(໓໕. ກ) ອໂຍນິໂສ ມນສິກາໂຣ

໙໓໖. ຕຕ຺ຖ ກຕໂມ ອໂຍນິໂສ ມນສິກາໂຣ? ອນິຈ຺ເຈ ‘‘ນິຈ຺ຈ’’ນ຺ຕິ ອໂຍນິໂສ ມນສິກາໂຣ, ທຸກ຺ເຂ ‘‘ສຸຂ’’ນ຺ຕິ ອໂຍນິໂສ ມນສິກາໂຣ, ອນຕ຺ຕນິ ‘‘ອຕ຺ຕາ’’ຕິ ອໂຍນິໂສ ມນສິກາໂຣ, ອສຸເຠ ‘‘ສຸຠ’’ນ຺ຕິ ອໂຍນິໂສ ມນສິກາໂຣ, ສຈ຺ຈວິປ຺ປຏິກຸເລນ ວາ ຈິຕ຺ຕສ຺ສ ອາວຏ຺ຏນາ ອນາວຏ຺ຏນາ ອາໂຠໂຄ ສມນ຺ນາຫາໂຣ ມນສິກາໂຣ – ອຍໍ ວຸຈ຺ຈຕິ ‘‘ອໂຍນິໂສ ມນສິກາໂຣ’’.

(ຂ) ກຸມ຺ມຄ຺ຄເສວນາ

ຕຕ຺ຖ ກຕມາ ກຸມ຺ມຄ຺ຄເສວນາ? ຕຕ຺ຖ ກຕໂມ ກຸມ຺ມຄ຺ໂຄ? ມິຈ຺ຉາທິຏ຺ຐິ, ມິຈ຺ຉາສງ຺ກປ຺ໂປ, ມິຈ຺ຉາວາຈາ, ມິຈ຺ຉາກມ຺ມນ຺ໂຕ, ມິຈ຺ຉາອາຊີໂວ, ມິຈ຺ຉາວາຍາໂມ, ມິຈ຺ຉາສຕິ, ມິຈ຺ຉາສມາຘິ – ອຍໍ ວຸຈ຺ຈຕິ ‘‘ກຸມ຺ມຄ຺ໂຄ’’. ຍາ ອິມສ຺ສ ກຸມ຺ມຄ຺ຄສ຺ສ ເສວນາ ນິເສວນາ ສໍເສວນາ ຠຊນາ ສມ຺ຠຊນາ ຠຕ຺ຕິ ສມ຺ຠຕ຺ຕິ ຕໍສມ຺ປວງ຺ກຕາ – ອຍໍ ວຸຈ຺ຈຕິ ‘‘ກຸມ຺ມຄ຺ຄເສວນາ’’.

(ຄ) ເຈຕໂສ ຈ ລີນຕ຺ຕໍ

ຕຕ຺ຖ ກຕມໍ ເຈຕໂສ ຈ ລີນຕ຺ຕໍ? ຍາ ຈິຕ຺ຕສ຺ສ ອກລ຺ຍຕາ ອກມ຺ມຎ຺ຎຕາ ໂອລີຍນາ ສລ຺ລີຍນາ ລີນໍ ລີຍນາ ລີຍິຕຕ຺ຕໍ ຖິນໍ ຖິຍນາ ຖິຍິຕຕ຺ຕໍ ຈິຕ຺ຕສ຺ສ – ອິທໍ ວຸຈ຺ຈຕິ ‘‘ເຈຕໂສ ຈ ລີນຕ຺ຕໍ’’.

ຕິກໍ.