໓. ຕິກນິທ຺ເທໂສ
(໑) ຕີຓິ ອກຸສລມູລານິ
໙໐໙. ຕຕ຺ຖ ກຕມານິ ຕີຓິ ອກຸສລມູລານິ? ໂລໂຠ, ໂທໂສ, ໂມໂຫ.
(ກ) ຕຕ຺ຖ ກຕໂມ ໂລໂຠ? ໂຍ ຣາໂຄ ສາຣາໂຄ ອນຸນໂຍ ອນຸໂຣໂຘ ນນ຺ທີ ນນ຺ທິຣາໂຄ ຈິຕ຺ຕສ຺ສ ສາຣາໂຄ ອິຈ຺ຉາ ມຸຈ຺ຉາ ອຊ຺ໂຌສານໍ ເຄໂຘ ປຣິເຄໂຘ ສງ຺ໂຄ ປງ຺ໂກ ເອຊາ ມາຍາ ຊນິກາ ສຎ຺ຊນນີ ສິພ຺ພິນີ ຊາລິນີ ສຣິຕາ ວິສຕ຺ຕິກາ ໂສຕໍ ວິສຏາ [ວິສທາ (ສີ. ກ.) ຘ. ສ. ໑໑໔໑] ອາຍູຫນີ [ອາຍູຫິນີ (ກ.)] ທຸຕິຍາ ປຓິຘິ ຠວເນຕ຺ຕິ ວນໍ ວນໂຖ ສນ຺ຖໂວ [ສນ຺ຘໂວ (ກ.)] ສິເນໂຫ ອເປກ຺ຂາ ປຏິພນ຺ຘຸ ອາສາ ອາສີສນາ ອາສີສິຕຕ຺ຕໍ [ອາສິໍສນາ ອາສິໍສິຕຕ຺ຕໍ (ສີ. ສ຺ຍາ.)] ຣູປາສາ ສທ຺ທາສາ ຄນ຺ຘາສາ ຣສາສາ ໂຜຏ຺ຐພ຺ພາສາ ລາຠາສາ ຘນາສາ ປຸຕ຺ຕາສາ ຊີວິຕາສາ ຊປ຺ປາ ອຠິຊປ຺ປາ ຊປ຺ປນາ ຊປ຺ປິຕຕ຺ຕໍ ໂລລຸປ຺ປໍ ໂລລຸປ຺ປາຍນາ ໂລລຸປ຺ປາຍິຕຕ຺ຕໍ ປຸຈ຺ຉຎ຺ຊິກຕາ ສາຘຸກມ຺ຍຕາ ອຘມ຺ມຣາໂຄ ວິສມໂລໂຠ ນິກນ຺ຕິ ນິກາມນາ ປຕ຺ຖນາ ປິຫນາ ສມ຺ປຕ຺ຖນາ ກາມຕຓ຺ຫາ ຠວຕຓ຺ຫາ ວິຠວຕຓ຺ຫາ ຣູປຕຓ຺ຫາ ອຣູປຕຓ຺ຫາ ນິໂຣຘຕຓ຺ຫາ ສທ຺ທຕຓ຺ຫາ ຣູປຕຓ຺ຫາ ຄນ຺ຘຕຓ຺ຫາ ຣສຕຓ຺ຫາ ໂຜຏ຺ຐພ຺ພຕຓ຺ຫາ ຘມ຺ມຕຓ຺ຫາ ໂອໂຆ ໂຍໂຄ ຄນ຺ໂຖ ອຸປາທານໍ ອາວຣຓໍ ນີວຣຓໍ ຉທນໍ ພນ຺ຘນໍ ອຸປກ຺ກິເລໂສ ອນຸສໂຍ ປຣິຍຸຏ຺ຐານໍ ລຕາ ເວວິຈ຺ຉໍ ທຸກ຺ຂມູລໍ ທຸກ຺ຂນິທານໍ ທຸກ຺ຂປ຺ປຠໂວ ມາຣປາໂສ ມາຣພຬິສໍ ມາຣວິສໂຍ ຕຓ຺ຫານທີ ຕຓ຺ຫາຊາລໍ ຕຓ຺ຫາຄທ຺ທຸລໍ ຕຓ຺ຫາສມຸທ຺ໂທ ອຠິຊ຺ຌາ ໂລໂຠ ອກຸສລມູລໍ – ອຍໍ ວຸຈ຺ຈຕິ ‘‘ໂລໂຠ’’.
(ຂ) ຕຕ຺ຖ ກຕໂມ ໂທໂສ? ‘‘ອນຕ຺ຖໍ ເມ ອຈຣີ’’ຕິ ອາຆາໂຕ ຊາຍຕິ, ‘‘ອນຕ຺ຖໍ ເມ ຈຣຕີ’’ຕິ ອາຆາໂຕ ຊາຍຕິ, ‘‘ອນຕ຺ຖໍ ເມ ຈຣິສ຺ສຕີ’’ຕິ ອາຆາໂຕ ຊາຍຕິ, ‘‘ປິຍສ຺ສ ເມ ມນາປສ຺ສ ອນຕ຺ຖໍ ອຈຣິ’’…ເປ… ອນຕ຺ຖໍ ຈຣຕິ…ເປ… ‘‘ອນຕ຺ຖໍ ຈຣິສ຺ສຕີ’’ຕິ ອາຆາໂຕ ຊາຍຕິ, ‘‘ອປ຺ປິຍສ຺ສ ເມ ອມນາປສ຺ສ ອຕ຺ຖໍ ອຈຣິ’’…ເປ… ອຕ຺ຖໍ ຈຣຕິ…ເປ… ‘‘ອຕ຺ຖໍ ຈຣິສ຺ສຕີ’’ຕິ ອາຆາໂຕ ຊາຍຕິ, ອຏ຺ຐາເນ ວາ ປນ ອາຆາໂຕ ຊາຍຕິ. ໂຍ ເອວຣູໂປ ຈິຕ຺ຕສ຺ສ ອາຆາໂຕ ປຏິຆາໂຕ ປຏິຆໍ ປຏິວິໂຣໂຘ ໂກໂປ ປໂກໂປ ສມ຺ປໂກໂປ ໂທໂສ ປໂທໂສ ສມ຺ປໂທໂສ ຈິຕ຺ຕສ຺ສ ພ຺ຍາປຕ຺ຕິ ມໂນປໂທໂສ ໂກໂຘ ກຸຊ຺ຌນາ ກຸຊ຺ຌິຕຕ຺ຕໍ ໂທໂສ ທຸສ຺ສນາ ທຸສ຺ສິຕຕ຺ຕໍ ພ຺ຍາປຕ຺ຕິ ພ຺ຍາປຊ຺ຊນາ ພ຺ຍາປຊ຺ຊິຕຕ຺ຕໍ ວິໂຣໂຘ ປຏິວິໂຣໂຘ ຈຓ຺ຑິກ຺ກໍ ອສຸໂຣໂປ ອນຕ຺ຕມນຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ໂທໂສ’’.
(ຄ) ຕຕ຺ຖ ກຕໂມ ໂມໂຫ? ທຸກ຺ເຂ ອຎ຺ຎາຓໍ, ທຸກ຺ຂສມຸທເຍ ອຎ຺ຎາຓໍ, ທຸກ຺ຂນິໂຣເຘ ອຎ຺ຎາຓໍ, ທຸກ຺ຂນິໂຣຘຄາມິນິຍາ ປຏິປທາຍ ອຎ຺ຎາຓໍ, ປຸພ຺ພນ຺ເຕ ອຎ຺ຎາຓໍ, ອປຣນ຺ເຕ ອຎ຺ຎາຓໍ, ປຸພ຺ພນ຺ຕາປຣນ຺ເຕ ອຎ຺ຎາຓໍ, ອິທປ຺ປຈ຺ຈຍຕາ ປຏິຈ຺ຈສມຸປ຺ປນ຺ເນສຸ ຘມ຺ເມສຸ ອຎ຺ຎາຓໍ, ຍໍ ເອວຣູປໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ໂມໂຫ’’. ອິມານິ ຕີຓິ ອກຸສລມູລານິ.
(໒) ຕໂຍ ອກຸສລວິຕກ຺ກາ
໙໑໐. ຕຕ຺ຖ ກຕເມ ຕໂຍ ອກຸສລວິຕກ຺ກາ? ກາມວິຕກ຺ໂກ, ພ຺ຍາປາທວິຕກ຺ໂກ, ວິຫິໍສາວິຕກ຺ໂກ.
