມສ຺ມິນ຺ຕິ ວຸຕ຺ໂຕ. ອຫງ຺ກາຣມມງ຺ກາຣມານານຸສຍາຕິ ອຫງ຺ກາຣທິຏ຺ຐິ ຈ ມມງ຺ກາຣຕຓ຺ຫາ ຈ ມານານຸສໂຍ ຈາຕິ ອຕ຺ຕໂນ ຈ ປຣສ຺ສ ຈ ກິເລສາ. ນາສ຺ສູຕິ ນ ຠເວຍ຺ຍຸໍ. ພຫິທ຺ຘາ ຈ ສພ຺ພນິມິຕ຺ເຕສູຕິ ຣູປນິມິຕ຺ຕໍ, ສທ຺ທນິມິຕ຺ຕໍ, ຄນ຺ຘນິມິຕ຺ຕໍ, ຣສນິມິຕ຺ຕໍ, ໂຜຏ຺ຐພ຺ພນິມິຕ຺ຕໍ, ສສ຺ສຕາທິນິມິຕ຺ຕໍ, ປຸຄ຺ຄລນິມິຕ຺ຕໍ ຘມ຺ມນິມິຕ຺ຕນ຺ຕິ ເອວຣູເປສຸ ຈ ພຫິທ຺ຘາ ສພ຺ພນິມິຕ຺ເຕສຸ. ເຈໂຕວິມຸຕ຺ຕິໍ ປຎ຺ຎາວິມຸຕ຺ຕິນ຺ຕິ ຜລສມາຘິຎ຺ເຈວ ຜລຎາຓຎ຺ຈ. ສິຍາຕິ ຠເວຍ຺ຍ.

ອິຘານນ຺ທ, ຠິກ຺ຂຸໂນຕິ, ອານນ຺ທ, ອິມສ຺ມິໍ ສາສເນ ຠິກ຺ຂຸໂນ. ເອຕໍ ສນ຺ຕໍ ເອຕໍ ປຓີຕນ຺ຕິ ນິພ຺ພານໍ ທສ຺ເສນ຺ໂຕ ອາຫ. ນິພ຺ພານໍ ຫິ ກິເລສານໍ ສນ຺ຕຕາຍ ສນ຺ຕໍ ນາມ, ນິພ຺ພານໍ ສນ຺ຕນ຺ຕິ ສມາປຕ຺ຕິໍ ອປ຺ເປຕ຺ວາວ ທິວສມ຺ປິ ນິສິນ຺ນສ຺ສ ຈິຕ຺ຕຸປ຺ປາໂທ ສນ຺ຕນ຺ເຕວ ປວຕ຺ຕຕີຕິປິ ສນ຺ຕໍ. ປຓີຕນ຺ຕິ ສມາປຕ຺ຕິໍ ອປ຺ເປຕ຺ວາ ນິສິນ຺ນສ຺ສາປິ ຈິຕ຺ຕຸປ຺ປາໂທ ປຓີຕນ຺ເຕວ ປວຕ຺ຕຕີຕິ ນິພ຺ພານໍ ປຓີຕໍ ນາມ. ສພ຺ພສງ຺ຂາຣສມໂຖຕິອາທີນິປິ ຕສ຺ເສວ ເວວຈນານິ. ‘‘ສພ຺ພສງ຺ຂາຣສມໂຖ’’ຕິ ສມາປຕ຺ຕິໍ ອປ຺ເປຕ຺ວາ ນິສິນ຺ນສ຺ສ ຫິ ທິວສຠາຄມ຺ປິ ຈິຕ຺ຕຸປ຺ປາໂທ ສພ຺ພສງ຺ຂາຣສມໂຖເຕວ ປວຕ຺ຕຕິ…ເປ… ຕຖາ ຕີສຸ ຠເວສຸ ວານສງ຺ຂາຕາຍ ຕຓ຺ຫາຍ ອຠາເວນ ນິພ຺ພານນ຺ຕິ ລທ຺ຘນາເມ ຕສ຺ມິໍ ສມາປຕ຺ຕິໍ ອປ຺ເປຕ຺ວາ ນິສິນ຺ນສ຺ສ ຈິຕ຺ຕຸປ຺ປາໂທ ນິພ຺ພານໍ ນິພ຺ພານນ຺ເຕວ ປວຕ຺ຕຕີຕິ ສພ຺ພສງ຺ຂາຣສມໂຖຕິອາທີນິ ນາມານິ ລຠຕິ. ອິມສ຺ມິໍ ປນ ອຏ຺ຐວິເຘ ອາໂຠຄສມນ຺ນາຫາເຣ ອິມສ຺ມິໍ ຐາເນ ເອໂກປິ ລພ຺ຠຕິ, ທ຺ເວປິ ສພ຺ເພປິ ລພ຺ຠນ຺ເຕວ.

ສງ຺ຂາຍາຕິ ຎາເຓນ ຊານິຕ຺ວາ. ປໂຣປຣານີຕິ ປຣານິ ຈ ໂອປຣານິ ຈ. ປຣອຕ຺ຕຠາວສກອຕ຺ຕຠາວານິ ຫິ ປຣານິ ຈ ໂອປຣານິ ຈາຕິ ວຸຕ຺ຕໍ ໂຫຕິ. ຍສ຺ສາຕິ ຍສ຺ສ ອຣຫໂຕ. ອິຎ຺ຊິຕນ຺ຕິ ຣາຄິຎ຺ຊິຕໍ ໂທສໂມຫມານທິຏ຺ຐິກິເລສທຸຈ຺ຈຣິຕິຎ຺ຊິຕນ຺ຕິ ອິມານິ ສຕ຺ຕ ອິຎ຺ຊິຕານິ ຈລິຕານິ ຜນ຺ທິຕານິ. ນຕ຺ຖິ ກຸຫິຎ຺ຈີຕິ ກຕ຺ຖຈິ ເອກາຣມ຺ມເຓປິ ນຕ຺ຖິ. ສນ຺ໂຕຕິ ປຈ຺ຈນີກກິເລສານໍ ສນ຺ຕຕາຍ ສນ຺ໂຕ. ວິຘູໂມຕິ ກາຍທຸຈ຺ຈຣິຕາທິຘູມວິຣຫິໂຕ. ອນີໂຆຕິ ຣາຄາທິອີຆວິຣຫິໂຕ. ນິຣາໂສຕິ ນິຕ຺ຕຓ຺ໂຫ. ອຕາຣີຕິ ຕິຓ຺ໂຓ ອຸຕ຺ຕິຓ຺ໂຓ ສມຕິກ຺ກນ຺ໂຕ. ໂສຕິ ໂສ ອຣຫໍ ຂີຓາສໂວ. ຊາຕິຊຣນ຺ຕິ ເອຕ຺ຖ ຊາຕິຊຣາຄຫເຓເນວ ພ຺ຍາຘິມຣຓມ຺ປິ ຄຫິຕເມວາຕິ ເວທິຕພ຺ພໍ. ອິຕິ ສຸຕ຺ຕນ຺ເຕປິ ຄາຖາຍປິ ອຣຫຕ຺ຕຜລສມາປຕ຺ຕິເຍວ ກຖິຕາຕິ.