ສີລສໍກິເລສໂວທານວຓ຺ຓນາ

໒໑. ສໍກິລິສ຺ສຕິ ເຕນາຕິ ສໍກິເລໂສ. ໂກ ປນ ໂສຕິ ອາຫ ‘‘ຂຓ຺ຑາທິຠາໂວ ສີລສ຺ສ ສໍກິເລໂສ’’ຕິ. ໂວທາຍຕິ ວິສຸຊ຺ຌຕິ ເອເຕນາຕິ ໂວທານໍ, ອຂຓ຺ຑາທິຠາໂວ. ລາຠຍສາທີຕິ ອາທິ-ສທ຺ເທນ ຎາຕິອງ຺ຄຊີວິຕາທີນໍ ສງ຺ຄໂຫ. ສຕ຺ຕສຸ ອາປຕ຺ຕິກ຺ຂນ຺ເຘສຸ ອາທິມ຺ຫິ ວາ ອນ຺ເຕ ວາ ເວມຊ຺ເຌຕິ ຈ ອິທໍ ເຕສໍ ອຸທ຺ເທສາທິປາຬິວເສນ ວຸຕ຺ຕໍ. ນ ຫິ ອຎ຺ໂຎ ໂກຈິ ອາປຕ຺ຕິກ຺ຂນ຺ຘານໍ ອນຸກ຺ກໂມ ອຕ຺ຖິ. ຂຓ຺ຑນ຺ຕິ ຂຓ຺ຑວນ຺ຕໍ, ຂຓ຺ຑິຕໍ ວາ. ຉິທ຺ທນ຺ຕິ ເອຕ຺ຖາປິ ເອເສວ ນໂຍ. ປຣິຍນ຺ເຕ ຉິນ຺ນສາຏໂກ ວິຍາຕິ ວຕ຺ຖນ຺ເຕ, ທສນ຺ເຕ ວາ ຉິນ຺ນວຕ຺ຖໍ ວິຍ.

ເອວນ຺ຕິ ອິທານິ ວຸຈ຺ຈມານາກາເຣນ. ເມຖຸນສໍໂຍຄວເສນາຕິ ຣາຄປຣິຍຸຏ຺ຐາເນນ ສທິສຠາວາປຕ຺ຕິຍາ ມິຖຸນານໍ ອິທນ຺ຕິ ເມຖຸນໍ, ນິພນ຺ຘນໍ. ເມຖຸນວເສນ ສມາໂຍໂຄ ເມຖຸນສໍໂຍໂຄ. ອິຘ ປນ ເມຖຸນສໍໂຍໂຄ ວິຍາຕິ ເມຖຸນສໍໂຍໂຄ, ຕສ຺ສ ວເສນ. ອິຘາຕິ ອິມສ຺ມິໍ ໂລເກ. ເອກຈ຺ໂຈຕິ ເອໂກ. ສມໂຓ ວາ ພ຺ຣາຫ຺ມໂຓ ວາຕິ ປພ຺ພຊ຺ຊາມຕ຺ເຕນ ສມໂຓ ວາ ຊາຕິມຕ຺ເຕນ ພ຺ຣາຫ຺ມໂຓ ວາ. ທ຺ວຍໍທ຺ວຍສມາປຕ຺ຕິນ຺ຕິ ທ຺ວີຫິ ທ຺ວີຫິ ສມາປຊ຺ຊິຕພ຺ພໍ, ເມຖຸນນ຺ຕິ ອຕ຺ໂຖ. ນ ເຫວ ໂຂ ສມາປຊ຺ຊຕີຕິ ສມ຺ພນ຺ໂຘ. ອຸຈ຺ຉາທນໍ ອຸພ຺ພຕ຺ຕນໍ. ສມ຺ພາຫນໍ ປຣິມທ຺ທນໍ. ສາທິຍຕີຕິ ອຘິວາເສຕິ. ຕທສ຺ສາເທຕີຕິ ຕໍ ອຸຈ຺ຉາທນາທິໍ ອຠິຣມຕິ. ນິກາເມຕີຕິ ອິຈ຺ຉຕິ. ວິຕ຺ຕິນ຺ຕິ ຕຸຏ຺ຐິໍ. ອິທມ຺ປິ ໂຂຕິ ເອຕ຺ຖ ອິທນ຺ຕິ ຍຖາວຸຕ຺ຕໍ ສາທິຍນາທິໍ ຂຓ຺ຑຠາວາທິວເສນ ເອກໍ ກຕ຺ວາ ວຸຕ຺ຕໍ. ປິ-ສທ຺ໂທ ວກ຺ຂມານໍ ອຸປາທາຍ ສມຸຈ຺ຈຍຕ຺ໂຖ. ໂຂ-ສທ຺ໂທ ອວຘາຣຓຕ຺ໂຖ. ອິທໍ ວຸຕ຺ຕໍ ໂຫຕິ – ຍເທຕໍ ພ຺ຣຫ຺ມຈາຣີປຏິຎ຺ຎສ຺ສ ອສຕິປິ ທ຺ວຍໍທ຺ວຍສມາປຕ຺ຕິຍໍ ມາຕຸຄາມສ຺ສ ອຸຈ຺ຉາທນນ຺ຫາປນສມ຺ພາຫນສາທິຍນາທິ, ອິທມ຺ປິ ເອກໍເສນ ຕສ຺ສ ພ຺ຣຫ຺ມຈຣິຍສ຺ສ ຂຓ຺ຑາທິຠາວາປາທນໂຕ ຂຓ຺ຑມ຺ປິ ຉິທ຺ທມ຺ປິ ສພລມ຺ປິ ກມ຺ມາສມ຺ປີຕິ. ເອວໍ ປນ ຂຓ຺ຑາທິຠາວາປຕ຺ຕິຍາ ໂສ ອປຣິສຸທ຺ຘໍ ພ຺ຣຫ຺ມຈຣິຍໍ ຈຣຕິ, ນ ປຣິສຸທ຺ຘໍ, ສໍຍຸຕ຺ໂຕ ເມຖຸນສໍໂຍເຄນ, ນ ວິສໍຍຸຕ຺ໂຕ. ຕໂຕ ຈສ຺ສ ນ ຊາຕິອາທີຫິ ປຣິມຸຕ຺ຕີຕິ ທສ຺ເສນ຺ໂຕ ‘‘ອຍໍ ວຸຈ຺ຈຕີ’’ຕິອາທິມາຫ.

ສຎ຺ຊຄ຺ຆຕີຕິ ກິເລສວເສນ ມຫາຫສິຕໍ ຫສຕິ. ສໍກີຬຕີຕິ ກາຍສໍສຄ຺ຄວເສນ ກີຬຕິ. ສໍເກລາຍຕີຕິ ສພ຺ພໂສ ມາຕຸຄາມໍ ເກລາຍນ຺ໂຕ ວິຫຣຕິ. ຈກ຺ຂຸນາຕິ ອຕ຺ຕໂນ ຈກ຺ຂຸນາ. ຈກ຺ຂຸນ຺ຕິ ມາຕຸຄາມສ຺ສ ຈກ຺ຂຸໍ. ອຸປນິຊ຺ຌາຍຕີຕິ ອຸເປຈ຺ຈ ນິຊ຺ຌາຍຕິ ໂອໂລເກຕິ. ຕິໂຣກຸຏ຺ຏາຕິ ກຸຏ຺ຏສ຺ສ ປຣໂຕ. ຕຖາ ຕິໂຣປາກາຣາ. ມຕ຺ຕິກາມຍາ ຠິຕ຺ຕິ ກຸຏ຺ຏໍ, ອິຏ຺ຐກາມຍາ ປາກາໂຣຕິ ວທນ຺ຕິ. ຍາ ກາຈິ ວາ ຠິຕ຺ຕິ ໂປຣິສໂຕ ທິຍຑ຺ຒຣຕນຸຈ຺ຈປ຺ປມາຓາ ກຸຏ຺ຏໍ, ກຸຏ຺ຏໂຕ ອຘິໂກ ປາກາໂຣ.

