ວຸຏ຺ຐານພລສມາໂຍຄກຖາວຓ຺ຓນາ

໘໒໗. ວຸຏ຺ຐານໍ ນິມິຕ຺ຕໂຕ, ປວຕ຺ຕໂຕ ຈ ວຸຏ຺ຐານໍ. ພລສມາໂຍໂຄ ສມຖວິປສ຺ສນາພເລຫິ ສມ຺ປຍຸຕ຺ຕຕາ. ປຣິຎ຺ຎາຠິສມຍາທິວເສນ ທຸກ຺ຂາທີສຸ ວິເສສທສ຺ສນຏ຺ເຐນ ມຄ຺ຄປຎ຺ຎາປິ ວິປສ຺ສນາຕິ ວຸຈ຺ຈຕີຕິ ‘‘ໂລກິຍວິປສ຺ສນາ’’ຕິ ວິເສເສຕ຺ວາ ວຸຕ຺ຕໍ. ເຕເນວາຫ ‘‘ວຸຏ຺ຐານຏ຺ເຐນ ສມຖວິປສ຺ສນໍ ຍຸຄນທ຺ຘໍ ຠາເວຕີ’’ຕິ (ປຏິ. ມ. ໒.໕). ນິມິຕ຺ຕາຣມ຺ມຓຕ຺ຕາ ເນວນິມິຕ຺ຕາ ວຸຏ຺ຐາຕິ, ປວຕ຺ຕິ…ເປ… ຉິນ຺ທນໂຕ ນ ປວຕ຺ຕາ ວຸຏ຺ຐາຕີຕິ ໂຍຊນາ. ຕຕ຺ຖ ນິມິຕ຺ຕໂຕ ວຸຏ຺ຐານໍ ສງ຺ຂາຣນິມິຕ຺ຕໍ ນິສ຺ສຊ຺ຊິຕ຺ວາ ນິພ຺ພານາຣມ຺ມຓກຣຓໍ. ປວຕ຺ຕໂຕ ວຸຏ຺ຐານໍ ເຫຕຸນິໂຣເຘນ ອາຍຕິໍ ວິປາກປ຺ປວຕ຺ຕສ຺ສ ອນຸປ຺ປວຕ຺ຕິຘມ຺ມຕາປາທນໍ. ເຕນາຫ ‘‘ສມຸທຍສ຺ສ ອສມຸຈ຺ຉິນ຺ທນໂຕ ປວຕ຺ຕາ ນ ວຸຏ຺ຐາຕີ’’ຕິ.

ທຸຠໂຕຕິ ອຸຠໂຕ, ທ-ກາຣາຄມໍ ກຕ຺ວາ ເອວໍ ວຸຕ຺ຕໍ. ທຸຠາຕິ ວາ ປທນ຺ຕຣເມເວຕໍ ອຸຠຍສທ຺ເທນ ສມານຕ຺ຖໍ. ທສ຺ສນຏ຺ເຐນາຕິ ປຣິຎ຺ຎາຠິສມຍາທິລກ຺ຂເຓນ ຈຕຸສຈ຺ຈທສ຺ສນຏ຺ເຐນ. ມິຈ຺ຉາທິຏ຺ຐິຍາຕິ ທ຺ວາສຏ຺ຐິປ຺ປເຠທາຍປິ ມິຈ຺ຉາທິຏ຺ຐິຍາ. ຕທນຸວຕ຺ຕກກິເລເສຫີຕິ ອປາຍຄມນີຍຕາຍ ຕສ຺ສາ ມິຈ຺ຉາທິຏ຺ຐິຍາ ອນຸວຕ຺ຕເກຫິ ວິຈິກິຈ຺ຉາທິກິເລເສຫິ. ຂນ຺ເຘຫີຕິ ເອຕ຺ຖາປິ ຕທນຸວຕ຺ຕກສທ຺ໂທ ອາເນຕ຺ວາ ສມ຺ພນ຺ຘິຕພ຺ໂພ. ເຕ ຈ ມິຈ຺ຉາທິຏ຺ຐິອາທິປຈ຺ຈຍາ ອຸປ຺ປຊ຺ຊນາຣຫາ ເວທິຕພ຺ພາ. ມິຈ຺ຉາສງ຺ກປ຺ປາຕິອາທີສຸປິ ຕທນຸວຕ຺ຕກກິເລເສຫິ ຈ ຂນ຺ເຘຫິ ຈ ວຸຏ຺ຐາຕິ. ພຫິທ຺ຘາ ຈ ສພ຺ພນິມິຕ຺ເຕຫິ ວຸຏ຺ຐາຕີຕິ ປາຬິ ສໍຂິຕ຺ຕາ. ຍຖາ ມິຈ຺ຉາທິຏ຺ຐິມິຈ຺ຉາສງ຺ກປ຺ປາ, ເອວໍ ມິຈ຺ຉາວາຈາທໂຍປິ ອປາຍຄມນີຍາ ເອວ ເວທິຕພ຺ພາ. ມິຈ຺ຉາວາຈາກມ຺ມນ຺ຕາຊີວາ ເຈຕນາສຠາວາ. ມິຈ຺ຉາສຕິ ຕຖາປວຕ຺ຕາ ຈຕ຺ຕາໂຣ ຂນ຺ຘາ. ອຸປຣິມຄ຺ຄຕ຺ຕເຍ ສມ຺ມາທິຏ຺ຐິ ຕໍຕໍມຄ຺ຄວຊ຺ຌາ ມານໂຕ ວຸຏ຺ຐາຕິ. ໂສ ຫິ ‘‘ອຫມສ຺ມີ’’ຕິ ປວຕ຺ຕິຍາ ທິຏ຺ຐິຏ຺ຐານິໂຍ, ມິຈ຺ຉາມຄ຺ຄໂຕ ປເນຕ຺ຖ ວຸຏ຺ຐານໍ ອນຸທ຺ຘຣິຕ຺ວາ ຕໍຕໍມຄ຺ຄວຊ຺ຌສໍໂຍຊນານຸສເຍເຫວ ວຸຏ຺ຐານໍ ອຸທ຺ຘຏໍ.