(ກ) ຕຕ຺ຖ ກຕໂມ ກາມວິຕກ຺ໂກ? ກາມປຏິສໍຍຸຕ຺ໂຕ ຕກ຺ໂກ ວິຕກ຺ໂກ ມິຈ຺ຉາສງ຺ກປ຺ໂປ – ອຍໍ ວຸຈ຺ຈຕິ ‘‘ກາມວິຕກ຺ໂກ’’.
(ຂ) ຕຕ຺ຖ ກຕໂມ ພ຺ຍາປາທວິຕກ຺ໂກ? ພ຺ຍາປາທປຏິສໍຍຸຕ຺ໂຕ ຕກ຺ໂກ ວິຕກ຺ໂກ ມິຈ຺ຉາສງ຺ກປ຺ໂປ – ອຍໍ ວຸຈ຺ຈຕິ ‘‘ພ຺ຍາປາທວິຕກ຺ໂກ’’.
(ຄ) ຕຕ຺ຖ ກຕໂມ ວິຫິໍສາວິຕກ຺ໂກ? ວິຫິໍສາປຏິສໍຍຸຕ຺ໂຕ ຕກ຺ໂກ ວິຕກ຺ໂກ ມິຈ຺ຉາສງ຺ກປ຺ໂປ – ອຍໍ ວຸຈ຺ຈຕິ ‘‘ວິຫິໍສາວິຕກ຺ໂກ’’. ອິເມ ຕໂຍ ອກຸສລວິຕກ຺ກາ.
(໓) ຕິສ຺ໂສ ອກຸສລສຎ຺ຎາ
໙໑໑. ຕຕ຺ຖ ກຕມາ ຕິສ຺ໂສ ອກຸສລສຎ຺ຎາ? ກາມສຎ຺ຎາ, ພ຺ຍາປາທສຎ຺ຎາ, ວິຫິໍສາສຎ຺ຎາ.
(ກ) ຕຕ຺ຖ ກຕມາ ກາມສຎ຺ຎາ? ກາມປຏິສໍຍຸຕ຺ຕາ ສຎ຺ຎາ ສຎ຺ຊານນາ ສຎ຺ຊານິຕຕ຺ຕໍ – ອຍໍ ວຸຈ຺ຈຕິ ‘‘ກາມສຎ຺ຎາ’’.
(ຂ) ຕຕ຺ຖ ກຕມາ ພ຺ຍາປາທສຎ຺ຎາ? ພ຺ຍາປາທປຏິສໍຍຸຕ຺ຕາ ສຎ຺ຎາ ສຎ຺ຊານນາ ສຎ຺ຊານິຕຕ຺ຕໍ – ອຍໍ ວຸຈ຺ຈຕິ ‘‘ພ຺ຍາປາທສຎ຺ຎາ’’.
(ຄ) ຕຕ຺ຖ ກຕມາ ວິຫິໍສາສຎ຺ຎາ? ວິຫິໍສາປຏິສໍຍຸຕ຺ຕາ ສຎ຺ຎາ ສຎ຺ຊານນາ ສຎ຺ຊານິຕຕ຺ຕໍ – ອຍໍ ວຸຈ຺ຈຕິ ‘‘ວິຫິໍສາສຎ຺ຎາ’’. ອິມາ ຕິສ຺ໂສ ອກຸສລສຎ຺ຎາ.
(໔) ຕິສ຺ໂສ ອກຸສລຘາຕຸໂຍ
໙໑໒. ຕຕ຺ຖ ກຕມາ ຕິສ຺ໂສ ອກຸສລຘາຕຸໂຍ? ກາມຘາຕຸ, ພ຺ຍາປາທຘາຕຸ, ວິຫິໍສາຘາຕຸ.
ຕຕ຺ຖ ກຕມາ ກາມຘາຕຸ? ກາມວິຕກ຺ໂກ ກາມຘາຕຸ. ພ຺ຍາປາທວິຕກ຺ໂກ ພ຺ຍາປາທຘາຕຸ. ວິຫິໍສາວິຕກ຺ໂກ ວິຫິໍສາຘາຕຸ.
(ກ) ຕຕ຺ຖ ກຕໂມ ກາມວິຕກ຺ໂກ? ກາມປຏິສໍຍຸຕ຺ໂຕ ຕກ຺ໂກ ວິຕກ຺ໂກ ມິຈ຺ຉາສງ຺ກປ຺ໂປ – ອຍໍ ວຸຈ຺ຈຕິ ‘‘ກາມວິຕກ຺ໂກ’’.
(ຂ) ຕຕ຺ຖ ກຕໂມ ພ຺ຍາປາທວິຕກ຺ໂກ? ພ຺ຍາປາທປຏິສໍຍຸຕ຺ໂຕ ຕກ຺ໂກ ວິຕກ຺ໂກ ມິຈ຺ຉາສງ຺ກປ຺ໂປ – ອຍໍ ວຸຈ຺ຈຕິ ‘‘ພ຺ຍາປາທວິຕກ຺ໂກ’’.
(ຄ) ຕຕ຺ຖ ກຕໂມ ວິຫິໍສາວິຕກ຺ໂກ? ວິຫິໍສາປຏິສໍຍຸຕ຺ໂຕ ຕກ຺ໂກ ວິຕກ຺ໂກ ມິຈ຺ຉາສງ຺ກປ຺ໂປ – ອຍໍ ວຸຈ຺ຈຕິ ‘‘ວິຫິໍສາວິຕກ຺ໂກ’’. ອິມາ ຕິສ຺ໂສ ອກຸສລຘາຕຸໂຍ.
(໕) ຕີຓິ ທຸຈ຺ຈຣິຕານິ
໙໑໓. ຕຕ຺ຖ ກຕມານິ ຕີຓິ ທຸຈ຺ຈຣິຕານິ? ກາຍທຸຈ຺ຈຣິຕໍ, ວຈີທຸຈ຺ຈຣິຕໍ, ມໂນທຸຈ຺ຈຣິຕໍ.
(ກ) ຕຕ຺ຖ ກຕມໍ ກາຍທຸຈ຺ຈຣິຕໍ? ປາຓາຕິປາໂຕ, ອທິນ຺ນາທານໍ, ກາເມສຸມິຈ຺ຉາຈາໂຣ – ອິທໍ ວຸຈ຺ຈຕິ ‘‘ກາຍທຸຈ຺ຈຣິຕໍ’’.
(ຂ) ຕຕ຺ຖ ກຕມໍ ວຈີທຸຈ຺ຈຣິຕໍ? ມຸສາວາໂທ, ປິສຸຓາ ວາຈາ, ຜຣຸສາ ວາຈາ, ສມ຺ຜປ຺ປລາໂປ – ອິທໍ ວຸຈ຺ຈຕິ ‘‘ວຈີທຸຈ຺ຈຣິຕໍ’’.
(ຄ) ຕຕ຺ຖ ກຕມໍ ມໂນທຸຈ຺ຈຣິຕໍ? ອຠິຊ຺ຌາ, ພ຺ຍາປາໂທ, ມິຈ຺ຉາທິຏ຺ຐິ – ອິທໍ ວຸຈ຺ຈຕິ ‘‘ມໂນທຸຈ຺ຈຣິຕໍ’’.
(ກ-ຄ) ຕຕ຺ຖ ກຕມໍ ກາຍທຸຈ຺ຈຣິຕໍ? ອກຸສລໍ ກາຍກມ຺ມໍ ກາຍທຸຈ຺ຈຣິຕໍ, ອກຸສລໍ ວຈີກມ຺ມໍ ວຈີທຸຈ຺ຈຣິຕໍ, ອກຸສລໍ ມໂນກມ຺ມໍ ມໂນທຸຈ຺ຈຣິຕໍ.
ຕຕ຺ຖ ກຕມໍ ອກຸສລໍ ກາຍກມ຺ມໍ? ອກຸສລາ ກາຍສຎ຺ເຈຕນາ ອກຸສລໍ ກາຍກມ຺ມໍ, ອກຸສລາ ວຈີສຎ຺ເຈຕນາ ອກຸສລໍ ວຈີກມ຺ມໍ, ອກຸສລາ ມໂນສຎ຺ເຈຕນາ ອກຸສລໍ ມໂນກມ຺ມໍ. ອິມານິ ຕີຓິ ທຸຈ຺ຈຣິຕານິ.
(໖) ຕໂຍ ອາສວາ
໙໑໔. ຕຕ຺ຖ ກຕເມ ຕໂຍ ອາສວາ? ກາມາສໂວ, ຠວາສໂວ, ອວິຊ຺ຊາສໂວ.
(ກ) ຕຕ຺ຖ ກຕໂມ ກາມາສໂວ? ໂຍ ກາເມສຸ ກາມຈ຺ຉນ຺ໂທ ກາມຣາໂຄ ກາມນນ຺ທີ ກາມຕຓ຺ຫາ ກາມສິເນໂຫ ກາມປຣິຬາໂຫ ກາມມຸຈ຺ຉາ ກາມຊ຺ໂຌສານໍ – ອຍໍ ວຸຈ຺ຈຕິ ‘‘ກາມາສໂວ’’.
(ຂ) ຕຕ຺ຖ ກຕໂມ ຠວາສໂວ? ໂຍ ຠເວສຸ ຠວຈ຺ຉນ຺ໂທ…ເປ… ຠວຊ຺ໂຌສານໍ – ອຍໍ ວຸຈ຺ຈຕິ ‘‘ຠວາສໂວ’’.
(ຄ) ຕຕ຺ຖ ກຕໂມ ອວິຊ຺ຊາສໂວ? ທຸກ຺ເຂ ອຎ຺ຎາຓໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາສໂວ’’. ອິເມ ຕໂຍ ອາສວາ.
(໗) ຕີຓິ ສໍໂຍຊນານິ
໙໑໕. ຕຕ຺ຖ ກຕມານິ ຕີຓິ ສໍໂຍຊນານິ? ສກ຺ກາຍທິຏ຺ຐິ, ວິຈິກິຈ຺ຉາ, ສີລພ຺ພຕປຣາມາໂສ.
(ກ) ຕຕ຺ຖ ກຕມາ ສກ຺ກາຍທິຏ຺ຐິ? ອິຘ ອສ຺ສຸຕວາ ປຸຖຸຊ຺ຊໂນ ອຣິຍານໍ ອທສ຺ສາວີ ອຣິຍຘມ຺ມສ຺ສ ອໂກວິໂທ ອຣິຍຘມ຺ເມ ອວິນີໂຕ, ສປ຺ປຸຣິສານໍ ອທສ຺ສາວີ ສປ຺ປຸຣິສຘມ຺ມສ຺ສ ອໂກວິໂທ ສປ຺ປຸຣິສຘມ຺ເມ ອວິນີໂຕ – ຣູປໍ ອຕ຺ຕໂຕ ສມນຸປສ຺ສຕິ ຣູປວນ຺ຕໍ ວາ ອຕ຺ຕານໍ ອຕ຺ຕນິ ວາ ຣູປໍ ຣູປສ຺ມິໍ ວາ ອຕ຺ຕານໍ. ເວທນໍ…ເປ… ສຎ຺ຎໍ…ເປ… ສງ຺ຂາເຣ…ເປ… ວິຎ຺ຎາຓໍ ອຕ຺ຕໂຕ ສມນຸປສ຺ສຕິ ວິຎ຺ຎາຓວນ຺ຕໍ ວາ ອຕ຺ຕານໍ ອຕ຺ຕນິ ວາ ວິຎ຺ຎາຓໍ ວິຎ຺ຎາຓສ຺ມິໍ ວາ ອຕ຺ຕານໍ. ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ‘‘ສກ຺ກາຍທິຏ຺ຐິ’’.
(ຂ) ຕຕ຺ຖ ກຕມາ ວິຈິກິຈ຺ຉາ? ສຕ຺ຖຣິ ກງ຺ຂຕິ ວິຈິກິຈ຺ຉຕິ, ຘມ຺ເມ ກງ຺ຂຕິ ວິຈິກິຈ຺ຉຕິ, ສງ຺ເຆ ກງ຺ຂຕິ ວິຈິກິຈ຺ຉຕິ, ສິກ຺ຂາຍ ກງ຺ຂຕິ ວິຈິກິຈ຺ຉຕິ, ປຸພ຺ພນ຺ເຕ ກງ຺ຂຕິ ວິຈິກິຈ຺ຉຕິ, ອປຣນ຺ເຕ ກງ຺ຂຕິ ວິຈິກິຈ຺ຉຕິ, ປຸພ຺ພນ຺ຕາປຣນ຺ເຕ ກງ຺ຂຕິ ວິຈິກິຈ຺ຉຕິ, ອິທປ຺ປຈ຺ຈຍຕາປຏິຈ຺ຈສມຸປ຺ປນ຺ເນສຸ ຘມ຺ເມສຸ ກງ຺ຂຕິ ວິຈິກິຈ຺ຉຕິ. ຍາ ເອວຣູປາ ກງ຺ຂາ ກງ຺ຂາຍນາ ກງ຺ຂາຍິຕຕ຺ຕໍ ຖມ຺ຠິຕຕ຺ຕໍ ຈິຕ຺ຕສ຺ສ ມໂນວິເລໂຂ – ອຍໍ ວຸຈ຺ຈຕິ ‘‘ວິຈິກິຈ຺ຉາ’’.
(ຄ) ຕຕ຺ຖ ກຕໂມ ສີລພ຺ພຕປຣາມາໂສ? ‘‘ອິໂຕ ພຫິທ຺ຘາ ສມຓພ຺ຣາຫ຺ມຓານໍ ສີເລນ ສຸທ຺ຘິ ວເຕນ ສຸທ຺ຘິ ສີລພ຺ພເຕນ ສຸທ຺ຘີ’’ຕິ – ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ‘‘ສີລພ຺ພຕປຣາມາໂສ’’. ອິມານິ ຕີຓິ ສໍໂຍຊນານິ.
(໘) ຕິສ຺ໂສ ຕຓ຺ຫາ
໙໑໖. ຕຕ຺ຖ ກຕມາ ຕິສ຺ໂສ ຕຓ຺ຫາ? ກາມຕຓ຺ຫາ, ຠວຕຓ຺ຫາ, ວິຠວຕຓ຺ຫາ.
ຕຕ຺ຖ ກຕມາ ຠວຕຓ຺ຫາ? ຠວທິຏ຺ຐິສຫຄໂຕ ຣາໂຄ ສາຣາໂຄ ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ຠວຕຓ຺ຫາ’’.
ຕຕ຺ຖ ກຕມາ ວິຠວຕຓ຺ຫາ? ອຸຈ຺ເຉທທິຏ຺ຐິສຫຄໂຕ ຣາໂຄ ສາຣາໂຄ ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ວິຠວຕຓ຺ຫາ’’. ອວເສສາ ຕຓ຺ຫາ ກາມຕຓ຺ຫາ.
ຕຕ຺ຖ ກຕມາ ກາມຕຓ຺ຫາ? ກາມຘາຕຸປຏິສໍຍຸຕ຺ໂຕ ຣາໂຄ ສາຣາໂຄ ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ກາມຕຓ຺ຫາ’’.
( ) [(ຕຕ຺ຖ ກຕມາ ຠວຕຓ຺ຫາ)] ຣູປຘາຕຸອຣູປຘາຕຸປຏິສໍຍຸຕ຺ໂຕ ຣາໂຄ ສາຣາໂຄ ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ຠວຕຓ຺ຫາ’’.
( ) [(ຕຕ຺ຖ ກຕມາ ວິຠວຕຓ຺ຫາ) (?)] ອຸຈ຺ເຉທທິຏ຺ຐິສຫຄໂຕ ຣາໂຄ ສາຣາໂຄ ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ວິຠວຕຓ຺ຫາ’’. ອິມາ ຕິສ຺ໂສ ຕຓ຺ຫາ.
(໙) ອປຣາປິ ຕິສ຺ໂສ ຕຓ຺ຫາ
໙໑໗. ຕຕ຺ຖ ກຕມາ ອປຣາປິ ຕິສ຺ໂສ ຕຓ຺ຫາ? ກາມຕຓ຺ຫາ, ຣູປຕຓ຺ຫາ, ອຣູປຕຓ຺ຫາ.
(ກ) ຕຕ຺ຖ ກຕມາ ກາມຕຓ຺ຫາ? ກາມຘາຕຸປຏິສໍຍຸຕ຺ໂຕ ຣາໂຄ ສາຣາໂຄ ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ກາມຕຓ຺ຫາ’’.
