໗. ຂລຸປຈ຺ຉາຠຕ຺ຕິກງ຺ຄກຖາ

໓໐. ຂລຸປຈ຺ຉາຠຕ຺ຕິກງ຺ຄມ຺ປິ ‘‘ອຕິຣິຕ຺ຕໂຠຊນໍ ປຏິກ຺ຂິປາມິ, ຂລຸປຈ຺ຉາຠຕ຺ຕິກງ຺ຄໍ ສມາທິຍາມີ’’ຕິ ອິເມສໍ ອຎ຺ຎຕຣວຈເນນ ສມາທິນ຺ນໍ ໂຫຕິ.

ເຕນ ປນ ຂລຸປຈ຺ຉາຠຕ຺ຕິເກນ ປວາເຣຕ຺ວາ ປຸນ ໂຠຊນໍ ກປ຺ປິຍໍ ກາເຣຕ຺ວາ ນ ຠຸຎ຺ຊິຕພ຺ພໍ. ອິທມສ຺ສ ວິຘານໍ.

ປເຠທໂຕ ປນ ອຍມ຺ປິ ຕິວິໂຘ ໂຫຕິ. ຕຕ຺ຖ ອຸກ຺ກຏ຺ໂຐ ຍສ຺ມາ ປຐມປິຓ຺ເຑ ປວາຣຓາ ນາມ ນຕ຺ຖິ, ຕສ຺ມິໍ ປນ ອຊ຺ໂຌຫຣິຍມາເນ ອຎ຺ຎໍ ປຏິກ຺ຂິປໂຕ ໂຫຕິ, ຕສ຺ມາ ເອວໍ ປວາຣິໂຕ ປຐມປິຓ຺ຑໍ ອຊ຺ໂຌຫຣິຕ຺ວາ ທຸຕິຍປິຓ຺ຑໍ ນ ຠຸຎ຺ຊຕິ. ມຊ຺ຌິໂມ ຍສ຺ມິໍ ໂຠຊເນ ປວາຣິໂຕ, ຕເທວ ຠຸຎ຺ຊຕິ. ມຸທຸໂກ ປນ ຍາວ ອາສນາ ນ ວຸຏ຺ຐາຕິ ຕາວ ຠຸຎ຺ຊຕິ.

ອິເມສໍ ປນ ຕິຓ຺ຓມ຺ປິ ປວາຣິຕານໍ ກປ຺ປິຍໍ ກາຣາເປຕ຺ວາ ຠຸຕ຺ຕກ຺ຂເຓ ຘຸຕງ຺ຄໍ ຠິຊ຺ຊຕິ. ອຍເມຕ຺ຖ ເຠໂທ.

ອຍໍ ປນານິສໍໂສ, ອນຕິຣິຕ຺ຕໂຠຊນາປຕ຺ຕິຍາ ທູຣຠາໂວ, ໂອທຣິກຕ຺ຕາຠາໂວ, ນິຣາມິສສນ຺ນິຘິຕາ, ປຸນ ປຣິເຍສນາຍ ອຠາໂວ, ອປ຺ປິຈ຺ຉຕາທີນໍ ອນຸໂລມວຸຕ຺ຕິຕາຕິ.

ປຣິເຍສນາຍ ເຂທໍ, ນ ຍາຕິ ນ ກໂຣຕິ ສນ຺ນິຘິໍ ຘີໂຣ;

ໂອທຣິກຕ຺ຕໍ ປຊຫຕິ, ຂລຸປຈ຺ຉາຠຕ຺ຕິໂກ ໂຍຄີ.

ຕສ຺ມາ ສຸຄຕປສຕ຺ຖໍ, ສນ຺ໂຕສຄຸຓາທິວຸຑ຺ຒິສຎ຺ຊນນໍ;

ໂທເສ ວິຘຸນິຕຸກາໂມ, ຠເຊຍ຺ຍ ໂຍຄີ ຘຸຕງ຺ຄມິທນ຺ຕິ.

ອຍໍ ຂລຸປຈ຺ຉາຠຕ຺ຕິກງ຺ເຄ ສມາທານວິຘານປ຺ປເຠທເຠທານິສໍສວຓ຺ຓນາ.