໕. ອີໂຍ

ກຣີຍຕິ ສມ຺ພນ຺ຘີຍຕີຕິ ກມ຺ມໍ. ຕຎ຺ຈ ນາມ ຊາຕິ ຄຸຓກິຣິຍາທພ຺ພ ສມ຺ພນ຺ຘໂຕ ປຎ຺ຈຘາ ຠວຕິ. ຕຕ຺ຖ ນາມກມ຺ມໍ’ ຑິຕ຺ໂຖ ຑວິຕ຺ໂຖຕິ ນາເມນ ປິຓ຺ຑສ຺ສ ສມ຺ພນ຺ຘາ. ຊາຕິກມ຺ມໍ ໂຄອສ຺ໂສຕິ ໂຄຕ຺ຕາທິຊາຕິຍາ ປິຓ຺ຑສ຺ສ ສມ຺ພນ຺ຘາ. ຄຸຓກມ຺ມໍ ສຸກ຺ໂກນີໂລຕິ ສຸກ຺ກາທິນາ ຄຸເຓນ ທພ຺ພສ຺ສ ສມ຺ພນ຺ຘາ. ກິຣິຍາກມ຺ມໍ ປາຈໂກ ປາຍໂກຕິ ປາຈກາທິກິຣິຍາຍ ທພ຺ພສ຺ສ ສມ຺ພນ຺ຘາ. ທພ຺ພກມ຺ມໍ ທຓ຺ຑີວິສາຓີຕິ ທຓ຺ຑາທິນາ ທພ຺ເພນ ປິຓ຺ຑສ຺ສ ສມ຺ພນ຺ຘາ. ເອວໍ ກມ຺ມສ຺ສ ປຎ຺ຈປ຺ປກາຣສມ຺ຠເວປິຈ຺ຉາຍມຕ຺ເຖ ອີຍສ຺ສ ວິຘານໂຕ ອິຈ຺ຉາສມ຺ພນ຺ຘິເຍວ ກມ຺ມໍ ຄຍ຺ຫຕີຕິ ກິຣິຍາກມ຺ມເມວາຕ຺ຣ ຄຍ຺ຫເຕ ອມຸກເມວຕ຺ຖມຸປທສ຺ເສນ຺ໂຕ ອາຫ- ‘ຍທິປິ’ຈ຺ຈາທິ. ອຍຎ຺ຈ ນິປາຕ ສມຸທາໂຍ ວິເສສາຠິຘານນິມິຕ຺ຕາສ຺ຍຸປຄເມ ວຕ຺ຕເຕ.

ຕຖາປີຕິໂລກວຸຕ຺ຕິຣຍໍວິເສສາຠິຘານາຣມ຺ເຠ. ຕໍສມ຺ພນ຺ຘິເຍວາຕິ ອິຈ຺ຉາສມ຺ພນ຺ຘິເອວ. ອຕ຺ຕໂນປຸຕ຺ຕມິຈ຺ຉຕີຕ຺ຍາທິວຈນິຈ຺ຉາຍມຕ຺ຕສມ຺ພນ຺ຘິນິປຸຕ຺ຕາໂທ ອຕ຺ຕໂນຕ຺ຍນຸວຕ຺ຕິຍສຸຕ຺ຕນ຺ຕເຣນປຈ຺ຈໂຍວິຘີຍເຕປາຓິນິນາ, ເອຕ຺ຖ ຕ຺ວ(ຕ຺ຕ)ຄ຺ຄຫຓມນ຺ຕເຣນາຕ຺ຕ ສມ຺ພນ຺ຘິນ຺ເຍວ ປຸຕ຺ຕາໂທ ກຖໍ ວິຎ຺ຎາຍເຕ ວິເສສວຈນາຠາເວ ຫິ ປຣສມ຺ພນ຺ຘິນ຺ຍປິ ປປ຺ໂປຕີຕີມໍໂຈທ຺ຍມຸພ຺ຠາວຍ ມາຫ- ‘ອຕ຺ຕສມ຺ພນ຺ຘິນິ’ຈ຺ຈາທິ. ອີຍສ຺ສ ປຣສມ຺ພນ຺ຘິນ຺ຍປິ ປສງ຺ໂຄຕິ ສມ຺ພນ຺ໂຘ. ກຸໂຕຈາຫ-ອີຍສ຺ສາອິຕິຘານາ’ຕິ. ອຕ຺ຖຄ຺ຄຫຓສ຺ສາວຈເນ ອີຍສ຺ສານຠິຘານາຕິ ຠາໂວ.