(ຂ) ຕຕ຺ຖ ກຕມາ ຣູປຕຓ຺ຫາ? ຣູປຘາຕຸປຏິສໍຍຸຕ຺ໂຕ ຣາໂຄ ສາຣາໂຄ ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ຣູປຕຓ຺ຫາ’’.
(ຄ) ຕຕ຺ຖ ກຕມາ ອຣູປຕຓ຺ຫາ? ອຣູປຘາຕຸປຏິສໍຍຸຕ຺ໂຕ ຣາໂຄ ສາຣາໂຄ ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ອຣູປຕຓ຺ຫາ’’. ອິມາ ຕິສ຺ໂສ ຕຓ຺ຫາ.
(໑໐) ອປຣາປິ ຕິສ຺ໂສ ຕຓ຺ຫາ
໙໑໘. ຕຕ຺ຖ ກຕມາ ອປຣາປິ ຕິສ຺ໂສ ຕຓ຺ຫາ? ຣູປຕຓ຺ຫາ, ອຣູປຕຓ຺ຫາ, ນິໂຣຘຕຓ຺ຫາ.
(ກ) ຕຕ຺ຖ ກຕມາ ຣູປຕຓ຺ຫາ? ຣູປຘາຕຸປຏິສໍຍຸຕ຺ໂຕ ຣາໂຄ ສາຣາໂຄ ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ຣູປຕຓ຺ຫາ’’.
(ຂ) ຕຕ຺ຖ ກຕມາ ອຣູປຕຓ຺ຫາ? ອຣູປຘາຕຸປຏິສໍຍຸຕ຺ໂຕ ຣາໂຄ ສາຣາໂຄ ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ອຣູປຕຓ຺ຫາ’’.
(ຄ) ຕຕ຺ຖ ກຕມາ ນິໂຣຘຕຓ຺ຫາ? ອຸຈ຺ເຉທທິຏ຺ຐິສຫຄໂຕ ຣາໂຄ ສາຣາໂຄ ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ນິໂຣຘຕຓ຺ຫາ’’. ອິມາ ຕິສ຺ໂສ ຕຓ຺ຫາ.
(໑໑) ຕິສ຺ໂສ ເອສນາ
໙໑໙. ຕຕ຺ຖ ກຕມາ ຕິສ຺ໂສ ເອສນາ? ກາເມສນາ, ຠເວສນາ, ພ຺ຣຫ຺ມຈຣິເຍສນາ.
(ກ) ຕຕ຺ຖ ກຕມາ ກາເມສນາ? ໂຍ ກາເມສຸ ກາມຈ຺ຉນ຺ໂທ…ເປ… ກາມຊ຺ໂຌສານໍ – ອຍໍ ວຸຈ຺ຈຕິ ‘‘ກາເມສນາ’’.
(ຂ) ຕຕ຺ຖ ກຕມາ ຠເວສນາ? ໂຍ ຠເວສຸ ຠວຈ຺ຉນ຺ໂທ…ເປ… ຠວຊ຺ໂຌສານໍ – ອຍໍ ວຸຈ຺ຈຕິ ‘‘ຠເວສນາ’’.
(ຄ) ຕຕ຺ຖ ກຕມາ ພ຺ຣຫ຺ມຈຣິເຍສນາ? ‘‘ສສ຺ສໂຕ ໂລໂກ’’ຕິ ວາ, ‘‘ອສສ຺ສໂຕ ໂລໂກ’’ຕິ – ວາ…ເປ… ‘‘ເນວ ໂຫຕິ ນ ນ ໂຫຕິ ຕຖາຄໂຕ ປຣໍ ມຣຓາ’’ຕິ ວາ ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ‘‘ພ຺ຣຫ຺ມຈຣິເຍສນາ’’.
(ກ) ຕຕ຺ຖ ກຕມາ ກາເມສນາ, ກາມຣາໂຄ, ຕເທກຏ຺ຐໍ ອກຸສລໍ ກາຍກມ຺ມໍ ວຈີກມ຺ມໍ ມໂນກມ຺ມໍ – ອຍໍ ວຸຈ຺ຈຕິ ‘‘ກາເມສນາ’’.
(ຂ) ຕຕ຺ຖ ກຕມາ ຠເວສນາ, ຠວຣາໂຄ ຕເທກຏ຺ຐໍ ອກຸສລໍ ກາຍກມ຺ມໍ ວຈີກມ຺ມໍ ມໂນກມ຺ມໍ – ອຍໍ ວຸຈ຺ຈຕິ ‘‘ຠເວສນາ’’.
(ຄ) ຕຕ຺ຖ ກຕມາ ພ຺ຣຫ຺ມຈຣິເຍສນາ, ອນ຺ຕຄ຺ຄາຫິກາ ທິຏ຺ຐິ ຕເທກຏ຺ຐໍ ອກຸສລໍ ກາຍກມ຺ມໍ ວຈີກມ຺ມໍ ມໂນກມ຺ມໍ – ອຍໍ ວຸຈ຺ຈຕິ ‘‘ພ຺ຣຫ຺ມຈຣິເຍສນາ’’. ອິມາ ຕິສ຺ໂສ ເອສນາ.
(໑໒) ຕິສ຺ໂສ ວິຘາ
໙໒໐. ຕຕ຺ຖ ກຕມາ ຕິສ຺ໂສ ວິຘາ? ‘‘ເສຍ຺ໂຍຫມສ຺ມີ’’ຕິ ວິຘາ, ‘‘ສທິໂສຫມສ຺ມີ’’ຕິ ວິຘາ, ‘‘ຫີໂນຫມສ຺ມີ’’ຕິ ວິຘາ – ອິມາ ຕິສ຺ໂສ ວິຘາ.
(໑໓) ຕີຓິ ຠຍານິ
໙໒໑. ຕຕ຺ຖ ກຕມານິ ຕີຓິ ຠຍານິ? ຊາຕິຠຍໍ, ຊຣາຠຍໍ, ມຣຓຠຍໍ.
(ກ) ຕຕ຺ຖ ກຕມໍ ຊາຕິຠຍໍ? ຊາຕິໍ ປຏິຈ຺ຈ ຠຍໍ ຠຍານກໍ ຉມ຺ຠິຕຕ຺ຕໍ ໂລມຫໍໂສ ເຈຕໂສ ອຸຕ຺ຣາໂສ – ອິທໍ ວຸຈ຺ຈຕິ ‘‘ຊາຕິຠຍໍ’’.
(ຂ) ຕຕ຺ຖ ກຕມໍ ຊຣາຠຍໍ? ຊຣໍ ປຏິຈ຺ຈ ຠຍໍ ຠຍານກໍ ຉມ຺ຠິຕຕ຺ຕໍ ໂລມຫໍໂສ ເຈຕໂສ ອຸຕ຺ຣາໂສ – ອິທໍ ວຸຈ຺ຈຕິ ‘‘ຊຣາຠຍໍ’’.
(ຄ) ຕຕ຺ຖ ກຕມໍ ມຣຓຠຍໍ? ມຣຓໍ ປຏິຈ຺ຈ ຠຍໍ ຠຍານກໍ ຉມ຺ຠິຕຕ຺ຕໍ ໂລມຫໍໂສ ເຈຕໂສ ອຸຕ຺ຣາໂສ – ອິທໍ ວຸຈ຺ຈຕິ ‘‘ມຣຓຠຍໍ’’. ອິມານິ ຕີຓິ ຠຍານິ.
(໑໔) ຕີຓິ ຕມານິ
໙໒໒. ຕຕ຺ຖ ກຕມານິ ຕີຓິ ຕມານິ? ອຕີຕໍ ວາ ອທ຺ຘານໍ ອາຣພ຺ຠ ກງ຺ຂຕິ ວິຈິກິຈ຺ຉຕິ ນາຘິມຸຈ຺ຈຕິ ນ ສມ຺ປສີທຕິ, ອນາຄຕໍ ວາ ອທ຺ຘານໍ ອາຣພ຺ຠ ກງ຺ຂຕິ ວິຈິກິຈ຺ຉຕິ ນາຘິມຸຈ຺ຈຕິ ນ ສມ຺ປສີທຕິ, ເອຕຣຫິ ວາ ປຈ຺ຈຸປ຺ປນ຺ນໍ ອທ຺ຘານໍ ອາຣພ຺ຠ ກງ຺ຂຕິ ວິຈິກິຈ຺ຉຕິ ນາຘິມຸຈ຺ຈຕິ ນ ສມ຺ປສີທຕິ – ອິມານິ ຕີຓິ ຕມານິ.
