໔. ຈຕຸກ຺ກນິທ຺ເທໂສ

(໑) ຈຕ຺ຕາໂຣ ອາສວາ

໙໓໗. ຕຕ຺ຖ ກຕເມ ຈຕ຺ຕາໂຣ ອາສວາ? ກາມາສໂວ, ຠວາສໂວ, ທິຏ຺ຐາສໂວ, ອວິຊ຺ຊາສໂວ.

(ກ) ກາມາສໂວ

ຕຕ຺ຖ ກຕໂມ ກາມາສໂວ? ໂຍ ກາເມສຸ ກາມຈ຺ຉນ຺ໂທ ກາມຣາໂຄ ກາມນນ຺ທີ ກາມຕຓ຺ຫາ ກາມສິເນໂຫ ກາມປຣິຬາໂຫ ກາມມຸຈ຺ຉາ ກາມຊ຺ໂຌສານໍ – ອຍໍ ວຸຈ຺ຈຕິ ‘‘ກາມາສໂວ’’.

(ຂ) ຠວາສໂວ

ຕຕ຺ຖ ກຕໂມ ຠວາສໂວ? ໂຍ ຠເວສຸ ຠວຈ຺ຉນ຺ໂທ…ເປ… ຠວຊ຺ໂຌສານໍ – ອຍໍ ວຸຈ຺ຈຕິ ‘‘ຠວາສໂວ’’.

(ຄ) ທິຏ຺ຐາສໂວ

ຕຕ຺ຖ ກຕໂມ ທິຏ຺ຐາສໂວ? ‘‘ສສ຺ສໂຕ ໂລໂກ’’ຕິ ວາ, ‘‘ອສສ຺ສໂຕ ໂລໂກ’’ຕິ ວາ, ‘‘ອນ຺ຕວາ ໂລໂກ’’ຕິ ວາ, ‘‘ອນນ຺ຕວາ ໂລໂກ’’ຕິ ວາ, ‘‘ຕໍ ຊີວໍ ຕໍ ສຣີຣ’’ນ຺ຕິ ວາ, ‘‘ອຎ຺ຎໍ ຊີວໍ ອຎ຺ຎໍ ສຣີຣ’’ນ຺ຕິ ວາ, ‘‘ໂຫຕິ ຕຖາຄໂຕ ປຣໍ ມຣຓາ’’ຕິ ວາ, ‘‘ນ ໂຫຕິ ຕຖາຄໂຕ ປຣໍ ມຣຓາ’’ຕິ ວາ, ‘‘ໂຫຕິ ຈ ນ ຈ ໂຫຕິ ຕຖາຄໂຕ ປຣໍ ມຣຓາ’’ຕິ ວາ, ‘‘ເນວ ໂຫຕິ ນ ນ ໂຫຕິ ຕຖາຄໂຕ ປຣໍ ມຣຓາ’’ຕິ ວາ. ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ‘‘ທິຏ຺ຐາສໂວ’’. ສພ຺ພາປິ ມິຈ຺ຉາທິຏ຺ຐິ ທິຏ຺ຐາສໂວ.

(ຆ) ອວິຊ຺ຊາສໂວ

ຕຕ຺ຖ ກຕໂມ ອວິຊ຺ຊາສໂວ? ທຸກ຺ເຂ ອຎ຺ຎາຓໍ, ທຸກ຺ຂສມຸທເຍ ອຎ຺ຎາຓໍ, ທຸກ຺ຂນິໂຣເຘ ອຎ຺ຎາຓໍ, ທຸກ຺ຂນິໂຣຘຄາມິນິຍາ ປຏິປທາຍ ອຎ຺ຎາຓໍ, ປຸພ຺ພນ຺ເຕ ອຎ຺ຎາຓໍ, ອປຣນ຺ເຕ ອຎ຺ຎາຓໍ, ປຸພ຺ພນ຺ຕາປຣນ຺ເຕ ອຎ຺ຎາຓໍ, ອິທປ຺ປຈ຺ຈຍຕາ ປຏິຈ຺ຈສມຸປ຺ປນ຺ເນສຸ ຘມ຺ເມສຸ ອຎ຺ຎາຓໍ. ຍໍ ເອວຣູປໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາສໂວ’’. ອິເມ ຈຕ຺ຕາໂຣ ອາສວາ.

