ສມາຘິອານິສໍສກຖາວຓ຺ຓນາ

໓໖໒. ທິຏ຺ຐຘມ຺ໂມ ວຸຈ຺ຈຕິ ປຈ຺ຈກ຺ຂຠູໂຕ ອຕ຺ຕຠາໂວ, ຕຕ຺ຖ ສຸຂວິຫາໂຣ ທິຏ຺ຐຘມ຺ມສຸຂວິຫາໂຣ. ກາມໍ ‘‘ສມາປຊ຺ຊິຕ຺ວາ’’ຕິ ເອເຕນ ອປ຺ປນາສມາຘິເຍວ ວິຠາວິໂຕ, ‘‘ເອກຄ຺ຄຈິຕ຺ຕາ’’ຕິ ປນ ປເທນ ອຸປຈາຣສມາຘິໂນປິ ຄຫຓໍ ໂຫຕີຕິ ຕໂຕ ນິວຕ຺ຕນຕ຺ຖໍ ‘‘ອປ຺ປນາສມາຘິຠາວນາ’’ຕິ ວຸຕ຺ຕໍ. ນ ໂຂ ປເນເຕຕິ ເອເຕ ພາຫິຣກຠາວິຕາ ຌານຘມ຺ມາ ຈິຕ຺ເຕກຄ຺ຄຕາມຕ຺ຕກຣາ. ອຣິຍສ຺ສ ວິນເຍ ພຸທ຺ຘສ຺ສ ຠຄວໂຕ ສາສເນ ‘‘ສລ຺ເລຂາ’’ຕິ ນ ວຸຈ຺ຈນ຺ຕິ ກິເລສານໍ ສລ຺ເລຂນປຏິປທາ ນ ໂຫຕີຕິ ກຕ຺ວາ, ສາສເນ ປນ ອວິຫິໍສາທໂຍປິ ສລ຺ເລຂາວ ໂລກຸຕ຺ຕຣປາທກຕ຺ຕາ.

ສມ຺ພາເຘຕິ ຕຓ຺ຫາສໍກິເລສາທິນາ ສໍກິລິຏ຺ຐຕາຍ ປຣມສມ຺ພາເຘ ອຕິວິຍ ສງ຺ກຏຏ຺ຐານຠູເຕ ສໍສາຣປ຺ປວຕ຺ເຕ. ໂອກາສາຘິຄມນເຍນາຕິ ອຕ຺ຖປຏິລາຠໂຍຄ຺ຄສ຺ສ ນວມຂຓສງ຺ຂາຕສ຺ສ ໂອກາສສ຺ສ ອຘິຄມນເຍນ. ຕສ຺ສ ຫິ ທຸລ຺ລຠຕາຍ ອປ຺ປນາຘິຄມມ຺ປິ ອນຘິຄມຍມາໂນ ສໍເວຄພຫຸໂລ ປຸຄ຺ຄໂລ ອຸປຈາຣສມາຘິມ຺ຫິເຍວ ຐຕ຺ວາ ວິປສ຺ສນາຍ ກມ຺ມໍ ກໂຣຕິ ‘‘ສີຆໍ ສໍສາຣທຸກ຺ຂໍ ສມຕິກ຺ກມິສ຺ສາມີ’’ຕິ.

ອຠິຎ຺ຎາປາທກນ຺ຕິ ອິທ຺ຘິວິຘາທິອຠິຎ຺ຎາຎາຓປາທກຠູຕໍ ອຘິຏ຺ຐານຠູຕໍ. ໂຫຕີຕິ ວຸຕ຺ຕນຍາຕິ ເອຕ຺ຖ ອິຕິ-ສທ຺ໂທ ປກາຣຕ຺ໂຖ, ເຕນ ‘‘ອິມິນາ ປກາເຣນ ວຸຕ຺ຕນຍາ’’ຕິ ເສສາຠິຎ຺ຎານມ຺ປິ ວຸຕ຺ຕປ຺ປກາຣໍ ສງ຺ຄຓ຺ຫາຕິ. ສຕິ ສຕິ ອາຍຕເນຕິ ປຸຣິມຠວສິທ຺ເຘ ອຠິຎ຺ຎາຘິຄມສ຺ສ ກາຣເຓ ວິຊ຺ຊມາເນ. ອຠິຎ຺ຎາຘິຄມສ຺ສ ຫິ ອຘິກາໂຣ ອິຈ຺ຉິຕພ຺ໂພ, ໂຍ ‘‘ປຸພ຺ພເຫຕູ’’ຕິ ວຸຈ຺ຈຕິ. ນ ສມາປຕ຺ຕີສຸ ວສີຠາໂວ. ເຕນາຫ ຠຄວາ ‘‘ສຕິ ສຕິ ອາຍຕເນ’’ຕິ (ມ. ນິ. ໓.໑໕໘; ອ. ນິ. ໓.໑໐໒). ອຠິຎ຺ຎາສຈ຺ຉິກຣຓີຍສ຺ສາຕິ ວກ຺ຂມານວິຠາຄາຍ ອຠິວິສິຏ຺ຐາຍ ປຎ຺ຎາຍ ສຈ຺ຉິກາຕພ຺ພສ຺ສ. ຘມ຺ມສ຺ສາຕິ ຠາເວຕພ຺ພສ຺ສ ເຈວ ວິຠາເວຕພ຺ພສ຺ສ ຈ ຘມ຺ມສ຺ສ. ອຠິຎ຺ຎາສຈ຺ຉິກິຣິຍາຍ ຈິຕ຺ຕໍ ອຠິນິນ຺ນາເມຕີຕິ ໂຍຊນາ. ຕຕ຺ຣ ຕຕ຺ເຣວາຕິ ຕສ຺ມິໍ ຕສ຺ມິໍເຍວ ສຈ຺ຉິກາຕພ຺ພຘມ຺ເມ. ສກ຺ຂິຠາວາຍ ປຈ຺ຈກ຺ຂກາຣິຕາຍ ຠພ຺ໂພ ສກ຺ຂິຠພ຺ໂພ, ຕສ຺ສ ຠາໂວ ສກ຺ຂິຠພ຺ພຕາ, ຕໍ ສກ຺ຂິຠພ຺ພຕໍ.

