ອຸປາທານປຈ຺ຈຍາຠວປທວິຕ຺ຖາຣກຖາວຓ຺ຓນາ

໖໔໖. ອຕ຺ຖໂຕຕິ ວຈນຕ຺ຖໂຕ. ຘມ຺ມໂຕຕິ ສຠາວຘມ຺ມໂຕ. ສາຕ຺ຖໂຕຕິ ສາຕ຺ຖກໂຕ, ປຸພ຺ເພ ວຸຕ຺ຕສ຺ສປິ ປຸນ ວຈນສ຺ສ ສປ຺ປໂຍຊນໂຕ. ເຠທສງ຺ຄຫາຕິ ເຠທໂຕ ສງ຺ຄຫໂຕ, ວິຠາຄໂຕ ເຈວ ວິຠຕ຺ຕສ຺ສ ສງ຺ຂິປນໂຕ ຈາຕິ ອຕ຺ໂຖ. ຍໍ ຍສ຺ສ ປຈ຺ຈໂຍຕິ ຍໍ ຍໍ ອຸປາທານໍ ຍສ຺ສ ຍສ຺ສ ຠວສ຺ສ ປຈ຺ຈໂຍ ໂຫຕິ, ຕໂຕ ຈາຕິ ອຕ຺ໂຖ.

ຠວຕີຕິ ຠໂວຕິ ຜລໂວຫາເຣນ ກມ຺ມຠໂວ ວຸຕ຺ໂຕ. ອຸປປຕ຺ຕິຠວນິພ຺ພຈນເມວ ຫິ ທ຺ວຍສ຺ສປິ ສາຘາຣຓໍ ກຕ຺ວາ ວຸຕ຺ຕໍ, ຠວຕິ ເອຕສ຺ມາ ອຸປປຕ຺ຕິຠໂວຕິ ວາ. ທຸຕິໂຍ ປນ ກມ຺ມຠໂວ ສຕ຺ຕສ຺ສ ປຸນພ຺ຠວຠາເວນ ສວິເສສໍ ຠວຕີຕິ ຠໂວ. ຕໂຕ ເອວ ນ ສພ຺ພສ຺ສ ຠວນ຺ຕຣສ຺ສ, ຕໍເຫຕຸໂນ ວາ ຠວຠາວປ຺ປສງ຺ໂຄ. ທຸວິເຘນາຕິ ທ຺ວີຫິ ອາກາເຣຫິ ປວຕ຺ຕິໂຕຕິ ອຕ຺ໂຖ. ທຸວິເຘນາຕິ ວາ ປຈ຺ຈຕ຺ຕຕ຺ເຖ ກຣຓວຈນໍ, ທຸວິໂຘຕິ ວຸຕ຺ຕໍ ໂຫຕິ. ອຕ຺ຖີຕິ ສໍວິຊ຺ຊຕິ.