(໒-໕) ຈຕ຺ຕາໂຣ ຄນ຺ຖາທີ

໙໓໘. ຕຕ຺ຖ ກຕເມ ຈຕ຺ຕາໂຣ ຄນ຺ຖາ …ເປ… ຈຕ຺ຕາໂຣ ໂອຆາ…ເປ… ຈຕ຺ຕາໂຣ ໂຍຄາ…ເປ… ຈຕ຺ຕາຣິ ອຸປາທານານິ? ກາມຸປາທານໍ, ທິຏ຺ຐຸປາທານໍ, ສີລພ຺ພຕຸປາທານໍ, ອຕ຺ຕວາທຸປາທານໍ.

(ກ) ກາມຸປາທານໍ

ຕຕ຺ຖ ກຕມໍ ກາມຸປາທານໍ? ໂຍ ກາເມສຸ ກາມຈ຺ຉນ຺ໂທ…ເປ… ກາມຊ຺ໂຌສານໍ – ອິທໍ ວຸຈ຺ຈຕິ ‘‘ກາມຸປາທານໍ’’.

(ຂ) ທິຏ຺ຐຸປາທານໍ

ຕຕ຺ຖ ກຕມໍ ທິຏ຺ຐຸປາທານໍ? ‘‘ນຕ຺ຖິ ທິນ຺ນໍ, ນຕ຺ຖິ ຍິຏ຺ຐໍ…ເປ… ເຍ ອິມຎ຺ຈ ໂລກໍ ປຣຎ຺ຈ ໂລກໍ ສຍໍ ອຠິຎ຺ຎາ ສຈ຺ຉິກຕ຺ວາ ປເວເທນ຺ຕີ’’ຕິ. ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອິທໍ ວຸຈ຺ຈຕິ ‘‘ທິຏ຺ຐຸປາທານໍ’’. ຐເປຕ຺ວາ ສີລພ຺ພຕຸປາທານຎ຺ຈ ອຕ຺ຕວາທຸປາທານຎ຺ຈ ສພ຺ພາປິ ມິຈ຺ຉາທິຏ຺ຐິ ທິຏ຺ຐຸປາທານໍ.

(ຄ) ສີລພ຺ພຕຸປາທານໍ

ຕຕ຺ຖ ກຕມໍ ສີລພ຺ພຕຸປາທານໍ? ອິໂຕ ພຫິທ຺ຘາ ສມຓພ຺ຣາຫ຺ມຓານໍ ສີເລນ ສຸທ຺ຘິ ວເຕນ ສຸທ຺ຘິ ສີລພ຺ພເຕນ ສຸທ຺ຘີຕິ. ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອິທໍ ວຸຈ຺ຈຕິ ‘‘ສີລພ຺ພຕຸປາທານໍ’’.

(ຆ) ອຕ຺ຕວາທຸປາທານໍ

ຕຕ຺ຖ ກຕມໍ ອຕ຺ຕວາທຸປາທານໍ? ອິຘ ອສ຺ສຸຕວາ ປຸຖຸຊ຺ຊໂນ ອຣິຍານໍ ອທສ຺ສາວີ ອຣິຍຘມ຺ມສ຺ສ ອໂກວິໂທ ອຣິຍຘມ຺ເມ ອວິນີໂຕ, ສປ຺ປຸຣິສານໍ ອທສ຺ສາວີ ສປ຺ປຸຣິສຘມ຺ມສ຺ສ ອໂກວິໂທ ສປ຺ປຸຣິສຘມ຺ເມ ອວິນີໂຕ – ຣູປໍ ອຕ຺ຕໂຕ ສມນຸປສ຺ສຕິ ຣູປວນ຺ຕໍ ວາ ອຕ຺ຕານໍ ອຕ຺ຕນິ ວາ ຣູປໍ ຣູປສ຺ມິໍ ວາ ອຕ຺ຕານໍ. ເວທນໍ…ເປ… ສຎ຺ຎໍ…ເປ… ສງ຺ຂາເຣ…ເປ… ວິຎ຺ຎາຓໍ ອຕ຺ຕໂຕ ສມນຸປສ຺ສຕິ ວິຎ຺ຎາຓວນ຺ຕໍ ວາ ອຕ຺ຕານໍ ອຕ຺ຕນິ ວາ ວິຎ຺ຎາຓໍ ວິຎ຺ຎາຓສ຺ມິໍ ວາ ອຕ຺ຕານໍ. ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອິທໍ ວຸຈ຺ຈຕິ ‘‘ອຕ຺ຕວາທຸປາທານໍ’’. ອິມານິ ຈຕ຺ຕາຣິ ອຸປາທານານິ.