(໑໕) ຕີຓິ ຕິຕ຺ຖາຍຕນານິ
໙໒໓. ຕຕ຺ຖ ກຕມານິ ຕີຓິ ຕິຕ຺ຖາຍຕນານິ? ອິເຘກຈ຺ໂຈ ສມໂຓ ວາ ພ຺ຣາຫ຺ມໂຓ ວາ ເອວໍວາທີ ໂຫຕິ ເອວໍທິຏ຺ຐີ – ‘‘ຍໍ ກິຎ຺ຈາຍໍ ປຸຣິສປຸຄ຺ຄໂລ ປຏິສໍເວເທຕິ ສຸຂໍ ວາ ທຸກ຺ຂໍ ວາ ອທຸກ຺ຂມສຸຂໍ ວາ, ສພ຺ພໍ ຕໍ ປຸພ຺ເພ ກຕເຫຕູ’’ຕິ; ອິຘ ປເນກຈ຺ໂຈ ສມໂຓ ວາ ພ຺ຣາຫ຺ມໂຓ ວາ ເອວໍວາທີ ໂຫຕິ ເອວໍທິຏ຺ຐີ – ‘‘ຍໍ ກິຎ຺ຈາຍໍ ປຸຣິສປຸຄ຺ຄໂລ ປຏິສໍເວເທຕິ ສຸຂໍ ວາ ທຸກ຺ຂໍ ວາ ອທຸກ຺ຂມສຸຂໍ ວາ, ສພ຺ພໍ ຕໍ ອິສ຺ສຣນິມ຺ມານເຫຕູ’’ຕິ; ອິຘ ປເນກຈ຺ໂຈ ສມໂຓ ວາ ພ຺ຣາຫ຺ມໂຓ ວາ ເອວໍວາທີ ໂຫຕິ ເອວໍທິຏ຺ຐີ – ‘‘ຍໍ ກິຎ຺ຈາຍໍ ປຸຣິສປຸຄ຺ຄໂລ ປຏິສໍເວເທຕິ ສຸຂໍ ວາ ທຸກ຺ຂໍ ວາ ອທຸກ຺ຂມສຸຂໍ ວາ, ສພ຺ພໍ ຕໍ ອເຫຕຸ ອປ຺ປຈ຺ຈຍາ’’ຕິ – ອິມານິ ຕີຓິ ຕິຕ຺ຖາຍຕນານິ.
(໑໖) ຕໂຍ ກິຎ຺ຈນາ
໙໒໔. ຕຕ຺ຖ ກຕເມ ຕໂຍ ກິຎ຺ຈນາ [ກຕມານິ ຕີຓິ ກິຎ຺ຈນານິ (?) ທີ. ນິ. ໓.໓໐໕]? ຣາໂຄ ກິຎ຺ຈນໍ, ໂທໂສ ກິຎ຺ຈນໍ, ໂມໂຫ ກິຎ຺ຈນໍ – ອິເມ ຕໂຍ ກິຎ຺ຈນາ.
(໑໗) ຕີຓິ ອງ຺ຄຓານິ
ຕຕ຺ຖ ກຕມານິ ຕີຓິ ອງ຺ຄຓານິ? ຣາໂຄ ອງ຺ຄຓໍ, ໂທໂສ ອງ຺ຄຓໍ, ໂມໂຫ ອງ຺ຄຓໍ – ອິມານິ ຕີຓິ ອງ຺ຄຓານິ.
(໑໘) ຕີຓິ ມລານິ
ຕຕ຺ຖ ກຕມານິ ຕີຓິ ມລານິ? ຣາໂຄ ມລໍ, ໂທໂສ ມລໍ, ໂມໂຫ ມລໍ – ອິມານິ ຕີຓິ ມລານິ.
(໑໙) ຕີຓິ ວິສມານິ
ຕຕ຺ຖ ກຕມານິ ຕີຓິ ວິສມານິ? ຣາໂຄ ວິສມໍ, ໂທໂສ ວິສມໍ, ໂມໂຫ ວິສມໍ – ອິມານິ ຕີຓິ ວິສມານິ.
(໒໐) ອປຣານິປິ ຕີຓິ ວິສມານິ
ຕຕ຺ຖ ກຕມານິ ອປຣານິປິ ຕີຓິ ວິສມານິ? ກາຍວິສມໍ, ວຈີວິສມໍ, ມໂນວິສມໍ – ອິມານິ ຕີຓິ ວິສມານິ.
(໒໑) ຕໂຍ ອຄ຺ຄີ
ຕຕ຺ຖ ກຕເມ ຕໂຍ ອຄ຺ຄີ? ຣາຄຄ຺ຄິ, ໂທສຄ຺ຄິ, ໂມຫຄ຺ຄິ – ອິເມ ຕໂຍ ອຄ຺ຄີ.
(໒໒) ຕໂຍ ກສາວາ
ຕຕ຺ຖ ກຕເມ ຕໂຍ ກສາວາ? ຣາຄກສາໂວ, ໂທສກສາໂວ, ໂມຫກສາໂວ – ອິເມ ຕໂຍ ກສາວາ.
(໒໓) ອປເຣປິ ຕໂຍ ກສາວາ
ຕຕ຺ຖ ກຕເມ ອປເຣປິ ຕໂຍ ກສາວາ? ກາຍກສາໂວ, ວຈີກສາໂວ, ມໂນກສາໂວ – ອິເມ ຕໂຍ ກສາວາ.
(໒໔. ກ) ອສ຺ສາທທິຏ຺ຐິ
໙໒໕. ຕຕ຺ຖ ກຕມາ ອສ຺ສາທທິຏ຺ຐິ? ອິເຘກຈ຺ໂຈ ສມໂຓ ວາ ພ຺ຣາຫ຺ມໂຓ ວາ ເອວໍວາທີ ໂຫຕິ ເອວໍທິຏ຺ຐີ – ‘‘ນຕ຺ຖິ ກາເມສຸ ໂທໂສ’’ຕິ. ໂສ ກາເມສຸ ປາຕພ຺ຍຕໍ ອາປຊ຺ຊຕິ. ອຍໍ ວຸຈ຺ຈຕິ ‘‘ອສ຺ສາທທິຏ຺ຐິ’’.
(ຂ) ອຕ຺ຕານຸທິຏ຺ຐິ
ຕຕ຺ຖ ກຕມາ ອຕ຺ຕານຸທິຏ຺ຐິ? ອິຘ ອສ຺ສຸຕວາ ປຸຖຸຊ຺ຊໂນ ອຣິຍານໍ ອທສ຺ສາວີ ອຣິຍຘມ຺ມສ຺ສ ອໂກວິໂທ ອຣິຍຘມ຺ເມ ອວິນີໂຕ, ສປ຺ປຸຣິສານໍ ອທສ຺ສາວີ ສປ຺ປຸຣິສຘມ຺ມສ຺ສ ອໂກວິໂທ ສປ຺ປຸຣິສຘມ຺ເມ ອວິນີໂຕ – ຣູປໍ ອຕ຺ຕໂຕ ສມນຸປສ຺ສຕິ ຣູປວນ຺ຕໍ ວາ ອຕ຺ຕານໍ ອຕ຺ຕນິ ວາ ຣູປໍ ຣູປສ຺ມິໍ ວາ ອຕ຺ຕານໍ. ເວທນໍ…ເປ… ສຎ຺ຎໍ…ເປ… ສງ຺ຂາເຣ…ເປ… ວິຎ຺ຎາຓໍ ອຕ຺ຕໂຕ ສມນຸປສ຺ສຕິ ວິຎ຺ຎາຓວນ຺ຕໍ ວາ ອຕ຺ຕານໍ ອຕ຺ຕນິ ວາ ວິຎ຺ຎາຓໍ ວິຎ຺ຎາຓສ຺ມິໍ ວາ ອຕ຺ຕານໍ. ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ‘‘ອຕ຺ຕານຸທິຏ຺ຐິ’’.
