໒. ເຕຈີວຣິກງ຺ຄກຖາ

໒໕. ຕທນນ຺ຕຣໍ ປນ ເຕຈີວຣິກງ຺ຄໍ ‘‘ຈຕຸຕ຺ຖກຈີວຣໍ ປຏິກ຺ຂິປາມິ, ເຕຈີວຣິກງ຺ຄໍ ສມາທິຍາມີ’’ຕິ ອິເມສໍ ອຎ຺ຎຕຣວຈເນນ ສມາທິນ຺ນໍ ໂຫຕິ.

ເຕນ ປນ ເຕຈີວຣິເກນ ຈີວຣທຸສ຺ສໍ ລຠິຕ຺ວາ ຍາວ ອຜາສຸກຠາເວນ ກາຕຸໍ ວາ ນ ສກ຺ໂກຕິ, ວິຈາຣກໍ ວາ ນ ລຠຕິ, ສູຈິອາທີສຸ ວາສ຺ສ ກິຎ຺ຈິ ນ ສມ຺ປຊ຺ຊຕິ, ຕາວ ນິກ຺ຂິປິຕພ຺ພໍ. ນິກ຺ຂິຕ຺ຕປຈ຺ຈຍາ ໂທໂສ ນຕ຺ຖິ. ຣຊິຕກາລໂຕ ປນ ປຏ຺ຐາຍ ນິກ຺ຂິປິຕຸໍ ນ ວຏ຺ຏຕິ, ຘຸຕງ຺ຄໂຈໂຣ ນາມ ໂຫຕິ. ອິທມສ຺ສ ວິຘານໍ.

ປເຠທໂຕ ປນ ອຍມ຺ປິ ຕິວິໂຘ ໂຫຕິ. ຕຕ຺ຖ ອຸກ຺ກຏ຺ເຐນ ຣຊນກາເລ ປຐມໍ ອນ຺ຕຣວາສກໍ ວາ ອຸຕ຺ຕຣາສງ຺ຄໍ ວາ ຣຊິຕ຺ວາ ຕໍ ນິວາເສຕ຺ວາ ອິຕຣໍ ຣຊິຕພ຺ພໍ. ຕໍ ປາຣຸປິຕ຺ວາ ສງ຺ຆາຏິ ຣຊິຕພ຺ພາ. ສງ຺ຆາຏິໍ ປນ ນິວາເສຕຸໍ ນ ວຏ຺ຏຕິ. ອິທມສ຺ສ ຄາມນ຺ຕເສນາສເນ ວຕ຺ຕໍ. ອາຣຎ຺ຎເກ ປນ ທ຺ເວ ເອກໂຕ ໂຘວິຕ຺ວາ ຣຊິຕຸໍ ວຏ຺ຏຕິ. ຍຖາ ປນ ກຎ຺ຈິ ທິສ຺ວາ ສກ຺ໂກຕິ ກາສາວໍ ອາກຑ຺ຒິຕ຺ວາ ອຸປຣິກາຕຸໍ, ເອວໍ ອາສນ຺ເນ ຐາເນ ນິສີທິຕພ຺ພໍ. ມຊ຺ຌິມສ຺ສ ຣຊນສາລາຍໍ ຣຊນກາສາວໍ ນາມ ໂຫຕິ, ຕໍ ນິວາເສຕ຺ວາ ວາ ປາຣຸປິຕ຺ວາ ວາ ຣຊນກມ຺ມໍ ກາຕຸໍ ວຏ຺ຏຕິ. ມຸທຸກສ຺ສ ສຠາຄຠິກ຺ຂູນໍ ຈີວຣານິ ນິວາເສຕ຺ວາ ວາ ປາຣຸປິຕ຺ວາ ວາ ຣຊນກມ຺ມໍ ກາຕຸໍ ວຏ຺ຏຕິ. ຕຕ຺ຣຏ຺ຐກປຈ຺ຈຕ຺ຖຣຓມ຺ປິ ຕສ຺ສ ວຏ຺ຏຕິ. ປຣິຫຣິຕຸໍ ປນ ນ ວຏ຺ຏຕິ. ສຠາຄຠິກ຺ຂູນໍ ຈີວຣມ຺ປິ ອນ຺ຕຣນ຺ຕຣາ ປຣິຠຸຎ຺ຊິຕຸໍ ວຏ຺ຏຕິ. ຘຸຕງ຺ຄເຕຈີວຣິກສ຺ສ ປນ ຈຕຸຕ຺ຖໍ ວຕ຺ຕມານໍ ອໍສກາສາວເມວ ວຏ຺ຏຕິ. ຕຎ຺ຈ ໂຂ ວິຕ຺ຖາຣໂຕ ວິທຕ຺ຖິ, ທີຆໂຕ ຕິຫຕ຺ຖເມວ ວຏ຺ຏຕິ.

ອິເມສໍ ປນ ຕິຓ຺ຓມ຺ປິ ຈຕຸຕ຺ຖກຈີວຣໍ ສາທິຕກ຺ຂເຓເຍວ ຘຸຕງ຺ຄໍ ຠິຊ຺ຊຕິ. ອຍເມຕ຺ຖ ເຠໂທ.

ອຍໍ ປນານິສໍໂສ, ເຕຈີວຣິໂກ ຠິກ຺ຂຸ ສນ຺ຕຸຏ຺ໂຐ ໂຫຕິ ກາຍປຣິຫາຣິເກນ ຈີວເຣນ. ເຕນສ຺ສ ປກ຺ຂິໂນ ວິຍ ສມາທາເຍວ ຄມນໍ, ອປ຺ປສມາຣມ຺ຠຕາ, ວຕ຺ຖສນ຺ນິຘິປຣິວຊ຺ຊນໍ, ສລ຺ລຫຸກວຸຕ຺ຕິຕາ, ອຕິເຣກຈີວຣໂລລຸປ຺ປປ຺ປຫານໍ, ກປ຺ປິເຍ ມຕ຺ຕກາຣິຕາຍ ສລ຺ເລຂວຸຕ຺ຕິຕາ, ອປ຺ປິຈ຺ຉຕາທີນໍ ຜລນິປ຺ຜຕ຺ຕີຕິ ເອວມາທໂຍ ຄຸຓາ ສມ຺ປຊ຺ຊນ຺ຕີຕິ.

ອຕິເຣກວຕ຺ຖຕຓ຺ຫໍ, ປຫາຍ ສນ຺ນິຘິວິວຊ຺ຊິໂຕ ຘີໂຣ;

ສນ຺ໂຕສສຸຂຣສຎ຺ຎູ, ຕິຈີວຣຘໂຣ ຠວຕິ ໂຍຄີ.

ຕສ຺ມາ ສປຕ຺ຕຈຣໂຓ, ປກ຺ຂີວ ສຈີວໂຣວ ໂຍຄິວໂຣ;

ສຸຂມນຸວິຈຣິຕຸກາໂມ, ຈີວຣນິຍເມ ຣຕິໍ ກຍິຣາຕິ.

ອຍໍ ເຕຈີວຣິກງ຺ເຄ ສມາທານວິຘານປ຺ປເຠທເຠທານິສໍສວຓ຺ຓນາ.