(໖) ຈຕ຺ຕາໂຣ ຕຓ຺ຫຸປ຺ປາທາ

໙໓໙. ຕຕ຺ຖ ກຕເມ ຈຕ຺ຕາໂຣ ຕຓ຺ຫຸປ຺ປາທາ? ຈີວຣເຫຕຸ ວາ ຠິກ຺ຂຸໂນ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ປິຓ຺ຑປາຕເຫຕຸ ວາ ຠິກ຺ຂຸໂນ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເສນາສນເຫຕຸ ວາ ຠິກ຺ຂຸໂນ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ອິຕິຠວາຠວເຫຕຸ ວາ ຠິກ຺ຂຸໂນ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ – ອິເມ ຈຕ຺ຕາໂຣ ຕຓ຺ຫຸປ຺ປາທາ.

(໗) ຈຕ຺ຕາຣິ ອຄຕິຄມນານິ

ຕຕ຺ຖ ກຕມານິ ຈຕ຺ຕາຣິ ອຄຕິຄມນານິ? ຉນ຺ທາຄຕິໍ ຄຈ຺ຉຕິ, ໂທສາຄຕິໍ ຄຈ຺ຉຕິ, ໂມຫາຄຕິໍ ຄຈ຺ຉຕິ, ຠຍາຄຕິໍ ຄຈ຺ຉຕິ. ຍາ ເອວຣູປາ ອຄຕິ ອຄຕິຄມນໍ ຉນ຺ທຄມນໍ ວຄ຺ຄຄມນໍ ວາຣິຄມນໍ – ອິມານິ ຈຕ຺ຕາຣິ ອຄຕິຄມນານິ.

(໘) ຈຕ຺ຕາໂຣ ວິປຣິຍາສາ

ຕຕ຺ຖ ກຕເມ ຈຕ຺ຕາໂຣ ວິປຣິຍາສາ? ອນິຈ຺ເຈ ‘‘ນິຈ຺ຈ’’ນ຺ຕິ ສຎ຺ຎາວິປຣິຍາໂສ ຈິຕ຺ຕວິປຣິຍາໂສ ທິຏ຺ຐິວິປຣິຍາໂສ, ທຸກ຺ເຂ ‘‘ສຸຂ’’ນ຺ຕິ ສຎ຺ຎາວິປຣິຍາໂສ ຈິຕ຺ຕວິປຣິຍາໂສ ທິຏ຺ຐິວິປຣິຍາໂສ, ອນຕ຺ຕນິ ‘‘ອຕ຺ຕາ’’ຕິ ສຎ຺ຎາວິປຣິຍາໂສ ຈິຕ຺ຕວິປຣິຍາໂສ ທິຏ຺ຐິວິປຣິຍາໂສ, ອສຸເຠ ‘‘ສຸຠ’’ນ຺ຕິ ສຎ຺ຎາວິປຣິຍາໂສ ຈິຕ຺ຕວິປຣິຍາໂສ ທິຏ຺ຐິວິປຣິຍາໂສ – ອິເມ ຈຕ຺ຕາໂຣ ວິປຣິຍາສາ.

(໙) ຈຕ຺ຕາໂຣ ອນຣິຍໂວຫາຣາ

ຕຕ຺ຖ ກຕເມ ຈຕ຺ຕາໂຣ ອນຣິຍໂວຫາຣາ? ອທິຏ຺ເຐ ທິຏ຺ຐວາທິຕາ, ອສ຺ສຸເຕ ສຸຕວາທິຕາ, ອມຸເຕ ມຸຕວາທິຕາ, ອວິຎ຺ຎາເຕ ວິຎ຺ຎາຕວາທິຕາ – ອິເມ ຈຕ຺ຕາໂຣ ອນຣິຍໂວຫາຣາ.

(໑໐) ອປເຣປິ ຈຕ຺ຕາໂຣ ອນຣິຍໂວຫາຣາ

ຕຕ຺ຖ ກຕເມ ອປເຣປິ ຈຕ຺ຕາໂຣ ອນຣິຍໂວຫາຣາ? ທິຏ຺ເຐ ອທິຏ຺ຐວາທິຕາ, ສຸເຕ ອສ຺ສຸຕວາທິຕາ, ມຸເຕ ອມຸຕວາທິຕາ, ວິຎ຺ຎາເຕ ອວິຎ຺ຎາຕວາທິຕາ – ອິເມ ຈຕ຺ຕາໂຣ ອນຣິຍໂວຫາຣາ.

