໑. ປໍສຸກູລິກງ຺ຄກຖາວຓ຺ຓນາ

໒໔. ຄຫປຕິທານຈີວຣນ຺ຕິ ເອຕ຺ຖ ທາຍກຠາເວນ ສມຓາປິ ອຸກ຺ກຏ຺ຐສ຺ສ ຄຫປຕິປກ຺ຂໍເຍວ ປວິຏ຺ຐາຕິ ທຏ຺ຐພ຺ພໍ. ‘‘ປພ຺ພຊິໂຕ ຄຓ຺ຫິສ຺ສຕີ’’ຕິ ຐປິຕກໍ ສິຍາ ຄຫປຕິຈີວຣໍ, ນ ປນ ຄຫປຕິທານຈີວຣນ຺ຕິ ຕາທິສໍ ນິວຕ຺ເຕຕຸໍ ທານຄ຺ຄຫຓໍ. ອຎ຺ຎຕເຣນາຕິ ເອຕ຺ຖ ສມາທານວຈເນນ ຕາວ ສມາທິນ຺ນໍ ໂຫຕຸ, ປຏິກ຺ເຂປວຈເນນ ປນ ກຖນ຺ຕິ? ອຕ຺ຖໂຕ ອາປນ຺ນຕ຺ຕາ. ຍຖາ ‘‘ເທວທຕ຺ໂຕ ທິວາ ນ ຠຸຎ຺ຊຕີ’’ຕິ ວຸຕ຺ເຕ ‘‘ຣຕ຺ຕິຍໍ ຠຸຎ຺ຊຕີ’’ຕິ ອຕ຺ຖໂຕ ອາປນ຺ນເມວ ໂຫຕິ, ຕສ຺ສ ອາຫາເຣນ ວິນາ ສຣີຣຏ຺ຐິຕິ ນຕ຺ຖີຕິ, ເອວມິຘາປິ ຠິກ຺ຂຸໂນ ຄຫປຕິທານຈີວເຣ ປຏິກ຺ຂິຕ຺ເຕ ຕທຎ຺ຎຈີວຣປ຺ປຏິຄ຺ຄໂຫ ອຕ຺ຖໂຕ ອາປນ຺ໂນ ເອວ ໂຫຕິ, ຈີວເຣນ ວິນາ ສາສເນ ຐິຕິ ນຕ຺ຖີຕິ.

ເອວໍ ສມາທິນ຺ນຘຸຕງ຺ເຄນາຕິອາທິວິຘານໍ ປໍສຸກູລິກງ຺ເຄ ປຏິປຊ຺ຊນວິຘິ. ສຸສາເນ ລທ຺ຘໍ ໂສສານິກໍ. ຕໍ ປນ ຍສ຺ມາ ຕຕ຺ຖ ເກນຈິ ຉຑ຺ຑິຕຕ຺ຕາ ປຕິຕໍ ໂຫຕິ, ຕສ຺ມາ ວຸຕ຺ຕໍ ‘‘ສຸສາເນ ປຕິຕກ’’ນ຺ຕິ. ເອວໍ ປາປຓິກມ຺ປິ ທຏ຺ຐພ຺ພໍ. ຕາລເວຬິມຄ຺ໂຄ ນາມ ມຫາຄາເມ ເອກາ ວີຖິ. ອນຸຣາຘປຸເຣຕິ ຈ ວທນ຺ຕິ. ຑຑ຺ໂຒ ປເທໂສ ເອຕສ຺ສາຕິ ຑຑ຺ຒປ຺ປເທສໍ, ວຕ຺ຖໍ. ມຄ຺ເຄ ປຕິຕກໍ ພຫຸທິວສາຕິກ຺ກນ຺ຕໍ ຄເຫຕພ຺ພນ຺ຕິ ວທນ຺ຕິ. ‘‘ທ຺ວຕ຺ຕິທິວສາຕິກ຺ກນ຺ຕ’’ນ຺ຕິ ອປເຣ. ໂຖກໍ ຣກ຺ຂິຕ຺ວາຕິ ກຕິປຍໍ ກາລໍ ອາຄເມຕ຺ວາ. ວາຕາຫຕມ຺ປິ ສາມິການໍ ສຕິສມ຺ໂມເສນ ປຕິຕສທິສນ຺ຕິ ‘‘ສາມິເກ ອປສ຺ສນ຺ເຕນ ຄເຫຕຸໍ ວຏ຺ຏຕີ’’ຕິ ວຸຕ຺ຕໍ. ຕສ຺ມາ ໂຖກໍ ອາຄເມຕ຺ວາ ຄເຫຕພ຺ພໍ.

‘‘ສງ຺ຆສ຺ສ ເທມາ’’ຕິ ທິນ຺ນໍ, ໂຈຬກຠິກ຺ຂາວເສນ ລທ຺ຘຎ຺ຈ ລທ຺ຘກາລໂຕ ປຏ຺ຐາຍ ‘‘ສມຓຈີວຣໍ ສິຍາ ນຸ ໂຂ, ໂນ’’ຕິ ອາສງ຺ກໍ ນິວຕ຺ເຕຕຸໍ ‘‘ນ ຕໍ ປໍສຸກູລ’’ນ຺ຕິ ວຸຕ຺ຕໍ. ນ ຫິ ຕໍ ເຕວີສຕິຍາ ອຸປ຺ປຕ຺ຕິຏ຺ຐາເນສຸ ກຕ຺ຖຈິ ປຣິຍາປນ຺ນໍ. ອິທານິ ອິມິນາວ ປສງ຺ເຄນ ຍໍ ຠິກ຺ຂຸທຕ຺ຕິເຍ ລກ຺ຂຓປຕ຺ຕໍ ປໍສຸກູລໍ, ຕສ຺ສ ຈ ອຸກ຺ກຏ຺ຐານຸກ຺ກຏ຺ຐວິຠາຄໍ ທສ຺ເສຕຸໍ ‘‘ຠິກ຺ຂຸທຕ຺ຕິເຍປີ’’ຕິອາທິ ວຸຕ຺ຕໍ. ຕຕ຺ຖ ຄາເຫຕ຺ວາ ວາ ທີຍຕີຕິ ສງ຺ຆສ຺ສ ວາ ຄຓສ຺ສ ວາ ເທນ຺ເຕຫິ ຍໍ ຈີວຣໍ ວສ຺ສຄ຺ເຄນ ປາເປຕ຺ວາ ຠິກ຺ຂູນໍ ທີຍຕິ. ເສນາສນຈີວຣນ຺ຕິ ເສນາສນໍ ກາເຣຕ຺ວາ ‘‘ເອຕສ຺ມິໍ ເສນາສເນ ວສນ຺ຕາ ປຣິຠຸຎ຺ຊນ຺ຕູ’’ຕິ ທິນ຺ນຈີວຣໍ. ນ ຕໍ ປໍສຸກູລນ຺ຕິ ອປໍສຸກູລຠາໂວ ປຸພ຺ເພ ວຸຕ຺ຕກາຣຓໂຕ, ຄາເຫຕ຺ວາ ທິນ຺ນຕ຺ຕາ ຈ. ເຕນາຫ ‘‘ໂນ ຄາຫາເປຕ຺ວາ ທິນ຺ນເມວ ປໍສຸກູລ’’ນ຺ຕິ. ຕຕ຺ຣປີຕິ ຍໍ ຄາເຫຕ຺ວາ ນ ທິນ຺ນໍ ຠິກ຺ຂຸທຕ຺ຕິຍໍ, ຕຕ຺ຣປິ ເຍນ ຠິກ຺ຂຸນາ ຈີວຣໍ ທີຍຕິ, ຕສ຺ສ ລາເຠ, ທາເນ ຈ ວິສຸໍ ວິສຸໍ ອຸຠຍຕ຺ຖ ອາທຣຄາຣວານໍ ສພ຺ຠາວໂຕ, ຕທຠາວໂຕ ຈ ຠິກ຺ຂຸທຕ຺ຕິຍສ຺ສ ເອກໂຕສຸທ຺ຘິ ອຸຠໂຕສຸທ຺ຘິ ອນຸກ຺ກຏ຺ຐຕາ ໂຫນ຺ຕີຕິ ອິມມຕ຺ຖໍ ທສ຺ເສຕຸໍ ‘‘ຍໍ ທາຍເກຫີ’’ຕິອາທິ ວຸຕ຺ຕໍ, ປາທມູເລ ຐເປຕ຺ວາ ທິນ຺ນກໍ ສມເຓນາຕິ ອຘິປ຺ປາໂຍ. ຍສ຺ສ ກສ຺ສຈີຕິ ອຸກ຺ກຏ຺ຐາທີສຸ ຍສ຺ສ ກສ຺ສຈິ. ຣຸຈິຍາຕິ ຉນ຺ເທນ. ຂນ຺ຕິຍາຕິ ນິຊ຺ຌານກ຺ຂນ຺ຕິຍາ.