ອຓຸສຫຄຕາຕິ ອຓຸຠາວໍ ຄຕາ ປຕ຺ຕາ, ຕນຸຠູຕາຕິ ອຕ຺ໂຖ.

໘໒໘. ເອວໍ ວຸຏ຺ຐານໍ ທສ຺ເສຕ຺ວາ ອິທານິ ພລສມາໂຍຄໍ ທສ຺ເສຕຸໍ ‘‘ໂລກິຍານຎ຺ຈາ’’ຕິອາທິ ວຸຕ຺ຕໍ. ສມຖພລໍ ອຘິກໍ ໂຫຕິ ສມາຘິຠາວນາຠາວໂຕ. ວິປສ຺ສນາພລໍ ອຘິກໍ ໂຫຕິ ຎາຓຸຕ຺ຕຣຕ຺ຕາ ວິປສ຺ສນາຠາວນາຍ. ສມານຠາເວນ ຍຸເຄ ນທ຺ຘາ ພທ຺ຘາ ວິຍ ໂຫນ຺ຕີຕິ ຍຸຄນທ຺ຘາ. ເຕນາຫ ‘‘ອຎ຺ຎມຎ຺ຎໍ ອນຕິວຕ຺ຕນຏ຺ເຐນາ’’ຕິ, ກິຈ຺ຈໂຕ ອນູນາຘິກຠາເວນາຕິ ອຕ຺ໂຖ. ຕໂຕ ເອວ ສມາໂຍໂຄຕິ ສມປຣິຈ຺ເຉທໂຍໂຄຕິ ອຕ຺ໂຖ.

ສມາຘິປຏິປກ຺ຂທສ຺ສນຕ຺ຖໍ ‘‘ອຸທ຺ຘຈ຺ຈສຫຄຕກິເລເສຫີ’’ຕິ ວຸຕ຺ຕໍ, ອຸທ຺ຘຈ຺ຈປຘາເນຫິ ກິເລເສຫີຕິ ອຘິປ຺ປາໂຍ. ອວິກ຺ເຂໂປ ສມາຘີຕິ ສມຸຈ຺ຉິນ຺ທເນນ ວິກ຺ເຂປສ຺ສ ອຸຊຸປຏິປກ຺ຂຠູໂຕ ສມາຘິ. ນິໂຣຘໂຄຈໂຣຕິ ນິພ຺ພານາຣມ຺ມໂຓ. ວຸຏ຺ຐານຏ຺ເຐນາຕິ ວຸຏ຺ຐານກຠາເວນ ນິມິຕ຺ຕໂຕ, ປວຕ຺ຕໂຕ ຈ ວຸຏ຺ຐຫມານວເສນ. ເອກຣສາຕິ ສມານກິຈ຺ຈາ.