໖໔໗. ອຕ຺ຕໂນ ປຈ຺ຈເຍຫິ ກຣີຍຕີຕິ ກມ຺ມໍ, ອຕ຺ຕໂນ ຜລໍ ກໂຣຕີຕິ ກມ຺ມນ຺ຕິ ເກຈິ, ‘‘ກມ຺ມ’’ນ຺ຕິ ເອວໍ ວຕ຺ຕພ຺ພາ ກມ຺ມສງ຺ຂາຕາ. ປຣິຕ຺ຕຠູມໂກຕິ ກາມຠູມໂກ. ມຫາຠູມໂກຕິ ມຫຄ຺ຄຕຠູມໂກ. ສພ຺ພນ຺ຕິ ອນວເສສໍ. ຠວໍ ຄຈ຺ຉຕິ, ຄເມຕິ ຈາຕິ ຠວຄາມິ. ຄຈ຺ຉຕີຕິ ຈ ນິປ຺ຜາທນສມຕ຺ຖຕາວເສນ, ອຕ຺ຕໂນ ປວຕ຺ຕິກາເລ ຠວາຠິມຸຂໍ ຫຸຕ຺ວາ ປວຕ຺ຕຕີຕິ ອຕ຺ໂຖ, ນິພ຺ພຕ຺ຕນເມວ ວາ ຄມນໍ ອຘິປ຺ເປຕໍ. ‘‘ຠວຄາມີ’’ຕິ ຈ ເອເຕນ ກມ຺ມກ຺ຂຍກຣໍ ກມ຺ມໍ ນິວຕ຺ເຕຕິ. ອຍຎ຺ຫິ ວຏ຺ຏກຖາ, ຕຎ຺ຈ ວິວຏ຺ຏນິສ຺ສິຕນ຺ຕິ. ອປຸຎ຺ຎາຠິສງ຺ຂາໂຣຕິ ທ຺ວາທສ ເຈຕນາຕິ ອຸທ຺ຘຈ຺ຈສຫຄຕເຈຕນາຍປິ ຄຫຓໍ ‘‘ອວິຊ຺ຊາປຈ຺ຈຍາ ສງ຺ຂາຣາ’’ຕິ ເອຕ຺ຖ ວິຍ ເວທິຕພ຺ພໍ. ‘‘ຠວປຈ຺ຈຍາ ຊາຕີ’’ຕິ ເອຕ຺ຖ ປນ ‘‘ສງ຺ຂາຣປຈ຺ຈຍາ ວິຎ຺ຎາຓ’’ນ຺ຕິ (ມ. ນິ. ໓.໑໒໖; ມຫາວ. ໑; ສໍ. ນິ. ໒.໑; ອຸທາ. ໑; ເນຕ຺ຕິ. ໒໔) ເອຕ຺ຖ ວິຍ ສາປິ ອປເນຕພ຺ພາ. ມນ຺ທພຫຸວິປາກຕາຕິ ອປ຺ປມຫາວິປາກຕາ.

‘‘ສພ຺ພມ຺ປິ ຠວຄາມິກມ຺ມນ຺ຕິ ອິມິນາ ເຈຕນາສມ຺ປຍຸຕ຺ຕາ ອຠິຊ຺ຌາທໂຍ ວຸຕ຺ຕາ’’ຕິ ເອເຕນ ອາຈຍຄາມິຕາຍ ເຕສໍ ກມ຺ມສງ຺ຂາຕຕາ ວຸຕ຺ຕາຕິ ກມ຺ມຠວປຣິຍາປນ຺ນຕໍ ປຣິຍາເຍນ ວທຕິ, ນິປ຺ປຣິຍາເຍນ ປນ ເຈຕນາວ ກມ຺ມຠໂວ. ວຸຕ຺ຕຎ຺ຫິ ‘‘ກມ຺ມຠໂວ ຕີຫິ ຂນ຺ເຘຫິ ເອເກນາຍຕເນນ ເອກາຍ ຘາຕຸຍາ ສມ຺ປຍຸຕ຺ໂຕ, ເອເກນ ຂນ຺ເຘນ ເອເກນາຍຕເນນ ເອກາຍ ຘາຕຸຍາ ເກຫິຈິ ສມ຺ປຍຸຕ຺ໂຕ’’ຕິ (ຘາຕຸ. ໒໔໔). ອຸປປຕ຺ຕິຠໂວ ຕີຫິປິ ຕິເກຫິ ວຸຕ຺ໂຕ ອຸປາທິນ຺ນກ຺ຂນ຺ໂຘວ. ຍຖາຫ ‘‘ອຸປປຕ຺ຕິຠໂວ… ກາມຠໂວ… ສຎ຺ຎາຠໂວ… ປຎ຺ຈໂວກາຣຠໂວ ປຎ຺ຈຫິ ຂນ຺ເຘຫິ ເອກາທສຫາຍຕເນຫິ ສຕ຺ຕຣສຫິ ຘາຕູຫິ ສງ຺ຄຫິໂຕ’’ຕິອາທິ (ຘາຕຸ. ໖໗). ຍທິ ຫິ ອນຸປາທິນ຺ນການມ຺ປິ ຄຫຓໍ ສິຍາ, ‘‘ທ຺ວາທສຫິ ອາຍຕເນຫິ ອຏ຺ຐາຣສຫິ ຘາຕູຫີ’’ຕິ ວຕ຺ຕພ຺ພໍ ສິຍາຕິ. ກາມຕຓ຺ຫາຍ ກາເມຕພ຺ພໂຕ ກາມນິສ຺ສຍຕາຍ ໂຠຄາ ວິຍ, ກາມສຫຈຣິຕຕາຍ ‘‘ກຸນ຺ຕາ ປຈຣນ຺ຕີ’’ຕິ ວິຍ, ກາມາຣມ຺ມຓຕາຍ ‘‘ສຸຂໍ ຣູປ’’ນ຺ຕິ ວິຍ, ກາມປຈ຺ຈຍຏ຺ຐານຕາຍ ‘‘ສຸໂຂ ສຄ຺ໂຄ’’ຕິ ວິຍ ກາມາຕິ ອວີຈິປຣນິມ຺ມິຕວສວຕ຺ຕິປຣິຈ຺ຉິນ຺ນາ ອຸປາທິນ຺ນກ຺ຂນ຺ຘາ ວຸຈ຺ຈນ຺ຕິ. ຣູປາວິຣາຄໂຕ ຍໍ ນິສ຺ສິຕາ, ຕທຸປຈາເຣນ ‘‘ມຎ຺ຈາ ໂຆສນ຺ຕີ’’ຕິ ວິຍ, ‘‘ຜນ຺ທນເທວຕາ’’ຕິ ວິຍ ຈ ‘‘ຣູປ’’ນ຺ຕິ ວຸຈ຺ຈນ຺ຕິ ພ຺ຣຫ຺ມກາຍິກາກນິຏ຺ຐປຣິຈ຺ຉິນ຺ນາ ອຸປາທິນ຺ນກ຺ຂນ຺ຘາ.

