ຈິຣຏ຺ຐິຕິສມ຺ປາທນວຓ຺ຓນາ

໗໖. ລກ຺ຂຏ຺ຐາເນ ຐິຕໍ ສເຣນ ວາລໍ ວິຊ຺ຌຕີຕິ ວາລເວຘີ. ອິຘ ປນ ອເນກຘາ ຠິນ຺ນສ຺ສ ວາລສ຺ສ ອໍສຸໍ ວິຊ຺ຌນ຺ໂຕ ‘‘ວາລເວຘີ’’ຕິ ອຘິປ຺ເປໂຕ. ເຕນ ວາລເວຘິນາ. ສູເທນາຕິ ຠຕ຺ຕກາເຣນ. ‘‘ອາກາຣາ ປຣິຄ຺ຄເຫຕພ຺ພາ’’ຕິ ສງ຺ເຂປໂຕ ວຸຕ຺ຕມຕ຺ຖໍ ວິວຣິຕຸໍ ‘‘ຍຖາ ຫີ’’ຕິອາທິ ວຸຕ຺ຕໍ. ຕຕ຺ຖ ສຸກຸສໂລຕິ ສຸຏ຺ຐຸ ເຉໂກ. ຘນຸຄ຺ຄໂຫຕິ ອິສ຺ສາໂສ. ກມ຺ມນ຺ຕິ ໂຍຄ຺ຍໍ. ອກ຺ກນ຺ຕປທານນ຺ຕິ ວິຊ຺ຌນກາເລ ອກ຺ກມນວເສນ ປວຕ຺ຕປທານໍ. ອາກາຣນ຺ຕິ ຘນຸຊິຍາສຣານໍ ຄຫິຕາກາຣໍ. ປຣິຄ຺ຄຓ຺ເຫຍ຺ຍາຕິ ອຸປຘາເຣຍ຺ຍ. ໂຠຊນສປ຺ປາຍາທໂຍຕິ ອາທິ-ສທ຺ໂທ ອວຸຕ຺ຕາກາຣານມ຺ປິ ສງ຺ຄາຫໂກ ທຏ຺ຐພ຺ໂພ. ເຕນ ອຸຕຸຠາວນານິມິຕ຺ຕາທີນມ຺ປິ ປຣິຄ຺ຄຓ຺ຫນໍ ວຸຕ຺ຕໍ ໂຫຕິ. ຕສ຺ມິນ຺ຕິ ຕສ຺ມິໍ ຕຣຸຓສມາຘິມ຺ຫິ.

ຠຕ຺ຕາຣນ຺ຕິ ສາມິນໍ, ຠຕ຺ຕເວຕນາທີຫິ ໂປສກນ຺ຕິ ອຕ຺ໂຖ. ປຣິວິສນ຺ໂຕຕິ ໂຠເຊນ຺ໂຕ. ຕສ຺ສ ຣຸຈ຺ຈິຕ຺ວາ ຠຸຎ຺ຊນາກາຣໍ ສລ຺ລກ຺ເຂຕ຺ວາ ຕສ຺ສ ອຸປນາເມນ຺ໂຕຕິ ໂຍຊນາ. ອຍມ຺ປິ ໂຍຄີ. ອຘິຄຕກ຺ຂເຓ ໂຠຊນາທໂຍ ອາກາເຣຕິ ປຸພ຺ເພ ຌານສ຺ສ ອຘິຄຕກ຺ຂເຓ ກິຈ຺ຈສາຘເກ ໂຠຊນາທິຄເຕ ອາກາເຣ. ຄເຫຕ຺ວາຕິ ປຣິຄ຺ຄເຫຕ຺ວາ ສລ຺ລກ຺ເຂຕ຺ວາ. ນຏ຺ເຐ ນຏ຺ເຐ ສມາຘິມ຺ຫິ ປຸນປ຺ປຸນໍ ອປ຺ປນາຍ.

