໖. ປຕ຺ຕປິຓ຺ຑິກງ຺ຄກຖາ

໒໙. ປຕ຺ຕປິຓ຺ຑິກງ຺ຄມ຺ປິ ‘‘ທຸຕິຍກຠາຊນໍ ປຏິກ຺ຂິປາມິ, ປຕ຺ຕປິຓ຺ຑິກງ຺ຄໍ ສມາທິຍາມີ’’ຕິ ອິເມສໍ ອຎ຺ຎຕຣວຈເນນ ສມາທິນ຺ນໍ ໂຫຕິ.

ເຕນ ປນ ປຕ຺ຕປິຓ຺ຑິເກນ ຍາຄຸປານກາເລ ຠາຊເນ ຐເປຕ຺ວາ ພ຺ຍຎ຺ຊເນ ລທ຺ເຘ ພ຺ຍຎ຺ຊນໍ ວາ ປຐມໍ ຂາທິຕພ຺ພໍ, ຍາຄຸ ວາ ປາຕພ຺ພາ. ສເຈ ປນ ຍາຄຸຍໍ ປກ຺ຂິປຕິ, ປູຕິມຈ຺ຉກາທິມ຺ຫິ ພ຺ຍຎ຺ຊເນ ປກ຺ຂິຕ຺ເຕ ຍາຄຸ ປຏິກູລາ ໂຫຕິ, ອປ຺ປຏິກູລເມວ ຈ ກຕ຺ວາ ຠຸຎ຺ຊິຕຸໍ ວຏ຺ຏຕິ. ຕສ຺ມາ ຕຖາຣູປໍ ພ຺ຍຎ຺ຊນໍ ສນ຺ຘາຍ ອິທໍ ວຸຕ຺ຕໍ. ຍໍ ປນ ມຘຸສກ຺ກຣາທິກໍ ອປ຺ປຏິກູລໍ ໂຫຕິ, ຕໍ ປກ຺ຂິປິຕພ຺ພໍ. ຄຓ຺ຫນ຺ເຕນ ຈ ປມາຓຍຸຕ຺ຕເມວ ຄຓ຺ຫິຕພ຺ພໍ. ອາມກສາກໍ ຫຕ຺ເຖນ ຄເຫຕ຺ວາ ຂາທິຕຸໍ ວຏ຺ຏຕິ. ຕຖາ ປນ ອກຕ຺ວາ ປຕ຺ເຕເຍວ ປກ຺ຂິປິຕພ຺ພໍ. ທຸຕິຍກຠາຊນສ຺ສ ປນ ປຏິກ຺ຂິຕ຺ຕຕ຺ຕາ ອຎ຺ຎໍ ຣຸກ຺ຂປຓ຺ຓມ຺ປິ ນ ວຏ຺ຏຕີຕິ ອິທມສ຺ສ ວິຘານໍ.

ປເຠທໂຕ ປນ ອຍມ຺ປິ ຕິວິໂຘ ໂຫຕິ. ຕຕ຺ຖ ອຸກ຺ກຏ຺ຐສ຺ສ ອຎ຺ຎຕ຺ຣ ອຸຈ຺ຉຸຂາທນກາລາ ກຈວຣມ຺ປິ ຉຑ຺ເຑຕຸໍ ນ ວຏ຺ຏຕິ. ໂອທນປິຓ຺ຑມຈ຺ຉມໍສປູເວປິ ຠິນ຺ທິຕ຺ວາ ຂາທິຕຸໍ ນ ວຏ຺ຏຕິ. ມຊ຺ຌິມສ຺ສ ເອເກນ ຫຕ຺ເຖນ ຠິນ຺ທິຕ຺ວາ ຂາທິຕຸໍ ວຏ຺ຏຕິ, ຫຕ຺ຖໂຍຄີ ນາເມສ. ມຸທຸໂກ ປນ ປຕ຺ຕໂຍຄີ ນາມ ໂຫຕິ, ຕສ຺ສ ຍໍ ສກ຺ກາ ໂຫຕິ ປຕ຺ເຕ ປກ຺ຂິປິຕຸໍ, ຕໍ ສພ຺ພໍ ຫຕ຺ເຖນ ວາ ທນ຺ເຕຫິ ວາ ຠິນ຺ທິຕ຺ວາ ຂາທິຕຸໍ ວຏ຺ຏຕິ.

ອິເມສໍ ປນ ຕິຓ຺ຓມ຺ປິ ທຸຕິຍກຠາຊນໍ ສາທິຕກ຺ຂເຓ ຘຸຕງ຺ຄໍ ຠິຊ຺ຊຕິ. ອຍເມຕ຺ຖ ເຠໂທ.

ອຍໍ ປນານິສໍໂສ, ນານາຣສຕຓ຺ຫາວິໂນທນໍ. ອຕ຺ຣິຈ຺ຉຕາຍ ປຫານໍ, ອາຫາເຣ ປໂຍຊນມຕ຺ຕທສ຺ສິຕາ, ຖາລກາທິປຣິຫຣຓເຂທາຠາໂວ, ອວິກ຺ຂິຕ຺ຕໂຠຊິຕາ, ອປ຺ປິຈ຺ຉຕາທີນໍ ອນຸໂລມວຸຕ຺ຕິຕາຕິ.

ນານາຠາຊນວິກ຺ເຂປໍ, ຫິຕ຺ວາ ໂອກ຺ຂິຕ຺ຕໂລຈໂນ;

ຂຓນ຺ໂຕ ວິຍ ມູລານິ, ຣສຕຓ຺ຫາຍ ສຸພ຺ພໂຕ.

ສຣູປໍ ວິຍ ສນ຺ຕຸຏ຺ຐິໍ, ຘາຣຍນ຺ໂຕ ສຸມານໂສ;

ປຣິຠຸຎ຺ເຊຍ຺ຍ ອາຫາຣໍ, ໂກ ອຎ຺ໂຎ ປຕ຺ຕປິຓ຺ຑິໂກຕິ.

ອຍໍ ປຕ຺ຕປິຓ຺ຑິກງ຺ເຄ ສມາທານວິຘານປ຺ປເຠທເຠທານິສໍສວຓ຺ຓນາ.