໑໗. ຂຸທ຺ທກວຕ຺ຖຸວິຠງ຺ໂຄ
໑. ເອກກມາຕິກາ
໘໓໒. (໑)ຊາຕິມໂທ (໒)ໂຄຕ຺ຕມໂທ (໓)ອາໂຣຄ຺ຍມໂທ (໔)ໂຍພ຺ພນມໂທ (໕)ຊີວິຕມໂທ (໖)ລາຠມໂທ (໗)ສກ຺ກາຣມໂທ (໘) ຄຣຸກາຣມໂທ (໙) ປຸເຣກ຺ຂາຣມໂທ (໑໐) ປຣິວາຣມໂທ (໑໑) ໂຠຄມໂທ (໑໒) ວຓ຺ຓມໂທ (໑໓) ສຸຕມໂທ (໑໔) ປຏິຠານມໂທ (໑໕) ຣຕ຺ຕຎ຺ຎຸມໂທ (໑໖) ປິຓ຺ຑປາຕິກມໂທ (໑໗) ອນວຎ຺ຎາຕມໂທ (໑໘) ອິຣິຍາປຖມໂທ (໑໙) ອິທ຺ຘິມໂທ (໒໐) ຍສມໂທ (໒໑) ສີລມໂທ (໒໒) ຌານມໂທ (໒໓) ສິປ຺ປມໂທ (໒໔) ອາໂຣຫມໂທ (໒໕) ປຣິຓາຫມໂທ (໒໖) ສຓ຺ຐານມໂທ (໒໗) ປາຣິປູຣິມໂທ (໒໘)ມໂທ (໒໙) ປມາໂທ (໓໐) ຖມ຺ໂຠ (໓໑) ສາຣມ຺ໂຠ (໓໒) ອຕ຺ຣິຈ຺ຉຕາ (໓໓)ມຫິຈ຺ຉຕາ (໓໔) ປາປິຈ຺ຉຕາ (໓໕) ສິງ຺ຄໍ (໓໖) ຕິນ຺ຕິຓໍ (໓໗) ຈາປລ຺ຍໍ (໓໘)ອສຠາຄວຸຕ຺ຕິ (໓໙) ອຣຕິ (໔໐) ຕນ຺ທີ (໔໑) ວິຊມ຺ຠິຕາ (໔໒) ຠຕ຺ຕສມ຺ມໂທ (໔໓) ເຈຕໂສ ຈ ລີນຕ຺ຕໍ [ເຈຕໂສ ລີນຕ຺ຕໍ (ສ຺ຍາ.)] (໔໔) ກຸຫນາ (໔໕) ລປນາ (໔໖) ເນມິຕ຺ຕິກຕາ (໔໗)ນິປ຺ເປສິກຕາ (໔໘) ລາເຠນ ລາຠໍ ນິຊິຄີສນຕາ [ນິຊິຄິໍສນຕາ (ສີ.), ຊິຄິໍສນຕາ (ສ຺ຍາ.)] (໔໙) ເສຍ຺ໂຍຫມສ຺ມີຕິ ມາໂນ (໕໐) ສທິໂສຫມສ຺ມີຕິ ມາໂນ (໕໑) ຫີໂນ ຫມສ຺ມີຕິ ມາໂນ (໕໒) ເສຍ຺ຍສ຺ສ ເສຍ຺ໂຍຫມສ຺ມີຕິ ມາໂນ (໕໓) ເສຍ຺ຍສ຺ສ ສທິໂສຫມສ຺ມີຕິ ມາໂນ (໕໔) ເສຍ຺ຍສ຺ສ ຫີໂນຫມສ຺ມີຕິ ມາໂນ (໕໕) ສທິສສ຺ສ ເສຍ຺ໂຍຫມສ຺ມີຕິ ມາໂນ (໕໖) ສທິສສ຺ສ ສທິໂສຫມສ຺ມີຕິ ມາໂນ (໕໗) ສທິສສ຺ສ ຫີໂນຫມສ຺ມີຕິ ມາໂນ (໕໘) ຫີນສ຺ສ ເສຍ຺ໂຍຫມສ຺ມີຕິ ມາໂນ (໕໙) ຫີນສ຺ສ ສທິໂສຫມສ຺ມີຕິ ມາໂນ (໖໐) ຫີນສ຺ສ ຫີໂນຫມສ຺ມີຕິ ມາໂນ (໖໑) ມາໂນ (໖໒) ອຕິມາໂນ (໖໓) ມານາຕິມາໂນ (໖໔) ໂອມາໂນ (໖໕)ອຘິມາໂນ (໖໖) ອສ຺ມິມາໂນ (໖໗) ມິຈ຺ຉາມາໂນ (໖໘) ຎາຕິວິຕກ຺ໂກ (໖໙)ຊນປທວິຕກ຺ໂກ (໗໐) ອມຣວິຕກ຺ໂກ (໗໑) ປຣານຸທ຺ທຍຕາປຏິສໍຍຸຕ຺ໂຕ ວິຕກ຺ໂກ (໗໒) ລາຠສກ຺ກາຣສິໂລກປຏິສໍຍຸຕ຺ໂຕ ວິຕກ຺ໂກ (໗໓) ອນວຎ຺ຎຕ຺ຕິປຏິສໍຍຸຕ຺ໂຕ ວິຕກ຺ໂກ
ເອກກໍ.
໒. ທຸກມາຕິກາ
໘໓໓. (໑) ໂກໂຘ ຈ ອຸປນາໂຫ ຈ (໒) ມກ຺ໂຂ ຈ ປຬາໂສ [ປລາໂສ (ສີ. ສ຺ຍາ.)] ຈ (໓) ອິສ຺ສາ ຈ ມຈ຺ຉຣິຍຎ຺ຈ (໔) ມາຍາ ຈ ສາເຐຍ຺ຍຎ຺ຈ (໕) ອວິຊ຺ຊາ ຈ ຠວຕຓ຺ຫາ ຈ (໖) ຠວທິຏ຺ຐິ ຈ ວິຠວທິຏ຺ຐິ ຈ (໗) ສສ຺ສຕທິຏ຺ຐິ ຈ ອຸຈ຺ເຉທທິຏ຺ຐິ ຈ (໘) ອນ຺ຕວາທິຏ຺ຐິ ຈ ອນນ຺ຕວາທິຏ຺ຐິ ຈ (໙) ປຸພ຺ພນ຺ຕານຸທິຏ຺ຐິ ຈ ອປຣນ຺ຕານຸທິຏ຺ຐິ ຈ (໑໐) ອຫິຣິກຎ຺ຈ ອໂນຕ຺ຕປ຺ປຎ຺ຈ (໑໑) ໂທວຈສ຺ສຕາ ຈ ປາປມິຕ຺ຕຕາ ຈ (໑໒) ອນຊ຺ຊໂວ ຈ ອມທ຺ທໂວ ຈ (໑໓) ອກ຺ຂນ຺ຕິ ຈ ອໂສຣຈ຺ຈຎ຺ຈ (໑໔) ອສາຂລ຺ຍຎ຺ຈ ອປ຺ປຏິສນ຺ຖາໂຣ ຈ (໑໕)ອິນ຺ທ຺ຣິເຍສຸ ອຄຸຕ຺ຕທ຺ວາຣຕາ ຈ ໂຠຊເນ ອມຕ຺ຕຎ຺ຎຸຕາ ຈ (໑໖) ມຸຏ຺ຐສ຺ສຈ຺ຈຎ຺ຈ ອສມ຺ປຊຎ຺ຎຎ຺ຈ (໑໗) ສີລວິປຕ຺ຕິ ຈ ທິຏ຺ຐິວິປຕ຺ຕິ ຈ (໑໘) ອຊ຺ຌຕ຺ຕສໍໂຍຊນຎ຺ຈ ພຫິທ຺ຘາສໍໂຍຊນຎ຺ຈ
ທຸກໍ.
໓. ຕິກມາຕິກາ
໘໓໔. (໑) ຕີຓິ ອກຸສລມູລານິ (໒) ຕໂຍ ອກຸສລວິຕກ຺ກາ (໓) ຕິສ຺ໂສ ອກຸສລສຎ຺ຎາ (໔) ຕິສ຺ໂສ ອກຸສລຘາຕຸໂຍ (໕) ຕີຓິ ທຸຈ຺ຈຣິຕານິ (໖) ຕໂຍ ອາສວາ (໗) ຕີຓິ ສໍໂຍຊນານິ (໘) ຕິສ຺ໂສ ຕຓ຺ຫາ (໙) ອປຣາປິ ຕິສ຺ໂສ ຕຓ຺ຫາ (໑໐) ອປຣາປິ ຕິສ຺ໂສ ຕຓ຺ຫາ (໑໑) ຕິສ຺ໂສ ເອສນາ (໑໒) ຕິສ຺ໂສ ວິຘາ (໑໓) ຕີຓິ ຠຍານິ (໑໔)ຕີຓິ ຕມານິ (໑໕) ຕີຓິ ຕິຕ຺ຖາຍຕນານິ (໑໖) ຕໂຍ ກິຎ຺ຈນາ (໑໗) ຕີຓິ ອງ຺ຄຓານິ (໑໘) ຕີຓິ ມລານິ (໑໙) ຕີຓິ ວິສມານິ (໒໐) ອປຣານິປິ ຕີຓິ ວິສມານິ (໒໑) ຕໂຍ ອຄ຺ຄີ (໒໒) ຕໂຍ ກສາວາ (໒໓) ອປເຣປິ ຕໂຍ ກສາວາ (໒໔)ອສ຺ສາທທິຏ຺ຐິ, ອຕ຺ຕານຸທິຏ຺ຐິ, ມິຈ຺ຉາທິຏ຺ຐິ (໒໕) ອຣຕິ, ວິເຫສາ, ອຘມ຺ມຈຣິຍາ (໒໖)ໂທວຈສ຺ສຕາ, ປາປມິຕ຺ຕຕາ, ນານຕ຺ຕສຎ຺ຎາ (໒໗) ອຸທ຺ຘຈ຺ຈໍ, ໂກສຊ຺ຊໍ, ປມາໂທ (໒໘) ອສນ຺ຕຸຏ຺ຐິຕາ, ອສມ຺ປຊຎ຺ຎຕາ, ມຫິຈ຺ຉຕາ (໒໙) ອຫິຣິກໍ, ອໂນຕ຺ຕປ຺ປໍ, ປມາໂທ (໓໐)ອນາທຣິຍໍ, ໂທວຈສ຺ສຕາ, ປາປມິຕ຺ຕຕາ (໓໑) ອສ຺ສທ຺ຘິຍໍ, ອວທຎ຺ຎຸຕາ, ໂກສຊ຺ຊໍ (໓໒) ອຸທ຺ຘຈ຺ຈໍ, ອສໍວໂຣ, ທຸສ຺ສີລ຺ຍໍ (໓໓) ອຣິຍານໍ ອທສ຺ສນກມ຺ຍຕາ, ສທ຺ຘມ຺ມໍ ອໂສຕຸກມ຺ຍຕາ, ອຸປາຣມ຺ຠຈິຕ຺ຕຕາ (໓໔) ມຸຏ຺ຐສ຺ສຈ຺ຈໍ, ອສມ຺ປຊຎ຺ຎໍ, ເຈຕໂສ ວິກ຺ເຂໂປ (໓໕)ອໂຍນິໂສ ມນສິກາໂຣ, ກຸມ຺ມຄ຺ຄເສວນາ, ເຈຕໂສ ຈ ລີນຕ຺ຕໍ
ຕິກໍ.
