໓. ປິຓ຺ຑປາຕິກງ຺ຄກຖາ

໒໖. ປິຓ຺ຑປາຕິກງ຺ຄມ຺ປິ ‘‘ອຕິເຣກລາຠໍ ປຏິກ຺ຂິປາມິ, ປິຓ຺ຑປາຕິກງ຺ຄໍ ສມາທິຍາມີ’’ຕິ ອິເມສໍ ອຎ຺ຎຕຣວຈເນນ ສມາທິນ຺ນໍ ໂຫຕິ.

ເຕນ ປນ ປິຓ຺ຑປາຕິເກນ ‘‘ສງ຺ຆຠຕ຺ຕໍ, ອຸທ຺ເທສຠຕ຺ຕໍ, ນິມນ຺ຕນຠຕ຺ຕໍ, ສລາກຠຕ຺ຕໍ, ປກ຺ຂິກໍ, ອຸໂປສຖິກໍ, ປາຏິປທິກໍ, ອາຄນ຺ຕຸກຠຕ຺ຕໍ, ຄມິກຠຕ຺ຕໍ, ຄິລານຠຕ຺ຕໍ, ຄິລານຸປຏ຺ຐາກຠຕ຺ຕໍ, ວິຫາຣຠຕ຺ຕໍ, ຘຸຣຠຕ຺ຕໍ, ວາຣກຠຕ຺ຕ’’ນ຺ຕິ ເອຕານິ ຈຸທ຺ທສ ຠຕ຺ຕານິ ນ ສາທິຕພ຺ພານິ. ສເຈ ປນ ‘‘ສງ຺ຆຠຕ຺ຕໍ ຄຓ຺ຫຖາ’’ຕິອາທິນາ ນເຍນ ອວຕ຺ວາ ‘‘ອມ຺ຫາກໍ ເຄເຫ ສງ຺ໂຆ ຠິກ຺ຂໍ ຄຓ຺ຫາຕຸ, ຕຸມ຺ເຫປິ ຠິກ຺ຂໍ ຄຓ຺ຫຖາ’’ຕິ ວຕ຺ວາ ທິນ຺ນານິ ໂຫນ຺ຕິ, ຕານິ ສາທິຕຸໍ ວຏ຺ຏນ຺ຕິ. ສງ຺ຆໂຕ ນິຣາມິສສລາກາປິ ວິຫາເຣ ປກ຺ກຠຕ຺ຕມ຺ປິ ວຏ຺ຏຕິເຍວາຕິ ອິທມສ຺ສ ວິຘານໍ.

ປເຠທໂຕ ປນ ອຍມ຺ປິ ຕິວິໂຘ ໂຫຕິ. ຕຕ຺ຖ ອຸກ຺ກຏ຺ໂຐ ປຸຣໂຕປິ ປຈ຺ຉໂຕປິ ອາຫຏຠິກ຺ຂໍ ຄຓ຺ຫຕິ, ປຕ຺ຕທ຺ວາເຣ ຐຕ຺ວາ ປຕ຺ຕໍ ຄຓ຺ຫນ຺ຕານມ຺ປິ ເທຕິ, ປຏິກ຺ກມນໍ ອາຫຣິຕ຺ວາ ທິນ຺ນຠິກ຺ຂມ຺ປິ ຄຓ຺ຫຕິ, ຕໍ ທິວສໍ ປນ ນິສີທິຕ຺ວາ ຠິກ຺ຂໍ ນ ຄຓ຺ຫຕິ. ມຊ຺ຌິໂມ ຕໍ ທິວສໍ ນິສີທິຕ຺ວາປິ ຄຓ຺ຫຕິ, ສ຺ວາຕນາຍ ປນ ນາຘິວາເສຕິ. ມຸທຸໂກສ຺ວາຕນາຍປິ ປຸນທິວສາຍປິ ຠິກ຺ຂໍ ອຘິວາເສຕິ. ເຕ ອຸໂຠປິ ເສຣິວິຫາຣສຸຂໍ ນ ລຠນ຺ຕິ, ອຸກ຺ກຏ຺ໂຐວ ລຠຕິ. ເອກສ຺ມິໍ ກິຣ ຄາເມ ອຣິຍວໍໂສ ໂຫຕິ, ອຸກ຺ກຏ຺ໂຐ ອິຕເຣ ອາຫ – ‘‘ອາຍາມາວຸໂສ, ຘມ຺ມສວນາຍາ’’ຕິ. ເຕສຸ ເອໂກ ເອເກນມ຺ຫິ, ຠນ຺ເຕ, ມນຸສ຺ເສນ ນິສີທາປິໂຕຕິ ອາຫ. ອປໂຣ ມຍາ, ຠນ຺ເຕ, ສ຺ວາຕນາຍ ເອກສ຺ສ ຠິກ຺ຂາ ອຘິວາສິຕາຕິ. ເອວໍ ເຕ ອຸໂຠ ປຣິຫີນາ. ອິຕໂຣ ປາໂຕວ ປິຓ຺ຑາຍ ຈຣິຕ຺ວາ ຄນ຺ຕ຺ວາ ຘມ຺ມຣສໍ ປຏິສໍເວເທສິ.

