໒. ເຕຈີວຣິກງ຺ຄກຖາວຓ຺ຓນາ

໒໕. ຈຕຸຕ຺ຖກຈີວຣນ຺ຕິ ນິວາສນປາຣຸປນໂຍຄ຺ຍໍ ຈຕຸຕ຺ຖກຈີວຣນ຺ຕິ ອຘິປ຺ປາໂຍ, ອໍສກາສາວສ຺ສ ອປ຺ປຏິກ຺ຂິປິຕພ຺ພໂຕ. ອຎ຺ຎຕຣວຈເນນາຕິ ເອຕ຺ຖ ຍໍ ວຕ຺ຕພ຺ພໍ, ຕໍ ເຫຏ຺ຐາ ວຸຕ຺ຕນຍເມວ. ຍາວ ນ ສກ຺ໂກຕິ, ຍາວ ນ ລຠຕິ, ຍາວ ນ ສມ຺ປຊ຺ຊຕີຕິ ປຈ຺ເຈກໍ ຍາວ-ສທ຺ໂທ ສມ຺ພນ຺ຘິຕພ຺ໂພ. ນ ສມ຺ປຊ຺ຊຕີຕິ ນ ສິຊ຺ຌຕິ. ນິກ຺ຂິຕ຺ຕປຈ຺ຈຍາ ໂທໂສ ນຕ຺ຖີຕິ ນິຈຍສນ຺ນິຘິຘຸຕງ຺ຄສໍກິເລສໂທໂສ ນຕ຺ຖິ. ອາສນ຺ເນຕິ ຈີວຣສ຺ສ ອາສນ຺ເນ ຐາເນ. ຣຊນກ຺ຂເຓ ປຣິຠຸຎ຺ຊນກາສາວໍ ຣຊນກາສາວໍ. ຕຕ຺ຣຏ຺ຐກປຈ຺ຈຕ຺ຖຣຓໍ ນາມ ອຕ຺ຕໂນ, ປຣສ຺ສ ວາ ສນ຺ຕກໍ ເສນາສເນ ປຈ຺ຈຕ຺ຖຣຓວເສນ ອຘິຏ຺ຐິຕໍ. ‘‘ອໍສກາສາວໍ ປຣິກ຺ຂາຣໂຈຬໍ ໂຫຕິ, ອິຕິ ປຈ຺ຈຕ຺ຖຣຓໍ, ອໍສກາສາວນ຺ຕິ ອິມານິ ທ຺ເວປິ ອຕິເຣກຈີວຣຏ຺ຐາເນ ຐິຕານິປິ ຘຸຕງ຺ຄເຠທໍ ນ ກໂຣນ຺ຕີ’’ຕິ ອຏ຺ຐກຖາຍໍ ວຸຕ຺ຕນ຺ຕິ ວທນ຺ຕິ. ປຣິຫຣິຕຸໍ ປນ ນ ວຏ຺ຏຕີຕິ ຣຊນກາເລ ເອວ ອນຸຎ຺ຎາຕຕ຺ຕາ ນິຈ຺ຈປຣິໂຠຄວເສນ ນ ວຏ຺ຏຕິ ເຕຈີວຣິກສ຺ສ. ອໍສກາສາວນ຺ຕິ ຂນ຺ເຘ ຐເປຕພ຺ພກາສາວໍ. ກາຍປຣິຫາຣິເກນາຕິ ວາຕາຕປາທິປຣິສ຺ສຍໂຕ ກາຍສ຺ສ ປຣິຫຣຓມຕ຺ເຕນ. ສມາທາເຍວາຕິ ຄເຫຕ຺ວາ ເອວ. ອປ຺ປສມາຣມ຺ຠຕາຕິ ອປ຺ປກິຈ຺ຈຕາ. ກປ຺ປິເຍ ມຕ຺ຕກາຣິຕາຍາຕິ ນິສີທນາທິວເສນ, ປຣິກ຺ຂາຣໂຈຬວເສນ ຈ ພຫູສຸ ຈີວເຣສຸ ອນຸຎ຺ຎາເຕສຸປິ ຕິຈີວຣມຕ຺ເຕ ຐິຕຕ຺ຕາ. ສຫ ປຕ຺ຕຈຣຓາຍາຕິ ສປຕ຺ຕຈຣໂຓ. ປກ຺ຂີ ສປກ຺ຂໂກ.

ອິຕິ ເຕຈີວຣິກງ຺ຄກຖາວຓ຺ຓນາ.