ໂສຕາປນ຺ນປຸຄ຺ຄລກຖາວຓ຺ຓນາ

໘໑໑. ຕສ຺ເສວ ໂສຕາປຕ຺ຕິມຄ຺ຄຈິຕ຺ຕສ຺ສ. ກາມຎ຺ເຈຕ຺ຖ ນາຕິຕິກ຺ຂປຎ຺ຎສ຺ສ ທ຺ເວ, ຕິກ຺ຂປຎ຺ຎສ຺ສ ຕີຓິ ຜລຈິຕ຺ຕານິ ໂຫນ຺ຕິ, ອວິເສສໂຕ ປນ ຄຫິຕສ຺ສ ມຄ຺ຄສ຺ສ ວເສນ ‘‘ທ຺ເວ, ຕີຓິ ວາ’’ຕິ ວຸຕ຺ຕໍ. ສມາຘິມານນ຺ຕຣິກຎ຺ຎມາຫູຕິ ຍໍ ອຕ຺ຕໂນ ປວຕ຺ຕິສມນນ຺ຕຣໍ ນິຍເມເນວ ຜລປ຺ປທານໂຕ ອານນ຺ຕຣິກສມາຘີຕິ ອາຫູຕິ ອຕ຺ໂຖ. ອນນ຺ຕຣເມວ ປວຕ຺ຕນກໍ ຜລໍ ອນນ຺ຕຣໍ, ຕຕ຺ຖ ນິຍຸຕ຺ໂຕ, ຕໍ ວາ ປໂຍຊນໍ ເອຕສ຺ສາຕິ ອານນ຺ຕຣິໂກ, ມຄ຺ໂຄ.

ອາເສວນນ຺ເຕຕິ ອາເສວນໂຕ ອນ຺ເຕ, ອາເສວນລາຠິໂນ ອນຸໂລມຎາຓສ຺ສ ອນນ຺ຕຣນ຺ຕິ ອຕ຺ໂຖ. ລທ຺ຘາເສວນເມວ ອນຸໂລມໍ ໂຄຕ຺ຣຠຸໍ ອຸປ຺ປາເທຕິ. ອຸປຣິ ປນ ຉ, ສຕ຺ຕ ວາ ຊວນານິ ປວຕ຺ຕນ຺ຕິ, ຕສ຺ມາ ຈຕ຺ຕາຣິ ຜລຈິຕ຺ຕານິ ໂຫນ຺ຕີຕິ ວເທຍ຺ຍາຕິ ອາຫ ‘‘ສຕ຺ຕຈິຕ຺ຕປຣມາ ຈ ເອກາວຊ຺ຊນວີຖີ’’ຕິ.

ຕໍ ປນ ນ ສາຣໂຕ ປຈ຺ເຈຕພ຺ພນ຺ຕິ ໂຍຊນາ. ຍໍ ປເນຕ຺ຖ ວຕ຺ຕພ຺ພໍ, ຕໍ ເຫຏ຺ຐາ ວຸຕ຺ຕເມວ.

໘໑໒. ເອຕ຺ຕາວຕາຕິ ປຐມມຄ຺ຄານນ຺ຕຣໍ ຜລສ຺ສ ອຸປ຺ປຕ຺ຕິມກ຺ເກນ. ຠຸສໍ ປມຕ຺ໂຕປີຕິ ເທວຣຊ຺ຊຈກ຺ກວຕ຺ຕິຣຊ຺ຊາທິປມາທຏ຺ຐານໍ ອາຄມ຺ມ ຠຸສໍ ປມຕ຺ໂຕປິ. ເຍສໍ ຍຖາວຸຕ຺ຕອາວຊ຺ຊນຊວນຈິຕ຺ຕານໍ ອຸປ຺ປຕ຺ຕິຍາ ເອສ ໂສຕາປນ຺ໂນ ປຈ຺ຈເວກ຺ຂຕິ ນາມາຕິ ອຘິປ຺ປາໂຍ.

ເອເຕເນວ ປສງ຺ເຄນ ເສສານໍ ອຣິຍານໍ ປຈ຺ຈເວກ຺ຂຓານິ ທສ຺ເສຕຸໍ ‘‘ຍຖາ ຈາ’’ຕິອາທິ ວຸຕ຺ຕໍ.

ອຸກ຺ກຏ຺ຐປຣິຈ຺ເຉໂທເຍວ ເຈໂສ, ຍທິທໍ ປຎ຺ຈນ຺ນໍ, ຈຕຸນ຺ນຎ຺ຈ ປຈ຺ຈເວກ຺ຂຓານໍ ທສ຺ສນນ຺ຕິ ອຕ຺ໂຖ. ‘‘ອຠາເວເນວາ’’ຕິ ເອເຕນ ປຫີນາວສິຏ຺ຐກິເລສປຈ຺ຈເວກ຺ຂຓສມຕ຺ຖຕາ ກສ຺ສຈິ ໂຫຕິ, ກສ຺ສຈິ ນ ໂຫຕີຕິ ທສ຺ເສຕິ. ໂລໂຠ ເອວ ໂລຠຘມ຺ໂມ.