ຣູປເມວ ຠໂວ ຣູປຠໂວ, ຕຖາ ອຣູປນ຺ຕິ ອາກາສານຎ຺ຈາຍຕນຠວຄ຺ຄປຣິຈ຺ຉິນ຺ນາ ຈຕ຺ຕາໂຣ ອຸປາທິນ຺ນກ຺ຂນ຺ຘາ ວຸຈ຺ຈນ຺ຕິ. ອຣູປເມວ ຠໂວ ອຣູປຠໂວ. ກາໂມ ເອວ ຠໂວຕິ ກາມຠໂວ, ໂສ ປນ ຍສ຺ມາ ຍຖາວຸຕ຺ເຕນຕ຺ເຖນ ‘‘ກາໂມ’’ຕິ ວຕ຺ຕພ຺ໂພ ໂຫຕິ, ຕສ຺ມາ ‘‘ກາມສງ຺ຂາໂຕ ຠໂວ’’ຕິ ວຸຕ຺ຕໍ. ກາມາວຈຣສຎ຺ຎິໂຕ ວາ ຠໂວ ‘‘ກາມສງ຺ຂາໂຕ ຠໂວ’’ຕິ ວຸຕ຺ໂຕ. ຕຖາ ຣູປາຣູປຠໂວຕິ ອາຫ ‘‘ເອສ ນໂຍ ຣູປາຣູປຠເວສູ’’ຕິ. ສຎ຺ຎາວຕໍ ຠໂວຕິ ເອຕ຺ຖ ວນ຺ຕຸ-ສທ຺ທສ຺ສ ໂລໂປ ທຏ຺ຐພ຺ໂພ. ຕສ຺ສ ວາ ອຕ຺ເຖ ອກາຣໍ ກຕ຺ວາ ‘‘ສຎ຺ຎຠໂວ’’ຕິປິ ປາໂຐ. ເຕນາຫ ‘‘ສຎ຺ຎາວາ’’ຕິອາທິ. ໂວກິຓ຺ໂຓຕິ ເອເຕນ ໂວກາຣສທ຺ທສ຺ສ ກມ຺ມສາຘນຕມາຫ. ໂວກິຣີຍຕິ ປສາຣີຍຕິ ວິຕ຺ຖາຣີຍຕີຕິ ໂວກາໂຣ, ໂວກິຣຓໍ ວາ ໂວກາໂຣ, ໂສ ເອກສ຺ເສວ ຂນ຺ຘສ຺ສ ວເສນ ປວຕ຺ຕຕ຺ຕາ ‘‘ເອໂກ ໂວກາໂຣ’’ຕິ ວຸຕ຺ໂຕ, ປສຏຸປ຺ປຕ຺ຕີຕິ ອຕ຺ໂຖ.

