ນິມິຕ຺ຕວຑ຺ຒນນຍວຓ຺ຓນາ

໗໗. ຕຕ຺ຣາຕິ ສາມິອຕ຺ເຖ ຠຸມ຺ມວຈນໍ, ຕສ຺ສາຕິ ອຕ຺ໂຖ. ອວຑ຺ເຒຕ຺ວາຕິ ຍຖາ ກຸມ຺ຠກາໂຣ ມຕ຺ຕິກາຍ ປຕ຺ຕໍ ກໂຣນ຺ໂຕ ປຐມໍ ອປຣິຈ຺ຉິນ຺ທິຕ຺ວາວ ປຕ຺ຕໍ ວຑ຺ເຒຕິ, ເອວໍ ປຕ຺ຕວຑ຺ຒນໂຍເຄນ ປຕ຺ຕວຑ຺ຒນຍຸຕ຺ຕິຍາ ອວຑ຺ເຒຕ຺ວາ ປູວິກສ຺ສ ປູວວຑ຺ຒນໍ. ຠຕ຺ຕສ຺ສ ອຸປຣິ ຠຕ຺ຕປກ຺ຂິປນໍ ຠຕ຺ຕວຑ຺ຒນໍ. ວຕ຺ຖສ຺ສ ຕິນ຺ຕສ຺ສ ອຎ຺ຉນາທິ ທຸສ຺ສວຑ຺ຒນໍ. ປຈ຺ເຈກໍ ໂຍຄ-ສທ຺ໂທ ໂຍເຊຕພ຺ໂພ. ອປຣິຈ຺ຉິນ຺ທິຕ຺ວາ ນ ວຑ຺ເຒຕພ຺ພໍ ສປຣິຈ຺ເຉເທ ເອວ ຠາວນາປວຕ຺ຕິໂຕ. ຕຖາ ຫິ ວຸຕ຺ຕໍ ‘‘ສານ຺ຕເກ ໂນ ອນນ຺ຕເກ’’ຕິ (ວິສຸທ຺ຘິ. ໑.໕໕).

ຫໍສໂປຕກາຕິ ຊວນຫໍສໂປຕກາ. ອຸກ຺ກູລໍ ອຸນ຺ນຕຏ຺ຐານໍ. ວິກູລໍ ນິນ຺ນຏ຺ຐານໍ. ນທີໂສເຕນ ກຕໍ ວິທຸຄ຺ຄໍ ນທີວິທຸຄ຺ຄໍ. ວິສມາກາເຣນ ຐິໂຕ ປພ຺ພຕປເທໂສ ປພ຺ພຕວິສໂມ.

ຖູລານິ ຫຸຕ຺ວາ ອຸປຏ຺ຐຫນ຺ຕິ ປຈ຺ຈເວກ຺ຂຓາພາຫຸລ຺ເລນ ວິຠູຕຠາວໂຕ. ທຸພ຺ພລານິ ຫຸຕ຺ວາ ອຸປຏ຺ຐຫນ຺ຕິ ປຄຸຓພລວຠາວສ຺ສ ອນາປາທິກຕ຺ຕາ. ອຸປຣິ ອຸສ຺ສຸກ຺ກນາຍາຕິ ຠາວນາຍ ອຸປຣິ ອາໂຣຫນາຍ, ທຸຕິຍຊ຺ຌານາຘິຄມາຍາຕິ ອຕ຺ໂຖ.

ປພ຺ພເຕຍ຺ຍາຕິ ປພ຺ພເຕ ພຫຸລຈາຣິນີ. ອເຂຕ຺ຕຎ຺ຎູຕິ ອໂຄຈຣຎ຺ຎູ. ສມາຘິປຣິປນ຺ຖານໍ ວິໂສຘນານຠິຎ຺ຎາຕາຍ ພາໂລ. ຌານສ຺ສ ປຄຸຓຠາວາປາທນເວຍ຺ຍຕ຺ຕິຍສ຺ສ ອຠາເວນ ອພ຺ຍຕ຺ໂຕ. ອຸປຣິຌານສ຺ສ ປທຏ຺ຐານຠາວານວໂພເຘນ ອເຂຕ຺ຕຎ຺ຎູ. ສພ຺ພຖາປິ ສມາປຕ຺ຕິໂກສລ຺ລາຠາເວນ ອກຸສໂລ. ສມາຘິນິມິຕ຺ຕສ຺ສ ວາ ອນາເສວນາຍ ພາໂລ. ອຠາວນາຍ ອພ຺ຍຕ຺ໂຕ. ອພຫຸລີກາເຣນ ອເຂຕ຺ຕຎ຺ຎູ. ສມ຺ມເທວ ອນຘິຏ຺ຐານໂຕ ອກຸສໂລຕິ ໂຍເຊຕພ຺ພໍ. ອຸຠໂຕ ຠຏ຺ໂຐຕິ ອຸຠຍໂຕ ຌານໂຕ ຠຏ຺ໂຐ. ໂສ ຫິ ອປ຺ປຄຸຓຕາຍ ນ ສຸປ຺ປຕິຏ຺ຐິຕຕາຍ ສອຸສ຺ສາໂຫປິ ວິນາສໂຕ, ອສາມຕ຺ຖິຍໂຕ ຈ ຌານທ຺ວຍໂຕ ປຣິຫີໂນ. ຈິຓ຺ຓວສິນາຕິ ອາເສວິຕວສິນາ.