ຕຓ຺ຫາປຈ຺ຈຍາອຸປາທານປທວິຕ຺ຖາຣກຖາວຓ຺ຓນາ
໖໔໕. ອຕ຺ຖວິຠາໂຄ ອຕ຺ຖສ຺ສ ວິຠຊນາ. ວຕ຺ຖຸສງ຺ຂາຕໍ ກາມນ຺ຕິ ກາມຄຸຓສຎ຺ຎິຕໍ ຣູປາທິອາຣມ຺ມຓມາຫ. ອຸປາທິຍຕີຕິ ກາມວເສນ ຄຓ຺ຫາຕິ, ທຬ຺ຫໍ ອສ຺ສາເທຕີຕິ ອຕ຺ໂຖ. ກາມໍ ອຸປາທິຍຕີຕິ ເອຕ຺ຖ ກມ຺ມສາຘໂນ ກາມສທ຺ໂທ, ກາໂມ ຈ ໂສຕິ ເອຕ຺ຖ ກຕ຺ຕຸສາຘໂນ ກິເລສກາມສ຺ສ ອຘິປ຺ເປຕຕ຺ຕາ. ອຸປາທານສທ຺ໂທ ປນ ອຸຠຍຕ຺ຖາປິ ກຕ຺ຕຸສາຘໂນວ. ທຬ຺ຫຕ຺ໂຖ ຠຸສຕ຺ໂຖ. ຍຖາ ຠຸໂສ ອາຍາໂສ ອຸປາຍາໂສ, ຠຸສໍ ກຸຏ຺ຐໍ ອຸປກຸຏ຺ຐໍ, ເອວໍ ອິຘາປີຕິ ອາຫ ‘‘ອຸປາຍາສອຸປກຸຏ຺ຐາທີສຸ ວິຍາ’’ຕິ. ປຸຣິມທິຏ຺ຐິໍ ອຸຕ຺ຕຣທິຏ຺ຐິ ອຸປາທິຍຕີຕິ ປຸຣິມທິຏ຺ຐິໍ ສສ຺ສຕຠາເວນ ຄຓ຺ຫນ຺ຕີ ອຸປາທິຍຕິ, ປຸຣິມທິຏ຺ຐິອາກາເຣນ ວາ ອຸຕ຺ຕຣທິຏ຺ຐິ ອຸປ຺ປຊ຺ຊມານາ ເຕເນວ ປຸຣິມທິຏ຺ຐິໍ ທຬ຺ຫໍ ກໂຣນ຺ຕີ ຕໍ ອຸປາທິຍຕີຕິ ວຸຕ຺ຕາ. ອຖ ວາ ປຸຣິມທິຏ຺ຐິໍ ອຸຕ຺ຕຣທິຏ຺ຐິ ອຸປາທິຍຕີຕິ ‘‘ສສ຺ສໂຕ ອຕ຺ຕາ’’ຕິ (ທີ. ນິ. ໑.໓໑) ອິທໍ ປຸຣິມທິຏ຺ຐິໍ ອຸປາທິຍມານໍ ອຸຕ຺ຕຣທິຏ຺ຐິໍ ນິທສ຺ເສຕຸໍ ວຸຕ຺ຕໍ. ຍຖາ ຫິ ເອສາ ທຬ຺ຫີກຣຓວເສນ ປຸຣິມໍ ອຸຕ຺ຕຣາ ອຸປາທິຍຕິ, ເອວໍ ‘‘ນຕ຺ຖິ ທິນ຺ນ’’ນ຺ຕິອາທິກາປີຕິ (ມ. ນິ. ໑.໔໔໕; ໒.໙໔; ໓.໙໑, ໑໑໖, ໑໓໖; ຘ. ສ. ໑໒໒໑; ວິຠ. ໙໓໘). ອຕ຺ຕຄ຺ຄຫຓໍ ປນ ອຕ຺ຕວາທຸປາທານນ຺ຕິ ນ ອິທໍ ທິຏ຺ຐຸປາທານທສ຺ສນນ຺ຕິ ທຏ຺ຐພ຺ພໍ. ໂລໂກ ຈາຕິ ວາ ອຕ຺ຕຄ຺ຄຫຓວິນິມຸຕ຺ຕໍ ຄຫຓໍ ທິຏ຺ຐຸປາທານຠູຕໍ ອິຘ ປຸຣິມທິຏ຺ຐິອຸຕ຺ຕຣທິຏ຺ຐິວຈເນຫິ ວຸຕ຺ຕນ຺ຕິ ເວທິຕພ຺ພໍ.