ມຫານສວິຊ຺ຊາປຣິຈເຍນ ປຓ຺ຑິໂຕ. ຕຕ຺ຖ ວິສທຎາຓຕາຍ ພ຺ຍຕ຺ໂຕ. ຐານຸປ຺ປຕ຺ຕິກກໂອສລ຺ລໂຍເຄນ ກຸສໂລ. ນານຈ຺ຈເຍຫີຕິ ນານຈ຺ຈເຍຫິ ນານາສຠາເວຫິ, ນານາຣເສຫີຕິ ອຕ຺ໂຖ. ເຕນາຫ ‘‘ອມ຺ພິລຄ຺ເຄຫີ’’ຕິອາທິ. ສູເປຫີຕິ ພ຺ຍຎ຺ຊເນຫິ. ອມ຺ພິລຄ຺ເຄຫີຕິ ອມ຺ພິລໂກຏ຺ຐາເສຫິ, ເຍ ວາ ອມ຺ພິລຣສາ ຫຸຕ຺ວາ ອຄ຺ຄຠູຕາ, ເຕຫິ ຈຕຸຣມ຺ພິລາທິມິສ຺ເສຫິ. ເອສ ນໂຍ ຕິຕ຺ຕກຄ຺ຄາທີສຸປິ. ຂາຣິເກຫີຕິ ວາຕິງ຺ຄຓກຬີຣາທິມິສ຺ເສຫິ. ນິມິຕ຺ຕນ຺ຕິ ອາກາຣໍ ຣຸຈ຺ຈນວເສນ ຠຸຎ຺ຊນາກາຣໍ. ອຸຄ຺ຄຓ຺ຫາຕີຕິ ອຸປຣູປຣິ ຄຓ຺ຫາຕິ ອຸປຘາເຣຕິ. ອິມສ຺ສ ວາ ສູເປຍ຺ຍສ຺ສ ອຕ຺ຖາຍ ຫຕ຺ຖໍ ອຠິຫຣຕິ. ອຠິຫາຣານນ຺ຕິ ອຠິມຸເຂນ ຫຣິຕພ຺ພານໍ ປຓ຺ຓາກາຣານໍ, ປູຊາຠິຫາຣານໍ ວາ. ນິມິຕ຺ຕໍ ອຸຄ຺ຄຓ຺ຫາຕີຕິ ‘‘ເອວໍ ເມ ຈິຕ຺ຕໍ ສມາຫິຕໍ ອໂຫສີ’’ຕິ ນິມິຕ຺ຕໍ ຄຓ຺ຫາຕິ ສລ຺ລກ຺ເຂຕິ.

ສມາຘິປຣິປນ຺ຖານນ຺ຕິ ສມາຘິສ຺ສ ປຣິປນ຺ຖຠູຕານໍ. ຘມ຺ມານນ຺ຕິ ກາມຈ຺ຉນ຺ທາທິນີວຣຓຘມ຺ມານໍ. ສຸວິໂສຘິຕຕ຺ຕາຕິ ສຸຏ຺ຐຸ ວິໂສຘິຕຕ຺ຕາ, ວິກ຺ຂມ຺ຠນວເສເນວ ສມ຺ມເທວ ປຫີນຕ຺ຕາຕິ ອຕ຺ໂຖ. ກາມາທີນວປຈ຺ຈເວກ຺ຂຓາທີຫີຕິ ອາທິ-ສທ຺ເທນ ອສຸຠມນສິກາຣເນກ຺ຂມ຺ມານິສໍສປຈ຺ຈເວກ຺ຂຓາທີນິ ສງ຺ຄຓ຺ຫາຕິ. ເນກ຺ຂມ຺ມຄຸຓທສ຺ສເນນາປິ ຫິ ຕສ຺ສ ວິພນ຺ຘຠູເຕ ກາມຈ຺ຉນ຺ເທ ອາທີນໂວ ວິເສສໂຕ ປາກໂຏ ໂຫຕີຕິ. ກາຍທຸຏ຺ຐຸລ຺ລນ຺ຕິ ກາຍທຣຖໍ ສາຣທ຺ຘກາຍຕໍ. ເຕນ ກາຍຈິຕ຺ຕານໍ ສາຣມ຺ຠນິມິຕ຺ຕສ຺ສ ພ຺ຍາປາທນີວຣຓສ຺ສ ນ ວິໂສຘນມາຫ. ອາຣມ຺ຠຘາຕຸມນສິກາຣາທີຕິ ອາທິ-ສທ຺ເທນ ວີຣິຍສມ຺ໂພຊ຺ຌງ຺ຄນິມິຕ຺ຕານໍ, ອາໂລກສຎ຺ຎາທີນຎ຺ຈ ສງ຺ຄໂຫ ທຏ຺ຐພ຺ໂພ. ສມຖນິມິຕ຺ຕມນສິກາຣາທີຕິ ອາທິ-ສທ຺ເທນ ສມາຘິສມ຺ໂພຊ຺ຌງ຺ຄຏ຺ຐານິຍານໍ ຘມ຺ມານໍ ສງ຺ຄໂຫ ທຏ຺ຐພ຺ໂພ. ອຎ຺ເຎປິ ສມາຘິປຣິປນ຺ເຖຕິ ວິຈິກິຈ຺ຉາຏ຺ຐານິເຍ, ມທມານາທິເກ ຈ ສນ຺ຘາຍາຫ. ອາສຍນ຺ຕິ ວສນກສຸສິຣໍ. ສຸປຣິສຸທ຺ຘນ຺ຕິ ອາສງ຺ກນີຍຕ຺ຕາຠາເວນ ສຸຏ຺ຐຸ ປຣິສຸທ຺ຘໍ. ເອຕ຺ຖາຫ – ນນຸ ຈາຍໍ ປເຄວ ກາມາທີນວໍ ປຈ຺ຈເວກ຺ຂິຕ຺ວາ ສມຖປຏິປທໍ ປຏິປນ຺ໂນ ອຸປຈາຣກ຺ຂເຓເຍວ ຌາເນນ ນີວຣຓານິ ວິກ຺ຂມ຺ຠິຕານິ, ອຖ ກສ຺ມາ ປຸນ ກາມາທີນວປຈ຺ຈເວກ຺ຂຓາທິ ຄຫິຕນ຺ຕິ? ສຈ຺ຈເມຕໍ. ຕໍ ປນ ປຫານມຕ຺ຕນ຺ຕິ ຌານສ຺ສ ຈິຣຏ຺ຐິຕິຍາ ອຕິສຍປຫານຕ຺ຖໍ ປຸນ ຄຫິຕໍ.

