໑໐. ວສ຺ສູປນາຍິກສຸຕ຺ຕວຓ຺ຓນາ

໑໐. ທສມໍ ອຏ຺ຐຸປ຺ປຕ຺ຕິຍໍ ວຸຕ຺ຕໍ. ກຕຣອຏ຺ຐຸປ຺ປຕ຺ຕິຍໍ? ມນຸສ຺ສານໍ ອຸຊ຺ຌາຍເນ. ຠຄວຕາ ຫິ ປຐມໂພຘິຍໍ ວີສຕິ ວສ຺ສານິ ວສ຺ສູປນາຍິກາ ອປ຺ປຎ຺ຎຕ຺ຕາ ອໂຫສິ. ຠິກ຺ຂູ ອນິພທ຺ຘວາສາ ວສ຺ເສປິ ອຸຕຸວສ຺ເສປິ ຍຖາສຸຂໍ ວິຈຣິໍສຸ. ເຕ ທິສ຺ວາ ມນຸສ຺ສາ ‘‘ກຖຎ຺ຫິ ນາມ ສມຓາ ສກ຺ຍປຸຕ຺ຕິຍາ ເຫມນ຺ຕມ຺ປິ ຄິມ຺ຫມ຺ປິ ວສ຺ສມ຺ປິ ຈາຣິກໍ ຈຣິສ຺ສນ຺ຕິ ຫຣິຕານິ ຕິຓານິ ສມ຺ມທ຺ທນ຺ຕາ ເອກິນ຺ທ຺ຣິຍໍ ຊີວໍ ວິເຫເຐນ຺ຕາ ພຫູ ຂຸທ຺ທເກ ປາເຓ ສງ຺ຆາຕໍ ອາປາເທນ຺ຕາ. ອິເມ ຫິ ນາມ ອຎ຺ຎຕິຕ຺ຖິຍາ ທຸຣກ຺ຂາຕຘມ຺ມາ ວສ຺ສາວາສໍ ອລ຺ລີຍິສ຺ສນ຺ຕິ ສໍກສາຍິສ຺ສນ຺ຕິ, ອິເມ ນາມ ສກຸຓາ ຣຸກ຺ຂຄ຺ເຄສຸ ກຸລາວການິ ກຕ຺ວາ ວສ຺ສາວາສໍ ອລ຺ລີຍິສ຺ສນ຺ຕິ ສໍກສາຍິສ຺ສນ຺ຕີ’’ຕິອາທີນິ ວຕ຺ວາ ອຸຊ຺ຌາຍິໍສຸ. ຕມຕ຺ຖໍ ຠິກ຺ຂູ ຠຄວໂຕ ອາໂຣເຈສຸໍ. ຠຄວາ ຕໍ ອຏ຺ຐຸປ຺ປຕ຺ຕິໍ ກຕ຺ວາ ອິມໍ ສຸຕ຺ຕໍ ເທເສນ຺ໂຕ ປຐມໍ ຕາວ ‘‘ອນຸຊານາມິ, ຠິກ຺ຂເວ, ວສ຺ສໍ ອຸປຄນ຺ຕຸ’’ນ຺ຕິ (ມຫາວ. ໑໘໔) ເອຕ຺ຕກເມວາຫ. ອຖ ຠິກ຺ຂູນໍ ‘‘ກທາ ນຸ ໂຂ ວສ຺ສໍ ອຸປຄນ຺ຕພ຺ພ’’ນ຺ຕິ ອຸປ຺ປນ຺ນໍ ວິຕກ຺ກໍ ສຸຕ຺ວາ ‘‘ອນຸຊານາມິ, ຠິກ຺ຂເວ, ວສ຺ສາເນ ວສ຺ສໍ ອຸປຄນ຺ຕຸ’’ນ຺ຕິ ອາຫ. ອຖ ໂຂ ຠິກ຺ຂູນໍ ເອຕທໂຫສິ – ‘‘ກຕິ ນຸ ໂຂ ວສ຺ສູປນາຍິກາ’’ຕິ. ຠຄວໂຕ ເອຕມຕ຺ຖໍ ອາໂຣເຈສຸໍ. ຕໍ ສຸຕ຺ວາ ສກລມ຺ປິ ອິທໍ ສຸຕ຺ຕໍ ເທເສນ຺ໂຕ ທ຺ເວມາ, ຠິກ຺ຂເວຕິອາທິມາຫ. ຕຕ຺ຖ ວສ຺ສູປນາຍິກາຕິ ວສ຺ສູປຄມນານິ. ປຸຣິມິກາຕິ ອປຣຊ຺ຊຸຄຕາຍ ອາສາຬ຺ຫິຍາ ອຸປຄນ຺ຕພ຺ພາ ປຸຣິມກຕ຺ຕິກປຸຓ຺ຓມິປຣິໂຍສານາ ປຐມາ ເຕມາສີ. ປຈ຺ຉິມິກາຕິ ມາສຄຕາຍ ອາສາຬ຺ຫິຍາ ອຸປຄນ຺ຕພ຺ພາ ປຈ຺ຉິມກຕ຺ຕິກປຣິໂຍສານາ ປຈ຺ຉິມາ ເຕມາສີຕິ. ທສມໍ.

ກມ຺ມກາຣຓວຄ຺ໂຄ ປຐໂມ.