ສີລພ຺ພຕໍ ອຸປາທິຍຕີຕິ ເອຕ຺ຖ ອສຸທ຺ຘິມຄ຺ຄໂຄສີລາທິສມາທານວເສນ ສີລໍ, ອວີຕິກ຺ກມນວເສນ ວຕໍ. ອຸຠຍຖາປິ ວາ ສີລໍ, ຕໂປກມ຺ມຠາເວນ ຄຫິຕຕາຍ ວຕໍ, ຄວາທິປກຕິຠາວນາ. ອຕ຺ຕໂນ ວາ ຄວາທິຠາວາຘິຏ຺ຐານໍ ສີລໍ, ‘‘ຄຈ຺ຉນ຺ໂຕ ຠກ຺ເຂຕິ, ຕິຏ຺ຐນ຺ໂຕ ມຸຕ຺ເຕຕີ’’ຕິອາທິນາ ຄວາທິກິຣິຍາກຣຓໍ ວຕໍ. ຕໍຕໍອກິຈ຺ຈສມ຺ມຕໂຕ ວາ ນິວຕ຺ຕິ ສີລໍ, ຕໍສມາທານວໂຕເວສ ໂຠຊນກິຈ຺ຈກຣຓາທິວິເສສປຏິປຕ຺ຕິ ວຕໍ, ຕໍ ສີລພ຺ພຕໍ ອສຸທ຺ຘິມຄ຺ຄໍ ‘‘ສຸທ຺ຘິມຄ຺ໂຄ’’ຕິ ປຣາມສນ຺ໂຕ ຕຖາ ອຠິນິວິສນ຺ໂຕ ອຸປາທິຍຕິ, ຕໍ ຄາຫໍ ທຬ຺ຫໍ ຄຓ຺ຫາຕີຕິ ອຕ຺ໂຖ. ສີລພ຺ພຕສຫຈຣິຕໍ ປຣາມາສໍ ສີລພ຺ພຕນ຺ຕິ ຄເຫຕ຺ວາ ອາຫ ‘‘ສີລພ຺ພຕຎ຺ຈ ຕໍ ອຸປາທານຎ຺ຈາ’’ຕິ. ໂຄສີລໂຄວຕາທີນີຕິ ຈ ຕຖາຠູຕໍ ທິຏ຺ຐິໍ ວທຕິ. ເຕເນວາຫ ‘‘ສຍເມວ ອຸປາທານານີ’’ຕິ. ອຠິນິເວສໂຕຕິ ອຠິນິເວສຠາວໂຕ, ອຠິນິວິສນໂຕ ວາ. ອຕ຺ຕວາທຸປາທານນ຺ຕິ ‘‘ອຕ຺ຕາ’’ຕິ ວາທສ຺ສ ປຎ຺ຎາປນສ຺ສ, ຄຫຓສ຺ສ ຈ ກາຣຓຠູຕາ ທິຏ຺ຐີຕິ ອຕ຺ໂຖ. ອຕ຺ຕວາທມຕ຺ຕເມວາຕິ ອຕ຺ຕສ຺ສ ອຠາວາ ‘‘ອຕ຺ຕາ’’ຕິ ອິທໍ ວຈນມຕ຺ຕເມວ. ອຸປາທິຍນ຺ຕີຕິ ທຬ຺ຫໍ ຄຓ຺ຫນ຺ຕິ. ກຖໍ? ‘‘ອຕ຺ຕາ’’ຕິ. ‘‘ອຕ຺ຕາ’’ຕິ ຫິ ອຠິນິວິສນ຺ຕາ ວຈນມຕ຺ຕເມວ ທຬ຺ຫໍ ກຕ຺ວາ ຄຓ຺ຫນ຺ຕີຕິ ອຕ຺ໂຖຕິ. ເອວໍ ‘‘ອຕ຺ຕວາທມຕ຺ຕເມວ ອຸປາທິຍນ຺ຕີ’’ຕິ ວຸຕ຺ຕໍ. ອຕ຺ຕວາທມຕ຺ຕນ຺ຕິ ວາ ວາຈາວຕ຺ຖຸມຕ຺ຕເມວາຫ. ວາຈາວຕ຺ຖຸມຕ຺ຕເມວ ຫິ ‘‘ອຕ຺ຕາ’’ຕິ ອຸປາທິຍນ຺ຕິ ອຕ຺ຕສ຺ສ ອຠາວາຕິ.