ອປ຺ປຕ຺ຕິຍາຕິ ກຣເຓ ເຫຕຸມ຺ຫິ ວາ ຕຕິຍາ. ເອຕ຺ຖາຕິ ອຕ຺ຕໂນ ປຸຕ຺ຕມິຈ຺ຉຕີເຕຕ຺ຖາປິ. ນ ອິຏ຺ໂຐຕິ ອີຍປ຺ປຈ຺ຈໂຍ ນາຠິມໂຕ. ເນເວຕ຺ຖ ຠວິຕພ຺ພນ຺ຕິ ວທໂຕ-ຘິປ຺ປາຍາມາຫ ‘ສາເປກ຺ຂຕ຺ຕ ເຍເວຕິ ຠາໂວ’ຕິ. ຍທິ ອຕ຺ຕໂນ ປຸຕ຺ຕມິຈ຺ຉຕີຕິ ວຕ຺ຕຸມິຈ຺ຉາຍໍ ສາເປກ຺ເຂຕ຺ເຕປິ ສິຍາ, ຕທາຍມນິຏ຺ຐປ຺ປສງ຺ໂຄຕິ ທສ຺ເສຕຸມາຫ- ‘ຍທິເຈຕ຺ຖ’ອິຈ຺ຈາທິ.

ອນິຏ຺ຐປ຺ປສງ຺ຄສ຺ສ ສຣູປມາຫ- ‘ອຕ຺ຕໂນ ປຸຕ຺ຕີຍຕີຕິ ສິຍາ’ຕິ. ອຸປ຺ປຊ຺ຊມາເນນ ອີເຍເນວ ອຕ຺ຕຕ຺ຖສ຺ສາຠິຫິຕຕ຺ຕາ ອຕ຺ຕສທ຺ທສ຺ສາປ຺ປໂຍໂຄຕິ ເຈຕມ຺ປິ ນ ສງ຺ຄຕນ຺ຕິ ປຏິປາທຍມາຫ ‘ນ ຈ ສກ຺ກາ’ຕິອາທິ. ກສ຺ມາເທວໍ ວຕ຺ຕຸໍ ນ ສກ຺ກາຕິ ອາຫ- ‘ປກຕິ’ຈ຺ຈາທິ. ອປູປາທິກາຍ ປກຕິຍາ ສມານຕ຺ຖສ຺ເສວ ວິເສສນສ຺ສ ວຸຕ຺ຕິປເທ ອນ຺ໂຕຠາວ ທສ຺ສນາຕິ ອຕ຺ໂຖ. ກ຺ວປເນວໍ ທິຏ຺ຐນ຺ຕ຺ຍາຫ- ‘ຕໍຍເຖ’ຈ຺ຈາທິ. ‘‘ຕມສ຺ສ ສິປ຺ປໍ ສີລໍ ປຓ຺ຍໍ ປຫຣຓໍ ປໂຍຊນໍ’’ຕິ (໔-໒໗) ຓິເກ ອາປູປິໂກ. ນຕຸ ຠິນ຺ນຕ຺ຖສ຺ສາຕິ ພ຺ຍຕິເຣກໍ ທສ຺ເສຕ຺ວາ ຕໍ ທິຏ຺ຐນ຺ເຕນ ສາເຘຕຸມາຫ- ