໑໐. ອາຘິປເຕຍ຺ຍສຸຕ຺ຕວຓ຺ຓນາ

໔໐. ທສເມ ອາຘິປເຕຍ຺ຍານີຕິ ເຊຏ຺ຐກກາຣຓໂຕ ນິພ຺ພຕ຺ຕານິ. ອຕ຺ຕາຘິປເຕຍ຺ຍນ຺ຕິອາທີສຸ ອຕ຺ຕານໍ ເຊຏ຺ຐກໍ ກຕ຺ວາ ນິພ຺ພຕ຺ຕິຕໍ ຄຸຓຊາຕໍ ອຕ຺ຕາຘິປເຕຍ຺ຍໍ. ໂລກໍ ເຊຏ຺ຐກໍ ກຕ຺ວາ ນິພ຺ພຕ຺ຕິຕໍ ໂລກາຘິປເຕຍ຺ຍໍ. ນວວິຘໍ ໂລກຸຕ຺ຕຣຘມ຺ມໍ ເຊຏ຺ຐກໍ ກຕ຺ວາ ນິພ຺ພຕ຺ຕິຕໍ ຘມ຺ມາຘິປເຕຍ຺ຍໍ. ນ ອິຕິ ຠວາຠວເຫຕູຕິ ອິຕິ ຠໂວ, ອິຕິ ຠໂວຕິ ເອວໍ ອາຍຕິໍ, ນ ຕສ຺ສ ຕສ຺ສ ສມ຺ປຕ຺ຕິຠວສ຺ສ ເຫຕຸ. ໂອຕິຓ຺ໂຓຕິ ອນຸປວິຏ຺ໂຐ. ຍສ຺ສ ຫິ ຊາຕິ ອນ຺ໂຕປວິຏ຺ຐາ, ໂສ ຊາຕິຍາ ໂອຕິຓ຺ໂຓ ນາມ. ຊຣາທີສຸປິ ເອເສວ ນໂຍ. ເກວລສ຺ສ ທຸກ຺ຂກ຺ຂນ຺ຘສ຺ສາຕິ ສກລສ຺ສ ວຏ຺ຏທຸກ຺ຂຣາສິສ຺ສ. ອນ຺ຕກິຣິຍາ ປຎ຺ຎາເຍຖາຕິ ອນ຺ຕກຣຓໍ ປຣິຈ຺ເຉທປຣິວຏຸມກຣຓໍ ປຎ຺ຎາເຍຍ຺ຍ. ໂອຫາຍາຕິ ປຫາຍ. ປາປິຏ຺ຐຕເຣຕິ ລາມກຕເຣ. ອາຣທ຺ຘນ຺ຕິ ປຄ຺ຄຫິຕໍ ປຣິປຸຓ຺ຓໍ, ອາຣທ຺ຘຕ຺ຕາວ ອສລ຺ລີນໍ. ອຸປຏ຺ຐິຕາຕິ ຈຕຸສຕິປຏ຺ຐານວເສນ ອຸປຏ຺ຐິຕາ. ອຸປຏ຺ຐິຕຕ຺ຕາວ ອສມ຺ມຸຏ຺ຐາ. ປສ຺ສທ຺ໂຘ ກາໂຍຕິ ນາມກາໂຍ ຈ ກຣຊກາໂຍ ຈ ປສ຺ສທ຺ໂຘ ວູປສນ຺ຕທຣໂຖ. ປສ຺ສທ຺ຘຕ຺ຕາວ ອສາຣທ຺ໂຘ. ສມາຫິຕໍ ຈິຕ຺ຕນ຺ຕິ ອາຣມ຺ມເຓ ຈິຕ຺ຕໍ ສມ຺ມາ ອາຫິຕໍ ສຸຏ຺ຐຸ ຐປິຕໍ. ສມ຺ມາ ອາຫິຕຕ຺ຕາວ ເອກຄ຺ຄໍ. ອຘິປຕິໍ ກຣິຕ຺ວາຕິ ເຊຏ຺ຐກໍ ກຕ຺ວາ. ສຸທ຺ຘໍ ອຕ຺ຕານໍ ປຣິຫຣຕີຕິ ສຸທ຺ຘໍ ນິມ຺ມລໍ ກຕ຺ວາ ອຕ຺ຕານໍ ປຣິຫຣຕິ ປຏິຊຄ຺ຄຕິ, ໂຄປາຍຕີຕິ ອຕ຺ໂຖ. ອຍຎ຺ຈ ຍາວ ອຣຫຕ຺ຕມຄ຺ຄາ ປຣິຍາເຍນ ສຸທ຺ຘມຕ຺ຕານໍ ປຣິຫຣຕິ ນາມ, ຜລປ຺ປຕ຺ໂຕວ ປນ ນິປ຺ປຣິຍາເຍນ ສຸທ຺ຘມຕ຺ຕານໍ ປຣິຫຣຕິ.