(ຄ) ມິຈ຺ຉາທິຏ຺ຐິ
ຕຕ຺ຖ ກຕມາ ມິຈ຺ຉາທິຏ຺ຐິ? ‘‘ນຕ຺ຖິ ທິນ຺ນໍ, ນຕ຺ຖິ ຍິຏ຺ຐໍ…ເປ… ເຍ ອິມຎ຺ຈ ໂລກໍ ປຣຎ຺ຈ ໂລກໍ ສຍໍ ອຠິຎ຺ຎາ ສຈ຺ຉິກຕ຺ວາ ປເວເທນ຺ຕີ’’ຕິ – ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ‘‘ມິຈ຺ຉາທິຏ຺ຐິ’’. ສສ຺ສຕທິຏ຺ຐິ ອສ຺ສາທທິຏ຺ຐິ, ສກ຺ກາຍທິຏ຺ຐິ ອຕ຺ຕານຸທິຏ຺ຐິ, ອຸຈ຺ເຉທທິຏ຺ຐິ ມິຈ຺ຉາທິຏ຺ຐິ.
(໒໕. ກ) ອຣຕິ
໙໒໖. ຕຕ຺ຖ ກຕມາ ອຣຕິ? ປນ຺ເຕສຸ ວາ ເສນາສເນສຸ ອຎ຺ຎຕຣຎ຺ຎຕເຣສຸ ວາ ອຘິກຸສເລສຸ ຘມ຺ເມສຸ ອຣຕິ ອຣຕິຕາ ອນຠິຣຕິ ອນຠິຣມຓາ ອຸກ຺ກຓ຺ຐິຕາ ປຣິຕສ຺ສິຕາ – ອຍໍ ວຸຈ຺ຈຕິ ‘‘ອຣຕິ’’.
(ຂ) ວິເຫສາ
ຕຕ຺ຖ ກຕມາ ວິເຫສາ? ອິເຘກຈ຺ໂຈ ປາຓິນາ ວາ ເລຑ຺ຑຸນາ ວາ ທຓ຺ເຑນ ວາ ສຕ຺ເຖນ ວາ ຣຊ຺ຊຸຍາ ວາ ອຎ຺ຎຕຣຎ຺ຎຕເຣນ ສຕ຺ເຕ ວິເຫເຐຕິ, ຍາ ເອວຣູປາ ເຫຐນາ ວິເຫຐນາ ຫິໍສນາ ວິຫິໍສນາ ໂຣສນາ ວິໂຣສນາ ປຣູປຆາໂຕ – ອຍໍ ວຸຈ຺ຈຕິ ‘‘ວິເຫສາ’’.
(ຄ) ອຘມ຺ມຈຣິຍາ
ຕຕ຺ຖ ກຕມາ ອຘມ຺ມຈຣິຍາ? ກາເຍນ ອຘມ຺ມຈຣິຍາວິສມຈຣິຍາ, ວາຈາຍ ອຘມ຺ມຈຣິຍາວິສມຈຣິຍາ, ມນສາ ອຘມ຺ມຈຣິຍາວິສມຈຣິຍາ – ອຍໍ ວຸຈ຺ຈຕິ ‘‘ອຘມ຺ມຈຣິຍາ’’.
(໒໖. ກ) ໂທວຈສ຺ສຕາ
໙໒໗. ຕຕ຺ຖ ກຕມາ ໂທວຈສ຺ສຕາ? ສຫຘມ຺ມິເກ ວຸຈ຺ຈມາເນ ໂທວຈສ຺ສາຍໍ ໂທວຈສ຺ສິຍໍ ໂທວຈສ຺ສຕາ ວິປ຺ປຏິກຸລຄ຺ຄາຫິຕາ ວິປຈ຺ຈນີກສາຕຕາ ອນາທຣິຍໍ ອນາທຣຕາ ອຄາຣວຕາ ອປ຺ປຕິສ຺ສວຕາ – ອຍໍ ວຸຈ຺ຈຕິ ‘‘ໂທວຈສ຺ສຕາ’’.
(ຂ) ປາປມິຕ຺ຕຕາ
ຕຕ຺ຖ ກຕມາ ປາປມິຕ຺ຕຕາ? ເຍ ເຕ ປຸຄ຺ຄລາ ອສ຺ສທ຺ຘາ ທຸສ຺ສີລາ ອປ຺ປສ຺ສຸຕາ ມຈ຺ຉຣິໂນ ທຸປ຺ປຎ຺ຎາ, ຍາ ເຕສໍ ເສວນາ ນິເສວນາ ສໍເສວນາ ຠຊນາ ສມ຺ຠຊນາ ຠຕ຺ຕິ ສມ຺ຠຕ຺ຕິ ຕໍສມ຺ປວງ຺ກຕາ – ອຍໍ ວຸຈ຺ຈຕິ ‘‘ປາປມິຕ຺ຕຕາ’’.
(ຄ) ນານຕ຺ຕສຎ຺ຎາ
ຕຕ຺ຖ ກຕມາ ນານຕ຺ຕສຎ຺ຎາ? ກາມສຎ຺ຎາ, ພ຺ຍາປາທສຎ຺ຎາ, ວິຫິໍສາສຎ຺ຎາ – ອຍໍ ວຸຈ຺ຈຕິ ‘‘ນານຕ຺ຕສຎ຺ຎາ’’. ສພ຺ພາປິ ອກຸສລາ ສຎ຺ຎາ ນານຕ຺ຕສຎ຺ຎາ.
(໒໗. ກ) ອຸທ຺ຘຈ຺ຈໍ
໙໒໘. ຕຕ຺ຖ ກຕມໍ ອຸທ຺ຘຈ຺ຈໍ? ຍໍ ຈິຕ຺ຕສ຺ສ ອຸທ຺ຘຈ຺ຈໍ ອວູປສໂມ ເຈຕໂສ ວິກ຺ເຂໂປ ຠນ຺ຕຕ຺ຕໍ ຈິຕ຺ຕສ຺ສ – ອິທໍ ວຸຈ຺ຈຕິ ‘‘ອຸທ຺ຘຈ຺ຈໍ’’.
(ຂ) ໂກສຊ຺ຊໍ
ຕຕ຺ຖ ກຕມໍ ໂກສຊ຺ຊໍ? ກາຍທຸຈ຺ຈຣິເຕ ວາ ວຈີທຸຈ຺ຈຣິເຕ ວາ ມໂນທຸຈ຺ຈຣິເຕ ວາ ປຎ຺ຈສຸ ວາ ກາມຄຸເຓສຸ ຈິຕ຺ຕສ຺ສ ໂວສ຺ສຄ຺ໂຄ ໂວສ຺ສຄ຺ຄານຸປ຺ປທານໍ ກຸສລານໍ ຘມ຺ມານໍ ຠາວນາຍ ອສກ຺ກຈ຺ຈກິຣິຍຕາ ອສາຕຈ຺ຈກິຣິຍຕາ ອນຏ຺ຐິຕກິຣິຍຕາ ໂອລີນວຸຕ຺ຕິຕາ ນິກ຺ຂິຕ຺ຕຉນ຺ທຕາ ນິກ຺ຂິຕ຺ຕຘຸຣຕາ ອນາເສວນາ ອຠາວນາ ອພຫຸລີກມ຺ມໍ ອນຘິຏ຺ຐານໍ ອນນຸໂຍໂຄ ປມາໂທ – ອິທໍ ວຸຈ຺ຈຕິ ‘‘ໂກສຊ຺ຊໍ’’.
(ຄ) ປມາໂທ
ຕຕ຺ຖ ກຕໂມ ປມາໂທ? ກາຍທຸຈ຺ຈຣິເຕ ວາ ວຈີທຸຈ຺ຈຣິເຕ ວາ ມໂນທຸຈ຺ຈຣິເຕ ວາ ປຎ຺ຈສຸ ວາ ກາມຄຸເຓສຸ ຈິຕ຺ຕສ຺ສ ໂວສ຺ສຄ຺ໂຄ ໂວສ຺ສຄ຺ຄານຸປ຺ປທານໍ ກຸສລານໍ ຘມ຺ມານໍ ຠາວນາຍ ອສກ຺ກຈ຺ຈກິຣິຍຕາ ອສາຕຈ຺ຈກິຣິຍຕາ ອນຏ຺ຐິຕກິຣິຍຕາ ໂອລີນວຸຕ຺ຕິຕາ ນິກ຺ຂິຕ຺ຕຉນ຺ທຕາ ນິກ຺ຂິຕ຺ຕຘຸຣຕາ ອນາເສວນາ ອຠາວນາ ອພຫຸລີກມ຺ມໍ ອນຘິຏ຺ຐານໍ ອນນຸໂຍໂຄ ປມາໂທ, ໂຍ ເອວຣູໂປ ປມາໂທ ປມຊ຺ຊນາ ປມຊ຺ຊິຕຕ຺ຕໍ – ອຍໍ ວຸຈ຺ຈຕິ ‘‘ປມາໂທ’’.
