໓. ປິຓ຺ຑປາຕິກງ຺ຄກຖາວຓ຺ຓນາ

໒໖. ອຕິເຣກລາຠນ຺ຕິ ‘‘ປິຓ຺ຑິຍາໂລປໂຠຊນໍ ນິສ຺ສາຍາ’’ຕິ (ມຫາວ. ໗໓, ໑໒໘) ເອວໍ ວຸຕ຺ຕຠິກ຺ຂາຫາຣລາຠໂຕ ອຕິເຣກລາຠໍ, ສງ຺ຆຠຕ຺ຕາທິນ຺ຕິ ອຕ຺ໂຖ. ສກລສ຺ສ ສງ຺ຆສ຺ສ ທາຕພ຺ພຠຕ຺ຕໍ ສງ຺ຆຠຕ຺ຕໍ. ກຕິປເຍ ຠິກ຺ຂູ ອຸທ຺ທິສິຕ຺ວາ ທາຕພ຺ພຠຕ຺ຕໍ ອຸທ຺ເທສຠຕ຺ຕໍ. ເອກສ຺ມິໍ ປກ຺ເຂ ເອກທິວສໍ ທາຕພ຺ພຠຕ຺ຕໍ ປກ຺ຂິກໍ. ອຸໂປສເຖ ອຸໂປສເຖ ທາຕພ຺ພຠຕ຺ຕໍ ອຸໂປສຖິກໍ. ປຏິປທທິວເສ ທາຕພ຺ພຠຕ຺ຕໍ ປາຏິປທິກໍ. ວິຫາຣໍ ອຸທ຺ທິສ຺ສ ທາຕພ຺ພຠຕ຺ຕໍ ວິຫາຣຠຕ຺ຕໍ. ຘຸຣເຄເຫ ເອວ ຐເປຕ຺ວາ ທາຕພ຺ພຠຕ຺ຕໍ ຘຸຣຠຕ຺ຕໍ. ຄາມວາສີອາທີຫິ ວາເຣນ ທາຕພ຺ພຠຕ຺ຕໍ ວາຣກຠຕ຺ຕໍ. ‘‘ສງ຺ຆຠຕ຺ຕໍ ຄຓ຺ຫຖາຕິອາທິນາ’’ຕິ ອາທິ-ສທ຺ເທນ ອຸທ຺ເທສຠຕ຺ຕາທິໍ ສງ຺ຄຓ຺ຫາຕິ. ສາທິຕຸໍ ວຏ຺ຏນ຺ຕີຕິ ຠິກ຺ຂາປຣິຍາເຍນ ວຸຕ຺ຕຕ຺ຕາ. ເຠສຊ຺ຊາທິປຏິສໍຍຸຕ຺ຕາ ນິຣາມິສສລາກາ. ຍາວກາລິກວຊ຺ຊາຕິ ຈ ວທນ຺ຕິ. ວິຫາເຣ ປກ຺ກຠຕ຺ຕມ຺ປີຕິ ອຸປາສກາ ອິເຘວ ຠຕ຺ຕໍ ປຈິຕ຺ວາ ‘‘ສພ຺ເພສໍ ອຍ຺ຍານໍ ທສ຺ສາມາ’’ຕິ ວິຫາເຣເຍວ ຠຕ຺ຕໍ ສມ຺ປາເທນ຺ຕິ, ຕໍ ປິຓ຺ຑປາຕິການມ຺ປິ ວຏ຺ຏຕິ. ອາຫຣິຕ຺ວາຕິ ປຕ຺ຕໍ ຄເຫຕ຺ວາ ເຄຫໂຕ ອາເນຕ຺ວາ. ຕໍ ທິວສໍ ນິສີທິຕ຺ວາຕິ ‘‘ມາ, ຠນ຺ເຕ, ປິຓ຺ຑາຍ ຈຣິຕ຺ຖ, ວິຫາເຣເຍວ ຠິກ຺ຂາ ອານີຍຕີ’’ຕິ ວທນ຺ຕານໍ ສມ຺ປຏິຈ຺ຉເນນ ຕໍ ທິວສໍ ນິສີທິຕ຺ວາ. ເສຣິວິຫາຣສຸຂນ຺ຕິ ອປຣາຍຕ຺ຕວິຫາຣິຕາສຸຂໍ. ອຣິຍວໍໂສຕິ ອຣິຍວໍສສຸຕ຺ຕປຏິສໍຍຸຕ຺ຕາ (ທີ. ນິ. ໓.໓໐໙; ອ. ນິ. ໔.໒໘) ຘມ຺ມກຖາ. ຘມ຺ມຣສນ຺ຕິ ຘມ຺ມູປສຎ຺ຫິຕໍ ປາໂມຊ຺ຊາທິຣສໍ.

ຊງ຺ຆພລໍ ນິສ຺ສາຍ ປິຓ຺ຑປຣິເຍສນໂຕ ໂກສຊ຺ຊນິມ຺ມທ຺ທນຕາ. ‘‘ຍຖາປິ ຠມໂຣ ປຸປ຺ຜ’’ນ຺ຕິອາທິນາ (ຘ. ປ. ໔໙; ເນຕ຺ຕິ. ໑໒໓) ວຸຕ຺ຕວິຘິນາ ອາຫາຣປຣິເຍສນໂຕ ປຣິສຸທ຺ຘາຊີວຕາ. ນິຈ຺ຈໍ ອນ຺ຕຣຆຣໍ ປວິສນ຺ຕສ຺ເສວ ສຸປ຺ປຏິຈ຺ຉນ຺ນຄມນາທໂຍ ເສຂິຍຘມ຺ມາ ສມ຺ປຊ຺ຊນ຺ຕີຕິ ເສຂິຍປຏິປຕ຺ຕິປູຣຓໍ. ປຏິຄ຺ຄຫເຓ ມຕ຺ຕຎ຺ຎຸຕາຍ, ສໍສຏ຺ຐວິຫາຣາຠາວໂຕ ຈ ອປຣໂປສິຕາ. ກຸເລ ກຸເລ ອປ຺ປກອປ຺ປກປິຓ຺ຑຄຫເຓນ ປຣານຸຄ຺ຄຫກິຣິຍາ. ອນ຺ຕິມາຍ ຊີວິກາຍ ອວຏ຺ຐາເນນ ມານປ຺ປຫານໍ. ວຸຕ຺ຕຎ຺ເຫຕໍ ‘‘ອນ຺ຕມິທໍ, ຠິກ຺ຂເວ, ຊີວິການໍ, ຍທິທໍ ປິຓ຺ໂຑລ຺ຍ’’ນ຺ຕິອາທິ (ອິຕິວຸ. ໙໑; ສໍ. ນິ. ໓.໘໐). ມິສ຺ສກຠຕ຺ເຕນ ຍາປນໂຕ ຣສຕຓ຺ຫານິວາຣຓໍ. ນິມນ຺ຕນາສມ຺ປຏິຈ຺ຉນໂຕ ຄຓໂຠຊນາທິສິກ຺ຂາປເທຫິ ອນາປຕ຺ຕິຕາ.

ອປ຺ປຏິຫຕວຸຕ຺ຕິຕາຍ ຈຕູສຸປິ ທິສາສຸ ວຕ຺ຕນຏ຺ເຐນ ຈາຕຸທ຺ທິໂສ. ອາຊີວສ຺ສ ວິສຸຊ຺ຌຕີຕິ ອາຊີໂວ ອສ຺ສ ວິສຸຊ຺ຌຕິ. ອຕ຺ຕຠຣສ຺ສາຕິ ອປ຺ປານວຊ຺ຊສຸລຠຣູເປຫິ ປຈ຺ຈເຍຫິ ອຕ຺ຕໂນ ຠຣຓໂຕ ອຕ຺ຕຠຣສ຺ສ. ຕໂຕ ເອວ ເອກວິຫາຣິຕາຍ ສທ຺ຘິວິຫາຣິກາທີນມ຺ປິ ອຎ຺ເຎສໍ ອໂປສນໂຕ ອນຎ຺ຎໂປສິໂນ. ປທທ຺ວເຍນາປິ ກາຍປຣິຫາຣິເກນ ຈີວເຣນ ກຸຈ຺ຉິປຣິຫາຣິເກນ ປິຓ຺ຑປາເຕນ ວິຈຣຓໂຕ ສລ຺ລຫຸກວຸຕ຺ຕິຕໍ, ສຸຠຣຕໍ, ປຣມອປ຺ປິຈ຺ຉຕໍ, ສນ຺ຕຸຏ຺ຐິຎ຺ຈ ທສ຺ເສຕິ. ເທວາປິ ປິຫຍນ຺ຕິ ຕາທິໂນຕິ ຕາທິສສ຺ສ ຠຸສໍ ອຕິວິຍ ສນ຺ຕກາຍວຈີມໂນກມ຺ມຕາຍ ອຸປສນ຺ຕສ຺ສ ປຣເມນ ສຕິເນປກ຺ເກນ ສມນ຺ນາຄມໂຕ ສພ຺ພກາລໍ ສຕິມໂຕ ປິຓ຺ຑປາຕິກສ຺ສ ຠິກ຺ຂຸສ຺ສ ສກ຺ກາທໂຍ ເທວາປິ ປິຫຍນ຺ຕິ ປຕ຺ເຖນ຺ຕິ. ຕສ຺ສ ສີລາທິຄຸເຓສຸ ພຫຸມານໍ ອຸປ຺ປາເທນ຺ຕາ ອາທຣໍ ຊເນນ຺ຕິ, ປເຄວ ມນຸສ຺ສາ. ສເຈ ໂສ ລາຠສກ຺ກາຣສິໂລກສນ຺ນິສ຺ສິໂຕ ນ ໂຫຕິ, ຕທຠິກງ຺ຂີ ນ ໂຫຕີຕິ ອຕ຺ໂຖ.

ອິຕິ ປິຓ຺ຑປາຕິກງ຺ຄກຖາວຓ຺ຓນາ.