໖໔໘. ກິຎ຺ຈາປິ ຠວນິທ຺ເທເສ ‘‘ສພ຺ພມ຺ປິ ຠວຄາມິກມ຺ມໍ ກມ຺ມຠໂວ’’ຕິ (ວິຠ. ໒໓໔) ອິມິນາ ເຈຕນາສມ຺ປຍຸຕ຺ຕຘມ຺ມາປິ ວຸຕ຺ຕາ. ປຸຎ຺ຎາຠິສງ຺ຂາຣາທໂຍວາຕິ ປນ ອວຘາຣຓໍ ປຈ຺ຈຍຘມ຺ມວິເສເສປິ ອຕ຺ຖປ຺ປເຠເທນ ສງ຺ຂາຣຠວຄ຺ຄຫເຓສຸ ອຕ຺ເຖວ ວິເສໂສຕິ ທສ຺ສນຕ຺ຖໍ ກຕໍ. ເຕນາຫ ‘‘ເອວໍ ສນ຺ເຕປີ’’ຕິອາທິ. ສງ຺ຂາຣຠວານໍ ຘມ຺ມເຠທໂຕ ນ ສງ຺ຂາຣາ ເອວ ປຸນ ວຸຕ຺ຕາຕິ ‘‘ສາຕ຺ຖກເມວິທໍ ປຸນວຈນ’’ນ຺ຕິ ເອຕໍ ອຍຸຕ຺ຕນ຺ຕິ ເຈ? ນ, ຠເວກເທສຠາເວນ ສງ຺ຂາຣານໍ ຠໂວຕິ ປຸນ ວຸຕ຺ຕຕ຺ຕາ. ປເຣນ ວາ ຘມ຺ມວິເສສໍ ອຄ຺ຄເຫຕ຺ວາ ປຸນວຈນໍ ໂຈທິຕນ຺ຕິ ໂຈທກາຠິລາສວເສນ ‘‘ສາຕ຺ຖກເມວິທໍ ປຸນວຈນ’’ນ຺ຕິ ວຸຕ຺ຕໍ.

໖໔໙. ກາມຠວາທິນິພ຺ພຕ຺ຕກສ຺ສ ກມ຺ມສ຺ສ ກາມຠວາທິຠາໂວ ຜລໂວຫາເຣນ ອຏ຺ຐກຖາຍໍ ວຸຕ຺ໂຕ. ສຫຊາຕວິຎ຺ຎາຓສ຺ສປິ ປຈ຺ຈຍຠູຕໍ ອວິຊ຺ຊາເຫຕຸກໍ ສງ຺ຂາຣຄ຺ຄຫເຓນ ຍໍ ກິຎ຺ຈິ ກມ຺ມໍ ປຸພ຺ເພ ວຸຕ຺ຕໍ, ອິຘ ປນ ‘‘ສພ຺ພມ຺ປິ ຠວຄາມິກມ຺ມ’’ນ຺ຕິ (ວິຠ. ໒໓໔) ວຈນໂຕ ຠວສ຺ສ ນິພ຺ພຕ຺ຕກໍ ອຸປາທານເຫຕຸກໍ ວິປຈ຺ຈນາຍ ກໂຕກາສເມວ ຠໂວຕິ ອຘິປ຺ເປໂຕ. ຍໍ ກາມຸປາທານປຈ຺ຈຍາ ຣູປຠວນິພ຺ພຕ຺ຕກໍ, ອຣູປຠວນິພ຺ພຕ຺ຕກຎ຺ຈ ກມ຺ມໍ ກຣີຍຕິ, ໂສ ກມ຺ມຠໂວ, ຕທຠິນິພ຺ພຕ຺ຕາ ຂນ຺ຘາ ອຸປປຕ຺ຕິຠໂວຕິ ອິມມຕ຺ຖໍ ‘‘ເອສ ນໂຍ ຣູປາຣູປຠເວສູ’’ຕິ ອຕິທິສຕິ. ທ຺ເວ ກາມຠວາຕິ ກາມກມ຺ມຠໂວ, ກາມູປປຕ຺ຕິຠໂວຕິ ທ຺ເວ ກາມຠວາ. ເອວໍ ‘‘ທ຺ເວ ຣູປຠວາ, ທ຺ເວ ອຣູປຠວາ’’ຕິ ເອຕ຺ຖາປິ. ອນ຺ໂຕຄເຘ ຫິ ວິສຸໍ ອຄ຺ຄເຫຕ຺ວາ ອພ຺ຠນ຺ຕຣຄເຕ ເອວ ກຕ຺ວາ ກາມຠວາທິເກ ກມ຺ມູປປຕ຺ຕິຠວວເສນ ທຸຄຸເຓ ກຕ຺ວາ ອາຫ ‘‘ຉ ຠວາ’’ຕິ.