ອສ຺ສາຕິ ພ຺ຣຫ຺ມຈາຣີປຏິຎ຺ຎສ຺ສ. ປຸພ຺ເພຕິ ວຕສມາທານໂຕ ປຸພ຺ເພ. ກາມຄຸເຓຫີຕິ ກາມໂກຏ຺ຐາເສຫິ. ສມປ຺ປິຕນ຺ຕິ ສຸຏ຺ຐຸ ອປ຺ປິຕໍ ສຫິຕໍ. ສມງ຺ຄີຠູຕນ຺ຕິ ສມນ຺ນາຄຕໍ. ປຣິຈາຣຍມານນ຺ຕິ ກີຬນ຺ຕໍ, ອຸປຏ຺ຐຫິຍມານໍ ວາ. ປຓິຘາຍາຕິ ປຕ຺ເຖຕ຺ວາ. ສີເລນາຕິອາທີສຸ ຍມນິຍມາທິສມາທານວເສນ ສີລໍ. ອວີຕິກ຺ກມວເສນ ວຕໍ. ອຸຠຍມ຺ປິ ສີລໍ. ທຸກ຺ກຣຈຣິຍວເສນ ປວຕ຺ຕິຕໍ ວຕໍ. ຕໍຕໍອກິຈ຺ຈສມ຺ມຕໂຕ ວາ ນິວຕ຺ຕິລກ຺ຂຓໍ ສີລໍ. ຕໍຕໍສມາທານວໂຕ ເວສໂຠຊນກິຈ຺ຈກຣຓາທິວິເສສປຏິປຕ຺ຕິ ວຕໍ. ສພ຺ພຖາປິ ທຸກ຺ກຣຈຣິຍາ ຕໂປ. ເມຖຸນວິຣຕິ ພ຺ຣຫ຺ມຈຣິຍໍ.

ສພ຺ພໂສຕິ ອນວເສສໂຕ, ສພ຺ເພສໍ ວາ. ອເຠເທນາຕິ ອວີຕິກ຺ກເມນ. ອປຣາຍ ຈ ປາປຘມ຺ມານໍ ອນຸປ຺ປຕ຺ຕິຍາ, ຄຸຓານໍ ອຸປ຺ປຕ຺ຕິຍາ ສງ຺ຄຫິໂຕຕິ ໂຍຊນາ. ຕຕ຺ຖ ກຸຊ຺ຌນລກ຺ຂໂຓ ໂກໂຘ. ອຸປນນ຺ຘນລກ຺ຂໂຓ ອຸປນາໂຫ. ປເຣສໍ ຄຸຓມກ຺ຂນລກ຺ຂໂຓ ມກ຺ໂຂ. ຍຸຄຄ຺ຄາຫລກ຺ຂໂຓ ປຬາໂສ. ປຣສມ຺ປຕ຺ຕິອຸສູຍນລກ຺ຂຓາ ອິສ຺ສາ. ອຕ຺ຕສມ຺ປຕ຺ຕິນິຄູຫນລກ຺ຂຓໍ ມຈ຺ຉຣິຍໍ. ສນ຺ຕໂທສປຏິຈ຺ຉາທນລກ຺ຂຓາ ມາຍາ. ອສນ຺ຕຄຸຓສມ຺ຠາວນລກ຺ຂຓໍ ສາເຐຍ຺ຍໍ. ຈິຕ຺ຕສ຺ສ ຖທ຺ຘຠາວລກ຺ຂໂຓ ຖມ຺ໂຠ. ກຣຓຸຕ຺ຕຣິຍລກ຺ຂໂຓ ສາຣມ຺ໂຠ. ອຸນ຺ນຕິລກ຺ຂໂຓ ມາໂນ. ອພ຺ຠຸນ຺ນຕິລກ຺ຂໂຓ ອຕິມາໂນ. ມຊ຺ຊນລກ຺ຂໂຓ ມໂທ. ຈິຕ຺ຕໂວສຄ຺ຄລກ຺ຂໂຓ ປມາໂທ. ອາທິ-ສທ຺ເທນ ໂລຠໂມຫວິປຣີຕມນສິກາຣາທີນໍ ສງ຺ຄໂຫ.

