໑. ປໍສຸກູລິກງ຺ຄກຖາ

໒໔. ອິທານິ ເອເກກສ຺ສ ສມາທານວິຘານປ຺ປເຠທເຠທານິສໍເສ ວຓ຺ຓຍິສ຺ສາມ. ປໍສຸກູລິກງ຺ຄໍ ຕາວ ‘‘ຄຫປຕິທານຈີວຣໍ ປຏິກ຺ຂິປາມິ, ປໍສຸກູລິກງ຺ຄໍ ສມາທິຍາມີ’’ຕິ ອິເມສຸ ທ຺ວີສຸ ວຈເນສຸ ອຎ຺ຎຕເຣນ ສມາທິນ຺ນໍ ໂຫຕິ. ອິທໍ ຕາເວຕ຺ຖ ສມາທານໍ.

ເອວໍ ສມາທິນ຺ນຘຸຕງ຺ເຄນ ປນ ເຕນ ໂສສານິກໍ, ປາປຓິກໍ, ຣຖິຍໂຈຬໍ, ສງ຺ກາຣໂຈຬໍ, ໂສຕ຺ຖິຍໍ, ນ຺ຫານໂຈຬໍ, ຕິຕ຺ຖໂຈຬໍ, ຄຕປຈ຺ຈາຄຕໍ, ອຄ຺ຄິຑຑ຺ຒໍ, ໂຄຂາຍິຕໍ, ອຸປຈິກາຂາຍິຕໍ, ອຸນ຺ທູຣຂາຍິຕໍ, ອນ຺ຕຈ຺ຉິນ຺ນໍ, ທສາຈ຺ຉິນ຺ນໍ, ຘຊາຫຏໍ, ຖູປຈີວຣໍ, ສມຓຈີວຣໍ, ອາຠິເສກິກໍ, ອິທ຺ຘິມຍໍ, ປນ຺ຖິກໍ, ວາຕາຫຏໍ, ເທວທຕ຺ຕິຍໍ, ສາມຸທ຺ທິຍນ຺ຕິເອເຕສຸ ອຎ຺ຎຕຣໍ ຈີວຣໍ ຄເຫຕ຺ວາ ຜາເລຕ຺ວາ ທຸພ຺ພລຏ຺ຐານໍ ປຫາຍ ຖິຣຏ຺ຐານານິ ໂຘວິຕ຺ວາ ຈີວຣໍ ກຕ຺ວາ ໂປຣາຓໍ ຄຫປຕິຈີວຣໍ ອປເນຕ຺ວາ ປຣິຠຸຎ຺ຊິຕພ຺ພໍ.

ຕຕ຺ຖ ໂສສານິກນ຺ຕິ ສຸສາເນ ປຕິຕກໍ. ປາປຓິກນ຺ຕິ ອາປຓທ຺ວາເຣ ປຕິຕກໍ. ຣຖິຍໂຈຬນ຺ຕິ ປຸຎ຺ຎຕ຺ຖິເກຫິ ວາຕປານນ຺ຕເຣນ ຣຖິກາຍ ຉຑ຺ຑິຕໂຈຬກໍ. ສງ຺ກາຣໂຈຬນ຺ຕິ ສງ຺ກາຣຏ຺ຐາເນ ຉຑ຺ຑິຕໂຈຬກໍ. ໂສຕ຺ຖິຍນ຺ຕິ ຄພ຺ຠມລໍ ປຸຎ຺ຉິຕ຺ວາ ຉຑ຺ຑິຕວຕ຺ຖໍ. ຕິສ຺ສາມຈ຺ຈມາຕາ ກິຣ ສຕຄ຺ຆນເກນ ວຕ຺ເຖນ ຄພ຺ຠມລໍ ປຸຎ຺ຉາເປຕ຺ວາ ປໍສຸກູລິກາ ຄຓ຺ຫິສ຺ສນ຺ຕີຕິ ຕາລເວຬິມຄ຺ເຄ ຉຑ຺ຑາເປສິ. ຠິກ຺ຂູ ຊິຓ຺ຓກຏ຺ຐານຕ຺ຖເມວ ຄຓ຺ຫນ຺ຕິ. ນ຺ຫານໂຈຬນ຺ຕິ ຍໍ ຠູຕເວຊ຺ເຊຫິ ສສີສໍ ນ຺ຫາປິຕາ ກາຬກຓ຺ຓິໂຈຬນ຺ຕິ ຉຑ຺ເຑຕ຺ວາ ຄຈ຺ຉນ຺ຕິ.