ອວິເສເສນາຕິ ອຸປາທານວເສນ ເຠທໍ ອກຕ຺ວາ. ອຸປາທານເຠທາກຣເຓເນວ ຈ ທ຺ວາທສປ຺ປເຠທສ຺ສ ສງ຺ຄຫວເສນ ສງ຺ຄຫໂຕ ‘‘ຉ ຠວາ’’ຕິ ວຸຕ຺ຕໍ. ອນຸປຄມ຺ມາຕິ ອນິສ຺ສາຍ, ອນາມສິຕ຺ວາຕິ ອຕ຺ໂຖ.

໖໕໐. ໂຄສີເລນ, ກຸກ຺ກຸຣສີເລນ ຈ ສມຕ຺ເຕນ ສມາທິນ຺ເນນ ຄຸນ຺ນໍ, ກຸກ຺ກຸຣານຎ຺ຈ ສຫພ຺ຍຕາ ວຸຕ຺ຕາຕິ ‘‘ສີລພ຺ພຕຸປາທານວໂຕ ຌານຠາວນາ ນ ອິຊ຺ຌຕີ’’ຕິ ມຎ຺ຎມານາ ເຕນ ຣູປາຣູປຠວາ ນ ໂຫນ຺ຕີຕິ ເກຈິ ວທນ຺ຕິ. ວກ຺ຂມາເນນ ປນ ປກາເຣນ ປຈ຺ຈຍຠາວໂຕ ‘‘ຕໍ ນ ຄເຫຕພ຺ພ’’ນ຺ຕິ ອາຫ. ອສຸທ຺ຘິມຄ຺ເຄ ຈ ສຸທ຺ຘິມຄ຺ຄປຣາມສນໍ ສີລພ຺ພຕຸປາທານນ຺ຕິ ສຸທ຺ຘິມຄ຺ຄປຣາມສເນນ ຣູປາຣູປາວຈຣຊ຺ຌານານໍ ນິພ຺ພຕ຺ຕນໍ ນ ນ ຍຸຊ຺ຊຕີຕິ.