໔. ຈຕຸກ຺ກມາຕິກາ
໘໓໕. (໑) ຈຕ຺ຕາໂຣ ອາສວາ (໒) ຈຕ຺ຕາໂຣ ຄນ຺ຖາ (໓) ຈຕ຺ຕາໂຣ ໂອຆາ (໔) ຈຕ຺ຕາໂຣ ໂຍຄາ (໕) ຈຕ຺ຕາຣິ ອຸປາທານານິ (໖) ຈຕ຺ຕາໂຣ ຕຓ຺ຫຸປ຺ປາທາ (໗) ຈຕ຺ຕາຣິ ອຄຕິຄມນານິ (໘) ຈຕ຺ຕາໂຣ ວິປຣິຍາສາ [ວິປຣິເຍສາ (ສີ. ສ຺ຍາ. ກ.)] (໙) ຈຕ຺ຕາໂຣ ອນຣິຍໂວຫາຣາ (໑໐) ອປເຣປິ ຈຕ຺ຕາໂຣ ອນຣິຍໂວຫາຣາ (໑໑) ຈຕ຺ຕາຣິ ທຸຈ຺ຈຣິຕານິ (໑໒) ອປຣານິປິ ຈຕ຺ຕາຣິ ທຸຈ຺ຈຣິຕານິ (໑໓)ຈຕ຺ຕາຣິ ຠຍານິ (໑໔) ອປຣານິປິ ຈຕ຺ຕາຣິ ຠຍານິ (໑໕) ຈຕສ຺ໂສ ທິຏ຺ຐິໂຍ
ຈຕຸກ຺ກໍ.
໕. ປຎ຺ຈກມາຕິກາ
໘໓໖. (໑) ປຎ຺ໂຈຣມ຺ຠາຄິຍານິ ສໍໂຍຊນານິ (໒) ປຎ຺ຈຸທ຺ຘມ຺ຠາຄິຍານິ ສໍໂຍຊນານິ (໓) ປຎ຺ຈ ມຈ຺ຉຣິຍານິ (໔) ປຎ຺ຈ ສງ຺ຄາ (໕) ປຎ຺ຈ ສລ຺ລາ (໖) ປຎ຺ຈ ເຈໂຕຂິລາ (໗)ປຎ຺ຈ ເຈຕໂສວິນິພນ຺ຘາ [ເຈຕໂສວິນິພທ຺ຘາ (ກ.)] (໘) ປຎ຺ຈ ນີວຣຓານິ (໙) ປຎ຺ຈ ກມ຺ມານິ ອານນ຺ຕຣິການິ (໑໐) ປຎ຺ຈ ທິຏ຺ຐິໂຍ (໑໑) ປຎ຺ຈ ເວຣາ (໑໒) ປຎ຺ຈ ພ຺ຍສນາ (໑໓) ປຎ຺ຈ ອກ຺ຂນ຺ຕິຍາ ອາທີນວາ (໑໔) ປຎ຺ຈ ຠຍານິ (໑໕) ປຎ຺ຈ ທິຏ຺ຐຘມ຺ມນິພ຺ພານວາທາ
ປຎ຺ຈກໍ.
໖. ຉກ຺ກມາຕິກາ
໘໓໗. (໑) ຉ ວິວາທມູລານິ (໒) ຉ ຉນ຺ທຣາຄາ (໓) ຉ ວິໂຣຘວຕ຺ຖູນິ (໔) ຉ ຕຓ຺ຫາກາຍາ (໕) ຉ ອຄາຣວາ (໖) ຉ ປຣິຫານິຍາ ຘມ຺ມາ (໗) ອປເຣປິ ຉ ປຣິຫານິຍາ ຘມ຺ມາ (໘) ຉ ໂສມນສ຺ສຸປວິຈາຣາ (໙) ຉ ໂທມນສ຺ສຸປວິຈາຣາ (໑໐) ຉ ອຸເປກ຺ຂຸປວິຈາຣາ (໑໑) ຉ ເຄຫສິຕານິ ໂສມນສ຺ສານິ (໑໒) ຉ ເຄຫສິຕານິ ໂທມນສ຺ສານິ (໑໓) ຉ ເຄຫສິຕາ ອຸເປກ຺ຂາ (໑໔) ຉ ທິຏ຺ຐິໂຍ
ຉກ຺ກໍ.
໗. ສຕ຺ຕກມາຕິກາ
໘໓໘. (໑) ສຕ຺ຕ ອນຸສຍາ (໒) ສຕ຺ຕ ສໍໂຍຊນານິ (໓) ສຕ຺ຕ ປຣິຍຸຏ຺ຐານານິ (໔)ສຕ຺ຕ ອສທ຺ຘມ຺ມາ (໕) ສຕ຺ຕ ທຸຈ຺ຈຣິຕານິ (໖) ສຕ຺ຕ ມານາ (໗) ສຕ຺ຕ ທິຏ຺ຐິໂຍ
ສຕ຺ຕກໍ.
໘. ອຏ຺ຐກມາຕິກາ
໘໓໙. (໑) ອຏ຺ຐ ກິເລສວຕ຺ຖູນິ (໒) ອຏ຺ຐ ກຸສີຕວຕ຺ຖູນິ (໓) ອຏ຺ຐສຸ ໂລກຘມ຺ເມສຸ ຈິຕ຺ຕສ຺ສ ປຏິຆາໂຕ (໔) ອຏ຺ຐ ອນຣິຍໂວຫາຣາ (໕) ອຏ຺ຐ ມິຈ຺ຉຕ຺ຕາ (໖) ອຏ຺ຐ ປຸຣິສໂທສາ (໗) ອຏ຺ຐ ອສຎ຺ຎິວາທາ (໘) ອຏ຺ຐ ເນວສຎ຺ຎິນາສຎ຺ຎິວາທາ
ອຏ຺ຐກໍ.
໙. ນວກມາຕິກາ
໘໔໐. (໑) ນວ ອາຆາຕວຕ຺ຖູນິ (໒) ນວ ປຸຣິສມລານິ (໓) ນວວິຘາ ມານາ (໔)ນວ ຕຓ຺ຫາມູລກາ ຘມ຺ມາ (໕) ນວ ອິຎ຺ຊິຕານິ (໖) ນວ ມຎ຺ຎິຕານິ (໗) ນວ ຜນ຺ທິຕານິ (໘) ນວ ປປຎ຺ຈິຕານິ (໙) ນວ ສງ຺ຂຕານິ
ນວກໍ.
໑໐. ທສກມາຕິກາ
໘໔໑. (໑) ທສ ກິເລສວຕ຺ຖູນິ (໒) ທສ ອາຆາຕວຕ຺ຖູນິ (໓) ທສ ອກຸສລກມ຺ມປຖາ (໔) ທສ ສໍໂຍຊນານິ (໕) ທສ ມິຈ຺ຉຕ຺ຕາ (໖) ທສວຕ຺ຖຸກາ ມິຈ຺ຉາທິຏ຺ຐິ (໗) ທສວຕ຺ຖຸກາ ອນ຺ຕຄ຺ຄາຫິກາ ທິຏ຺ຐິ
ທສກໍ.
໘໔໒. ອຏ຺ຐາຣສ ຕຓ຺ຫາວິຈຣິຕານິ ອຊ຺ຌຕ຺ຕິກສ຺ສ ອຸປາທາຍ, ອຏ຺ຐາຣສ ຕຓ຺ຫາວິຈຣິຕານິ ພາຫິຣສ຺ສ ອຸປາທາຍ, ຕເທກຊ຺ຌໍ ອຠິສຎ຺ຎູຫິຕ຺ວາ ອຠິສງ຺ຂິປິຕ຺ວາ ຉຕ຺ຕິໍສ ຕຓ຺ຫາວິຈຣິຕານິ ໂຫນ຺ຕິ. ອິຕິ ອຕີຕານິ ຉຕ຺ຕິໍສ ຕຓ຺ຫາວິຈຣິຕານິ, ອນາຄຕານິ ຉຕ຺ຕິໍສ ຕຓ຺ຫາວິຈຣິຕານິ, ປຈ຺ຈຸປ຺ປນ຺ນານິ ຉຕ຺ຕິໍສ ຕຓ຺ຫາວິຈຣິຕານິ, ຕເທກຊ຺ຌໍ ອຠິສຎ຺ຎູຫິຕ຺ວາ ອຠິສງ຺ຂິປິຕ຺ວາ ອຏ຺ຐ ຕຓ຺ຫາວິຈຣິຕສຕໍ ໂຫຕິ. ຍານິ ຈ ທ຺ວາສຏ຺ຐິ ທິຏ຺ຐິຄຕານິ ພ຺ຣຫ຺ມຊາເລ ເວຍ຺ຍາກຣເຓ ວຸຕ຺ຕານິ ຠຄວຕາ.
ມາຕິກາ.
໑. ເອກກນິທ຺ເທໂສ
(໑) ຊາຕິມໂທ
໘໔໓. ຕຕ຺ຖ ກຕໂມ ຊາຕິມໂທ? ຊາຕິໍ ປຏິຈ຺ຈ ມໂທ ມຊ຺ຊນາ ມຊ຺ຊິຕຕ຺ຕໍ ມາໂນ ມຎ຺ຎນາ ມຎ຺ຎິຕຕ຺ຕໍ ອຸນ຺ນຕິ ອຸນ຺ນາໂມ [ອຸຓ຺ຓຕິ ອຸຓ຺ຓາໂມ (ສ຺ຍາ. ກ.) ຘ. ສ. ໑໑໒໑] ຘໂຊ ສມ຺ປຄ຺ຄາໂຫ ເກຕຸກມ຺ຍຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ຊາຕິມໂທ’’.
(໒-໒໗) ໂຄຕ຺ຕມທາທີ
໘໔໔. ຕຕ຺ຖ ກຕໂມ ໂຄຕ຺ຕມໂທ? ໂຄຕ຺ຕໍ ປຏິຈ຺ຈ…ເປ… ອາໂຣຄ຺ຍໍ ປຏິຈ຺ຈ…ເປ… ໂຍພ຺ພນໍ ປຏິຈ຺ຈ…ເປ… ຊີວິຕໍ ປຏິຈ຺ຈ…ເປ… ລາຠໍ ປຏິຈ຺ຈ…ເປ… ສກ຺ກາຣໍ ປຏິຈ຺ຈ…ເປ… ຄຣຸກາຣໍ ປຏິຈ຺ຈ…ເປ… ປຸເຣກ຺ຂາຣໍ ປຏິຈ຺ຈ…ເປ… ປຣິວາຣໍ ປຏິຈ຺ຈ…ເປ… ໂຠຄໍ ປຏິຈ຺ຈ…ເປ… ວຓ຺ຓໍ ປຏິຈ຺ຈ…ເປ… ສຸຕໍ ປຏິຈ຺ຈ…ເປ… ປຏິຠານໍ ປຏິຈ຺ຈ…ເປ… ຣຕ຺ຕຎ຺ຎຸຕໍ ປຏິຈ຺ຈ…ເປ… ປິຓ຺ຑປາຕິກຕ຺ຕໍ ປຏິຈ຺ຈ…ເປ… ອນວຎ຺ຎາຕໍ ປຏິຈ຺ຈ…ເປ… ອິຣິຍາປຖໍ ປຏິຈ຺ຈ…ເປ… ອິທ຺ຘິໍ ປຏິຈ຺ຈ…ເປ… ຍສໍ ປຏິຈ຺ຈ…ເປ… ສີລໍ ປຏິຈ຺ຈ…ເປ… ຌານໍ ປຏິຈ຺ຈ…ເປ… ສິປ຺ປໍ ປຏິຈ຺ຈ…ເປ… ອາໂຣຫໍ ປຏິຈ຺ຈ…ເປ… ປຣິຓາຫໍ ປຏິຈ຺ຈ…ເປ… ສຓ຺ຐານໍ ປຏິຈ຺ຈ…ເປ… ປາຣິປູຣິໍ ປຏິຈ຺ຈ ມໂທ ມຊ຺ຊນາ ມຊ຺ຊິຕຕ຺ຕໍ ມາໂນ ມຎ຺ຎນາ ມຎ຺ຎິຕຕ຺ຕໍ ອຸນ຺ນຕິ ອຸນ຺ນາໂມ ຘໂຊ ສມ຺ປຄ຺ຄາໂຫ ເກຕຸກມ຺ຍຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ປາຣິປູຣິມໂທ’’.
(໒໘) ມໂທ
໘໔໕. ຕຕ຺ຖ ກຕໂມ ມໂທ? ໂຍ ມໂທ ມຊ຺ຊນາ ມຊ຺ຊິຕຕ຺ຕໍ ມາໂນ ມຎ຺ຎນາ ມຎ຺ຎິຕຕ຺ຕໍ ອຸນ຺ນຕິ ອຸນ຺ນາໂມ ຘໂຊ ສມ຺ປຄ຺ຄາໂຫ ເກຕຸກມ຺ຍຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ມໂທ’’.
(໒໙) ປມາໂທ
໘໔໖. ຕຕ຺ຖ ກຕໂມ ປມາໂທ? ກາຍທຸຈ຺ຈຣິເຕ ວາ ວຈີທຸຈ຺ຈຣິເຕ ວາ ມໂນທຸຈ຺ຈຣິເຕ ວາ ປຎ຺ຈສຸ ວາ ກາມຄຸເຓສຸ ຈິຕ຺ຕສ຺ສ ໂວສ຺ສຄ຺ໂຄ ໂວສ຺ສຄ຺ຄານຸປ຺ປທານໍ ກຸສລານໍ ວາ ຘມ຺ມານໍ ຠາວນາຍ ອສກ຺ກຈ຺ຈກິຣິຍຕາ ອສາຕຈ຺ຈກິຣິຍຕາ ອນຏ຺ຐິຕກິຣິຍຕາ ໂອລີນວຸຕ຺ຕິຕາ ນິກ຺ຂິຕ຺ຕຉນ຺ທຕາ ນິກ຺ຂິຕ຺ຕຘຸຣຕາ ອນາເສວນາ ອຠາວນາ ອພຫຸລີກມ຺ມໍ ອນຘິຏ຺ຐານໍ ອນນຸໂຍໂຄ ປມາໂທ, ໂຍ ເອວຣູໂປ ປມາໂທ ປມຊ຺ຊນາ ປມຊ຺ຊິຕຕ຺ຕໍ – ອຍໍ ວຸຈ຺ຈຕິ ‘‘ປມາໂທ’’.
(໓໐) ຖມ຺ໂຠ
໘໔໗. ຕຕ຺ຖ ກຕໂມ ຖມ຺ໂຠ? ໂຍ ຖມ຺ໂຠ ຖມ຺ຠນາ ຖມ຺ຠິຕຕ຺ຕໍ ກກ຺ຂຬິຍໍ ຜາຣຸສິຍໍ ອຸຊຸຈິຕ຺ຕຕາ ອມຸທຸຕາ – ອຍໍ ວຸຈ຺ຈຕິ ‘‘ຖມ຺ໂຠ’’.
(໓໑) ສາຣມ຺ໂຠ
໘໔໘. ຕຕ຺ຖ ກຕໂມ ສາຣມ຺ໂຠ? ໂຍ ສາຣມ຺ໂຠ ປຏິສາຣມ຺ໂຠ ສາຣມ຺ຠນາ ປຏິສາຣມ຺ຠນາ ປຏິສາຣມ຺ຠິຕຕ຺ຕໍ – ອຍໍ ວຸຈ຺ຈຕິ ‘‘ສາຣມ຺ໂຠ’’.
(໓໒) ອຕ຺ຣິຈ຺ຉຕາ
໘໔໙. ຕຕ຺ຖ ກຕມາ ອຕ຺ຣິຈ຺ຉຕາ? ອິຕຣີຕຣຈີວຣປິຓ຺ຑປາຕເສນາສນຄິລານປ຺ປຈ຺ຈຍເຠສຊ຺ຊປຣິກ຺ຂາເຣຫິ ປຎ຺ຈຫິ ວາ ກາມຄຸເຓຫິ ອສນ຺ຕຸຏ຺ຐສ຺ສ ຠິຍ຺ໂຍກມ຺ຍຕາ, ຍາ ເອວຣູປາ ອິຈ຺ຉາ ອິຈ຺ຉາຄຕາ ອຕ຺ຣິຈ຺ຉຕາ ຣາໂຄ ສາຣາໂຄ ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ອຕ຺ຣິຈ຺ຉຕາ’’.
(໓໓) ມຫິຈ຺ຉຕາ
໘໕໐. ຕຕ຺ຖ ກຕມາ ມຫິຈ຺ຉຕາ? ອິຕຣີຕຣຈີວຣປິຓ຺ຑປາຕເສນາສນຄິລານປ຺ປຈ຺ຈຍເຠສຊ຺ຊປຣິກ຺ຂາເຣຫິ ປຎ຺ຈຫິ ວາ ກາມຄຸເຓຫິ ອສນ຺ຕຸຏ຺ຐສ຺ສ ຠິຍ຺ໂຍກມ຺ຍຕາ, ຍາ ເອວຣູປາ ອິຈ຺ຉາ ອິຈ຺ຉາຄຕາ ມຫິຈ຺ຉຕາ ຣາໂຄ ສາຣາໂຄ ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ມຫິຈ຺ຉຕາ’’.
(໓໔) ປາປິຈ຺ຉຕາ
໘໕໑. ຕຕ຺ຖ ກຕມາ ປາປິຈ຺ຉຕາ? ອິເຘກຈ຺ໂຈ ອສ຺ສທ຺ໂຘ ສມາໂນ ‘‘ສທ຺ໂຘຕິ ມໍ ຊໂນ ຊານາຕູ’’ຕິ ອິຈ຺ຉຕິ, ທຸສ຺ສີໂລ ສມາໂນ ‘‘ສີລວາຕິ ມໍ ຊໂນ ຊານາຕູ’’ຕິ ອິຈ຺ຉຕິ, ອປ຺ປສ຺ສຸໂຕ ສມາໂນ ‘‘ພຫຸສ຺ສຸໂຕຕິ ມໍ ຊໂນ ຊານາຕູ’’ຕິ ອິຈ຺ຉຕິ, ສງ຺ຄຓິກາຣາໂມ ສມາໂນ ‘‘ປວິວິຕ຺ໂຕຕິ ມໍ ຊໂນ ຊານາຕູ’’ຕິ ອິຈ຺ຉຕິ, ກຸສີໂຕ ສມາໂນ ‘‘ອາຣທ຺ຘວີຣິໂຍຕິ ມໍ ຊໂນ ຊານາຕູ’’ຕິ ອິຈ຺ຉຕິ, ມຸຏ຺ຐສ຺ສຕີ ສມາໂນ ‘‘ອຸປຏ຺ຐິຕສ຺ສຕີຕິ ມໍ ຊໂນ ຊານາຕູ’’ຕິ ອິຈ຺ຉຕິ, ອສມາຫິໂຕ ສມາໂນ ‘‘ສມາຫິໂຕຕິ ມໍ ຊໂນ ຊານາຕູ’’ຕິ ອິຈ຺ຉຕິ, ທຸປ຺ປຎ຺ໂຎ ສມາໂນ ‘‘ປຎ຺ຎວາຕິ ມໍ ຊໂນ ຊານາຕູ’’ຕິ ອິຈ຺ຉຕິ, ອຂີຓາສໂວ ສມາໂນ ‘‘ຂີຓາສໂວຕິ ມໍ ຊໂນ ຊານາຕູ’’ຕິ ອິຈ຺ຉຕິ – ຍາ ເອວຣູປາ ອິຈ຺ຉາ ອິຈ຺ຉາຄຕາ ປາປິຈ຺ຉຕາ ຣາໂຄ ສາຣາໂຄ ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ປາປິຈ຺ຉຕາ’’.
(໓໕) ສິງ຺ຄໍ
໘໕໒. ຕຕ຺ຖ ກຕມໍ ສິງ຺ຄໍ? ຍໍ ສິງ຺ຄໍ ສິງ຺ຄາຣຕາ ຈາຕຸຣຕາ ຈາຕຸຣິຍໍ ປຣິກ຺ຂຕ຺ຕຕາ ປາຣິກ຺ຂຕ຺ຕິຍໍ – ອິທໍ ວຸຈ຺ຈຕິ ‘‘ສິງ຺ຄໍ’’.
(໓໖) ຕິນ຺ຕິຓໍ
໘໕໓. ຕຕ຺ຖ ກຕມໍ ຕິນ຺ຕິຓໍ? ຍໍ ຕິນ຺ຕິຓໍ ຕິນ຺ຕິຓາຍນາ ຕິນ຺ຕິຓາຍິຕຕ຺ຕໍ ໂລລຸປ຺ປໍ ໂລລຸປ຺ປາຍນາ ໂລລຸປ຺ປາຍິຕຕ຺ຕໍ ປຸຈ຺ຉຎ຺ຊິກຕາ ສາຘຸກມ຺ຍຕາ – ອິທໍ ວຸຈ຺ຈຕິ ‘‘ຕິນ຺ຕິຓໍ’’.
(໓໗) ຈາປລ຺ຍໍ
໘໕໔. ຕຕ຺ຖ ກຕມໍ ຈາປລ຺ຍໍ? ຈີວຣມຓ຺ຑນາ ປຕ຺ຕມຓ຺ຑນາ ເສນາສນມຓ຺ຑນາ ອິມສ຺ສ ວາ ປູຕິກາຍສ຺ສ ພາຫິຣານໍ ວາ ປຣິກ຺ຂາຣານໍ ມຓ຺ຑນາ ວິຠູສນາ ເກຬນາ ປຣິເກຬນາ ຄິທ຺ຘິກຕາ ຄິທ຺ຘິກຕ຺ຕໍ ຈປລຕາ ຈາປລ຺ຍໍ – ອິທໍ ວຸຈ຺ຈຕິ ‘‘ຈາປລ຺ຍໍ’’.
(໓໘) ອສຠາຄວຸຕ຺ຕິ
໘໕໕. ຕຕ຺ຖ ກຕມໍ ອສຠາຄວຸຕ຺ຕິ? ມາຕຣິ ວາ ປິຕຣິ ວາ ເຊຏ຺ເຐ ວາ ຠາຕຣິ ວາ ອາຈຣິເຍສຸ ວາ ອຸປຊ຺ຌາເຍ ວາ ພຸທ຺ເຘ ວາ ສາວເກສຸ ວາ ອຎ຺ຎຕຣຎ຺ຎຕເຣສຸ ຄຣຸຏ຺ຐານິເຍສຸ ວິປ຺ປຏິກູລຄ຺ຄາຫິຕາ ວິປຈ຺ຈນີກສາຕຕາ ອນາທຣິຍໍ ອນາທຣິຍຕາ ອຄາຣວຕາ ອປ຺ປຕິສ຺ສວຕາ – ອຍໍ ວຸຈ຺ຈຕິ ‘‘ອສຠາຄວຸຕ຺ຕິ’’.
(໓໙) ອຣຕິ
໘໕໖. ຕຕ຺ຖ ກຕມາ ອຣຕິ? ປນ຺ເຕສຸ ວາ ເສນາສເນສຸ ອຎ຺ຎຕຣຎ຺ຎຕເຣສຸ ວາ ອຘິກຸສເລສຸ ຘມ຺ເມສຸ ອຣຕິ ອຣຕິຕາ ອນຠິຣຕິ ອນຠິຣມຓາ ອຸກ຺ກຓ຺ຐິຕາ ປຣິຕສ຺ສິຕາ – ອຍໍ ວຸຈ຺ຈຕິ ‘‘ອຣຕິ’’.
(໔໐) ຕນ຺ທີ
໘໕໗. ຕຕ຺ຖ ກຕມາ ຕນ຺ທີ? ຍາ ຕນ຺ທີ ຕນ຺ທິຍນາ ຕນ຺ທິມນກຕາ ອາລສ຺ຍໍ ອາລສ຺ຍາຍນາ ອາລສ຺ຍາຍິຕຕ຺ຕໍ – ອຍໍ ວຸຈ຺ຈຕິ ‘‘ຕນ຺ທີ’’.
(໔໑) ວິຊມ຺ຠິຕາ
໘໕໘. ຕຕ຺ຖ ກຕມາ ວິຊມ຺ຠິຕາ? ຍາ ກາຍສ຺ສ ຊມ຺ຠນາ ວິຊມ຺ຠນາ ອານມນາ ວິນມນາ ສນ຺ນມນາ ປຓມນາ ພ຺ຍາຘິຍກໍ – ອຍໍ ວຸຈ຺ຈຕິ ‘‘ວິຊມ຺ຠິຕາ’’.
(໔໒) ຠຕ຺ຕສມ຺ມໂທ
໘໕໙. ຕຕ຺ຖ ກຕໂມ ຠຕ຺ຕສມ຺ມໂທ? ຍາ ຠຸຕ຺ຕາວິສ຺ສ ຠຕ຺ຕມຸຈ຺ຉາ ຠຕ຺ຕກິລມໂຖ ຠຕ຺ຕປຣິຬາໂຫ ກາຍທຸຏ຺ຐຸລ຺ລໍ – ອຍໍ ວຸຈ຺ຈຕິ ‘‘ຠຕ຺ຕສມ຺ມໂທ’’.
(໔໓) ເຈຕໂສ ຈ ລີນຕ຺ຕໍ
໘໖໐. ຕຕ຺ຖ ກຕມໍ ເຈຕໂສ ຈ ລີນຕ຺ຕໍ? ຍາ ຈິຕ຺ຕສ຺ສ ອກລ຺ຍຕາ ອກມ຺ມຎ຺ຎຕາ ໂອລີຍນາ ສລ຺ລີຍນາ ລີນໍ ລີຍນາ ລີຍິຕຕ຺ຕໍ ຖິນໍ ຖີຍນາ ຖີຍິຕຕ຺ຕໍ ຈິຕ຺ຕສ຺ສ – ອິທໍ ວຸຈ຺ຈຕິ ‘‘ເຈຕໂສ ຈ ລີນຕ຺ຕໍ’’.
(໔໔) ກຸຫນາ
໘໖໑. ຕຕ຺ຖ ກຕມາ ກຸຫນາ? ລາຠສກ຺ກາຣສິໂລກສນ຺ນິສ຺ສິຕສ຺ສ ປາປິຈ຺ຉສ຺ສ ອິຈ຺ຉາປກຕສ຺ສ ປຈ຺ຈຍປຏິເສວນສງ຺ຂາເຕນ [ປຈ຺ຈຍປຏິເສຘນສງ຺ຂາເຕນ (ສີ.)] ວາ ສາມນ຺ຕຊປ຺ປິເຕນ ວາ ອິຣິຍາປຖສ຺ສ ວາ ອຐປນາ [ອາຐປນາ (ກ.)] ຐປນາ ສຓ຺ຐປນາ ຠາກຸຏິຕາ ຠາກຸຏິຍໍ ກຸຫນາ ກຸຫາຍນາ ກຸຫິຕຕ຺ຕໍ – ອຍໍ ວຸຈ຺ຈຕິ ‘‘ກຸຫນາ’’.
(໔໕) ລປນາ
໘໖໒. ຕຕ຺ຖ ກຕມາ ລປນາ? ລາຠສກ຺ກາຣສິໂລກສນ຺ນິສ຺ສິຕສ຺ສ ປາປິຈ຺ຉສ຺ສ ອິຈ຺ຉາປກຕສ຺ສ ຍາ ປເຣສໍ ອາລປນາ ລປນາ ສລ຺ລປນາ ອຸລ຺ລປນາ ສມຸລ຺ລປນາ ອຸນ຺ນຫນາ ສມຸນ຺ນຫນາ ອຸກ຺ກາຈນາ ສມຸກ຺ກາຈນາ ອນຸປ຺ປິຍຠາຓິຕາ ຈາຏຸກມ຺ຍຕາ ມຸຄ຺ຄສູປ຺ຍຕາ ປາຣິຠຏຍຕາ – ອຍໍ ວຸຈ຺ຈຕິ ‘‘ລປນາ’’.
(໔໖) ເນມິຕ຺ຕິກຕາ
໘໖໓. ຕຕ຺ຖ ກຕມາ ເນມິຕ຺ຕິກຕາ? ລາຠສກ຺ກາຣສິໂລກສນ຺ນິສ຺ສິຕສ຺ສ ປາປິຈ຺ຉສ຺ສ ອິຈ຺ຉາປກຕສ຺ສ ຍໍ ປເຣສໍ ນິມິຕ຺ຕໍ ນິມິຕ຺ຕກມ຺ມໍ ໂອຠາໂສ ໂອຠາສກມ຺ມໍ ສາມນ຺ຕຊປ຺ປາ ປຣິກຖາ – ອຍໍ ວຸຈ຺ຈຕິ ‘‘ເນມິຕ຺ຕິກຕາ’’.
(໔໗) ນິປ຺ເປສິກຕາ
໘໖໔. ຕຕ຺ຖ ກຕມາ ນິປ຺ເປສິກຕາ? ລາຠສກ຺ກາຣສິໂລກສນ຺ນິສ຺ສິຕສ຺ສ ປາປິຈ຺ຉສ຺ສ ອິຈ຺ຉາປກຕສ຺ສ ຍາ ປເຣສໍ ອກ຺ໂກສນາ ວມ຺ຠນາ ຄຣຫຓາ ອຸກ຺ເຂປນາ ສມຸກ຺ເຂປນາ ຂິປນາ ສງ຺ຂິປນາ ປາປນາ ສມ຺ປາປນາ ອວຓ຺ຓຫາຣິກາ ປຣປິຏ຺ຐິມໍສິກຕາ – ອຍໍ ວຸຈ຺ຈຕິ ‘‘ນິປ຺ເປສິກຕາ’’.