ຕິຕ຺ຖໂຈຬນ຺ຕິ ນ຺ຫານຕິຕ຺ເຖ ຉຑ຺ຑິຕປິໂລຕິກາ. ຄຕປຈ຺ຈາຄຕນ຺ຕິ ຍໍ ມນຸສ຺ສາ ສຸສານໍ ຄນ຺ຕ຺ວາ ປຈ຺ຈາຄຕາ ນ຺ຫຕ຺ວາ ຉຑ຺ເຑນ຺ຕິ. ອຄ຺ຄິຑຑ຺ຒນ຺ຕິ ອຄ຺ຄິນາ ຑຑ຺ຒປ຺ປເທສໍ. ຕຎ຺ຫິ ມນຸສ຺ສາ ຉຑ຺ເຑນ຺ຕິ. ໂຄຂາຍິຕາທີນິ ປາກຏາເນວ. ຕາທິສານິປິ ຫິ ມນຸສ຺ສາ ຉຑ຺ເຑນ຺ຕິ. ຘຊາຫຏນ຺ຕິ ນາວໍ ອາໂຣຫນ຺ຕາ ຘຊໍ ພນ຺ຘິຕ຺ວາ ອາຣູຫນ຺ຕິ. ຕໍ ເຕສໍ ທສ຺ສນາຕິກ຺ກເມ ຄເຫຕຸໍ ວຏ຺ຏຕິ. ຍມ຺ປິ ຍຸທ຺ຘຠູມິຍໍ ຘຊໍ ພນ຺ຘິຕ຺ວາ ຐປິຕໍ, ຕໍ ທ຺ວິນ຺ນມ຺ປິ ເສນານໍ ຄຕກາເລ ຄເຫຕຸໍ ວຏ຺ຏຕິ.

ຖູປຈີວຣນ຺ຕິ ວມ຺ມິກໍ ປຣິກ຺ຂິປິຕ຺ວາ ພລິກມ຺ມໍ ກຕໍ. ສມຓຈີວຣນ຺ຕິ ຠິກ຺ຂຸສນ຺ຕກໍ. ອາຠິເສກິກນ຺ຕິ ຣຎ຺ໂຎ ອຠິເສກຏ຺ຐາເນ ຉຑ຺ຑິຕຈີວຣໍ. ອິທ຺ຘິມຍນ຺ຕິ ເອຫິຠິກ຺ຂຸຈີວຣໍ. ປນ຺ຖິກນ຺ຕິ ອນ຺ຕຣາມຄ຺ເຄ ປຕິຕກໍ. ຍໍ ປນ ສາມິການໍ ສຕິສມ຺ໂມເສນ ປຕິຕໍ, ຕໍ ໂຖກໍ ຣກ຺ຂິຕ຺ວາ ຄເຫຕພ຺ພໍ. ວາຕາຫຏນ຺ຕິ ວາເຕນ ປຫຣິຕ຺ວາ ທູເຣ ປາຕິຕໍ, ຕໍ ປນ ສາມິເກ ອປສ຺ສນ຺ເຕນ ຄເຫຕຸໍ ວຏ຺ຏຕິ. ເທວທຕ຺ຕິຍນ຺ຕິ ອນຸຣຸທ຺ຘຕ຺ເຖຣສ຺ສ ວິຍ ເທວຕາຫິ ທິນ຺ນກໍ. ສາມຸທ຺ທິຍນ຺ຕິ ສມຸທ຺ທວີຈີຫິ ຖເລ ອຸສ຺ສາຣິຕໍ.

ຍໍ ປນ ສງ຺ຆສ຺ສ ເທມາຕິ ທິນ຺ນໍ, ໂຈຬກຠິກ຺ຂາຍ ວາ ຈຣມາເນຫິ ລທ຺ຘໍ, ນ ຕໍ ປໍສຸກູລໍ. ຠິກ຺ຂຸທຕ຺ຕິເຍປິ ຍໍ ວສ຺ສຄ຺ເຄນ ຄາເຫຕ຺ວາ ວາ ທີຍຕິ, ເສນາສນຈີວຣໍ ວາ ໂຫຕິ, ນ ຕໍ ປໍສຸກູລໍ. ໂນ ຄາຫາເປຕ຺ວາ ທິນ຺ນເມວ ປໍສຸກູລໍ. ຕຕ຺ຣປິ ຍໍ ທາຍເກຫິ ຠິກ຺ຂຸສ຺ສ ປາທມູເລ ນິກ຺ຂິຕ຺ຕໍ, ເຕນ ປນ ຠິກ຺ຂຸນາ ປໍສຸກູລິກສ຺ສ ຫຕ຺ເຖ ຐເປຕ຺ວາ ທິນ຺ນໍ, ຕໍ ເອກໂຕສຸທ຺ຘິກໍ ນາມ. ຍໍ ຠິກ຺ຂຸໂນ ຫຕ຺ເຖ ຐເປຕ຺ວາ ທິນ຺ນໍ, ເຕນ ປນ ປາທມູເລ ຐປິຕໍ, ຕມ຺ປິ ເອກໂຕສຸທ຺ຘິກໍ. ຍໍ ຠິກ຺ຂຸໂນປິ ປາທມູເລ ຐປິຕໍ, ເຕນາປິ ຕເຖວ ທິນ຺ນໍ, ຕໍ ອຸຠໂຕສຸທ຺ຘິກໍ. ຍໍ ຫຕ຺ເຖ ຐເປຕ຺ວາ ລທ຺ຘໍ, ຫຕ຺ເຖເຍວ ຐປິຕໍ, ຕໍ ອນຸກ຺ກຏ຺ຐຈີວຣໍ ນາມ. ອິຕິ ອິມໍ ປໍສຸກູລເຠທໍ ຎຕ຺ວາ ປໍສຸກູລິເກນ ຈີວຣໍ ປຣິຠຸຎ຺ຊິຕພ຺ພນ຺ຕິ ອິທເມຕ຺ຖ ວິຘານໍ.