‘‘ຘມ຺ມສງ຺ເຂປວິຕ຺ຖາເຣ ປນ ກາມຸປາທານໍ ສງ຺ເຂປໂຕ ຕຓ຺ຫາທຬ຺ຫຕ຺ຕໍ, ເສສຸປາທານຕ຺ຕຍໍ ທິຏ຺ຐິມຕ຺ຕເມວ, ວິຕ຺ຖາຣໂຕ ປນາ’’ຕິ ເອວໍ ຘມ຺ມສງ຺ເຂປວິຕ຺ຖາຣສມຸທາຍໂຕ ຕທວຍວຠູຕໍ ສງ຺ເຂປໍ, ວິຕ຺ຖາຣຎ຺ຈ ນິທ຺ຘາເຣຕີຕິ. ຘມ຺ມສງ຺ເຂປວິຕ຺ຖາເຣຕິ ນິທ຺ຘາຣເຓ ຠຸມ຺ມໍ ທຏ຺ຐພ຺ພໍ. ກາເມສູຕິ ປຎ຺ຈສຸ ກາມຄຸເຓສຸ. ກາມຈ຺ຉນ຺ໂທຕິ ກາມສງ຺ຂາໂຕ ຉນ຺ໂທ, ນ ກຕ຺ຕຸກມ຺ຍຕາຉນ຺ໂທ, ນ ຈ ຘມ຺ມຈ຺ຉນ຺ໂທ. ກາມນວເສນ, ຣຎ຺ຊນວເສນ ຈ ກາໂມເຍວ ຣາໂຄ ກາມຣາໂຄ, ເອວໍ ສພ຺ພຕ຺ຖ ກາມຕ຺ຖໍ ວິທິຕ຺ວາ ກາໂມ ເອວ ນນ຺ທນຏ຺ເຐນ ກາມນນ຺ທີ, ຕຓ຺ຫາຍນຏ຺ເຐນ ກາໂມເຍວ ກາມຕຓ຺ຫາ, ສິເນຫນຏ຺ເຐນ ກາໂມ ເອວ ກາມສ຺ເນໂຫ, ປຣິທຍ຺ຫນຏ຺ເຐນ ກາມປຣິຬາໂຫ, ມຸຈ຺ຉນຏ຺ເຐນ ກາມມຸຈ຺ຉາ, ຄິລິຕ຺ວາ ປຣິນິຏ຺ຐາປນຏ຺ເຐນ ກາມຊ຺ໂຌສານໍ ເວທິຕພ຺ພໍ. ອປ຺ປຕ຺ຕວິສຍປຕ຺ຖນາ ຕຓ຺ຫາ ອາຣມ຺ມເຓ ປຣິຕສ຺ສນຠາວໂຕ, ສມ຺ປຕ຺ຕວິສຍຄ຺ຄຫຓໍ ອຸປາທານໍ ອາຣມ຺ມເຓ ທຬ຺ຫຄ຺ຄາຫຠາວໂຕ. ອປ຺ປິຈ຺ຉຕາປຏິປກ຺ຂາ ຕຓ຺ຫາ ວິສຍາຠິມຸຂຠາວໂຕ, ສນ຺ຕຸຏ຺ຐິປຏິປກ຺ຂາ ອຸປາທານໍ ຕຓ຺ຫາທຬ຺ຫຕ຺ຕໍ ຫຸຕ຺ວາ ອຕ຺ຣິຈ຺ຉຕາຠາວໂຕ. ປຣິເຍສນທຸກ຺ຂມູລາ ຕຓ຺ຫາ ອປ຺ປຕ຺ຕວິສຍປຕ຺ຖນາຠາວໂຕ, ອາຣກ຺ຂທຸກ຺ຂມູລໍ ອຸປາທານໍ ສມ຺ປຕ຺ຕວິສຍຄ຺ຄຫຓຠາວໂຕ.
ນຕ຺ຖິ ທິນ຺ນນ຺ຕິອາທີສຸ ທິນ຺ນນ຺ຕິ ທານມາຫ, ຕໍ ອຜລຕ຺ຕາ ຣູປໍ ວິຍ ທານໍ ນາມ ນ ໂຫຕີຕິ ປຏິກ຺ຂິປຕິ. ຍິຏ຺ຐໍ ວຸຈ຺ຈຕິ ມຫາວິຊິຕຍຎ຺ຎສທິໂສ ມຫາຍາໂຄ. ຫຸຕນ຺ຕິ ອາຫຸນປາຫຸນມງ຺ຄລກິຣິຍາ. ຕຕ຺ຖ ອາມນ຺ເຕຕ຺ວາ ຫວນໍ ທານໍ ອາຫຸນໍ, ປາຫຸນານໍ ອຕິຖີນໍ ອຕິຖິກິຣິຍາ ປາຫຸນໍ, ອາວາຫາທີສຸ ມງ຺ຄລຕ຺ຖໍ ທານໍ ມງ຺ຄລກິຣິຍາ, ທສ ກຸສລກມ຺ມປຖາ ສຸກຕກມ຺ມານິ ນາມ, ທສ ອກຸສລກມ຺ມປຖາ ທຸກ຺ກຏກມ຺ມານິ ນາມ, ຜລໍ ວິປາໂກຕິ ນິສ຺ສນ຺ທາທິຜລຎ຺ເຈວ ນິປ຺ປຣິຍາຍວິປາໂກ ຈ ນຕ຺ຖີຕິ ໂຍຊນາ. ຍຖາ ເຈຕ຺ຖ, ເອວໍ ‘‘ນຕ຺ຖິ ທິນ຺ນ’’ນ຺ຕິອາທີສຸປິ ຜລວິປາກປຏິກ຺ເຂໂປວ ທຏ຺ຐພ຺ໂພ. ນຕ຺ຖິ ອຍໍ ໂລໂກຕິ ປຣໂລເກ ຐິໂຕ ອິມໍ ໂລກໍ ‘‘ນຕ຺ຖີ’’ຕິ ຄຓ຺ຫາຕິ. ອິມໍ ຫິ ໂລກໍ ອເວກ຺ຂິຕ຺ວາ ປຣໂລໂກ, ປຣຎ຺ຈ ໂລກໍ ອເວກ຺ຂິຕ຺ວາ ອຍໍ ໂລໂກ ໂຫຕິ ຄນ຺ຕພ຺ພໂຕ, ອາຄນ຺ຕພ຺ພໂຕ ຈາຕິ ປຣໂລກໂຕ ອິຘາຄມນສ຺ສ ອຠາວາ ຕຕ຺ເຖວ ອຸຈ຺ຉິຊ຺ຊນໂຕ ຈິຕ຺ເຕນ ປຣໂລເກ ຐິໂຕ ອິມໍ ໂລກໍ ‘‘ນຕ຺ຖີ’’ຕິ ຄຓ຺ຫາຕີຕິ ອຕ຺ໂຖ. ນ ຫິ ອຍໍ ທິຏ຺ຐິ ປຣໂລເກ ຐິຕສ຺ເສວ ໂຫຕີຕິ. ນຕ຺ຖິ ປຣໂລໂກຕິ ອິຘໂລເກ ຐິໂຕ ປຣໂລກໍ ‘‘ນຕ຺ຖີ’’ຕິ ຄຓ຺ຫາຕິ. ອິຘາປິ ວຸຕ຺ຕນເຍເນວ ອຕ຺ໂຖ ເວທິຕພ຺ໂພ. ອຍໍ ວາ ເອຕ຺ຖ ອຕ຺ໂຖ – ສໍສຣຓປ຺ປເທໂສ ອິຘໂລໂກ, ປຣໂລໂກ ຈ ນາມ ໂກຈິ ນຕ຺ຖິ ສໍສຣຓສ຺ສ ອຠາວາ ຕຕ຺ຖ ຕຕ຺ເຖວ ອຸຈ຺ຉິຊ຺ຊນໂຕຕິ.
ປຸຣິມຠວໂຕ ປຈ຺ຉິມຠເວ ອຸປປຕນໍ ອຸປປາໂຕ, ໂສ ເຍສໍ ສີລໍ, ເຕ ໂອປປາຕິກາ. ເຕ ປນ ຈວນກອຸປປຊ຺ຊນກສຕ຺ຕາ ນຕ຺ຖີຕິ ທສ຺ເສນ຺ໂຕ ອາຫ ‘‘ນຕ຺ຖິ ສຕ຺ຕາ ໂອປປາຕິກາ’’ຕິ. ນຕ຺ຖິ ໂລເກ ສມຓ…ເປ… ປເວເທນ຺ຕີຕິ ອນຸໂລມປຏິປທໍ ປຏິປນ຺ນຕ຺ຕາ ສມ຺ມຄ຺ຄຕາ ສມ຺ມາປຏິປນ຺ນາ ຘມ຺ມິກສມຓພ຺ຣາຫ຺ມຓາ ໂລກສ຺ມິໍ ນຕ຺ຖິ, ເຍ ອິມຎ຺ຈ ໂລກໍ, ປຣຎ຺ຈ ໂລກໍ ອຕ຺ຕນາ ເອວ ອຠິວິສິຏ຺ເຐນ ຎາເຓນ ປຈ຺ຈກ຺ຂໂຕ ຎຕ຺ວາ ປເວທນສມຕ຺ຖາ ສພ຺ພຎ຺ຎຸພຸທ຺ຘາ ນາມ ນຕ຺ຖີຕິ ທສ຺ເສຕິ. ຣູປໍ ອຕ຺ຕໂຕ ສມນຸປສ຺ສຕີຕິອາທີສຸ ວຕ຺ຕພ຺ພໍ ເຫຏ຺ຐາ ວຸຕ຺ຕເມວ.