(໔໘) ລາເຠນ ລາຠໍ ນິຊິຄີສນຕາ
໘໖໕. ຕຕ຺ຖ ກຕມາ ລາເຠນ ລາຠໍ ນິຊິຄີສນຕາ? ລາຠສກ຺ກາຣສິໂລກສນ຺ນິສ຺ສິໂຕ ປາປິຈ຺ໂຉ ອິຈ຺ຉາປກໂຕ ອິໂຕ ລທ຺ຘໍ ອາມິສໍ ອມຸຕ຺ຣ ຫຣຕິ ອມຸຕ຺ຣ ວາ ລທ຺ຘໍ ອາມິສໍ ອິຘ ອາຫຣຕິ, ຍາ ເອວຣູປາ ອາມິສສ຺ສ ເອຏ຺ຐິ ຄເວຏ຺ຐິ ປຣິເຍຏ຺ຐິ ເອສນາ ຄເວສນາ ປຣິເຍສນາ – ອຍໍ ວຸຈ຺ຈຕິ ‘‘ລາເຠນ ລາຠໍ ນິຊິຄີສນຕາ’’.
(໔໙) ເສຍ຺ໂຍຫມສ຺ມີຕິ ມາໂນ
໘໖໖. ຕຕ຺ຖ ກຕໂມ ເສຍ຺ໂຍຫມສ຺ມີຕິ ມາໂນ? ອິເຘກຈ຺ໂຈ ຊາຕິຍາ ວາ ໂຄຕ຺ເຕນ ວາ ໂກລປຸຕ຺ຕິເຍນ ວາ ວຓ຺ຓໂປກ຺ຂຣຕາຍ ວາ ຘເນນ ວາ ອຊ຺ເຌເນນ ວາ ກມ຺ມາຍຕເນນ ວາ ສິປ຺ປາຍຕເນນ ວາ ວິຊ຺ຊາຏ຺ຐາເນນ [ວິຊ຺ຊຏ຺ຐາເນນ (ສ຺ຍາ.)] ວາ ສຸເຕນ ວາ ປຏິຠາເນນ ວາ ອຎ຺ຎຕຣຎ຺ຎຕເຣນ ວຕ຺ຖຸນາ ມານໍ ຊປ຺ເປຕິ, ໂຍ ເອວຣູໂປ ມາໂນ ມຎ຺ຎນາ ມຎ຺ຎິຕຕ຺ຕໍ ອຸນ຺ນຕິ ອຸນ຺ນາໂມ ຘໂຊ ສມ຺ປຄ຺ຄາໂຫ ເກຕຸກມ຺ຍຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ເສຍ຺ໂຍຫມສ຺ມີຕິ ມາໂນ’’.
(໕໐) ສທິໂສຫມສ຺ມີຕິ ມາໂນ
໘໖໗. ຕຕ຺ຖ ກຕໂມ ສທິໂສຫມສ຺ມີຕິ ມາໂນ? ອິເຘກຈ຺ໂຈ ຊາຕິຍາ ວາ ໂຄຕ຺ເຕນ ວາ ໂກລປຸຕ຺ຕິເຍນ ວາ ວຓ຺ຓໂປກ຺ຂຣຕາຍ ວາ ຘເນນ ວາ ອຊ຺ເຌເນນ ວາ ກມ຺ມາຍຕເນນ ວາ ສິປ຺ປາຍຕເນນ ວາ ວິຊ຺ຊາຏ຺ຐາເນນ ວາ ສຸເຕນ ວາ ປຏິຠາເນນ ວາ ອຎ຺ຎຕຣຎ຺ຎຕເຣນ ວຕ຺ຖຸນາ ມານໍ ຊປ຺ເປຕິ, ໂຍ ເອວຣູໂປ ມາໂນ ມຎ຺ຎນາ ມຎ຺ຎິຕຕ຺ຕໍ ອຸນ຺ນຕິ ອຸນ຺ນາໂມ ຘໂຊ ສມ຺ປຄ຺ຄາໂຫ ເກຕຸກມ຺ຍຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ສທິໂສຫມສ຺ມີຕິ ມາໂນ’’.
(໕໑) ຫີໂນຫມສ຺ມີຕິ ມາໂນ
໘໖໘. ຕຕ຺ຖ ກຕໂມ ຫີໂນຫມສ຺ມີຕິ ມາໂນ? ອິເຘກຈ຺ໂຈ ຊາຕິຍາ ວາ ໂຄຕ຺ເຕນ ວາ ໂກລປຸຕ຺ຕິເຍນ ວາ ວຓ຺ຓໂປກ຺ຂຣຕາຍ ວາ ຘເນນ ວາ ອຊ຺ເຌເນນ ວາ ກມ຺ມາຍຕເນນ ວາ ສິປ຺ປາຍຕເນນ ວາ ວິຊ຺ຊາຏ຺ຐາເນນ ວາ ສຸເຕນ ວາ ປຏິຠາເນນ ວາ ອຎ຺ຎຕຣຎ຺ຎຕເຣນ ວຕ຺ຖຸນາ ໂອມານໍ ຊປ຺ເປຕິ, ໂຍ ເອວຣູໂປ ໂອມາໂນ ໂອມຎ຺ຎນາ ໂອມຎ຺ຎິຕຕ຺ຕໍ ຫີຬນາ ໂອຫີຬນາ ໂອຫີຬິຕຕ຺ຕໍ ອຕ຺ຕຸຎ຺ຎາ ອຕ຺ຕວຎ຺ຎາ ອຕ຺ຕປຣິຠໂວ – ອຍໍ ວຸຈ຺ຈຕິ ‘‘ຫີໂນຫມສ຺ມີຕິ ມາໂນ’’.
(໕໒) ເສຍ຺ຍສ຺ສ ເສຍ຺ໂຍຫມສ຺ມີຕິ ມາໂນ
໘໖໙. ຕຕ຺ຖ ກຕໂມ ເສຍ຺ຍສ຺ສ ເສຍ຺ໂຍຫມສ຺ມີຕິ ມາໂນ? ອິເຘກຈ຺ໂຈ ເສຍ຺ໂຍ ໂຫຕິ ຊາຕິຍາ ວາ ໂຄຕ຺ເຕນ ວາ ໂກລປຸຕ຺ຕິເຍນ ວາ ວຓ຺ຓໂປກ຺ຂຣຕາຍ ວາ ຘເນນ ວາ ອຊ຺ເຌເນນ ວາ ກມ຺ມາຍຕເນນ ວາ ສິປ຺ປາຍຕເນນ ວາ ວິຊ຺ຊາຏ຺ຐາເນນ ວາ ສຸເຕນ ວາ ປຏິຠາເນນ ວາ ອຎ຺ຎຕຣຎ຺ຎຕເຣນ ວຕ຺ຖຸນາ ປເຣຫິ ເສຍ຺ຍໍ ອຕ຺ຕານໍ ທຫຕິ; ໂສ ຕໍ ນິສ຺ສາຍ ມານໍ ຊປ຺ເປຕິ. ໂຍ ເອວຣູໂປ ມາໂນ ມຎ຺ຎນາ ມຎ຺ຎິຕຕ຺ຕໍ ອຸນ຺ນຕິ ອຸນ຺ນາໂມ ຘໂຊ ສມ຺ປຄ຺ຄາໂຫ ເກຕຸກມ຺ຍຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ເສຍ຺ຍສ຺ສ ເສຍ຺ໂຍຫມສ຺ມີຕິ ມາໂນ’’.
(໕໓) ເສຍ຺ຍສ຺ສ ສທິໂສຫມສ຺ມີຕິ ມາໂນ
໘໗໐. ຕຕ຺ຖ ກຕໂມ ເສຍ຺ຍສ຺ສ ສທິໂສຫມສ຺ມີຕິ ມາໂນ? ອິເຘກຈ຺ໂຈ ເສຍ຺ໂຍ ໂຫຕິ ຊາຕິຍາ ວາ ໂຄຕ຺ເຕນ ວາ ໂກລປຸຕ຺ຕິເຍນ ວາ ວຓ຺ຓໂປກ຺ຂຣຕາຍ ວາ ຘເນນ ວາ ອຊ຺ເຌເນນ ວາ ກມ຺ມາຍຕເນນ ວາ ສິປ຺ປາຍຕເນນ ວາ ວິຊ຺ຊາຏ຺ຐາເນນ ວາ ສຸເຕນ ວາ ປຏິຠາເນນ ວາ ອຎ຺ຎຕຣຎ຺ຎຕເຣນ ວຕ຺ຖຸນາ ປເຣຫິ ສທິສໍ ອຕ຺ຕານໍ ທຫຕິ; ໂສ ຕໍ ນິສ຺ສາຍ ມານໍ ຊປ຺ເປຕິ. ໂຍ ເອວຣູໂປ ມາໂນ ມຎ຺ຎນາ ມຎ຺ຎິຕຕ຺ຕໍ ອຸນ຺ນຕິ ອຸນ຺ນາໂມ ຘໂຊ ສມ຺ປຄ຺ຄາໂຫ ເກຕຸກມ຺ຍຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ເສຍ຺ຍສ຺ສ ສທິໂສຫມສ຺ມີຕິ ມາໂນ’’.