ອນຸສ຺ສວວເສນາຕິ ‘‘ເສຕວຘຍຊ຺ຊໍ ອາລຠເຕ ຠູຕິກາໂມ’’ຕິ ອາທິນ຺ນອນຸສ຺ສວວເສນ, ຍຖາ ອິເມ ມນຸສ຺ສໂລເກ ກາມາ ສມິທ຺ຘາ, ເອວໍ ເທວໂລເກ ອິໂຕ ສມິທ຺ຘຕຣາຕິ ທິຏ຺ຐານຸສາເຣນ ວາ. ປຸຣາຓຠາຣຕສີຕາຫຣຓປສຸພນ຺ຘວິຘິອາທິສວນໍ ອສ຺ສທ຺ຘມ຺ມສ຺ສວນໍ. ອາທິ-ສທ຺ເທນ ອສປ຺ປຸຣິສູປນິສ຺ສຍໍ ປຸພ຺ເພ ຈ ອກຕປຸຎ຺ຎຕໍ, ອຕ຺ຕມິຈ຺ຉາປຓິຘິຎ຺ຈ ສງ຺ຄຓ຺ຫາຕິ. ກາຍທຸຈ຺ຈຣິຕາທີນິປີຕິ ອຕ຺ຕໂນ ອຘິປ຺ເປຕານໍ ກາມານໍ ອນຸປາຍຠູຕານິປິ ກາຍທຸຈ຺ຈຣິຕາທີນິ ກໂຣຕິ, ຈິຣສຄ຺ຄາທິອຕ຺ຖໍ ຍຸທ຺ຘາທິວເສນາຕິ ອຘິປ຺ປາໂຍ. ສນ຺ທິຏ຺ຐິເກ ວາ ປນ ຣຊ຺ຊເສນາປຕິຏ຺ຐານາທິສງ຺ຄເຫ ກາເມ. ຕທນ຺ໂຕຄຘາ ເອວາຕິ ຕສ຺ມິໍ ທຸຈ຺ຈຣິຕນິພ຺ພຕ຺ເຕ, ສຸຈຣິຕນິພ຺ພຕ຺ເຕ ຈ ກາມຠເວ ອນ຺ໂຕຄຘາ ເອວາຕິ ອຕ຺ໂຖ. ອນ຺ໂຕຄຘາຕິ ຈ ສຎ຺ຎາຠວປຎ຺ຈໂວກາຣຠວານໍ ເອກເທເສນ ອນ຺ໂຕຄຘຕ຺ຕາ ວຸຕ຺ຕໍ. ນ ຫິ ເຕ ນິຣວເສສາ ກາມຠເວ ອນ຺ໂຕຄຘາຕິ.

ສປ຺ປເຠທສ຺ສາຕິ ສຸຄຕິທຸຄ຺ຄຕິມນຸສ຺ສາທິປ຺ປເຠທວໂຕ.

ກາມາວຈຣສມ຺ປຕ຺ຕິຠເວ ປຐມທຸຕິຍອຸຈ຺ເຉທວາທວເສນ, ຣູປຠເວ ຕຕິຍອຸຈ຺ເຉທວາທວເສນ, ອຣູປຠເວ ເສສອຸຈ຺ເຉທວາທວເສນ ອຍມຕ຺ຕາ ສຸອຸຈ຺ຉິນ຺ໂນ ໂຫຕີຕິ ຕທຸປຄໍ ກມ຺ມໍ ກໂຣຕີຕິ ອາຫ ‘‘ອຍໍ ອຕ຺ຕາ ນາມາ’’ຕິອາທິ. ຕຕ຺ຖ ສຸອຸຈ຺ຉິນ຺ໂນຕິ ສກລວຏ຺ຏທຸກ຺ຂສມຸຈ຺ເຉເທນ ສຸຏ຺ຐຸ ອຸຈ຺ຉິນ຺ໂນ, ອປຸນພ຺ຠວຸປ຺ປຕ຺ຕິໂກ ໂຫຕີຕິ ອຕ຺ໂຖ.