ອຍໍ ປນ ປເຠໂທ, ຕໂຍ ປໍສຸກູລິກາ ອຸກ຺ກຏ຺ໂຐ ມຊ຺ຌິໂມ ມຸທູຕິ. ຕຕ຺ຖ ໂສສານິກໍເຍວ ຄຓ຺ຫນ຺ໂຕ ອຸກ຺ກຏ຺ໂຐ ໂຫຕິ. ປພ຺ພຊິຕາ ຄຓ຺ຫິສ຺ສນ຺ຕີຕິ ຐປິຕກໍ ຄຓ຺ຫນ຺ໂຕ ມຊ຺ຌິໂມ. ປາທມູເລ ຐເປຕ຺ວາ ທິນ຺ນກໍ ຄຓ຺ຫນ຺ໂຕ ມຸທູຕິ.

ເຕສຸ ຍສ຺ສ ກສ຺ສຈິ ອຕ຺ຕໂນ ຣຸຈິຍາ ຄິຫິທິນ຺ນກໍ ສາທິຕກ຺ຂເຓ ຘຸຕງ຺ຄໍ ຠິຊ຺ຊຕິ. ອຍເມຕ຺ຖ ເຠໂທ.

ອຍໍ ປນານິສໍໂສ, ‘‘ປໍສຸກູລຈີວຣໍ ນິສ຺ສາຍ ປພ຺ພຊ຺ຊາ’’ຕິ (ມຫາວ. ໑໒໘) ວຈນໂຕ ນິສ຺ສຍານຸຣູປປຏິປຕ຺ຕິສພ຺ຠາໂວ, ປຐເມ ອຣິຍວໍເສ ປຕິຏ຺ຐານໍ, ອາຣກ຺ຂທຸກ຺ຂາຠາໂວ, ອປຣາຍຕ຺ຕວຸຕ຺ຕິຕາ, ໂຈຣຠເຍນ ອຠຍຕາ, ປຣິໂຠຄຕຓ຺ຫາຍ ອຠາໂວ, ສມຓສາຣຸປ຺ປປຣິກ຺ຂາຣຕາ, ‘‘ອປ຺ປານິ ເຈວ ສຸລຠານິ ຈ ຕານິ ຈ ອນວຊ຺ຊານີ’’ຕິ (ອ. ນິ. ໔.໒໗; ອິຕິວຸ. ໑໐໑) ຠຄວຕາ ສໍວຓ຺ຓິຕປຈ຺ຈຍຕາ, ປາສາທິກຕາ, ອປ຺ປິຈ຺ຉຕາທີນໍ ຜລນິປ຺ຜຕ຺ຕິ, ສມ຺ມາປຏິປຕ຺ຕິຍາ ອນຸພ຺ຣູຫນໍ, ປຈ຺ຉິມາຍ ຊນຕາຍ ທິຏ຺ຐານຸຄຕິອາປາທນນ຺ຕິ.

ມາຣເສນວິຆາຕາຍ, ປໍສຸກູລຘໂຣ ຍຕິ;

ສນ຺ນທ຺ຘກວໂຈ ຍຸທ຺ເຘ, ຂຕ຺ຕິໂຍ ວິຍ ໂສຠຕິ.

ປຫາຍ ກາສິກາທີນິ, ວຣວຕ຺ຖານິ ຘາຣິຕໍ;

ຍໍ ໂລກຄຣຸນາ ໂກ ຕໍ, ປໍສຸກູລໍ ນ ຘາຣເຍ.

ຕສ຺ມາ ຫິ ອຕ຺ຕໂນ ຠິກ຺ຂຸ, ປຏິຎ຺ຎໍ ສມນຸສ຺ສຣໍ;

ໂຍຄາຈາຣານຸກູລມ຺ຫິ, ປໍສຸກູເລ ຣໂຕ ສິຍາຕິ.

ອຍໍ ຕາວ ປໍສຸກູລິກງ຺ເຄ ສມາທານວິຘານປ຺ປເຠທເຠທານິສໍສວຓ຺ຓນາ.