(໕໔) ເສຍ຺ຍສ຺ສ ຫີໂນຫມສ຺ມີຕິ ມາໂນ
໘໗໑. ຕຕ຺ຖ ກຕໂມ ເສຍ຺ຍສ຺ສ ຫີໂນຫມສ຺ມີຕິ ມາໂນ? ອິເຘກຈ຺ໂຈ ເສຍ຺ໂຍ ໂຫຕິ ຊາຕິຍາ ວາ ໂຄຕ຺ເຕນ ວາ ໂກລປຸຕ຺ຕິເຍນ ວາ ວຓ຺ຓໂປກ຺ຂຣຕາຍ ວາ ຘເນນ ວາ ອຊ຺ເຌເນນ ວາ ກມ຺ມາຍຕເນນ ວາ ສິປ຺ປາຍຕເນນ ວາ ວິຊ຺ຊາຏ຺ຐາເນນ ວາ ສຸເຕນ ວາ ປຏິຠາເນນ ວາ ອຎ຺ຎຕຣຎ຺ຎຕເຣນ ວຕ຺ຖຸນາ ປເຣຫິ ຫີນໍ ອຕ຺ຕານໍ ທຫຕິ; ໂສ ຕໍ ນິສ຺ສາຍ ໂອມານໍ ຊປ຺ເປຕິ. ໂຍ ເອວຣູໂປ ໂອມາໂນ ໂອມຎ຺ຎນາ ໂອມຎ຺ຎິຕຕ຺ຕໍ ຫີຬນາ ໂອຫີຬນາ ໂອຫີຬິຕຕ຺ຕໍ ອຕ຺ຕຸຎ຺ຎາ ອຕ຺ຕວຎ຺ຎາ ອຕ຺ຕປຣິຠໂວ – ອຍໍ ວຸຈ຺ຈຕິ ‘‘ເສຍ຺ຍສ຺ສ ຫີໂນຫມສ຺ມີຕິ ມາໂນ’’.
(໕໕) ສທິສສ຺ສ ເສຍ຺ໂຍຫມສ຺ມີຕິ ມາໂນ
໘໗໒. ຕຕ຺ຖ ກຕໂມ ສທິສສ຺ສ ເສຍ຺ໂຍຫມສ຺ມີຕິ ມາໂນ? ອິເຘກຈ຺ໂຈ ສທິໂສ ໂຫຕິ ຊາຕິຍາ ວາ ໂຄຕ຺ເຕນ ວາ ໂກລປຸຕ຺ຕິເຍນ ວາ…ເປ… ອຎ຺ຎຕຣຎ຺ຎຕເຣນ ວຕ຺ຖຸນາ ປເຣຫິ ເສຍ຺ຍໍ ອຕ຺ຕານໍ ທຫຕິ; ໂສ ຕໍ ນິສ຺ສາຍ ມານໍ ຊປ຺ເປຕິ. ໂຍ ເອວຣູໂປ ມາໂນ ມຎ຺ຎນາ ມຎ຺ຎິຕຕ຺ຕໍ…ເປ… ເກຕຸກມ຺ຍຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ສທິສສ຺ສ ເສຍ຺ໂຍຫມສ຺ມີຕິ ມາໂນ’’.
(໕໖) ສທິສສ຺ສ ສທິໂສຫມສ຺ມີຕິ ມາໂນ
໘໗໓. ຕຕ຺ຖ ກຕໂມ ສທິສສ຺ສ ສທິໂສຫມສ຺ມີຕິ ມາໂນ? ອິເຘກຈ຺ໂຈ ສທິໂສ ໂຫຕິ ຊາຕິຍາ ວາ ໂຄຕ຺ເຕນ ວາ ໂກລປຸຕ຺ຕິເຍນ ວາ…ເປ… ອຎ຺ຎຕຣຎ຺ຎຕເຣນ ວຕ຺ຖຸນາ ປເຣຫິ ສທິສໍ ອຕ຺ຕານໍ ທຫຕິ; ໂສ ຕໍ ນິສ຺ສາຍ ມານໍ ຊປ຺ເປຕິ. ໂຍ ເອວຣູໂປ ມາໂນ ມຎ຺ຎນາ ມຎ຺ຎິຕຕ຺ຕໍ ອຸນ຺ນຕິ ອຸນ຺ນາໂມ ຘໂຊ ສມ຺ປຄ຺ຄາໂຫ ເກຕຸກມ຺ຍຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ສທິສສ຺ສ ສທິໂສຫມສ຺ມີຕິ ມາໂນ’’.
(໕໗) ສທິສສ຺ສ ຫີໂນຫມສ຺ມີຕິ ມາໂນ
໘໗໔. ຕຕ຺ຖ ກຕໂມ ສທິສສ຺ສ ຫີໂນຫມສ຺ມີຕິ ມາໂນ? ອິເຘກຈ຺ໂຈ ສທິໂສ ໂຫຕິ ຊາຕິຍາ ວາ ໂຄຕ຺ເຕນ ວາ ໂກລປຸຕ຺ຕິເຍນ ວາ…ເປ… ອຎ຺ຎຕຣຎ຺ຎຕເຣນ ວຕ຺ຖຸນາ ປເຣຫິ ຫີນໍ ອຕ຺ຕານໍ ທຫຕິ; ໂສ ຕໍ ນິສ຺ສາຍ ໂອມານໍ ຊປ຺ເປຕິ. ໂຍ ເອວຣູໂປ ໂອມາໂນ ໂອມຎ຺ຎນາ ໂອມຎ຺ຎິຕຕ຺ຕໍ ຫີຬນາ ໂອຫີຬນາ ໂອຫີຬິຕຕ຺ຕໍ ອຕ຺ຕຸຎ຺ຎາ ອຕ຺ຕວຎ຺ຎາ ອຕ຺ຕປຣິຠໂວ – ອຍໍ ວຸຈ຺ຈຕິ ‘‘ສທິສສ຺ສ ຫີໂນຫມສ຺ມີຕິ ມາໂນ’’.
(໕໘) ຫີນສ຺ສ ເສຍ຺ໂຍຫມສ຺ມີຕິ ມາໂນ
໘໗໕. ຕຕ຺ຖ ກຕໂມ ຫີນສ຺ສ ເສຍ຺ໂຍຫມສ຺ມີຕິ ມາໂນ? ອິເຘກຈ຺ໂຈ ຫີໂນ ໂຫຕິ ຊາຕິຍາ ວາ ໂຄຕ຺ເຕນ ວາ ໂກລປຸຕ຺ຕິເຍນ ວາ…ເປ… ອຎ຺ຎຕຣຎ຺ຎຕເຣນ ວຕ຺ຖຸນາ ປເຣຫິ ເສຍ຺ຍໍ ອຕ຺ຕານໍ ທຫຕິ; ໂສ ຕໍ ນິສ຺ສາຍ ມານໍ ຊປ຺ເປຕິ. ໂຍ ເອວຣູໂປ ມາໂນ ມຎ຺ຎນາ ມຎ຺ຎິຕຕ຺ຕໍ ອຸນ຺ນຕິ ອຸນ຺ນາໂມ ຘໂຊ ສມ຺ປຄ຺ຄາໂຫ ເກຕຸກມ຺ຍຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ຫີນສ຺ສ ເສຍ຺ໂຍຫມສ຺ມີຕິ ມາໂນ’’.
(໕໙) ຫີນສ຺ສ ສທິໂສຫມສ຺ມີຕິ ມາໂນ
໘໗໖. ຕຕ຺ຖ ກຕໂມ ຫີນສ຺ສ ສທິໂສຫມສ຺ມີຕິ ມາໂນ? ອິເຘກຈ຺ໂຈ ຫີໂນ ໂຫຕິ ຊາຕິຍາ ວາ ໂຄຕ຺ເຕນ ວາ ໂກລປຸຕ຺ຕິເຍນ ວາ…ເປ… ອຎ຺ຎຕຣຎ຺ຎຕເຣນ ວຕ຺ຖຸນາ ປເຣຫິ ສທິສໍ ອຕ຺ຕານໍ ທຫຕິ; ໂສ ຕໍ ນິສ຺ສາຍ ມານໍ ຊປ຺ເປຕິ. ໂຍ ເອວຣູໂປ ມາໂນ ມຎ຺ຎນາ ມຎ຺ຎິຕຕ຺ຕໍ ອຸນ຺ນຕິ ອຸນ຺ນາໂມ ຘໂຊ ສມ຺ປຄ຺ຄາໂຫ ເກຕຸກມ຺ຍຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ຫີນສ຺ສ ສທິໂສຫມສ຺ມີຕິ ມາໂນ’’.
(໖໐) ຫີນສ຺ສ ຫີໂນຫມສ຺ມີຕິ ມາໂນ
໘໗໗. ຕຕ຺ຖ ກຕໂມ ຫີນສ຺ສ ຫີໂນຫມສ຺ມີຕິ ມາໂນ? ອິເຘກຈ຺ໂຈ ຫີໂນ ໂຫຕິ ຊາຕິຍາ ວາ ໂຄຕ຺ເຕນ ວາ ໂກລປຸຕ຺ຕິເຍນ ວາ…ເປ… ອຎ຺ຎຕຣຎ຺ຎຕເຣນ ວຕ຺ຖຸນາ ປເຣຫິ ສທິສໍ ອຕ຺ຕານໍ ທຫຕິ; ໂສ ຕໍ ນິສ຺ສາຍ ໂອມານໍ ຊປ຺ເປຕິ. ໂຍ ເອວຣູໂປ ໂອມາໂນ ໂອມຎ຺ຎນາ ໂອມຎ຺ຎິຕຕ຺ຕໍ ຫີຬນາ ໂອຫີຬນາ ໂອຫີຬິຕຕ຺ຕໍ ອຕ຺ຕຸຎ຺ຎາ ອຕ຺ຕວຎ຺ຎາ ອຕ຺ຕປຣິຠໂວ – ອຍໍ ວຸຈ຺ຈຕິ ‘‘ຫີນສ຺ສ ຫີໂນຫມສ຺ມີຕິ ມາໂນ’’.
(໖໑) ມາໂນ
໘໗໘. ຕຕ຺ຖ ກຕໂມ ມາໂນ? ໂຍ ມາໂນ ມຎ຺ຎນາ ມຎ຺ຎິຕຕ຺ຕໍ ອຸນ຺ນຕິ ອຸນ຺ນາໂມ ຘໂຊ ສມ຺ປຄ຺ຄາໂຫ ເກຕຸກມ຺ຍຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ມາໂນ’’.
(໖໒) ອຕິມາໂນ
໘໗໙. ຕຕ຺ຖ ກຕໂມ ອຕິມາໂນ? ອິເຘກຈ຺ໂຈ ຊາຕິຍາ ວາ ໂຄຕ຺ເຕນ ວາ ໂກລປຸຕ຺ຕິເຍນ ວາ…ເປ… ອຎ຺ຎຕຣຎ຺ຎຕເຣນ ວຕ຺ຖຸນາ ປເຣຫິ ອຕ຺ຕານໍ ອຕິມຎ຺ຎຕິ. ໂຍ ເອວຣູໂປ ມາໂນ ມຎ຺ຎນາ ມຎ຺ຎິຕຕ຺ຕໍ ອຸນ຺ນຕິ ອຸນ຺ນາໂມ ຘໂຊ ສມ຺ປຄ຺ຄາໂຫ ເກຕຸກມ຺ຍຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ອຕິມາໂນ’’.