‘‘ກາມາວຈຣສມ຺ປຕ຺ຕິຠເວ’’ຕິ ອິທໍ ປຐມທິຏ຺ຐຘມ຺ມນິພ຺ພານວາທວເສນ ວຸຕ຺ຕໍ, ເສສໍ ອິຕຣທິຏ຺ຐຘມ຺ມນິພ຺ພານວາທວເສນ. ຕຕ຺ຖ ກິຎ຺ຈາປິ ປາຬິຍໍ (ທີ. ນິ. ໑.໙໓ ອາທໂຍ) ຣູປາວຈຣຊ຺ຌານວເສເນວ ອຸປຣິ ຈຕ຺ຕາໂຣ ທິຏ຺ຐຘມ຺ມນິພ຺ພານວາທາ ອາຄຕາ, ທິຏ຺ຐິຄຕິໂກ ປນ ຍໍ ກິຎ຺ຈິ ຄເຫຕ຺ວາ ຍຖາ ຕຖາ ອຠິນິວິສຕີຕິ ອຣູປຠວຄ຺ຄຫຓໍ, ອຣູປຊ຺ຌານານມ຺ປິ ວາ ຈຕຸຕ຺ຖຌານສງ຺ຄຫໂຕ ອຣູປຠວຄ຺ຄຫຓໍ, ສນ຺ຕສຸຂຕາຍ ວາ ຕໍສມງ຺ຄິໂນ ສຸຂິຕຠາວສາມຎ຺ຎໂຕ. ວິຄຕປຣິຬາໂຫຕິ ຍຖາຠິລາສິຕວິສຍູປຫາເຣນ, ປຫາເນນ ຈ ວູປສນ຺ຕກາມຣາຄປຣິຬາໂຫ, ທິຏ຺ເຐວ ຘມ຺ເມ ນິພ຺ພານປ຺ປຕ຺ໂຕຕິ ອຕ຺ໂຖ.

ສຸທ຺ຘິມຄ຺ຄປຣາມສນວເສນ ປວຕ຺ຕິຕໍ ຍໍ ກິຎ຺ຈິ ໂລກິຍໍ ສີລໍ, ຌານຎ຺ຈ ສີລພ຺ພຕມິຈ຺ເຈວ ອິຘາຘິປ຺ເປຕນ຺ຕິ ອາຫ ‘‘ອິທໍ ສີລພ຺ພຕໍ ນາມາ’’ຕິອາທິ. ກເມນ ອວຕ຺ວາ ສີລພ຺ພຕຸປາທານສ຺ສ ອນ຺ເຕ ຠວປຈ຺ຈຍຕາວຈນໍ ອຕ຺ຕວາທຸປາທານໍ ວິຍ ອຠິຓ຺ຫໍ ອສມຸທາຈາຣໂຕ, ອຕ຺ຕວາທຸປາທານນິມິຕ຺ຕຕ຺ຕາ ຈ.

ກມ຺ມຠເວຕິ ນິທ຺ຘາຣເຓ ຠຸມ຺ມໍ. ເຫຕຸປຈ຺ຈຍປ຺ປເຠເທຫີຕິ ເອຕ຺ຖ ມຄ຺ຄປຈ຺ຈໂຍ ຈ ວຕ຺ຕພ຺ໂພ. ທິຏ຺ຐຸປາທານາທີນິ ຫິ ສຫຊາຕກມ຺ມຠວສ຺ສ ມຄ຺ຄປຈ຺ຈຍາ ໂຫນ຺ຕີຕິ, ຕສ຺ມາ ຕານິ ສຫຊາຕາທີສຸ ເຫຕຸປຈ຺ຈຍໍ ອປນີຍ ມຄ຺ຄປຈ຺ຈຍໍ ປກ຺ຂິປິຕ຺ວາ ສຕ຺ຕຘາ ປຈ຺ຈຍາ ໂຫນ຺ຕີຕິ ເວທິຕພ຺ພານິ. ສພ຺ພານິ ປນ ອນນ຺ຕຣສມນນ຺ຕຣອນນ຺ຕຣູປນິສ຺ສຍນຕ຺ຖິວິຄຕາເສວນປຈ຺ຈເຍຫິ ປຈ຺ຈຍາ ໂຫນ຺ຕິ. ນານນ຺ຕຣສ຺ສ ອຸປນິສ຺ສຍປຈ຺ຈເຍນ ປຈ຺ຈຍາ ໂຫນ຺ຕິ. ກທາຈິ ອາຣມ຺ມຓປຈ຺ຈຍາທິນາປິ, ຕໍ ປນ ອຸປນິສ຺ສຍປຈ຺ຈເຍເນວ ສງ຺ຄເຫຕ຺ວາ ວຸຕ຺ຕໍ ‘‘ວິປ຺ປຍຸຕ຺ຕສ຺ສ ປນ ອຸປນິສ຺ສຍປຈ຺ຈເຍເນວາ’’ຕິ.