ປກຕິອຓຸອາທີນໍ ສສ຺ສຕຄ຺ຄາຫປຸພ຺ພງ຺ຄໂມ, ສຣີຣສ຺ສ ອຸຈ຺ເຉທຄ຺ຄາຫປຸພ຺ພງ຺ຄໂມ ຈ ເຕສໍ ຄາຫານໍ ສາມິຠູໂຕ ໂກຈິ ສສ຺ສໂຕ, ອຸຈ຺ຉິຊ຺ຊມາໂນ ວາ ອຕ຺ຕາ ອຕ຺ຖີຕິ ອຕ຺ຕຄ຺ຄາໂຫ ກທາຈິ ໂຫຕີຕິ ‘‘ເຍຠຸຍ຺ເຍນາ’’ຕິ ວຸຕ຺ຕໍ. ສ຺ວາຍໍ ອຕ຺ຕຄ຺ຄາໂຫ ອຕ຺ຖໂຕ ຂນ຺ຘາຣມ຺ມໂຓ ເອວ ທຏ຺ຐພ຺ໂພ. ເຍຠຸຍ຺ເຍນ ປຐມໍ ອຕ຺ຕວາທຸປາທານນ຺ຕິອາທິນາວ ສມ຺ພນ຺ໂຘ. ຍທິປິ ຠວຣາຄຊວນວີຖິ ປຐມໍ ປວຕ຺ຕຕິ ຄຫິຕປຏິສນ຺ຘິກສ຺ສ ຠວນິກນ຺ຕິຍາ ປວຕ຺ຕິຕພ຺ພຕ຺ຕາ, ໂສ ປນ ຠວຣາໂຄ ຕຓ຺ຫາທຬ຺ຫຕ຺ຕໍ ນ ໂຫຕີຕິ ມຎ຺ຎມາໂນ ນ ກາມຸປາທານສ຺ສ ປຐມຸປ຺ປຕ຺ຕິມາຫ.
ຕຓ຺ຫາ ກາມຸປາທານນ຺ຕິ ປນ ວິຠາຄສ຺ສ ອກຣເຓ ສພ຺ພາປິ ຕຓ຺ຫາ ກາມຸປາທານໍ, ກຣເຓປິ ວາ ກາມຣາຄໂຕ ອຎ຺ຎາປິ ຕຓ຺ຫາ ທຬ຺ຫຠາວໍ ປຕ຺ຕາ ກາມຸປາທານນ຺ຕິ ຕສ຺ສ ອຣຫຕ຺ຕມຄ຺ຄວຊ຺ຌຕາ ວຸຕ຺ຕາ.
ອຸປ຺ປຕ຺ຕິຏ຺ຐານຠູຕາ ຈິຕ຺ຕຸປ຺ປາທາ ວິສໂຍ. ປຎ຺ຈຸປາທານກ຺ຂນ຺ຘາ ອາລໂຍ. ຕຕ຺ຖ ຣມຕີຕິ ອາລຍຣາມາ, ປຊາ. ເຕເນວ ສາ ອາລຍຣາມຕາ ສສນ຺ຕາເນ, ປຣສນ຺ຕາເນ ຈ ປາກຏາ ໂຫຕິ. ກາມານນ຺ຕິ ວຕ຺ຖຸກາມານໍ. ‘‘ສຸຂທຸກ຺ຂໍ ກມ຺ມຸນາ ໂຫຕີ’’ຕິ ອຄ຺ຄເຫຕ຺ວາ ໂກຕູຫລມງ຺ຄລາທິພຫຸໂລ ໂຫຕິ. ສາ ໂກຕູຫລມງ຺ຄລາທິພຫຸລຕາ. ອສ຺ສ ກາມຸປາທານວໂຕ. ຕນ຺ຕິ ທິຏ຺ຐຸປາທານໍ, ອນຕ຺ຕນິ ຘມ຺ມມຕ຺ເຕ ‘‘ອຕ຺ຕາ’’ຕິ ມິຈ຺ຉາຠິນິເວສສ຺ສ ສຸຂຸມຕຣຘມ຺ມຸປາທານຕາຍ ສຸຂຸມຕາ ວຸຕ຺ຕາ. ອຸປນິສ຺ສຍວຈເນນ ອາຣມ຺ມຓານນ຺ຕຣປກຕູປນິສ຺ສຍາ ວຸຕ຺ຕາຕິ ອນນ຺ຕຣປຈ຺ຈຍາທີນມ຺ປິ ສງ຺ຄໂຫ ກໂຕ ໂຫຕິ.