ນິສ຺ສຍານຸຣູປປຏິປຕ຺ຕິສພ຺ຠາໂວຕິ ອຸປສມ຺ປນ຺ນສມນນ຺ຕຣໍ ອາຈຣິເຍນ ວຸຕ຺ເຕສຸ ຈຕູສຸ ນິສ຺ສເຍສຸ ອຕ຺ຕນາ ຍຖາປຏິຎ຺ຎາຕທຸຕິຍນິສ຺ສຍານຸຣູປາຍ ປຏິປຕ຺ຕິຍາ ວິຊ຺ຊມານຕາ. ອາຣກ຺ຂທຸກ຺ຂາຠາໂວຕິ ຈີວຣາຣກ຺ຂນທຸກ຺ຂສ຺ສ ອຠາໂວ ປໍສຸກູລຈີວຣສ຺ສ ອໂລຠນີຍຕ຺ຕາ. ປຣິໂຠຄຕຓ຺ຫາຍ ອຠາໂວ ສວິເສສລູຂສຠາວຕ຺ຕາ. ປາສາທິກຕາຕິ ປເຣສໍ ປສາທາວຫຕາ. ອປ຺ປິຈ຺ຉຕາທີນໍ ຜລນິປ຺ຜຕ຺ຕິ ຘຸຕງ຺ຄປຣິຫຣຓສ຺ສ ອປ຺ປິຈ຺ຉຕາທີຫິເຍວ ນິປ຺ຜາເທຕພ຺ພໂຕ. ຘຸຕຘມ຺ເມ ສມາທາຍ ວຕ຺ຕນໍ ຍາວເທວ ອຸປຣິ ສມ຺ມາປຏິປຕ຺ຕິສມ຺ປາທນາຍາຕິ ວຸຕ຺ຕໍ ‘‘ສມ຺ມາປຏິປຕ຺ຕິຍາ ອນຸພ຺ຣູຫນ’’ນ຺ຕິ. ມາຣເສນວິຆາຕາຍາຕິ ມາຣສ຺ສ, ມາຣເສນາຍ ຈ ວິຫນນາຍ ວິທ຺ຘໍສນາຍ. ກາຍວາຈາຈິຕ຺ເຕຫິ ຍໂຕ ສໍຍໂຕຕິ ຍຕິ, ຠິກ຺ຂຸ. ຘາຣິຕໍ ຍໍ ໂລກຄຣຸນາ ປໍສຸກູລໍ, ຕໍ ໂກ ນ ຘາຣເຍ, ຍສ຺ມາ ວາ ໂລກຄຣຸນາ ປໍສຸກູລໍ ຘາຣິຕໍ, ຕສ຺ມາ ໂກ ຕໍ ນ ຘາຣເຍຕິ ໂຍຊນາ ຍໍຕໍສທ຺ທານໍ ເອກນ຺ຕສມ຺ພນ຺ຘິຠາວໂຕ. ປຏິຎ຺ຎໍ ສມນຸສ຺ສຣນ຺ຕິ ອຸປສມ຺ປທມາເຬ ‘‘ອາມ ຠນ຺ເຕ’’ຕິ ອາຈຣິຍປມຸຂສ຺ສ ສງ຺ຆສ຺ສ ສມ຺ມຸຂາ ທິນ຺ນໍ ປຏິຎ຺ຎໍ ສມນຸສ຺ສຣນ຺ໂຕ.

ອິຕິ ປໍສຸກູລິກງ຺ຄກຖາວຓ຺ຓນາ.