ອິທານິ ‘‘ອຂຓ຺ຑາທິຠາໂວ ປນາ’’ຕິອາທິນາ ວຸຕ຺ຕເມວຕ຺ຖໍ ປາກຏຕຣໍ ກາຕຸໍ ‘‘ຍານິ ຫີ’’ຕິອາທິມາຫ. ຕຕ຺ຖ ອນຸປຫຕານີຕິ ອນຸປທ຺ທຸຕານິ. ວິວຏ຺ຏູປນິສ຺ສຍຕາຍ ຕຓ຺ຫາທາສພ຺ຍໂຕ ໂມຈເນນ ຠຸຊິສ຺ສຠາວກຣຓໍ. ອວິຎ຺ຎູນໍ ອປ຺ປມາຓຕ຺ຕາ ວຸຕ຺ຕໍ ‘‘ວິຎ຺ຎູຫິ ປສຕ຺ຖຕ຺ຕາ’’ຕິ. ສມາຘິສໍວຕ຺ຕນໍ ວາ ເອເຕສໍ ປໂຍຊນໍ, ສມາຘິສໍວຕ຺ຕເນ ວາ ນິຍຸຕ຺ຕານີຕິ ສມາຘິສໍວຕ຺ຕນິການິ. ນິທ຺ທາເນນ ສສ຺ສສມ຺ປຕ຺ຕິ ວິຍ ປຏິປກ຺ຂວິຄເມນ ສີລສມ຺ປທາ, ສາ ຈ ຕຕ຺ຖ ສຕິ ໂທສທສ຺ສເນຕິ ອາຫ ‘‘ສີລວິປຕ຺ຕິຍາ ຈ ອາທີນວທສ຺ສເນນາ’’ຕິ. ນິສມ຺ມກາຣີນໍ ປໂຍຊນຄຣຸກຕາຍ ທິຏ຺ຐຄຸເຓເຍວ ສມ຺ມາປຏິປຕ຺ຕີຕິ ວຸຕ຺ຕໍ ‘‘ສີລສມ຺ປຕ຺ຕິຍາ ຈ ອານິສໍສທສ຺ສເນນາ’’ຕິ.

