ປຣິຎ຺ຎາທິປ຺ປເຠທກຖາວຓ຺ຓນາ

໘໔໕. ອຠິຎ຺ຎາປຎ຺ຎາຕິອາທີນໍ ອຕ຺ໂຖ ເຫຏ຺ຐາ ວຸຕ຺ໂຕເຍວ. ອປິຈ ສຸຕມຍາຍ, ຈິນ຺ຕາມຍາຍ, ເອກຈ຺ຈຠາວນາມຍາຍ ຈ ອຠິວິສິຏ຺ຐາຍ ປຎ຺ຎາຍ ຎາຕາ ອຠິຎ຺ຎາຕາ. ອາເວຓິກາ ຠູມິ ປຣິຎ຺ຎນ຺ຕຣານໍ ອວິສຍຠາວໂຕ. ນ ຫິ ນາມຣູປປຣິຈ຺ເຉທປຈ຺ຈຍປຣິຄ຺ຄຫຓວເສນ ຕີຣຓປຣິຎ຺ຎາທີນໍ ປວຕ຺ຕິ ອຕ຺ຖິ.

໘໔໖. ອນຸໂລມຎາຓມ຺ປິ ອນິຈ຺ຈາທິວເສເນວ ສງ຺ຂາເຣ ອາຣພ຺ຠ ປວຕ຺ຕຕິ, ປເຄວ ປຏິສງ຺ຂານຸປສ຺ສນາທໂຍຕິ ອາຫ ‘‘ຍາວ ອນຸໂລມາ ອາເວຓິກາ ຠູມີ’’ຕິ. ກາມຎ຺ເຈຕ຺ຖ ຕີຣຓປຣິຎ຺ຎາຠູມິຍໍ ຎາຕປ຺ປຫານປຣິຎ຺ຎາໂຍປິ ລທ຺ຘາວສຣາ, ຕຕ຺ຖ ປນ ຍຖາ ຕີຣຓປຣິຎ຺ຎາ ສາຕິສຍໍ ກິຈ຺ຈກາຣີ, ນ ຕຖາ ອິຕຣາຕິ ອາເວຓິກຄ຺ຄຫຓໍ.

໘໔໗. ນິປ຺ປຣິຍາເຍນ ປຫານປຣິຎ຺ຎາ ນາມ ມຄ຺ຄຎາຓນ຺ຕິ ‘‘ຍາວ ມຄ຺ຄຎາຓາ ຠູມີ’’ຕິ ວຸຕ຺ຕໍ. ອຍໍ ອິຘ ອຘິປ຺ເປຕາຕິ ອິຘ ອຠິສມຍກາເລ ກິຈ຺ຈວິຈາເຣ ອຍໍ ປຫານປຣິຎ຺ຎາ ອຘິປ຺ເປຕາ ຕທຕ຺ຖຕ຺ຕາ ເສສປຣິຎ຺ຎານໍ. ເຕນາຫ ‘‘ຍສ຺ມາ ວາ’’ຕິອາທິ.

ຕທຕ຺ຖາເຍວາຕິ ປຫານປຣິຎ຺ຎຕ຺ຖາ ເອວ. ອຖ ວາ ຕທຕ຺ຖາເຍວາຕິ ປຫານຕ຺ຖາ ເອວ. ອຖ ວາ ຕທຕ຺ຖາເຍວາຕິ ມຄ຺ຄຕ຺ຖາ ເອວ. ຎາຕຕີຣຓປຣິຎ຺ຎາ ຫິ ຍາວເທວ ມຄ຺ຄາຘິຄມຕ຺ຖາຍ ປວຕ຺ຕາ. ນິຍມໂຕ ຎາຕາ ເຈວ ຕີຣິຕາ ຈ ໂຫນ຺ຕິ ຎາຕຕີຣິຕຠາເວຫິ ວິນາ ປຫານາຠາວໂຕ, ປຫານສິທ຺ຘິຍຎ຺ຈ ຎາຕຕີຣິຕຠາວສິທ຺ຘິໂຕ. ມຄ຺ຄຎາຓຎ຺ຫິ ທຸກ຺ເຂ ປຣິຎ຺ຎາຠິສມຍວເສນ ປວຕ຺ຕມານໍ ຕສ຺ສ ສຠາວລກ຺ຂຓໍ ວິຍ ສາມຎ຺ຎລກ຺ຂຓມ຺ປິ ປຏິວິຊ຺ຌຕີຕິ ວຸຈ຺ຈຕິ ຕປ຺ປຏິຈ຺ຉາທກສມ຺ໂມຫວິທ຺ຘໍສນໂຕ. ເຕນາຫ ‘‘ປຣິຎ຺ຎຕ຺ຕຍມ຺ປິ…ເປ… ເວທິຕພ຺ພ’’ນ຺ຕິ.

