ຠວປຈ຺ຈຍາຊາຕິອາທິປທວິຕ຺ຖາຣກຖາວຓ຺ຓນາ
໖໕໑. ຊາຕີຕິອາທີສູຕິ ອາທິ-ສທ຺ເທນ ‘‘ຊາຕິປຈ຺ຈຍາ ຊຣາມຣຓໍ ໂສກປຣິເທວທຸກ຺ຂໂທມນສ຺ສຸປາຍາສາ ສມ຺ຠວນ຺ຕີ’’ຕິ (ມ. ນິ. ໓.໑໒໖; ສໍ. ນິ. ໒.໑; ມຫາວ. ໑; ອຸທາ. ໑; ເນຕ຺ຕິ. ໒໔) ສພ຺ພໍ ສງ຺ຄຓ຺ຫາຕິ. ເຕນາຫ ‘‘ຊາຕິອາທີນ’’ນ຺ຕິອາທິ. ອຸປປຕ຺ຕິຠວຸປ຺ປຕ຺ຕິເຍວ ຊາຕີຕິ ອາຫ ‘‘ນ ອຸປປຕ຺ຕິຠໂວ’’ຕິ. ຊາຍມານສ຺ສ ປນ ຊາຕິ ຊາຕີຕິ ອຸປປຕ຺ຕິຠໂວປິ ອສຕິ ອຠາວາ ຊາຕິຍາ ປຈ຺ຈໂຍຕິ ສກ຺ກາ ວຕ຺ຕຸໍ. ຊາຍມານຣູປປທຏ຺ຐານຕາປິ ຫິ ຣູປຊາຕິຍາ ວຸຕ຺ຕາ ‘‘ອຸປຈິຕຣູປປທຏ຺ຐາໂນ ອຸປຈໂຍ, ອນຸປ຺ປພນ຺ຘຣູປປທຏ຺ຐານາ ສນ຺ຕຕີ’’ຕິ (ຘ. ສ. ອຏ຺ຐ. ໖໔໑).
ຊາຕານໍ ຂນ຺ຘານໍ ອຸຎ຺ຎາຕຕາ, ອຠິມຕຕາ ຈ ຫີນປຓີຕຕາ. ອນິຏ຺ຐຎ຺ຫິ ຫີນໍ, ອິຏ຺ຐໍ ປຓີຕໍ. ອາທິ-ສທ຺ເທນ ສຸວຓ຺ຓທຸພ຺ພຓ຺ຓຫີນຸຕ຺ຕມາທິໍ ສງ຺ຄຓ຺ຫາຕິ. ຍມການມ຺ປິ ສຕນ຺ຕິ ຍມກຠາເວນ ນິພ຺ພຕ຺ຕານມ຺ປິ ສມານານໍ. ໂສ ຈ ສຕ຺ຕານໍ ວິເສໂສ. ຠິນ຺ນສນ຺ຕານິກສ຺ສ ວິເສສກາຣຓສ຺ສ ສພ຺ເພນ ສພ຺ພໍ ອຠາວໂຕ ‘‘ອຊ຺ຌຕ຺ຕສນ຺ຕາເນ’’ຕິ ວຸຕ຺ຕໍ. ອຎ຺ຎສ຺ສ ກາຣຓສ຺ສ ອຠາວໂຕຕິ ອຕ຺ຕສນ຺ຕານຄຕໂຕ ອຎ຺ຎສ຺ສ ວິເສສກາຣຓສ຺ສ ອນຸປລພ຺ຠມານຕ຺ຕາ, ສຕິ ຈ ຕສ຺ມິໍ ສພ຺ພທາ ສພ຺ເພສໍ ອຠາວໂຕຕິ ປສງ຺ຄສ຺ສ ທຸນ຺ນິວາຣຓໂຕ ກາຣເຓ ອວິສິຏ຺ເຐ ຜລວິເສສສ຺ສ ອຍຸຊ຺ຊມານກຕ຺ຕາ. ເຕນາຫ ‘‘ກມ຺ມຠວເຫຕຸໂກວາ’’ຕິ.
ເຕນ ເຕນາຕິ ຎາຕິພ຺ຍສນາທິນາ ຊຣາມຣຓໂຕ ອຎ຺ເຎນ ທຸກ຺ຂຘມ຺ເມນ. ຊຣາມຣຓນິມິຕ຺ຕຎ຺ຫິ ອຸປ຺ປນ຺ນາ ໂສກາທໂຍ ຊຣາມຣຓາຠິສມ຺ພນ຺ຘາ, ຕທຎ຺ເຎ ອນຠິສມ຺ພນ຺ຘາ. ອຸປນິສ຺ສຍໂກຏິຍາຕິ ອຸປນິສ຺ສຍໍເສນ, ອຸປນິສ຺ສຍເລເສນາຕິ ອຕ຺ໂຖ. ໂຍ ຫິ ປຏ຺ຐາເນ ອນາຄໂຕ ສຕິ ຠາວາ, ອສຕິ ຈ ອຠາວາ ສຸຕ຺ຕນ຺ຕປຣິຍາເຍນ ອຸປນິສ຺ສໂຍ, ໂສ ‘‘ອຸປນິສ຺ສຍໂກຏີ’’ຕິ ວຸຈ຺ຈຕິ. ປຈ຺ຈຍມຫາປເທໂສ ກິເຣໂສ, ຍທິທໍ ອຸປນິສ຺ສໂຍຕິ.