ອິເມສໍ ປນ ຕິຓ຺ຓມ຺ປິ ສງ຺ຆຠຕ຺ຕາທິອຕິເຣກລາຠໍ ສາທິຕກ຺ຂເຓວ ຘຸຕງ຺ຄໍ ຠິຊ຺ຊຕິ. ອຍເມຕ຺ຖ ເຠໂທ.

ອຍໍ ປນານິສໍໂສ, ‘‘ປິຓ຺ຑິຍາໂລປໂຠຊນໍ ນິສ຺ສາຍ ປພ຺ພຊ຺ຊາ’’ຕິ (ອ. ນິ. ໔.໒໗; ອິຕິວຸ. ໑໐໑) ວຈນໂຕ ນິສ຺ສຍານຸຣູປປຏິປຕ຺ຕິສພ຺ຠາໂວ, ທຸຕິເຍ ອຣິຍວໍເສ ປຕິຏ຺ຐານໍ, ອປຣາຍຕ຺ຕວຸຕ຺ຕິຕາ, ‘‘ອປ຺ປານິ ເຈວ ສຸລຠານິ ຈ ຕານິ ຈ ອນວຊ຺ຊານີ’’ຕິ ຠຄວຕາ ສໍວຓ຺ຓິຕປຈ຺ຈຍຕາ, ໂກສຊ຺ຊນິມ຺ມທ຺ທນຕາ, ປຣິສຸທ຺ຘາຊີວຕາ, ເສຂິຍປຏິປຕ຺ຕິປູຣຓໍ, ອປຣໂປສິຕາ, ປຣານຸຄ຺ຄຫກິຣິຍາ, ມານປ຺ປຫານໍ, ຣສຕຓ຺ຫານິວາຣຓໍ, ຄຓໂຠຊນປຣມ຺ປຣໂຠຊນຈາຣິຕ຺ຕສິກ຺ຂາປເທຫິ ອນາປຕ຺ຕິຕາ, ອປ຺ປິຈ຺ຉຕາທີນໍ ອນຸໂລມວຸຕ຺ຕິຕາ, ສມ຺ມາປຏິປຕ຺ຕິພ຺ຣູຫນໍ, ປຈ຺ຉິມຊນຕານຸກມ຺ປນນ຺ຕິ.

ປິຓ຺ຑິຍາໂລປສນ຺ຕຸຏ຺ໂຐ, ອປຣາຍຕ຺ຕຊີວິໂກ;

ປຫີນາຫາຣໂລລຸປ຺ໂປ, ໂຫຕິ ຈາຕຸທ຺ທິໂສ ຍຕິ.

ວິໂນທຍຕິ ໂກສຊ຺ຊໍ, ອາຊີວສ຺ສ ວິສຸຊ຺ຌຕິ;

ຕສ຺ມາ ຫິ ນາຕິມຎ຺ເຎຍ຺ຍ, ຠິກ຺ຂາຈຣິຍາຍ ສຸເມຘໂສ.

ເອວຣູປສ຺ສ ຫິ –

‘‘ປິຓ຺ຑປາຕິກສ຺ສ ຠິກ຺ຂຸໂນ,

ອຕ຺ຕຠຣສ຺ສ ອນຎ຺ຎໂປສິໂນ;

ເທວາປິ ປິຫຍນ຺ຕິ ຕາທິໂນ,

ໂນ ເຈ ລາຠສິໂລກນິສ຺ສິໂຕ’’ຕິ.

ອຍໍ ປິຓ຺ຑປາຕິກງ຺ເຄ ສມາທານວິຘານປ຺ປເຠທເຠທານິສໍສວຓ຺ຓນາ.