ທຸຕິຍມຄ຺ຄຎາຓກຖາວຓ຺ຓນາ

໘໑໓. ກາມຣາຄພ຺ຍາປາທານໍ ຕນຸຠາວາຍາຕິ ເອເຕສໍ ກິເລສານໍ ຕນຸຠາວຕ຺ຖໍ. ຕຕ຺ຖ ທ຺ວີຫິ ກາຣເຓຫິ ຕນຸຠາໂວ ອຘິຈ຺ຈຸປ຺ປຕ຺ຕິຍາ, ປຣິຍຸຏ຺ຐານມນ຺ທຕາຍ ຈ. ສກທາຄາມິສ຺ສ ຫິ ວຏ຺ຏານຸສາຣິມຫາຊນສ຺ສ ວິຍ ກິເລສາ ອຠິຓ຺ຫໍ ນ ອຸປ຺ປຊ຺ຊນ຺ຕິ, ກທາຈິ ກທາຈິ ວິຣຬາກາຣາ ຫຸຕ຺ວາ ອຸປ຺ປຊ຺ຊນ຺ຕິ. ຕຖາ ອຸປ຺ປຊ຺ຊນ຺ຕາປິ ມທ຺ທນ຺ຕາ ຉາເທນ຺ຕາ ອນ຺ຘກາຣໍ ກໂຣນ຺ຕາ ນ ອຸປ຺ປຊ຺ຊນ຺ຕິ, ທ຺ວີຫິ ປນ ມຄ຺ເຄຫິ ປຫີນຕ຺ຕາ ມນ຺ທມນ຺ທາ ຕນຸກາກາຣາ ຫຸຕ຺ວາ ອຸປ຺ປຊ຺ຊນ຺ຕິ. ເກຈິ ປນ ‘‘ສກທາຄາມິສ຺ສາປິ ກິເລສາ ຈິເຣນ ອຸປ຺ປຊ຺ຊນ຺ຕິ, ອຸປ຺ປຊ຺ຊນ຺ຕາປິ ພຫລາວ ອຸປ຺ປຊ຺ຊນ຺ຕິ. ຕຖາ ຫິສ຺ສ ປຸຕ຺ຕຘີຕໂຣ ທິສ຺ສນ຺ຕີ’’ຕິ, ຕໍ ອກາຣຓໍ ວຕ຺ຖຸປຏິເສວເນນ ວິນາປິ ຄພ຺ຠຄ຺ຄຫຓສພ຺ຠາວໂຕ. ຕສ຺ມາ ວຸຕ຺ຕນເຍເນວ ທ຺ວີຫິ ກາຣເຓຫິ ເຕສໍ ຕນຸຠາໂວ ເວທິຕພ຺ໂພ. ທຸຕິຍາຍາຕິ ຄຓນວເສນປິ ທຸຕິຍາຍ, ອຸປ຺ປຕ຺ຕິວເສນປິ ທຸຕິຍາຍ ຠູມິຍາ. ປຕ຺ຕິຍາຕິ ສາມຎ຺ຎຜລສ຺ສ ປຏິລາຠາຍ. ຕຎ຺ຫິ ສມ຺ປຍຸຕ຺ຕານໍ ນິສ຺ສຍຠາວໂຕ ເຕ ຘມ຺ມາ ຠວນ຺ຕິ ເອຕ຺ຖາຕິ ຠູມິ. ຍສ຺ມາ ວາ ສມາເນປິ ໂລກຸຕ຺ຕຣຠາເວ ສຍມ຺ປິ ຠວຕິ ອຸປ຺ປຊ຺ຊຕິ, ນ ນິພ຺ພານໍ ວິຍ ອປາຕຸຠູຕໍ, ຕສ຺ມາປິ ‘‘ຠູມີ’’ຕິ ວຸຈ຺ຈຕິ. ໂຍຄໍ ກໂຣຕີຕິ ວິປສ຺ສນາຠິໂຍຄໍ ກໂຣຕິ. ‘‘ນວຫາກາເຣຫິ ອິນ຺ທ຺ຣິຍານິ ຕິກ຺ຂານິ ຠວນ຺ຕີ’’ຕິອາທິນາ (ວິສຸທ຺ຘິ. ໒.