(໖໓) ມານາຕິມາໂນ
໘໘໐. ຕຕ຺ຖ ກຕໂມ ມານາຕິມາໂນ? ອິເຘກຈ຺ໂຈ ຊາຕິຍາ ວາ ໂຄຕ຺ເຕນ ວາ ໂກລປຸຕ຺ຕິເຍນ ວາ…ເປ… ອຎ຺ຎຕຣຎ຺ຎຕເຣນ ວຕ຺ຖຸນາ ປຸພ຺ພກາລໍ ປເຣຫິ ສທິສໍ ອຕ຺ຕານໍ ທຫຕິ, ອປຣກາລໍ ອຕ຺ຕານໍ ເສຍ຺ຍໍ ທຫຕິ. ໂຍ ເອວຣູໂປ ມາໂນ ມຎ຺ຎນາ ມຎ຺ຎິຕຕ຺ຕໍ ອຸນ຺ນຕິ ອຸນ຺ນາໂມ ຘໂຊ ສມ຺ປຄ຺ຄາໂຫ ເກຕຸກມ຺ຍຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ມານາຕິມາໂນ’’.
(໖໔) ໂອມາໂນ
໘໘໑. ຕຕ຺ຖ ກຕໂມ ໂອມາໂນ? ອິເຘກຈ຺ໂຈ ຊາຕິຍາ ວາ ໂຄຕ຺ເຕນ ວາ ໂກລປຸຕ຺ຕິເຍນ ວາ ວຓ຺ຓໂປກ຺ຂຣຕາຍ ວາ ຘເນນ ວາ ອຊ຺ເຌເນນ ວາ ກມ຺ມາຍຕເນນ ວາ ສິປ຺ປາຍຕເນນ ວາ ວິຊ຺ຊາຏ຺ຐາເນນ ວາ ສຸເຕນ ວາ ປຏິຠາເນນ ວາ ອຎ຺ຎຕຣຎ຺ຎຕເຣນ ວຕ຺ຖຸນາ ໂອມານໍ ຊປ຺ເປຕິ. ໂຍ ເອວຣູໂປ ໂອມາໂນ ໂອມຎ຺ຎນາ ໂອມຎ຺ຎິຕຕ຺ຕໍ ຫີຬນາ ໂອຫີຬນາ ໂອຫີຬິຕຕ຺ຕໍ ອຕ຺ຕຸຎ຺ຎາ ອຕ຺ຕວຎ຺ຎາ ອຕ຺ຕປຣິຠໂວ – ອຍໍ ວຸຈ຺ຈຕິ ‘‘ໂອມາໂນ’’.
(໖໕) ອຘິມາໂນ
໘໘໒. ຕຕ຺ຖ ກຕໂມ ອຘິມາໂນ? ອປ຺ປຕ຺ເຕ ປຕ຺ຕສຎ຺ຎິຕາ, ອກເຕ ກຕສຎ຺ຎິຕາ, ອນຘິຄເຕ ອຘິຄຕສຎ຺ຎິຕາ, ອສຈ຺ຉິກເຕ ສຈ຺ຉິກຕສຎ຺ຎິຕາ, ໂຍ ເອວຣູໂປ ມາໂນ ມຎ຺ຎນາ ມຎ຺ຎິຕຕ຺ຕໍ ອຸນ຺ນຕິ ອຸນ຺ນາໂມ ຘໂຊ ສມ຺ປຄ຺ຄາໂຫ ເກຕຸກມ຺ຍຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ອຘິມາໂນ’’.
(໖໖) ອສ຺ມິມາໂນ
໘໘໓. ຕຕ຺ຖ ກຕໂມ ອສ຺ມິມາໂນ? ຣູປໍ ອສ຺ມີຕິ ມາໂນ, ອສ຺ມີຕິ ຉນ຺ໂທ, ອສ຺ມີຕິ ອນຸສໂຍ, ເວທນາ…ເປ… ສຎ຺ຎາ…ເປ… ສງ຺ຂາຣາ…ເປ… ວິຎ຺ຎາຓໍ ອສ຺ມີຕິ ມາໂນ, ອສ຺ມີຕິ ຉນ຺ໂທ, ອສ຺ມີຕິ ອນຸສໂຍ, ໂຍ ເອວຣູໂປ ມາໂນ ມຎ຺ຎນາ ມຎ຺ຎິຕຕ຺ຕໍ ອຸນ຺ນຕິ ອຸນ຺ນາໂມ ຘໂຊ ສມ຺ປຄ຺ຄາໂຫ ເກຕຸກມ຺ຍຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ອສ຺ມິມາໂນ’’.
(໖໗) ມິຈ຺ຉາມາໂນ
໘໘໔. ຕຕ຺ຖ ກຕໂມ ມິຈ຺ຉາມາໂນ? ອິເຘກຈ຺ໂຈ ປາປເກນ ວາ ກມ຺ມາຍຕເນນ ປາປເກນ ວາ ສິປ຺ປາຍຕເນນ ປາປເກນ ວາ ວິຊ຺ຊາຏ຺ຐາເນນ ປາປເກນ ວາ ສຸເຕນ ປາປເກນ ວາ ປຏິຠາເນນ ປາປເກນ ວາ ສີເລນ ປາປເກນ ວາ ວເຕນ ປາປເກນ ວາ ສີລພ຺ພເຕນ ປາປິກາຍ ວາ ທິຏ຺ຐິຍາ ອຎ຺ຎຕຣຎ຺ຎຕເຣນ ວຕ຺ຖຸນາ ມານໍ ຊປ຺ເປຕິ, ໂຍ ເອວຣູໂປ ມາໂນ ມຎ຺ຎນາ ມຎ຺ຎິຕຕ຺ຕໍ ອຸນ຺ນຕິ ອຸນ຺ນາໂມ ຘໂຊ ສມ຺ປຄ຺ຄາໂຫ ເກຕຸກມ຺ຍຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ມິຈ຺ຉາມາໂນ’’.
(໖໘) ຎາຕິວິຕກ຺ໂກ
໘໘໕. ຕຕ຺ຖ ກຕໂມ ຎາຕິວິຕກ຺ໂກ? ຎາຕເກ ອາຣພ຺ຠ ເຄຫສິໂຕ ຕກ຺ໂກ ວິຕກ຺ໂກ ມິຈ຺ຉາສງ຺ກປ຺ໂປ – ອຍໍ ວຸຈ຺ຈຕິ ‘‘ຎາຕິວິຕກ຺ໂກ’’.
(໖໙) ຊນປທວິຕກ຺ໂກ
໘໘໖. ຕຕ຺ຖ ກຕໂມ ຊນປທວິຕກ຺ໂກ? ຊນປທໍ ອາຣພ຺ຠ ເຄຫສິໂຕ ຕກ຺ໂກ ວິຕກ຺ໂກ ມິຈ຺ຉາສງ຺ກປ຺ໂປ – ອຍໍ ວຸຈ຺ຈຕິ ‘‘ຊນປທວິຕກ຺ໂກ’’.
(໗໐) ອມຣວິຕກ຺ໂກ
໘໘໗. ຕຕ຺ຖ ກຕໂມ ອມຣວິຕກ຺ໂກ? ທຸກ຺ກຣກາຣິຕາປຏິສໍຍຸຕ຺ໂຕ ວາ ທິຏ຺ຐິຄຕປຏິສໍຍຸຕ຺ໂຕ ວາ ເຄຫສິໂຕ ຕກ຺ໂກ ວິຕກ຺ໂກ ມິຈ຺ຉາສງ຺ກປ຺ໂປ – ອຍໍ ວຸຈ຺ຈຕິ ‘‘ອມຣວິຕກ຺ໂກ’’.
(໗໑) ປຣານຸທ຺ທຍຕາປຏິສໍຍຸຕ຺ໂຕ ວິຕກ຺ໂກ
໘໘໘. ຕຕ຺ຖ ກຕໂມ ປຣານຸທ຺ທຍຕາປຏິສໍຍຸຕ຺ໂຕ ວິຕກ຺ໂກ? ອິເຘກຈ຺ໂຈ ຄິຫີຫິ ສໍສຏ຺ໂຐ ວິຫຣຕິ ສຫນນ຺ທີ ສຫໂສກີ, ສຸຂິເຕສຸ ສຸຂິໂຕ, ທຸກ຺ຂິເຕສຸ ທຸກ຺ຂິໂຕ, ອຸປ຺ປນ຺ເນສຸ ກິຈ຺ຈກຣຓີເຍສຸ ອຕ຺ຕນາ ວາ ໂຍຄໍ ອາປຊ຺ຊຕິ. ໂຍ ຕຕ຺ຖ ເຄຫສິໂຕ ຕກ຺ໂກ ວິຕກ຺ໂກ ມິຈ຺ຉາສງ຺ກປ຺ໂປ – ອຍໍ ວຸຈ຺ຈຕິ ‘‘ປຣານຸທ຺ທຍຕາປຏິສໍຍຸຕ຺ໂຕ ວິຕກ຺ໂກ’’.
(໗໒) ລາຠາທິປຏິສໍຍຸຕ຺ໂຕ ວິຕກ຺ໂກ
໘໘໙. ຕຕ຺ຖ ກຕໂມ ລາຠສກ຺ກາຣສິໂລກປຏິສໍຍຸຕ຺ໂຕ ວິຕກ຺ໂກ? ລາຠສກ຺ກາຣສິໂລກໍ ອາຣພ຺ຠ ເຄຫສິໂຕ ຕກ຺ໂກ ວິຕກ຺ໂກ ມິຈ຺ຉາສງ຺ກປ຺ໂປ – ອຍໍ ວຸຈ຺ຈຕິ ‘‘ລາຠສກ຺ກາຣສິໂລກປຏິສໍຍຸຕ຺ໂຕ ວິຕກ຺ໂກ’’.