ອຸທ຺ຘຈ຺ຈ ມິທ຺ຘນ຺ຕິ ກຸກ຺ກຸຈ຺ຈໍ, ຖິນຎ຺ຈ ຕເທກຏ຺ຐຕາຍ ຄຫິຕເມວາຕິ ກຕ຺ວາ ວຸຕ຺ຕໍ. ສຸທ຺ຘນ຺ຕຄໂຕຕິ ສຸປຣິສຸທ຺ຘປຣິຍນ຺ຕໍ ສພ຺ພໂສ ວິໂສຘິຕໂກຓປຣິຍນ຺ຕໍ ອຸຍ຺ຍານໍ ຄໂຕ. ຕຫິໍ ຣເມຕິ ຕສ຺ມິໍ ຌາເນ ຣເມຍ຺ຍ ທິວສຠາຄມ຺ປິ ຌານສມງ຺ຄີ ເອວ ຠເວຍ຺ຍ.

ຈິຕ຺ຕຠາວນາເວປຸລ຺ລຕ຺ຖນ຺ຕິ ສມາຘິຠາວນາຍ ວິປຸລຠາວາຍ. ຍຖາ ຫິ ຠາວນາວເສນ ນິມິຕ຺ຕສ຺ສ ອຸປ຺ປຕ຺ຕິ, ເອວມສ຺ສ ຠາວນາວເສເນວ ວຑ຺ຒນມ຺ປິ. ຕສ຺ມາ ເອກງ຺ຄຸລາທິວເສນ ນິມິຕ຺ຕໍ ວຑ຺ເຒນ຺ຕສ຺ສ ປຸນປ຺ປຸນໍ ພຫຸລີກາເຣນ ຌານໍ ຠາວນາປິ ວຸທ຺ຘິໍ ວິຣຸຬ຺ຫິໍ ເວປຸລ຺ລໍ ອາປຊ຺ຊຕິ. ເຕນ ວຸຕ຺ຕໍ ‘‘ຈິຕ຺ຕຠາວນາເວປຸລ຺ລຕ຺ຖຎ຺ຈ ຍຖາລທ຺ຘໍ ປຏິຠາຄນິມິຕ຺ຕໍ ວຑ຺ເຒຕພ຺ພ’’ນ຺ຕິ. ຕສ຺ສາຕິ ປຏິຠາຄນິມິຕ຺ຕສ຺ສ.