໖໙໙) ວຸຕ຺ຕນເຍເນວ ຍທຄ຺ເຄນ ອິນ຺ທ຺ຣິຍານໍ ຕິກ຺ຂຕໍ ສມ຺ປາເທຕິ, ຕທຄ຺ເຄນ ພລານິ, ໂພຊ຺ຌງ຺ຄານິ ຈ ປຏຸຕຣຠາວໍ ອາປາເທນ຺ໂຕ ອິນ຺ທ຺ຣິຍພລໂພຊ຺ຌງ຺ຄານິ ສໂມຘາເນຕ຺ວາ ລກ຺ຂຓຕ຺ຕຍຕີຣຓວເສນ ຎາເຓນ ປຣິມທ຺ທຕິ. ຕຕ຺ຖ ອປຣາປຣໍ ຎາຓໍ ຈາເຣນ຺ໂຕ ປຣິວຕ຺ເຕຕິ. ເຕນາຫ ‘‘ວິປສ຺ສນາວີຖິໍ ໂອຄາຫຕີ’’ຕິ. ວຸຕ຺ຕນເຍເນວາຕິ ອຸທຍພ຺ພຍຎາຓາທີນໍ ອຸປ຺ປາທເນ ວຸຕ຺ຕນເຍນ. ໂຄຕ຺ຣຠຸອນນ຺ຕຣນ຺ຕິ ເອຕ຺ຖ ໂຄຕ຺ຣຠຸ ວິຍ ໂຄຕ຺ຣຠຸ. ປຐມມຄ຺ຄປຸເຣຈາຣິກຎາຓຎ຺ຫິ ປຸຖຸຊ຺ຊນໂຄຕ຺ຕາຠິຠວນໂຕ, ອຣິຍໂຄຕ຺ຕຠວນໂຕ ຈ ນິປ຺ປຣິຍາຍໂຕ ໂຄຕ຺ຣຠູຕິ ວຸຈ຺ຈຕິ, ອິທໍ ປນ ຕໍສທິສຕາຍ ປຣິຍາຍໂຕ ໂຄຕ຺ຣຠຸ. ເອກຈ຺ຈສໍກິເລສວິສຸທ຺ຘິຍາ, ປນ ອຈ຺ຈນ຺ຕວິສຸທ຺ຘິຍາ ອາຣມ຺ມຓກຣຓໂຕ ຈ ໂວທານນ຺ຕິ ວຸຈ຺ຈຕິ. ເຕນາຫ ປຏ຺ຐາເນ ‘‘ອນຸໂລມໍ ໂວທານສ຺ສ ອນນ຺ຕຣປຈ຺ຈເຍນ ປຈ຺ຈໂຍ’’ຕິ (ປຏ຺ຐາ ໑.໑.໔໑໗). ຍສ຺ມາ ປນ ປຏິສມ຺ຠິທາມຄ຺ເຄ ອຸປ຺ປາທາທິອຠິຠວນຕ຺ຖໍ ອຸປາທາຍ ‘‘ອຏ຺ຐ ໂຄຕ຺ຣຠຸຘມ຺ມາ ສມາຘິວເສນ ອຸປ຺ປຊ຺ຊນ຺ຕິ, ທສ ໂຄຕ຺ຣຠຸຘມ຺ມາ ວິປສ຺ສນາວເສນ ອຸປ຺ປຊ຺ຊນ຺ຕີ’’ຕິອາທີສຸ (ປຏິ. ມ. ໑.໖໐) ໂຄຕ຺ຣຠຸນາເມເນເວຕໍ ອາຄຕໍ, ຕສ຺ມາ ອິຘາປິ ‘‘ໂຄຕ຺ຣຠຸອນນ຺ຕຣ’’ນ຺ຕິ ວຸຕ຺ຕນ຺ຕິ ທຏ຺ຐພ຺ພໍ.

ທຸຕິຍຎາຓໍ ນິຏ຺ຐິຕໍ.