ຕຕ຺ຖ ສີລວິປຕ຺ຕິຍາ ອາທີນໂວ ສີລສມ຺ປທາຍ ເຫຏ຺ຐາ ທສ຺ສິຕອານິສໍສປຏິປກ຺ຂໂຕ ເວທິຕພ຺ໂພ, ຕໍ ສຸວິຎ຺ເຎຍ຺ຍນ຺ຕິ ອວິຕ຺ຖາເຣຕ຺ວາ ປກາຣນ຺ຕເຣຫິ ທສ຺ເສຕຸໍ ‘‘ອປິຈາ’’ຕິ ອາຣທ຺ຘໍ. ຕຕ຺ຖ ຍຖາ ສີລສມ຺ປທາ ສຕ຺ຕານໍ ມນຸຎ຺ຎຠາວກາຣຓໍ, ເອວໍ ສີລວິປຕ຺ຕິ ອມນຸຎ຺ຎຠາວກາຣຓນ຺ຕິ ອາຫ ‘‘ທຸສ຺ສີໂລ…ເປ… ເທວມນຸສ຺ສານ’’ນ຺ຕິ. ອນນຸສາສນີໂຍ ຊິຄຸຈ຺ຉິຕພ຺ພໂຕ. ທຸກ຺ຂິໂຕຕິ ສຎ຺ຊາຕທຸກ຺ໂຂ. ວິປ຺ປຏິສາຣີຕິ ‘‘ອກຕໍ ວຕ ເມ ກລ຺ຍາຓ’’ນ຺ຕິອາທິນາ ປຈ຺ຈານຸຕາປີ. ທຸພ຺ພຓ຺ໂຓຕິ ຄຸຓວຓ຺ເຓນ, ກາຍວຓ຺ເຓນ ຈ ວິຣຫິໂຕ. ອສ຺ສາຕິ ທຸສ຺ສີລສ຺ສ. ສມ຺ຜສ຺ສິຕານໍ ທຸກ຺ໂຂ ທຸກ຺ຂາວໂຫ ສມ຺ຜສ຺ໂສ ເອຕສ຺ສາຕິ ທຸກ຺ຂສມ຺ຜສ຺ໂສ. ຄຸຓານຸຠາວາຠາວໂຕ ອປ຺ປໍ ອຄ຺ຆຕີຕິ ອປ຺ປຄ຺ໂຆ. ອເນກວສ຺ສຄຓິກຄູຖກູໂປ ວິຍາຕິ ອເນກວສ຺ສສມູເຫ ສຎ຺ຈິຕຸກ຺ກາຣາວາໂຏ ວິຍ. ທຸພ຺ພິໂສຘໂນ ໂສເຘຕຸໍ ອສກ຺ກຸເຓຍ຺ໂຍ. ຉວາລາຕໍ ຉວຑາເຫ ສນ຺ຕຊ຺ຊນຸມ຺ມຸກ຺ກໍ. ອຸຠໂຕ ປຣິພາຫິໂຣຕິ ສາມຎ຺ຎໂຕ, ຄິຫິໂຠຄໂຕ ຈ ປຣິຫີໂນ. ສພ຺ເພສໍ ເວຣີ, ສພ຺ເພ ວາ ເວຣີ ເອຕສ຺ສາຕິ ສພ຺ພເວຣີ, ໂສ ເອວ ສພ຺ພເວຣິໂກ, ປຸຣິໂສ. ສໍວາສໍ ນາຣຫຕີຕິ ອສໍວາສາຣໂຫ. ສທ຺ຘມ຺ເມຕິ ປຏິປຕ຺ຕິສທ຺ຘມ຺ເມ, ປຏິເວຘສທ຺ຘມ຺ເມ ຈ.

‘‘ອຄ຺ຄິກ຺ຂນ຺ຘປຣິຍາເຍ ວຸຕ຺ຕທຸກ຺ຂຠາຄິຕາຍາ’’ຕິ ສງ຺ເຂເປນ ວຸຕ຺ຕມຕ຺ຖໍ ວິຕ຺ຖາຣໂຕ ທສ຺ເສຕຸໍ ‘‘ທຸສ຺ສີລານຎ຺ຫີ’’ຕິອາທິ ອາຣທ຺ຘໍ. ປຎ຺ຈກາມຄຸຓປຣິໂຠຄສຸເຂ, ປເຣຫິ ກຍິຣມານວນ຺ທນມານນາທິສຸເຂ ຈ ອສ຺ສາເທນ ຄຘິຕຈິຕ຺ຕາ ປຎ຺ຈກາມ…ເປ… ຄຘິຕຈິຕ຺ຕາ, ເຕສໍ. ເຕ ຍຖາວຸຕ຺ຕສຸຂສ຺ສາທາ ປຈ຺ຈຍາ ເອຕສ຺ສາຕິ ຕປ຺ປຈ຺ຈຍໍ. ທຸກ຺ຂນ຺ຕິ ສມ຺ພນ຺ໂຘ.