໘໔໘. ປຣິຎ຺ຎາ ວິຍາຕິ ຕິວິຘຕາສາມຎ຺ຎໍ ນິທສ຺ເສຕິ, ນ ປຣິຎ຺ຎາປຫາຕພ຺ພຕາສາມຎ຺ຎໍ ວິກ຺ຂມ຺ຠນປ຺ປຫານສ຺ສ ອຣິປຎ຺ຎາກິຈ຺ຈຠາວໂຕ. ກາມຈ຺ຉນ຺ທາທໂຍ ຍຖາ ນ ຈິຕ຺ຕໍ ປຣິຍຸຏ຺ຐາຍ ຕິຏ຺ຐນ຺ຕິ, ເອວໍ ປຣິຍຸຏ຺ຐານສ຺ສ ນິເສຘນໍ ອປ຺ປວຕ຺ຕິກຣຓໍ ວິກ຺ຂມ຺ຠນໍ, ວິກ຺ຂມ຺ຠນເມວ ປຫານໍ ວິກ຺ຂມ຺ຠນປ຺ປຫານໍ. ປາກຏຕ຺ຕາຕິ ‘‘ອຍໍ ອພ຺ຍາປນ຺ນຈິຕ຺ໂຕ ວິຄຕຖິນມິທ຺ໂຘ’’ຕິອາທິນາ (ອ. ນິ. ໔.໑໙໘) ປເຣສມ຺ປິ ປາກຏຕ຺ຕາ. ‘‘ນ ສຫສາ ຈິຕ຺ຕໍ ອຊ຺ໂຌຕ຺ຖຣນ຺ຕີ’’ຕິ ອິທໍ ປຏິລທ຺ຘມຕ຺ຕສ຺ສ ຌານສ຺ສ ວເສນ ວຸຕ຺ຕໍ, ສຸຠາວິເຕ ປນ ປຄຸຓຊ຺ຌາເນ ຍາວ ຈຣິມກຈິຕ຺ຕມ຺ປິ ນ ອຊ຺ໂຌຕ຺ຖຣນ຺ເຕວ. ອຖ ວາ ຌານສ຺ສ ປຸພ຺ພຠາເຄປີຕິ ຌານາຘິຄມຕ຺ຖາຍ ປຸພ຺ພຠາຄປຏິປຕ຺ຕິຍາ. ປຈ຺ຉາຠາເຄປີຕິ ຌານໍ ລຠິຕ຺ວາ ອຎ຺ຎກິຈ຺ຈປ຺ປສຸຕສ຺ສປິ. ວິຕກ຺ກາທໂຍຕິ ວິຕກ຺ກວິຈາຣປີຕິສຸຂຣູປສຎ຺ຎາທໂຍ. ທຸຕິຍຊ຺ຌານາທີນໍ ປຏິປກ຺ຂາ ທຸຕິຍາທີສຸ ອປ຺ປິເຕສຸເຍວ ວິກ຺ຂມ຺ຠນ຺ຕິ, ຕໂຕ ຕໂຕ ວຸຏ຺ຐິຕມຕ຺ຕສ຺ສ ປນ ປວຕ຺ຕນ຺ຕິ ປຣິຕ຺ຕຈິຕ຺ຕວເສເນວ ວຸຏ຺ຐຫນໂຕ.

໘໔໙. ‘‘ປທີເປນ ອນ຺ຘກາຣສ຺ສ ວິຍາ’’ຕິ ອິທໍ ປຏິປກ຺ເຂນ ປຫີນຠາວທສ຺ສນຕ຺ຖໍ ວຸຕ຺ຕໍ. ປຏິປກ຺ໂຂ ຫິ ປທີໂປ ອນ຺ຘກາຣສ຺ສ, ຆຏປ຺ປຫາໂຣ ປນ ເສວາລສ຺ສ ນ ປຏິປກ຺ໂຂ, ເກວລໍ ປວຕ຺ຕິນິວາຣຓມຕ຺ຕເມວ ກໂຣຕີຕິ. ເຕນ ອສຕິປິ ອຸຊຸວິປຈ຺ຈນີກຕາຍ ທຸຕິຍຊ຺ຌານາທີນໍ ວິຕກ຺ກາທີນໍ ວິກ຺ຂມ຺ຠນສ຺ສ ຕໍ ນິທສ຺ສນໍ ສຸຏ຺ຐຸຕຣໍ ຍຸຊ຺ຊຕິ. ‘‘ວິປສ຺ສນາຍ ອວຍວຠູເຕນາ’’ຕິ ອິທໍ ອິຘາຘິກຕຕທງ຺ຄປ຺ປຫານສ຺ສ ທສ຺ສນຕ຺ຖໍ ວຸຕ຺ຕໍ. ສີລວິໂສຘນາທິນາປິ ຫິ ຕທງ຺ຄປ຺ປຫານໍ ໂຫຕິເຍວາຕິ. ຎາຓງ຺ເຄນາຕິ ຎາຓສງ຺ຂາເຕນ ກາຣເຓນ. ຕທງ຺ເຄນ ຕທງ຺ຄສ຺ສ ປຫານໍ ຕທງ຺ຄປ຺ປຫານໍ. ສຕິ ວິຊ຺ຊມາເນ ຂນ຺ຘປຎ຺ຈກສງ຺ຂາເຕ ກາເຍ, ສຍໍ ວາ ຕຕ຺ຖ ສຕິ ທິຏ຺ຐິ ສກ຺ກາຍທິຏ຺ຐິ, ‘‘ຣູປໍ ອຕ຺ຕໂຕ ສມນຸປສ຺ສຕີ’’ຕິອາທິນາ (ສໍ. ນິ. ໓.໘໑; ໔.໓໔໕) ນເຍນ ວຸຕ຺ຕາ ອຕ຺ຕານຸທິຏ຺ຐິ. ໂສຬສວຕ຺ຖຸກາ, ອຏ຺ຐວຕ຺ຖຸກາ ຈ ກງ຺ຂາວ ມລໍ ກງ຺ຂາມລໍ. ສມູຫຄາຫສ຺ສາຕິ ‘‘ອຕ຺ຕາ ອຕ຺ຕນິຍ’’ນ຺ຕິ ເອວໍ ປວຕ຺ຕສມູຫຄຫຓສ຺ສ ປຫານໍ ກລາປສມ຺ມສເນນ ເອກາທສສຸ ໂອກາເສສຸ ປກ຺ຂິປິຕ຺ວາ ວິກິຣຓວເສນ ຂນ຺ຘານໍ ທສ຺ສນໂຕ. ອສ຺ສາທສຎ຺ຎາຍາຕິ ປຎ຺ຈກ຺ຂນ຺ເຘ ອສ຺ສາທນວເສນ ປວຕ຺ຕມິຈ຺ຉາສຎ຺ຎາຍ. ອປ຺ປຏິສງ຺ຂານສ຺ສາຕິ ປຏິສງ຺ຂານປຏິປກ຺ຂສ຺ສ ໂມຫສ຺ສ. ອນຸເປກ຺ຂນສ຺ສາຕິ ອເປກ຺ຂາຍ. ສງ຺ຂາເຣສຸ ນິຈ຺ຈາທິຄາໂຫ ສຈ຺ຈປຏິໂລມຄາໂຫ ມຄ຺ຄສຈ຺ຈາຘິຄມສ຺ສ ວິໂລມນໂຕ. ສາທີນເວສຸ ອນາທີນວສຎ຺ຎິຕາ, ອນາທີນເວ ຈ ສາທີນວສຎ຺ຎິຕາ ສຈ຺ຈປຏິໂລມຄາໂຫຕິ ຈ ວທນ຺ຕິ.

ເອວໍ ວິສຸທ຺ຘິກ຺ກເມນ ຕທງ຺ຄປ຺ປຫານໍ ທສ຺ເສຕ຺ວາ ອິທານິ ອຏ຺ຐາຣສມຫາວິປສ຺ສນາວເສນປິ ຕໍ ທສ຺ເສຕຸໍ ‘‘ຍໍ ວາ ປນາ’’ຕິອາທິ ວຸຕ຺ຕໍ. ຕຕ຺ຖ ຍໍ ວາ ປນ ປຫານນ຺ຕິ ສມ຺ພນ຺ໂຘ.