ຕໍ ຕໍ ຠວຄມິກມ຺ມໍ ອາຣພ຺ຠ ຠວປຕ຺ຖນາຍ ອນຸປ຺ປນ຺ນາຍປິ ກມ຺ມສ຺ສ ກຕູປຈິຕຠາເວເນວ ຠວປຕ຺ຖນາກິຈ຺ຈໍ ສິຊ຺ຌຕີຕິ ທສ຺ເສນ຺ໂຕ ອາຫ ‘‘ອປຕ຺ຖຍມານາ ວາ’’ຕິ. ສຫ ພ຺ເຍຕິ ປວຕ຺ຕຕີຕິ ສຫພ຺ໂຍ, ສຫາໂຍ, ອິຘ ປນ ເອກຠວູປໂຄ ອຘິປ຺ເປໂຕ, ຕສ຺ສ ຠາໂວ ສຫພ຺ຍຕາ, ຕໍ ສຫພ຺ຍຕໍ.

ກິໍ ປນ ອປ຺ປນາສມາຘິຠາວນາເຍວ ຠວວິເສສານິສໍສາ, ອຸທາຫຸ ອິຕຣາປີຕິ ໂຈທນໍ ມນສິ ກຕ຺ວາ ອາຫ ‘‘ອຸປຈາຣສມາຘິຠາວນາປີ’’ຕິອາທິ.

ນິພ຺ພານນ຺ຕິ ຕິສ຺ສນ຺ນໍ ທຸກ຺ຂຕານໍ ນິພ຺ພຸຕິໍ. ຣູປຘມ຺ເມ ປຣິຍາປນ຺ນາ ວິຊ຺ຊມານາປິ ສງ຺ຂາຣທຸກ຺ຂຕາ ຈິຕ຺ຕສ຺ສ ອຠາເວນ ອສນ຺ຕສມາວ. ເຕນາຫ ‘‘ສຸຂໍ ວິຫຣິສ຺ສາມາ’’ຕິ. ໂສຬສຫິ ຎາຓຈຣິຍາຫີຕິ ອນິຈ຺ຈານຸປສ຺ສນາທຸກ຺ຂອນຕ຺ຕນິພ຺ພິທາວິຣາຄນິໂຣຘປຏິນິສ຺ສຄ຺ຄວິວຏ຺ຏານຸປສ຺ສນາຕິ ອິມາຫິ ອຏ຺ຐຫິ, ອຏ຺ຐຫິ ຈ ອຣິຍມຄ຺ຄຜລຎາເຓຫີຕິ ເອວໍ ໂສຬສຫິ. ນວຫິ ສມາຘິຈຣິຍາຫີຕິ ປຎ຺ຈນ຺ນໍ ຣູປຊ຺ຌານານໍ, ຈຕຸນ຺ນໍ ອຣູປຊ຺ຌານານຎ຺ຈ ວເສນ ເອວໍ ນວຫິ. ເກຈິ ປນ ‘‘ຈຕ຺ຕາໂຣ ຣູປຊ຺ຌານສມາຘີ, ຈຕ຺ຕາໂຣ ອຣູປຊ຺ຌານສມາຘີ, ອຸຠເຍສໍ ອຸປຈາຣສມາຘິໍ ເອກໍ ກຕ຺ວາ ເອວໍ ນວາ’’ຕິ ວທນ຺ຕິ.

ສມາຘິຠາວນາໂຍເຄຕິ ສມາຘິຠາວນາຍ ອນຸໂຍເຄ ອນຸຍຸຎ຺ຊເນ, ສມາຘິຠາວນາສງ຺ຂາເຕ ວາ ໂຍເຄ. ໂຍໂຄຕິ ຠາວນາ ວຸຈ຺ຈຕິ. ຍຖາຫ ‘‘ໂຍຄາ ເວ ຊາຍຕີ ຠູຣີ’’ຕິ (ຘ. ປ. ໒໘໒).

໓໖໓. ສມາຘິປີຕິ ປິ-ສທ຺ເທນ ສີລໍ ສມ຺ປິຓ຺ເຑຕິ.

ສມາຘິນິທ຺ເທສວຓ຺ຓນາ ນິຏ຺ຐິຕາ.

ອິຕິ ເອກາທສມປຣິຈ຺ເຉທວຓ຺ຓນາ.

ປຐໂມ ຠາໂຄ ນິຏ຺ຐິໂຕ.