(໑໑) ຈຕ຺ຕາຣິ ທຸຈ຺ຈຣິຕານິ

ຕຕ຺ຖ ກຕມານິ ຈຕ຺ຕາຣິ ທຸຈ຺ຈຣິຕານິ? ປາຓາຕິປາໂຕ, ອທິນ຺ນາທານໍ, ກາເມສຸມິຈ຺ຉາຈາໂຣ, ມຸສາວາໂທ – ອິມານິ ຈຕ຺ຕາຣິ ທຸຈ຺ຈຣິຕານິ.

(໑໒) ອປຣານິປິ ຈຕ຺ຕາຣິ ທຸຈ຺ຈຣິຕານິ

ຕຕ຺ຖ ກຕມານິ ອປຣານິປິ ຈຕ຺ຕາຣິ ທຸຈ຺ຈຣິຕານິ? ມຸສາວາໂທ, ປິສຸຓາ ວາຈາ, ຜຣຸສາ ວາຈາ, ສມ຺ຜປ຺ປລາໂປ – ອິມານິ ຈຕ຺ຕາຣິ ທຸຈ຺ຈຣິຕານິ.

(໑໓) ຈຕ຺ຕາຣິ ຠຍານິ

ຕຕ຺ຖ ກຕມານິ ຈຕ຺ຕາຣິ ຠຍານິ? ຊາຕິຠຍໍ, ຊຣາຠຍໍ, ພ຺ຍາຘິຠຍໍ, ມຣຓຠຍໍ – ອິມານິ ຈຕ຺ຕາຣິ ຠຍານິ.

(໑໔) ອປຣານິປິ ຈຕ຺ຕາຣິ ຠຍານິ

ຕຕ຺ຖ ກຕມານິ ອປຣານິປິ ຈຕ຺ຕາຣິ ຠຍານິ? ຣາຊຠຍໍ, ໂຈຣຠຍໍ, ອຄ຺ຄິຠຍໍ, ອຸທກຠຍໍ – ອິມານິ ຈຕ຺ຕາຣິ ຠຍານິ.

ຕຕ຺ຖ ກຕມານິ ອປຣານິປິ ຈຕ຺ຕາຣິ ຠຍານິ? ອູມິຠຍໍ, ກຸມ຺ຠີລຠຍໍ [ກຸມ຺ຠີຣຠຍໍ, ກຸມ຺ຠີຬຠຍໍ (?) (ກຸມ຺ຠ + ອີຣ + ອ = ຠຍ)], ອາວຏ຺ຏຠຍໍ, ສຸສຸກາຠຍໍ – ອິມານິ ຈຕ຺ຕາຣິ ຠຍານິ.

ຕຕ຺ຖ ກຕມານິ ອປຣານິປິ ຈຕ຺ຕາຣິ ຠຍານິ? ອຕ຺ຕານຸວາທຠຍໍ, ປຣານຸວາທຠຍໍ, ທຓ຺ຑຠຍໍ, ທຸຄ຺ຄຕິຠຍໍ – ອິມານິ ຈຕ຺ຕາຣິ ຠຍານິ.

(໑໕) ຈຕສ຺ໂສ ທິຏ຺ຐິໂຍ

ຕຕ຺ຖ ກຕມາ ຈຕສ຺ໂສ ທິຏ຺ຐິໂຍ? ‘‘ສຍງ຺ກຕໍ ສຸຂທຸກ຺ຂ’’ນ຺ຕິ ສຈ຺ຈໂຕ ເຖຕໂຕ ທິຏ຺ຐິ ອຸປ຺ປຊ຺ຊຕິ, ‘‘ປຣງ຺ກຕໍ ສຸຂທຸກ຺ຂ’’ນ຺ຕິ ສຈ຺ຈໂຕ ເຖຕໂຕ ທິຏ຺ຐິ ອຸປ຺ປຊ຺ຊຕິ, ‘‘ສຍງ຺ກຕຎ຺ຈ ປຣງ຺ກຕຎ຺ຈ ສຸຂທຸກ຺ຂ’’ນ຺ຕິ ສຈ຺ຈໂຕ ເຖຕໂຕ ທິຏ຺ຐິ ອຸປ຺ປຊ຺ຊຕິ, ‘‘ອສຍງ຺ກາຣໍ ອປຣງ຺ກາຣໍ ອຘິຈ຺ຈສມຸປ຺ປນ຺ນໍ ສຸຂທຸກ຺ຂ’’ນ຺ຕິ ສຈ຺ຈໂຕ ເຖຕໂຕ ທິຏ຺ຐິ ອຸປ຺ປຊ຺ຊຕິ – ອິມາ ຈຕສ຺ໂສ ທິຏ຺ຐິໂຍ.

ຈຕຸກ຺ກໍ.