໘໕໐. ວຸຕ຺ຕເມວ ‘‘ສພ຺ພໍ ສງ຺ຂາຣຄຕໍ ອນິຈ຺ຈໂຕ ອນຸປສ຺ສຕີ’’ຕິອາທິນາ (ວິສຸທ຺ຘິ. ໒.໗໔໒).

ສນ຺ຕຕິສມູຫກິຈ຺ຈາຣມ຺ມຓານໍ ວເສນ ຆນຄ຺ຄຫຓໍ ຆນສຎ຺ຎາ, ຕສ຺ສາ ຆນສຎ຺ຎາຍ.

ນິໂຣເຘ ອຘິມຸຕ຺ຕຕາ, ຕາຍາຕິ ຕິຍທ຺ຘຄຕານໍ ສງ຺ຂາຣານໍ ນິໂຣຘເມວ ທິສ຺ວາ ຕຕ຺ຖ ອຘິມຸຈ຺ຈນວເສນ ປວຕ຺ຕປຎ຺ຎາ, ຕາຍ. ອາຍູຫນສ຺ສາຕິ ອຠິສງ຺ຂຣຓສ຺ສ.

ຕໍ ຕໍ ປຣິຈ຺ເຉທນ຺ຕິ ອາທານນິກ຺ເຂປາທິກໍ ຕໍ ຕໍ ປຣິຈ຺ເຉທໍ. ອຎ຺ຎຖາປວຕ຺ຕິທສ຺ສນນ຺ຕິ ວຸຕ຺ຕປຣິຈ຺ເຉທໂຕ ປຸພ຺ເພ, ປຈ຺ຉາ ຈ ອຎ຺ຎາກາຣປ຺ປວຕ຺ຕິຍາ ທສ຺ສນໍ, ອວຕ຺ຖາວິເສສປ຺ປວຕ຺ຕິທສ຺ສນໍ ວາ. ຘຸວສຎ຺ຎາຍາຕິ ຖິຣຠາວຄ຺ຄຫຓສ຺ສ.

ສາຣາທານາຠິນິເວສສ຺ສາຕິ ອສາເຣສຸ ສາຣຄຫຓາຠິນິເວສສ຺ສ.

ສໍສຍມິຈ຺ຉາຎາຓານໍ ວເສນ ສມ຺ມຸຍ຺ຫນໍ ສມ຺ໂມໂຫ, ໂສ ເອວ ອຠິນິເວໂສຕິ ສມ຺ໂມຫາຠິນິເວໂສ. ສງ຺ຂາເຣສຸ ເລຓຕາຓຠາວຄ຺ຄຫຓໍ ອາລຍາຠິນິເວໂສ, ອຕ຺ຖໂຕ ຠວນິກນ຺ຕິ.

ຍຖາ ຈິຕ຺ຕໍ ສງ຺ຂາເຣ ມຸຎ຺ຈິຕ຺ວາ ວິວຏ຺ຏໍ ນິພ຺ພານໍ ປກ຺ຂນ຺ທຕິ, ຕຖາ ປວຕ຺ຕນໂຕ ສງ຺ຂາຣຸເປກ຺ຂາ ຈ ອນຸໂລມຎ຺ຈ ‘‘ວິວຏ຺ຏານຸປສ຺ສນາ’’ຕິ ວຸຕ຺ຕໍ. ນິວິຏ຺ຐຠາເວນ ໂອຄາຬ຺ຫຠາເວນ ປວຕ຺ຕສໍໂຍຊນາທິກິເລສາ ເອວ ກິເລສາຠິນິເວໂສ. ນິພ຺ເພຘຠາຄິຍໍ ສມາຘິນ຺ຕິ ວິປສ຺ສນາສມາຘິມາຫ.