(໗໓) ອນວຎ຺ຎຕ຺ຕິປຏິສໍຍຸຕ຺ໂຕ ວິຕກ຺ໂກ
໘໙໐. ຕຕ຺ຖ ກຕໂມ ອນວຎ຺ຎຕ຺ຕິປຏິສໍຍຸຕ຺ໂຕ ວິຕກ຺ໂກ? ອິເຘກຈ຺ໂຈ ຊາຕິຍາ ວາ ໂຄຕ຺ເຕນ ວາ ໂກລປຸຕ຺ຕິເຍນ ວາ ວຓ຺ຓໂປກ຺ຂຣຕາຍ ວາ ຘເນນ ວາ ອຊ຺ເຌເນນ ວາ ກມ຺ມາຍຕເນນ ວາ ສິປ຺ປາຍຕເນນ ວາ ວິຊ຺ຊາຏ຺ຐາເນນ ວາ ສຸເຕນ ວາ ປຏິຠາເນນ ວາ ອຎ຺ຎຕຣຎ຺ຎຕເຣນ ວຕ຺ຖຸນາ ມາ ມໍ ປເຣ ອວຊານິໍສູຕິ. ໂຍ ຕຕ຺ຖ ເຄຫສິໂຕ ຕກ຺ໂກ ວິຕກ຺ໂກ ມິຈ຺ຉາສງ຺ກປ຺ໂປ – ອຍໍ ວຸຈ຺ຈຕິ ‘‘ອນວຎ຺ຎຕ຺ຕິປຏິສໍຍຸຕ຺ໂຕ ວິຕກ຺ໂກ’’.
ເອກກໍ.
໒. ທຸກນິທ຺ເທໂສ
(໑) ໂກໂຘ ຈ ອຸປນາໂຫ ຈ
໘໙໑. (ກ) ຕຕ຺ຖ ກຕໂມ ໂກໂຘ? ໂຍ ໂກໂຘ ກຸຊ຺ຌນາ ກຸຊ຺ຌິຕຕ຺ຕໍ ໂທໂສ ທຸສ຺ສນາ ທຸສ຺ສິຕຕ຺ຕໍ ພ຺ຍາປຕ຺ຕິ ພ຺ຍາປຊ຺ຊນາ ພ຺ຍາປຊ຺ຊິຕຕ຺ຕໍ ວິໂຣໂຘ ປຏິວິໂຣໂຘ ຈຓ຺ຑິກ຺ກໍ ອສຸໂຣໂປ ອນຕ຺ຕມນຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ໂກໂຘ’’.
(ຂ) ຕຕ຺ຖ ກຕໂມ ອຸປນາໂຫ? ປຸພ຺ພກາລໍ ໂກໂຘ, ອປຣກາລໍ ອຸປນາໂຫ. ໂຍ ເອວຣູໂປ ອຸປນາໂຫ ອຸປນຍ຺ຫນາ ອຸປນຍ຺ຫິຕຕ຺ຕໍ ອຏ຺ຐປນາ ຐປນາ ສຓ຺ຐປນາ ອນຸສໍສນ຺ທນາ ອນຸປ຺ປພນ຺ຘນາ ທຬ຺ຫີກມ຺ມໍ ໂກຘສ຺ສ – ອຍໍ ວຸຈ຺ຈຕິ ‘‘ອຸປນາໂຫ’’.
(໒) ມກ຺ໂຂ ຈ ປຬາໂສ ຈ
໘໙໒. (ກ) ຕຕ຺ຖ ກຕໂມ ມກ຺ໂຂ? ໂຍ ມກ຺ໂຂ ມກ຺ຂາຍນາ ມກ຺ຂາຍິຕຕ຺ຕໍ [ມກ຺ຂິຍນາ ມກ຺ຂິຍິຕຕ຺ຕໍ (ສີ. ກ.)] ນິຏ຺ຐຸຣິຍໍ ນິຏ຺ຐຸຣິຍກມ຺ມໍ – ອຍໍ ວຸຈ຺ຈຕິ ‘‘ມກ຺ໂຂ’’.
(ຂ) ຕຕ຺ຖ ກຕໂມ ປຬາໂສ? ໂຍ ປຬາໂສ ປຬາສາຍນາ [ປລາສາຍນາ ປລາສາຍິຕຕ຺ຕໍ (ສ຺ຍາ.)] ປຬາສາຫາໂຣ ວິວາທຏ຺ຐານໍ ຍຸຄຄ຺ຄາໂຫ ອປ຺ປຏິນິສ຺ສຄ຺ໂຄ – ອຍໍ ວຸຈ຺ຈຕິ ‘‘ປຬາໂສ’’.
(໓) ອິສ຺ສາ ຈ ມຈ຺ຉຣິຍຎ຺ຈ
໘໙໓. (ກ) ຕຕ຺ຖ ກຕມາ ອິສ຺ສາ? ຍາ ປຣລາຠສກ຺ກາຣຄຣຸກາຣມານນວນ຺ທນປູຊນາສຸ ອິສ຺ສາ ອິສ຺ສາຍນາ ອິສ຺ສາຍິຕຕ຺ຕໍ ອຸສູຍາ ອຸສູຍນາ ອຸສູຍິຕຕ຺ຕໍ – ອຍໍ ວຸຈ຺ຈຕິ ‘‘ອິສ຺ສາ’’.
(ຂ) ຕຕ຺ຖ ກຕມໍ ມຈ຺ຉຣິຍໍ? ປຎ຺ຈ ມຈ຺ຉຣິຍານິ – ອາວາສມຈ຺ຉຣິຍໍ, ກຸລມຈ຺ຉຣິຍໍ, ລາຠມຈ຺ຉຣິຍໍ, ວຓ຺ຓມຈ຺ຉຣິຍໍ, ຘມ຺ມມຈ຺ຉຣິຍໍ. ຍໍ ເອວຣູປໍ ມຈ຺ເຉຣໍ ມຈ຺ຉຣາຍນາ ມຈ຺ຉຣາຍິຕຕ຺ຕໍ ເວວິຈ຺ຉໍ ກທຣິຍໍ ກຏຸກຎ຺ຈຸກຕາ ອຄ຺ຄຫິຕຕ຺ຕໍ [ປຄ຺ຄຫິຕຕ຺ຕໍ (ສີ. ກ.) ຘ. ສ. ໑໑໒໗] ຈິຕ຺ຕສ຺ສ – ອິທໍ ວຸຈ຺ຈຕິ ‘‘ມຈ຺ຉຣິຍໍ’’.
(໔) ມາຍາ ຈ ສາເຐຍ຺ຍຎ຺ຈ
໘໙໔. (ກ) ຕຕ຺ຖ ກຕມາ ມາຍາ? ອິເຘກຈ຺ໂຈ ກາເຍນ ທຸຈ຺ຈຣິຕໍ ຈຣິຕ຺ວາ, ວາຈາຍ ທຸຈ຺ຈຣິຕໍ ຈຣິຕ຺ວາ, ມນສາ ທຸຈ຺ຈຣິຕໍ ຈຣິຕ຺ວາ ຕສ຺ສ ປຏິຈ຺ຉາທນເຫຕຸໍ ປາປິກໍ ອິຈ຺ຉໍ ປຓິທຫຕິ. ‘‘ມາ ມໍ ຊຎ຺ຎາ’’ຕິ ອິຈ຺ຉຕິ. ‘‘ມາ ມໍ ຊຎ຺ຎາ’’ຕິ ສງ຺ກປ຺ເປຕິ. ‘‘ມາ ມໍ ຊຎ຺ຎາ’’ຕິ ວາຈໍ ຠາສຕິ. ‘‘ມາ ມໍ ຊຎ຺ຎາ’’ຕິ ກາເຍນ ປຣກ຺ກມຕິ. ຍາ ເອວຣູປາ ມາຍາ ມາຍາວິຕາ ອຈ຺ຈາສຣາ ວຎ຺ຈນາ ນິກຕິ ວິກິຣຓາ ປຣິຫຣຓາ ຄູຫນາ ປຣິຄູຫນາ ຉາທນາ ປຏິຈ຺ຉາທນາ ອນຸຕ຺ຕານີກມ຺ມໍ ອນາວິກມ຺ມໍ ໂວຈ຺ຉາທນາ ປາປກິຣິຍາ – ອຍໍ ວຸຈ຺ຈຕິ ‘‘ມາຍາ’’.
(ຂ) ຕຕ຺ຖ ກຕມໍ ສາເຐຍ຺ຍໍ? ອິເຘກຈ຺ໂຈ ສໂຐ ໂຫຕິ ປຣິສໂຐ. ຍໍ ຕຕ຺ຖ ສຐໍ ສຐຕາ ສາເຐຍ຺ຍໍ ກກ຺ກຣຕາ ກກ຺ກຣິຍໍ [ກກ຺ຂຬຕາ ກກ຺ຂຬິຍໍ (ສ຺ຍາ.)] ປຣິກ຺ຂຕ຺ຕຕາ ປາຣິກ຺ຂຕ຺ຕິຍໍ – ອິທໍ ວຸຈ຺ຈຕິ ‘‘ສາເຐຍ຺ຍໍ’’.
(໕) ອວິຊ຺ຊາ ຈ ຠວຕຓ຺ຫາ ຈ
໘໙໕. (ກ) ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາ’’.
(ຂ) ຕຕ຺ຖ ກຕມາ ຠວຕຓ຺ຫາ? ໂຍ ຠເວສຸ ຠວຈ຺ຉນ຺ໂທ ຠວຣາໂຄ ຠວນນ຺ທີ ຠວຕຓ຺ຫາ ຠວສິເນໂຫ ຠວປຣິຬາໂຫ ຠວມຸຈ຺ຉາ ຠວຊ຺ໂຌສານໍ – ອຍໍ ວຸຈ຺ຈຕິ ‘‘ຠວຕຓ຺ຫາ’’.
(໖) ຠວທິຏ຺ຐິ ຈ ວິຠວທິຏ຺ຐິ ຈ
໘໙໖. (ກ) ຕຕ຺ຖ ກຕມາ ຠວທິຏ຺ຐິ? ‘‘ຠວິສ຺ສຕິ ອຕ຺ຕາ ຈ ໂລໂກ ຈາ’’ຕິ – ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ‘‘ຠວທິຏ຺ຐິ’’.
(ຂ) ຕຕ຺ຖ ກຕມາ ວິຠວທິຏ຺ຐິ? ‘‘ນ ຠວິສ຺ສຕິ ອຕ຺ຕາ ຈ ໂລໂກ ຈາ’’ຕິ – ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ວິຠວທິຏ຺ຐິ.