ປສ຺ສຖ ໂນຕິ ປສ຺ສຖ ນຸ, ອປິ ປສ຺ສຖ. ມຫນ຺ຕນ຺ຕິ ວິປຸລໍ. ອຄ຺ຄິກ຺ຂນ຺ຘນ຺ຕິ ອຄ຺ຄິສມູຫໍ. ອາທິຕ຺ຕນ຺ຕິ ປທິຕ຺ຕໍ. ສມ຺ປຊ຺ຊລິຕນ຺ຕິ ສມນ຺ຕໂຕ ປຊ຺ຊລິຕໍ ອຈ຺ຉິວິປ຺ຜຸລິງ຺ຄານິ ມຸຈ຺ຈນ຺ຕໍ. ສໂຊຕິຠູຕນ຺ຕິ ສປຠໍ ສມນ຺ຕໂຕ ອຸຏ຺ຐິຕາຫິ ຊາລາຫິ ເອກປ຺ປຠາສມຸທຍຠູຕໍ. ຕໍ ກິໍ ມຎ຺ຎຖາຕິ ຕໍ ອິທານິ ມຍາ ວຸຈ຺ຈມານມຕ຺ຖໍ ກິໍ ມຎ຺ຎຖາຕິ ອນຸມຕິຄຫຓຕ຺ຖໍ ປຸຈ຺ຉຕິ. ອາລິງ຺ເຄຕ຺ວາຕິ ອຸປຄູຫິຕ຺ວາ. ອຸປນິສີເທຍ຺ຍາຕິ ເຕເນວ ອາລິງ຺ຄເນນ ອຸເປຈ຺ຈ ນິສີເທຍ຺ຍ. ຍທຕ຺ຖເມຕ຺ຖ ສຕ຺ຖາ ອຄ຺ຄິກ຺ຂນ຺ຘາລິງ຺ຄນໍ, ກຎ຺ຎາລິງ຺ຄນຎ຺ຈ ອາເນສິ, ຕມຕ຺ຖໍ ວິຠາເວຕຸໍ ‘‘ອາໂຣຈຍາມີ’’ຕິອາທິມາຫ. ຕຕ຺ຖ ອາໂຣຈຍາມີຕິ ອາມນ຺ເຕມິ. ໂວຕິ ຕຸມ຺ເຫ. ປຏິເວທຍາມີຕິ ປໂພເຘມິ. ທຸສ຺ສີລສ຺ສາຕິ ນິສ຺ສີລສ຺ສ ສີລວິຣຫິຕສ຺ສ. ປາປຘມ຺ມສ຺ສາຕິ ທຸສ຺ສີລຕ຺ຕາ ເອວ ຫີນຊ຺ຌາສຍຕາຍ ລາມກສຠາວສ຺ສ. ອສຸຈິສງ຺ກສ຺ສຣສມາຈາຣສ຺ສາຕິ ອປຣິສຸທ຺ຘກາຍສມາຈາຣາທິຕາຍ ອສຸຈິສ຺ສ ຫຸຕ຺ວາ ສງ຺ກາຍ ສຣິຕພ຺ພສມາຈາຣສ຺ສ. ທຸສ຺ສີໂລ ຫິ ກິຎ຺ຈິເທວ ອສາຣຸປ຺ປໍ ທິສ຺ວາ ‘‘ອິທໍ ອສຸເກນ ກຕໍ ຠວິສ຺ສຕີ’’ຕິ ປເຣສໍ ອາສງ຺ກນີໂຍວ ໂຫຕິ, ເກນຈິເທວ ວາ ກຣຓີເຍນ ມນ຺ຕຍນ຺ເຕ ຠິກ຺ຂູ ທິສ຺ວາ ‘‘ກຈ຺ຈິ ນຸ ໂຂ ອິເມ ມຍາ ກຕໍ ກມ຺ມໍ ຊານິຕ຺ວາ ມນ຺ເຕນ຺ຕີ’’ຕິ ອຕ຺ຕໂນເຍວ ສງ຺ກາຍ ສຣິຕພ຺ພສມາຈາໂຣຕິ. ປຏິຈ຺ຉນ຺ນກມ຺ມນ຺ຕສ຺ສາຕິ ລຊ຺ຊິຕພ຺ພຕາຍ ປຏິຈ຺ຉາເທຕພ຺ພກມ຺ມນ຺ຕສ຺ສ. ອສ຺ສມຓສ຺ສາຕິ ນ ສມຓສ຺ສ. ສລາກຄ຺ຄຫຓາທີສຸ ‘‘ອຫມ຺ປິ ສມໂຓ’’ຕິ ມິຈ຺ຉາປຏິຎ຺ຎາຍ ສມຓປຏິຎ຺ຎສ຺ສ. ອເສຏ຺ຐຈາຣິຕາຍ ອພ຺ຣຫ຺ມຈາຣິສ຺ສ. ອຸໂປສຖາທີສຸ ‘‘ອຫມ຺ປິ ພ຺ຣຫ຺ມຈາຣີ’’ຕິ ມິຈ຺ຉາປຏິຎ຺ຎາຍ ພ຺ຣຫ຺ມຈາຣິປຏິຎ຺ຎສ຺ສ. ປູຕິນາ ກມ຺ເມນ ສີລວິປຕ຺ຕິຍາ ອນ຺ໂຕ ອນຸປວິຏ຺ຐຕ຺ຕາ ອນ຺ໂຕປູຕິກສ຺ສ. ຉຫິ ທ຺ວາເຣຫິ ຣາຄາທິກິເລສານຸວສ຺ສເນນ ຕິນ຺ຕຕ຺ຕາ ອວສ຺ສຸຕສ຺ສ. ສຎ຺ຊາຕຣາຄາທິກຈວຣຕ຺ຕາ, ສີລວນ຺ເຕຫິ ຉຑ຺ເຑຕພ຺ພຕ຺ຕາ ຈ ກສມ຺ພຸຊາຕສ຺ສ. ອຄ຺ຄິກ຺ຂນ຺ຘູປມາຍ ຫີນູປມຠູຕາຍາຕິ ອຕ຺ໂຖ. ເຕນາຫ ຠຄວາ – ‘‘ເອຕເທວ ຕສ຺ສ ວຣ’’ນ຺ຕິ. ຠຄວາ ທຸກ຺ຂໍ ທສ຺ເສຕ຺ວາ ທຸກ຺ຂໍ ທສ຺ເສຕີຕິ ສມ຺ພນ຺ໂຘ.

ວາຬຣຊ຺ຊຸຍາຕິ ວາເຬຫິ ກຕຣຊ຺ຊຸຍາ. ສາ ຫິ ຂຣຕຣາ ໂຫຕິ. ຆໍເສຍ຺ຍາຕິ ປຘໍສນວເສນ ຆໍເສຍ຺ຍ. ເຕລໂຘຕາຍາຕິ ເຕເລນ ນິສິຕາຍ. ປຈ຺ໂຈຣສ຺ມິນ຺ຕິ ປຕິອຸຣສ຺ມິໍ ອຸຣາຠິມຸຂໍ, ອຸຣມຊ຺ເຌຕິ ອຘິປ຺ປາໂຍ. ອໂຍສງ຺ກຸນາຕິ ສຓ຺ຑາເສນ. ເຜຓຸທ຺ເທຫກນ຺ຕິ ເຜຓໍ ອຸທ຺ເທເຫຕ຺ວາ, ອເນກວາຣໍ ເຜຓໍ ອຸຏ຺ຐເປຕ຺ວາຕິ ອຕ຺ໂຖ.