ສ຺ວາກ຺ຂາໂຕຕິອາທີນິ ວິສຸທ຺ຘິມຄ຺ເຄ (ວິສຸທ຺ຘິ. ໑.໑໔໗) ວິຕ຺ຖາຣິຕານິ. ຊານໍ ປສ຺ສໍ ວິຫຣນ຺ຕີຕິ ຕໍ ຘມ຺ມໍ ຊານນ຺ຕາ ປສ຺ສນ຺ຕາ ວິຫຣນ຺ຕິ. ອິມານິ ໂຂ, ຠິກ຺ຂເວ, ຕີຓິ ອາຘິປເຕຍ຺ຍານີຕິ ເອຕ຺ຕາວຕາ ຕີຓິ ອາຘິປເຕຍ຺ຍານິ ໂລກິຍໂລກຸຕ຺ຕຣມິສ຺ສການິ ກຖິຕານິ.

ປກຸພ຺ພໂຕຕິ ກໂຣນ຺ຕສ຺ສ. ອຕ຺ຕາ ເຕ ປຸຣິສ ຊານາຕິ, ສຈ຺ຈໍ ວາ ຍທິ ວາ ມຸສາຕິ ຍໍ ຕ຺ວໍ ກໂຣສິ, ຕໍ ຍທິ ວາ ຍຖາສຠາວໍ ຍທິ ວາ ໂນ ຍຖາສຠາວນ຺ຕິ ຕວ ອຕ຺ຕາວ ຊານາຕິ. ອິມິນາ ຈ ກາຣເຓນ ເວທິຕພ຺ພໍ ‘‘ປາປກມ຺ມໍ ກໂຣນ຺ຕສ຺ສ ໂລເກ ປຏິຈ຺ຉນ຺ນຏ຺ຐານໍ ນາມ ນຕ຺ຖີ’’ຕິ. ກລ຺ຍາຓນ຺ຕິ ສຸນ຺ທຣໍ. ອຕິມຎ຺ຎສີຕິ ອຕິກ຺ກມິຕ຺ວາ ມຎ຺ຎສິ. ອຕ຺ຕານໍ ປຣິຄູຫສີຕິ ຍຖາ ເມ ອຕ຺ຕາປິ ນ ຊານາຕິ, ເອວໍ ນໍ ປຣິຄູຫາມີຕິ ວາຍມສິ. ອຕ຺ຕາຘິປເຕຍ຺ຍໂກຕິ ອຕ຺ຕເຊຏ຺ຐໂກ. ໂລກາຘິໂປຕິ ໂລກເຊຏ຺ຐໂກ. ນິປໂກຕິ ປຎ຺ຎວາ. ຌາຍີຕິ ຌາຍນ຺ໂຕ. ຘມ຺ມາຘິໂປຕິ ຘມ຺ມເຊຏ຺ຐໂກ. ສຈ຺ຈປຣກ຺ກໂມຕິ ຖິຣປຣກ຺ກໂມ ຠູຕປຣກ຺ກໂມ. ປສຍ຺ຫ ມາຣນ຺ຕິ ມາຣໍ ປສຫິຕ຺ວາ. ອຠິຠຸຍ຺ຍ ອນ຺ຕກນ຺ຕິ ອິທໍ ຕສ຺ເສວ ເວວຈນໍ. ໂຍ ຈ ຜຸສີ ຊາຕິກ຺ຂຍໍ ປຘານວາຕິ ໂຍ ຌາຍີ ປຘານວາ ມາຣໍ ອຠິຠວິຕ຺ວາ ຊາຕິກ຺ຂຍໍ ອຣຫຕ຺ຕໍ ຜຸສິ. ໂສ ຕາທິໂສຕິ ໂສ ຕຖາວິໂຘ ຕຖາສຓ຺ຐິໂຕ. ໂລກວິທູຕິ ຕໂຍ ໂລເກ ວິທິເຕ ປາກເຏ ກຕ຺ວາ ຐິໂຕ. ສຸເມໂຘຕິ ສຸປຎ຺ໂຎ. ສພ຺ເພສຸ ຘມ຺ເມສຸ ອຕມ຺ມໂຍ ມຸນີຕິ ສພ຺ເພ ເຕຠູມກຘມ຺ເມ ຕຓ຺ຫາສງ຺ຂາຕາຍ ຕມ຺ມຍຕາຍ ອຠາເວນ ອຕມ຺ມໂຍ ຂີຓາສວມຸນິ ກທາຈິ ກຕ຺ຖຈິ ນ ຫີຍຕິ ນ ປຣິຫີຍຕີຕິ ວຸຕ຺ຕໍ ໂຫຕີຕິ.

ເທວທູຕວຄ຺ໂຄ ຈຕຸຕ຺ໂຖ.