໘໕໑. ອສນິວິຈກ຺ກໍ ອສນິມຓ຺ຑລໍ. ເອວໍ ປຫານນ຺ຕິ ອນຸປ຺ປຕ຺ຕິຘມ຺ມຕາປາທນມາຫ. ກມ຺ມກິເລສານໍ, ສພ຺ເພສມ຺ປິ ວາ ສງ຺ຂາຣານໍ ຂຍໍ ນິໂຣຘໍ ຄຈ຺ຉຕີຕິ ຂຍຄາມີ, ອຣິຍມຄ຺ໂຄ. ໂລກຸຕ຺ຕຣຄ຺ຄຫເຓເນວ ສິທ຺ເຘປິ ຂຍຄາມິຄ຺ຄຫຓໍ ວຓ຺ຓຠຓນຕ຺ຖໍ. ສມຸຈ຺ເຉທປ຺ປຫານເມວາຕິ ອວຘາຣຓໍ ນິປ຺ປຣິຍາຍຕໍ ອຸປາທາຍ. ຕທຕ຺ຖາເນວາຕິ ສມຸຈ຺ເຉທປ຺ປຫານຕ຺ຖາເນວ. ເຕນ ວິກ຺ຂມ຺ຠນຕທງ຺ຄປ຺ປຫານານໍ ມຄ຺ຄສມ຺ຠາຣຕມາຫ ເຕຫິ ວິນາ ອສິຊ຺ຌນໂຕ. ອຖ ວາ ຕທຕ຺ຖາເນວາຕິ ມຄ຺ຄຕ຺ຖາເນວ. ເຕນ ຕທຕ຺ຖຕາຍ ເຕສໍ ຕໍກິຈ຺ຈຕໍ ທສ຺ເສຕິ. ເຕນາຫ ‘‘ຕສ຺ມາ’’ຕິອາທິ. ຕເມວຕ຺ຖໍ ອຸປມາຍ ທສ຺ເສຕຸໍ ‘‘ປຏິຣາຊານໍ ວຘິຕ຺ວາ’’ຕິອາທິ ວຸຕ຺ຕໍ. ຍມ຺ປິ ຕໂຕ ປຸພ຺ເພ ກຕນ຺ຕິ ຍໍ ຕໂຕຣຊ຺ຊປ຺ປຕ຺ຕິໂຕ ປຸພ຺ເພ ກຕໍ ປຈ຺ຈນ຺ຕສາຘນທຸຄ຺ຄວິທ຺ຘໍສນາທິ. ຍຖາ ອິທຎ຺ຈິທຎ຺ຈ ຣຎ຺ຎາ ກຕນ຺ຕິເຍວ ວຸຈ຺ຈຕິ, ເອວໍ ໂລກິຍຎາເຓນ ສາຘິຕານິປິ ວິກ຺ຂມ຺ຠນຕທງ຺ຄປ຺ປຫານານິ ສມຸຈ຺ເຉທປ຺ປຫານວເສນ ປວຕ຺ຕສ຺ສ ມຄ຺ຄສ຺ສ ກິຈ຺ຈຠາເວນ ວຸຈ຺ຈນ຺ຕິ, ຕທຕ຺ຖຕາຍ, ເຕສໍ ຕໍສນ຺ຕຕິປຕິຕຕາຍ ຈ ມຄ຺ຄສ຺ສາຕິ ເວທິຕພ຺ພາ.

໘໕໒. ໂລກິຍສ຺ສ, ໂລກິຍາ ວາ ສຈ຺ຉິກິຣິຍາ ໂລກິຍສຈ຺ຉິກິຣິຍາ. ເອວໍ ໂລກຸຕ຺ຕຣສຈ຺ຉິກິຣິຍາ ເວທິຕພ຺ພາ. ລາຠີມ຺ຫີຕິ ລາຠີ ອມ຺ຫິ. ຕຖາ ວສີມ຺ຫີຕິ ເອຕ຺ຖາປິ. ປຈ຺ຈກ຺ຂໂຕ ຎາຓຜສ຺ເສນາຕິ ປຈ຺ຈກ຺ຂໂຕ ອາຣມ຺ມຓກຣຓສງ຺ຂາເຕນ ຎາຓຜສ຺ສເນນ. ‘‘ປຈ຺ຈກ຺ຂໂຕ’’ຕິ ຈ ອິມິນາ ອນຸມານໂຕ ອາຣມ຺ມຓກຣຓໍ ນິວຕ຺ເຕຕິ, ‘‘ອີທິສມິທ’’ນ຺ຕິ ປຈ຺ຈເວກ຺ຂຓວເສນ ປຈ຺ຈກ຺ຂໂຕ ຊານນໍ ເຫຕ຺ຖ ‘‘ຎາຓຜສ຺ໂສ’’ຕິ ອຘິປ຺ເປໂຕ. ຜສ຺ສິຕາຕິ ຎາເຓນ ຜຸຏ຺ຐາ.

ຌານມຄ຺ຄຜລານິ ວິຍ ອຕ຺ຕໂນ ສນ຺ຕາເນ ອນຸປ຺ປາເທຕ຺ວາປິ ຕປ຺ປຏິຈ຺ຉາທກສມ຺ໂມຫວິທ຺ຘໍສນວເສນ ຕຖາວິທ຺ຘໍສນປວຕ຺ຕຎາຓໍ ອປຣປ຺ປຈ຺ຈຍຎາຓໍ.

ປສ຺ສນ຺ໂຕ ປຈ຺ຈກ຺ຂໂຕ ຊານນ຺ໂຕ. ອມໂຕຄຘນ຺ຕິ ອມຕປຣິຍາປນ຺ນໍ, ອມຕສງ຺ຂາຕນ຺ຕິ ອຕ຺ໂຖ.

ໂສຕາປຕ຺ຕິມຄ຺ໂຄ ປຐມໍ ນິພ຺ພານທສ຺ສນໂຕ ທສ຺ສນໍ, ເຕນ ທສ຺ສເນນ ສຈ຺ຉິກິຣິຍາ ທສ຺ສນສຈ຺ຉິກິຣິຍາ. ກິຎ຺ຈາປິ ໂຄຕ຺ຣຠຸຎາຓໍ ຕໂຕ ປຐມຕຣໍ ນິພ຺ພານໍ ປສ຺ສຕິ, ອາລມ຺ພນກຣຓໂຕ ທິສ຺ວາ ກຕ຺ຕພ຺ພກິຈ຺ຈາກຣຓໂຕ ປນ ນ ທສ຺ສນນ຺ຕິ ວຸຈ຺ຈຕິ. ສາ ທຸວິຘາປີຕິ ສາ ທສ຺ສນຠາວນາວເສນ ທຸວິຘາປິ ສຈ຺ຉິກິຣິຍາ. ທສ຺ສນຠາວນາວເສນາຕິ ທສ຺ສນມຄ຺ຄຠາວນາມຄ຺ຄວເສນ. ເຕນ ອມຄ຺ຄວເສນ ປວຕ຺ຕນິພ຺ພານສ຺ສ ປຈ຺ຈເວກ຺ຂຓສຈ຺ຉິກິຣິຍໍ ນິວຕ຺ເຕຕິ. ນິພ຺ພານສ຺ສາຕິ ປນ ອິມິນາ ມຄ຺ຄຜເລສຸ ປຈ຺ຈເວກ຺ຂຓສຈ຺ຉິກິຣິຍໍ. ອິມສ຺ສ ຎາຓສ຺ສາຕິ ອິມສ຺ສ ຍຖາຘິຄຕສ຺ສ ໂລກຸຕ຺ຕຣຎາຓສ຺ສ.

໘໕໓. ອຠິມຕາຕິ ອຘິປ຺ເປຕາ. ຠາວນາ ນາມ ອຸປ຺ປາທນາ, ສນ຺ຕານປຣິຠາວນາ ຈາຕິ ຕທຸຠຍໍ ທສ຺ເສນ຺ໂຕ ‘‘ໂລກິຍານ’’ນ຺ຕິອາທິມາຫ. ຍທຄ຺ເຄນ ຫິ ໂລກິຍາ ກຸສລາທໂຍ ອຸປ຺ປາທິຕາ, ວຑ຺ຒິຕາ ຈ, ຕທຄ຺ເຄນສ຺ສ ສີລຠາວນາ, ກາຍຠາວນາ, ຈິຕ຺ຕຠາວນາ, ປຎ຺ຎາຠາວນາ ຈ ໂລກິຍາ ນິປ຺ຜາທິຕາ ໂຫຕິ, ຕາຍ ຈ ສນ຺ຕາໂນປິ ປຣິຠາວິໂຕຕິ. ຕາສຸ ໂລກິຍໂລກຸຕ຺ຕຣຠາວນາສຸ ອິຘ ຎາຓທສ຺ສນວິສຸທ຺ຘິກຖາຍໍ ໂລກຸຕ຺ຕຣຠາວນາ ອຘິປ຺ເປຕາ, ນ ອິຕຣາ ຕສ຺ສາ ສມ຺ຠາຣຠາວໂຕ. ຈຕຸພ຺ພິຘມ຺ເປຕໍ ຎາຓນ຺ຕິ ເອຕໍ ຈຕຸພ຺ພິຘມ຺ປິ ອຣິຍມຄ຺ຄຎາຓໍ ໂລກຸຕ຺ຕຣານິ ສມ຺ມາວາຈາທິເຠທານິ ສີລາທີນິ ອຸປ຺ປາເທຕິ. ກຖໍ? ສຫຊາຕາທິປຈ຺ຈຍຕາຍ. ສີລາທີນີຕິ ເອຕ຺ຖ ອາທິ-ສທ຺ເທນ ສມາຘິສ຺ສ ຄຫຓໍ, ນ ປຎ຺ຎາຍ. ນ ຫິ ຕເທວ ຕໍ ອຸປ຺ປາເທຕິ, ມຄ຺ຄຈິຕ຺ຕຸປ຺ປາໂທ ປນ ອຸປ຺ປາເທຕິ. ຕທນ຺ໂຕຄຘຠາວາ ສມ຺ມາສງ຺ກປ຺ໂປ. ໂສ ຫິ ປຎ຺ຈກ຺ຂນ຺ຘສງ຺ຄຫິໂຕຕິ ວທນ຺ຕິ. ສີລາທີນີຕິ ວາ ຜລສີລາທີນມ຺ປິ ຄຫຓນ຺ຕິ ປຎ຺ຎາຍປິ ຄຫຓໍ ຍຸຊ຺ຊຕິເຍວ. ສຫຊາຕປຈ຺ຈຍາທິຕາຍາຕິ ເອຕ຺ຖ ອາທິ-ສທ຺ເທນ ອນນ຺ຕຣປຈ຺ຈຍາທິຕາຍປິ ສງ຺ຄໂຫ ທຏ຺ຐພ຺ໂພ. ເຕຫິ ຈ ສນ຺ຕານໍ ວາເສຕີຕິ ເຕຫິ ສມຸຈ຺ຉິນ຺ທນປຏິປສ຺ສມ຺ຠນວເສນ ປວຕ຺ເຕຫິ ໂລກຸຕ຺ຕເຣຫິ ສີລາທີຫິ ອຣິຍປຸຄ຺ຄໂລ ອຕ຺ຕໂນ ສນ຺ຕານໍ ປຣິຠາເວຕິ. ຍໍ ນິສ຺ສາຍ ປຣາວຸຕ຺ຕີຕິ ວທນ຺ຕິ. ຍຖາ ປຣິຎ຺ຎຕ຺ຕຍມ຺ປິ ປຫານຕ຺ຕຍມ຺ປິ ມຄ຺ຄຎາຓສ຺ສ ກິຈ຺ຈນ຺ຕິ ວຸຕ຺ຕໍ ປຣິຍາເຍນ, ນ ເອວມິຘ. ອິຘ ປນ ໂລກຸຕ຺ຕຣຠາວນາວ ອສ຺ສ ມຄ຺ຄຎາຓສ຺ສ ກິຈ຺ຈໍ. ນ ເຫຕ຺ຖ ຠາວນາຍ ປຣິຍາໂຍ ລພ຺ຠຕີຕິ ອວຘາຣຓໍ. ເຕນ ໂລກິຍຠາວນໍ ນິວຕ຺ເຕຕິ.

ເອວໍ ສຣູເປເນວ ອາຄຕາຍາຕິ ‘‘ຈິຕ຺ຕໍ ຠາວຍ’’ນ຺ຕິ ສມາຘິ ວິຍ ຈິຕ຺ຕສີເສນ ອນາຄນ຺ຕ຺ວາ ‘‘ປຎ຺ຎໍ ຠາວຍ’’ນ຺ຕິ ເອວໍ ສຣູເປເນວ ອາຄຕາຍ ປຎ຺ຎາຍ. ຍໍ ວຸຕ຺ຕໍ ອຸທ຺ເທສວເສນ. ເອຕ຺ຕາວຕາ ຕໍ ວິຕ຺ຖາຣິຕໍ ໂຫຕິ. ອຍຎ຺ຈ ປຎ຺ໂຫ ວິສ຺ສຊ຺ຊິໂຕ ໂຫຕີຕິ ສມ຺ພນ຺ໂຘ.

ຎາຓທສ຺ສນວິສຸທ຺ຘິນິທ຺ເທສວຓ຺ຓນາ ນິຏ຺ຐິຕາ.

ອິຕິ ພາວີສຕິມປຣິຈ຺ເຉທວຓ຺ຓນາ.