ອຄ຺ຄິກ຺ຂນ຺ຘາລິງ຺ຄນທຸກ຺ຂໂຕປິ ອຘິມຕ຺ຕທຸກ຺ຂຕາຍ ກຏຸກຠູຕໍ ທຸກ຺ຂໍ ຜລໍ ເອຕສ຺ສາຕິ ອຄ຺ຄິກ຺ຂນ຺ຘາລິງ຺ຄນທຸກ຺ຂາຘິກທຸກ຺ຂກຏຸກຜລໍ. ກາມສຸຂໍ ອວິຊຫໂຕ ຠິນ຺ນສີລສ຺ສ ທຸສ຺ສີລສ຺ສ ກຸໂຕ ຕສ຺ສ ສຸຂໍ ນຕ຺ເຖວາຕິ ອຘິປ຺ປາໂຍ. ສາທເນຕິ ສາທິຍເນ. ຍນ຺ຕິ ອຎ຺ຊລິກມ຺ມສາທນໍ. ອສີລິໂນຕິ ທຸສ຺ສີລສ຺ສ. ອຸປຫຕນ຺ຕິ ສີລພ຺ຍສເນນ ອຸປທ຺ທຸຕໍ. ຂຕນ຺ຕິ ກຸສລມູລານໍ ຂຓເນນ ຂຕໍ, ຂຓິຕໍ ວາ ຄຸຓໍ ສຣີເຣຕິ ອຘິປ຺ປາໂຍ. ສພ຺ພຠເຍຫີຕິ ອຕ຺ຕານຸວາທາທິສພ຺ພຠເຍຫິ. ອຸປຈາຣຊ຺ຌານໍ ອຸປາທາຍ ສພ຺ເພຫິ ອຘິຄມສຸເຂຫິ.

ວຸຕ຺ຕປ຺ປກາຣວິປຣີຕໂຕຕິ ສີລວິປຕ຺ຕິຍໍ ວຸຕ຺ຕາກາຣປຏິປກ຺ຂໂຕ ‘‘ມນາໂປ ໂຫຕິ ເທວມນຸສ຺ສານ’’ນ຺ຕິອາທິນາ. ກາຍຄນ຺ໂຘປິ ປາໂມຊ຺ຊໍ, ສີລວນ຺ຕສ຺ສ ຠິກ຺ຂຸໂນ. ກໂຣຕິ ອປິ ເທວານນ຺ຕິ ເອຕ຺ຖ ‘‘ຄນ຺ໂຘ ອິສີນໍ ຈິຣທິກ຺ຂິຕານ’’ນ຺ຕິອາທິກາ (ຊາ. ໒.໑໗.໕໕) ຄາຖາ ວິຕ຺ຖາເຣຕພ຺ພາ. ອວິຆາຕີຕິ ອປ຺ປຏິຆາຕີ. ວຘພນ຺ຘາທິປຣິກິເລສາ ທິຏ຺ຐຘມ຺ມິກາ ອາສວາ ອຸປທ຺ທວາ. ສມ຺ປຣາຍິກທຸກ຺ຂານໍ ມູລໍ ນາມ ທຸສ຺ສີລ຺ຍໍ. ອນ຺ຕມຕິກ຺ກນ຺ຕໍ ອຈ຺ຈນ຺ຕໍ, ອຈ຺ຈນ຺ຕໍ ສນ຺ຕາ ອຈ຺ຈນ຺ຕສນ຺ຕາ ກິເລສປຣິຬາຫສງ຺ຂາຕທຣຖານໍ ອຠາເວນ ສພ຺ພທາ ສນ຺ຕາ. ອຸພ຺ພິຊ຺ຊິຕ຺ວາຕິ ຎາຓຸຕ຺ຣາເສນ ອຸຕ຺ຕສິຕ຺ວາ. ໂວທາເປຕພ຺ພນ຺ຕິ ວິໂສເຘຕພ຺ພໍ.

ສີລນິທ຺ເທສວຓ຺ຓນາ ນິຏ຺ຐິຕາ.

ອິຕິ ປຐມປຣິຈ຺ເຉທວຓ຺ຓນາ.