(໒໘. ກ) ອສນ຺ຕຸຏ຺ຐິຕາ
໙໒໙. ຕຕ຺ຖ ກຕມາ ອສນ຺ຕຸຏ຺ຐິຕາ? ອິຕຣີຕຣຈີວຣປິຓ຺ຑປາຕເສນາສນຄິລານປຈ຺ຈຍເຠສຊ຺ຊປຣິກ຺ຂາເຣຫິ ປຎ຺ຈຫິ ວາ ກາມຄຸເຓຫິ ອສນ຺ຕຸຏ຺ຐສ຺ສ ຠິຍ຺ໂຍກມ຺ຍຕາ, ຍາ ເອວຣູປາ ອິຈ຺ຉາ ອິຈ຺ຉາຄຕາ ອສນ຺ຕຸຏ຺ຐິຕາ ຣາໂຄ ສາຣາໂຄ ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ອສນ຺ຕຸຏ຺ຐິຕາ’’.
(ຂ) ອສມ຺ປຊຎ຺ຎຕາ
ຕຕ຺ຖ ກຕມາ ອສມ຺ປຊຎ຺ຎຕາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອສມ຺ປຊຎ຺ຎຕາ’’.
(ຄ) ມຫິຈ຺ຉຕາ
ຕຕ຺ຖ ກຕມາ ມຫິຈ຺ຉຕາ? ອິຕຣີຕຣຈີວຣປິຓ຺ຑປາຕເສນາສນຄິລານປຈ຺ຈຍເຠສຊ຺ຊປຣິກ຺ຂາເຣຫິ ປຎ຺ຈຫິ ວາ ກາມຄຸເຓຫິ ອສນ຺ຕຸຏ຺ຐສ຺ສ ຠິຍ຺ໂຍກມ຺ຍຕາ, ຍາ ເອວຣູປາ ອິຈ຺ຉາ ອິຈ຺ຉາຄຕາ ມຫິຈ຺ຉຕາ ຣາໂຄ ສາຣາໂຄ ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ມຫິຈ຺ຉຕາ’’.
(໒໙. ກ) ອຫິຣິກໍ
໙໓໐. ຕຕ຺ຖ ກຕມໍ ອຫິຣິກໍ? ຍໍ ນ ຫິຣີຍຕິ ຫິຣີຍິຕພ຺ເພນ, ນ ຫິຣີຍຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ວຸຈ຺ຈຕິ ‘‘ອຫິຣິກໍ’’.
(ຂ) ອໂນຕ຺ຕປ຺ປໍ
ຕຕ຺ຖ ກຕມໍ ອໂນຕ຺ຕປ຺ປໍ? ຍໍ ນ ໂອຕ຺ຕປ຺ປຕິ ໂອຕ຺ຕປ຺ປິຕພ຺ເພນ, ນ ໂອຕ຺ຕປ຺ປຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ວຸຈ຺ຈຕິ ‘‘ອໂນຕ຺ຕປ຺ປໍ’’.
(ຄ) ປມາໂທ
ຕຕ຺ຖ ກຕໂມ ປມາໂທ? ກາຍທຸຈ຺ຈຣິເຕ ວາ ວຈີທຸຈ຺ຈຣິເຕ ວາ ມໂນທຸຈ຺ຈຣິເຕ ວາ ປຎ຺ຈສຸ ວາ ກາມຄຸເຓສຸ ຈິຕ຺ຕສ຺ສ ໂວສ຺ສຄ຺ໂຄ ໂວສ຺ສຄ຺ຄານຸປ຺ປທານໍ ກຸສລານໍ ຘມ຺ມານໍ ຠາວນາຍ ອສກ຺ກຈ຺ຈກິຣິຍຕາ ອສາຕຈ຺ຈກິຣິຍຕາ ອນຏ຺ຐິຕກິຣິຍຕາ ໂອລີນວຸຕ຺ຕິຕາ ນິກ຺ຂິຕ຺ຕຉນ຺ທຕາ ນິກ຺ຂິຕ຺ຕຘຸຣຕາ ອນາເສວນາ ອຠາວນາ ອພຫຸລີກມ຺ມໍ ອນຘິຏ຺ຐານໍ ອນນຸໂຍໂຄ ປມາໂທ, ໂຍ ເອວຣູໂປ ປມາໂທ ປມຊ຺ຊນາ ປມຊ຺ຊິຕຕ຺ຕໍ – ອຍໍ ວຸຈ຺ຈຕິ ‘‘ປມາໂທ’’.
(໓໐. ກ) ອນາທຣິຍໍ
໙໓໑. ຕຕ຺ຖ ກຕມໍ ອນາທຣິຍໍ? ຍໍ ອນາທຣິຍໍ ອນາທຣຕາ ອຄາຣວຕາ ອປ຺ປຕິສ຺ສວຕາ ອນທ຺ທາ ອນທ຺ທາຍນາ ອນທ຺ທາຍິຕຕ຺ຕໍ [ອນາທາ ອນາທາຍນາ ອນາທາຍິຕຕ຺ຕໍ (ສ຺ຍາ.)] ອສີລ຺ຍໍ ອຈິຕ຺ຕີກາໂຣ – ອິທໍ ວຸຈ຺ຈຕິ ‘‘ອນາທຣິຍໍ’’.
(ຂ) ໂທວຈສ຺ສຕາ
ຕຕ຺ຖ ກຕມາ ໂທວຈສ຺ສຕາ? ສຫຘມ຺ມິເກ ວຸຈ຺ຈມາເນ ໂທວຈສ຺ສາຍໍ ໂທວຈສ຺ສິຍໍ ໂທວຈສ຺ສຕາ ວິປ຺ປຏິກຸລຄ຺ຄາຫິຕາ ວິປຈ຺ຈນີກສາຕຕາ ອນາທຣິຍໍ ອນາທຣຕາ ອຄາຣວຕາ ອປ຺ປຕິສ຺ສວຕາ – ອຍໍ ວຸຈ຺ຈຕິ ‘‘ໂທວຈສ຺ສຕາ’’.
(ຄ) ປາປມິຕ຺ຕຕາ
ຕຕ຺ຖ ກຕມາ ປາປມິຕ຺ຕຕາ? ເຍ ເຕ ປຸຄ຺ຄລາ ອສ຺ສທ຺ຘາ ທຸສ຺ສີລາ ອປ຺ປສ຺ສຸຕາ ມຈ຺ຉຣິໂນ ທຸປ຺ປຎ຺ຎາ, ຍາ ເຕສໍ ເສວນາ ນິເສວນາ ສໍເສວນາ ປຏິເສວນາ ຠຊນາ ສມ຺ຠຊນາ ຠຕ຺ຕິ ສມ຺ຠຕ຺ຕິ ຕໍສມ຺ປວງ຺ກຕາ – ອຍໍ ວຸຈ຺ຈຕິ ‘‘ປາປມິຕ຺ຕຕາ’’.
(໓໑. ກ) ອສ຺ສທ຺ຘິຍໍ
໙໓໒. ຕຕ຺ຖ ກຕມໍ ອສ຺ສທ຺ຘິຍໍ? ອິເຘກຈ຺ໂຈ ອສ຺ສທ຺ໂຘ ໂຫຕິ, ນ ສທ຺ທຫຕິ ພຸທ຺ຘໍ ວາ ຘມ຺ມໍ ວາ ສງ຺ຆໍ ວາ, ຍໍ ເອວຣູປໍ ອສ຺ສທ຺ຘິຍໍ ອສ຺ສທ຺ທຫນາ ອໂນກປ຺ປນາ ອນຠິປ຺ປສາໂທ – ອິທໍ ວຸຈ຺ຈຕິ ‘‘ອສ຺ສທ຺ຘິຍໍ’’.
