໔. ສປທານຈາຣິກງ຺ຄກຖາ

໒໗. ສປທານຈາຣິກງ຺ຄມ຺ປິ ‘‘ໂລລຸປ຺ປຈາຣໍ ປຏິກ຺ຂິປາມິ, ສປທານຈາຣິກງ຺ຄໍ ສມາທິຍາມີ’’ຕິ ອິເມສໍ ອຎ຺ຎຕຣວຈເນນ ສມາທິນ຺ນໍ ໂຫຕິ.

ເຕນ ປນ ສປທານຈາຣິເກນ ຄາມທ຺ວາເຣ ຐຕ຺ວາ ປຣິສ຺ສຍາຠາໂວ ສລ຺ລກ຺ເຂຕພ຺ໂພ. ຍສ຺ສາ ຣຈ຺ຉາຍ ວາ ຄາເມ ວາ ປຣິສ຺ສໂຍ ໂຫຕິ, ຕໍ ປຫາຍ ອຎ຺ຎຕ຺ຖ ຈຣິຕຸໍ ວຏ຺ຏຕິ. ຍສ຺ມິໍ ຆຣທ຺ວາເຣ ວາ ຣຈ຺ຉາຍ ວາ ຄາເມ ວາ ກິຎ຺ຈິ ນ ລຠຕິ, ອຄາມສຎ຺ຎໍ ກຕ຺ວາ ຄນ຺ຕພ຺ພໍ. ຍຕ຺ຖ ກິຎ຺ຈິ ລຠຕິ, ຕໍ ປຫາຍ ຄນ຺ຕຸໍ ນ ວຏ຺ຏຕິ. ອິມິນາ ຈ ຠິກ຺ຂຸນາ ກາລຕຣໍ ປວິສິຕພ຺ພໍ, ເອວຎ຺ຫິ ອຜາສຸກຏ຺ຐານໍ ປຫາຍ ອຎ຺ຎຕ຺ຖ ຄນ຺ຕຸໍ ສກ຺ຂິສ຺ສຕິ. ສເຈ ປນສ຺ສ ວິຫາເຣ ທານໍ ເທນ຺ຕາ ອນ຺ຕຣາມຄ຺ເຄ ວາ ອາຄຈ຺ຉນ຺ຕາ ມນຸສ຺ສາ ປຕ຺ຕໍ ຄເຫຕ຺ວາ ປິຓ຺ຑປາຕໍ ເທນ຺ຕິ ວຏ຺ຏຕິ. ອິມິນາ ຈ ມຄ຺ຄໍ ຄຈ຺ຉນ຺ເຕນາປິ ຠິກ຺ຂາຈາຣເວລາຍໍ ສມ຺ປຕ຺ຕຄາມໍ ອນຕິກ຺ກມິຕ຺ວາ ຈຣິຕພ຺ພເມວ. ຕຕ຺ຖ ອລຠິຕ຺ວາ ວາ ໂຖກໍ ລຠິຕ຺ວາ ວາ ຄາມປຏິປາຏິຍາ ຈຣິຕພ຺ພນ຺ຕິ ອິທມສ຺ສ ວິຘານໍ.

ປເຠທໂຕ ປນ ອຍມ຺ປິ ຕິວິໂຘ ໂຫຕິ. ຕຕ຺ຖ ອຸກ຺ກຏ຺ໂຐ ປຸຣໂຕ ອາຫຏຠິກ຺ຂມ຺ປິ ປຈ຺ຉໂຕ ອາຫຏຠິກ຺ຂມ຺ປິ ປຏິກ຺ກມນໍ ອາຫຣິຕ຺ວາ ທິຍ຺ຍມານມ຺ປິ ນ ຄຓ຺ຫຕິ, ປຕ຺ຕທ຺ວາເຣ ປນ ປຕ຺ຕໍ ວິສ຺ສຊ຺ເຊຕິ. ອິມສ຺ມິຎ຺ຫິ ຘຸຕງ຺ເຄ ມຫາກສ຺ສປຕ຺ເຖເຣນ ສທິໂສ ນາມ ນຕ຺ຖິ. ຕສ຺ສປິ ປຕ຺ຕວິສ຺ສຏ຺ຐຏ຺ຐານເມວ ປຎ຺ຎາຍຕິ. ມຊ຺ຌິໂມ ປຸຣໂຕ ວາ ປຈ຺ຉໂຕ ວາ ອາຫຏມ຺ປິ ປຏິກ຺ກມນໍ ອາຫຏມ຺ປິ ຄຓ຺ຫຕິ, ປຕ຺ຕທ຺ວາເຣປິ ປຕ຺ຕໍ ວິສ຺ສຊ຺ເຊຕິ, ນ ປນ ຠິກ຺ຂໍ ອາຄມຍມາໂນ ນິສີທຕິ. ເອວໍ ໂສ ອຸກ຺ກຏ຺ຐປິຓ຺ຑປາຕິກສ຺ສ ອນຸໂລເມຕິ. ມຸທຸໂກ ຕໍ ທິວສໍ ນິສີທິຕ຺ວາ ອາຄເມຕິ.

ອິເມສໍ ປນ ຕິຓ຺ຓມ຺ປິ ໂລລຸປ຺ປຈາເຣ ອຸປ຺ປນ຺ນມຕ຺ເຕ ຘຸຕງ຺ຄໍ ຠິຊ຺ຊຕິ. ອຍເມຕ຺ຖ ເຠໂທ.

ອຍໍ ປນານິສໍໂສ, ກຸເລສຸ ນິຈ຺ຈນວກຕາ, ຈນ຺ທູປມຕາ, ກຸລມຈ຺ເຉຣປ຺ປຫານໍ, ສມານຸກມ຺ປິຕາ, ກຸລູປກາທີນວາຠາໂວ, ອວ຺ຫານານຠິນນ຺ທນາ, ອຠິຫາເຣນ ອນຕ຺ຖິກຕາ, ອປ຺ປິຈ຺ຉຕາທີນໍ ອນຸໂລມວຸຕ຺ຕິຕາຕິ.

ຈນ຺ທູປໂມ ນິຈ຺ຈນໂວ ກຸເລສຸ,

ອມຈ຺ຉຣີ ສພ຺ພສມານຸກມ຺ໂປ;

ກຸລູປກາທີນວວິປ຺ປມຸຕ຺ໂຕ,

ໂຫຕີຘ ຠິກ຺ຂຸ ສປທານຈາຣີ.

ໂລລຸປ຺ປຈາຣຎ຺ຈ ປຫາຍ ຕສ຺ມາ,

ໂອກ຺ຂິຕ຺ຕຈກ຺ຂຸ ຍຸຄມຕ຺ຕທສ຺ສີ;

ອາກງ຺ຂມາໂນ ຠຸວິ ເສຣິຈາຣໍ,

ຈເຣຍ຺ຍ ຘີໂຣ ສປທານຈາຣນ຺ຕິ.

ອຍໍ ສປທານຈາຣິກງ຺ເຄ ສມາທານວິຘານປ຺ປເຠທເຠທານິສໍສວຓ຺ຓນາ.