(ຂ) ອວທຎ຺ຎຸຕາ
ຕຕ຺ຖ ກຕມາ ອວທຎ຺ຎຸຕາ? ປຎ຺ຈ ມຈ຺ຉຣິຍານິ – ອາວາສມຈ຺ຉຣິຍໍ, ກຸລມຈ຺ຉຣິຍໍ, ລາຠມຈ຺ຉຣິຍໍ, ວຓ຺ຓມຈ຺ຉຣິຍໍ, ຘມ຺ມມຈ຺ຉຣິຍໍ. ຍໍ ເອວຣູປໍ ມຈ຺ເຉຣໍ ມຈ຺ຉຣາຍນາ ມຈ຺ຉຣາຍິຕຕ຺ຕໍ ເວວິຈ຺ຉໍ ກທຣິຍໍ ກຏຸກຎ຺ຈຸກຕາ ອຄ຺ຄຫິຕຕ຺ຕໍ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ອວທຎ຺ຎຸຕາ’’.
(ຄ) ໂກສຊ຺ຊໍ
ຕຕ຺ຖ ກຕມໍ ໂກສຊ຺ຊໍ? ກາຍທຸຈ຺ຈຣິເຕ ວາ ວຈີທຸຈ຺ຈຣິເຕ ວາ ມໂນທຸຈ຺ຈຣິເຕ ວາ ປຎ຺ຈສຸ ວາ ກາມຄຸເຓສຸ ຈິຕ຺ຕສ຺ສ ໂວສ຺ສຄ຺ໂຄ, ໂວສ຺ສຄ຺ຄານຸປ຺ປທານໍ ກຸສລານໍ ຘມ຺ມານໍ, ຠາວນາຍ ອສກ຺ກຈ຺ຈກິຣິຍຕາ ອສາຕຈ຺ຈກິຣິຍຕາ ອນຏ຺ຐິຕກິຣິຍຕາ ໂອລີນວຸຕ຺ຕິຕາ ນິກ຺ຂິຕ຺ຕຉນ຺ທຕາ ນິກ຺ຂິຕ຺ຕຘຸຣຕາ ອນາເສວນາ ອຠາວນາ ອພຫຸລີກມ຺ມໍ ອນຘິຏ຺ຐານໍ ອນນຸໂຍໂຄ ປມາໂທ – ອິທໍ ວຸຈ຺ຈຕິ ‘‘ໂກສຊ຺ຊໍ’’.
(໓໒. ກ) ອຸທ຺ຘຈ຺ຈໍ
໙໓໓. ຕຕ຺ຖ ກຕມໍ ອຸທ຺ຘຈ຺ຈໍ? ຍໍ ຈິຕ຺ຕສ຺ສ ອຸທ຺ຘຈ຺ຈໍ ອວູປສໂມ ເຈຕໂສ ວິກ຺ເຂໂປ ຠວນ຺ຕຕ຺ຕໍ ຈິຕ຺ຕສ຺ສ – ອິທໍ ວຸຈ຺ຈຕິ ‘‘ອຸທ຺ຘຈ຺ຈໍ’’.
(ຂ) ອສໍວໂຣ
ຕຕ຺ຖ ກຕໂມ ອສໍວໂຣ? ອິເຘກຈ຺ໂຈ ຈກ຺ຂຸນາ ຣູປໍ ທິສ຺ວາ ນິມິຕ຺ຕຄ຺ຄາຫີ ໂຫຕິ ອນຸພ຺ຍຎ຺ຊນຄ຺ຄາຫີ. ຍຕ຺ວາຘິກຣຓເມນໍ ຈກ຺ຂຸນ຺ທ຺ຣິຍໍ ອສໍວຸຕໍ ວິຫຣນ຺ຕໍ ອຠິຊ຺ຌາໂທມນສ຺ສາ ປາປກາ ອກຸສລາ ຘມ຺ມາ ອນ຺ວາສ຺ສເວຍ຺ຍຸໍ, ຕສ຺ສ ສໍວຣາຍ ນ ປຏິປຊ຺ຊຕິ, ນ ຣກ຺ຂຕິ ຈກ຺ຂຸນ຺ທ຺ຣິຍໍ, ຈກ຺ຂຸນ຺ທ຺ຣິເຍ ນ ສໍວຣໍ ອາປຊ຺ຊຕິ. ໂສເຕນ ສທ຺ທໍ ສຸຕ຺ວາ…ເປ… ຆາເນນ ຄນ຺ຘໍ ຆາຍິຕ຺ວາ…ເປ… ຊິວ຺ຫາຍ ຣສໍ ສາຍິຕ຺ວາ…ເປ… ກາເຍນ ໂຜຏ຺ຐພ຺ພໍ ຜຸສິຕ຺ວາ…ເປ… ມນສາ ຘມ຺ມໍ ວິຎ຺ຎາຍ ນິມິຕ຺ຕຄ຺ຄາຫີ ໂຫຕິ ອນຸພ຺ຍຎ຺ຊນຄ຺ຄາຫີ. ຍຕ຺ວາຘິກຣຓເມນໍ ມນິນ຺ທ຺ຣິຍໍ ອສໍວຸຕໍ ວິຫຣນ຺ຕໍ ອຠິຊ຺ຌາໂທມນສ຺ສາ ປາປກາ ອກຸສລາ ຘມ຺ມາ ອນ຺ວາສ຺ສເວຍ຺ຍຸໍ, ຕສ຺ສ ສໍວຣາຍ ນ ປຏິປຊ຺ຊຕິ, ນ ຣກ຺ຂຕິ ມນິນ຺ທ຺ຣິຍໍ, ມນິນ຺ທ຺ຣິເຍ ນ ສໍວຣໍ ອາປຊ຺ຊຕິ – ອຍໍ ວຸຈ຺ຈຕິ ‘‘ອສໍວໂຣ’’.
(ຄ) ທຸສ຺ສີລ຺ຍໍ
ຕຕ຺ຖ ກຕມໍ ທຸສ຺ສີລ຺ຍໍ? ກາຍິໂກ ວີຕິກ຺ກໂມ, ວາຈສິໂກ ວີຕິກ຺ກໂມ, ກາຍິກວາຈສິໂກ ວີຕິກ຺ກໂມ – ອິທໍ ວຸຈ຺ຈຕິ ‘‘ທຸສ຺ສີລ຺ຍໍ’’.
(໓໓. ກ) ອຣິຍານໍ ອທສ຺ສນກມ຺ຍຕາ
໙໓໔. ຕຕ຺ຖ ກຕມາ ອຣິຍານໍ ອທສ຺ສນກມ຺ຍຕາ? ຕຕ຺ຖ ກຕເມ ອຣິຍາ? ອຣິຍາ ວຸຈ຺ຈນ຺ຕິ ພຸທ຺ຘາ ຈ ພຸທ຺ຘສາວກາ ຈ. ຍາ ອິເມສໍ ອຣິຍານໍ ອທສ຺ສນກມ຺ຍຕາ ອທຏ຺ຐຸກມ຺ຍຕາ ອສເມຕຸກມ຺ຍຕາ ອສມາຄນ຺ຕຸກມ຺ຍຕາ – ອຍໍ ວຸຈ຺ຈຕິ ‘‘ອຣິຍານໍ ອທສ຺ສນກມ຺ຍຕາ’’.
(ຂ) ສທ຺ຘມ຺ມໍ ອໂສຕຸກມ຺ຍຕາ
ຕຕ຺ຖ ກຕມາ ສທ຺ຘມ຺ມໍ ອໂສຕຸກມ຺ຍຕາ? ຕຕ຺ຖ ກຕໂມ ສທ຺ຘມ຺ໂມ? ຈຕ຺ຕາໂຣ ສຕິປຏ຺ຐານາ, ຈຕ຺ຕາໂຣ ສມ຺ມປ຺ປຘານາ, ຈຕ຺ຕາໂຣ ອິທ຺ຘິປາທາ, ປຎ຺ຈິນ຺ທ຺ຣິຍານິ, ປຎ຺ຈ ພລານິ, ສຕ຺ຕ ໂພຊ຺ຌງ຺ຄາ, ອຣິໂຍ ອຏ຺ຐງ຺ຄິໂກ ມຄ຺ໂຄ – ອຍໍ ວຸຈ຺ຈຕິ ‘‘ສທ຺ຘມ຺ໂມ’’. ຍາ ອິມສ຺ສ ສທ຺ຘມ຺ມສ຺ສ ອໂສຕຸກມ຺ຍຕາ ອສວນກມ຺ຍຕາ ອນຸຄ຺ຄເຫຕຸກມ຺ຍຕາ ອຘາເຣຕຸກມ຺ຍຕາ – ອຍໍ ວຸຈ຺ຈຕິ ‘‘ສທ຺ຘມ຺ມໍ ອໂສຕຸກມ຺ຍຕາ’’.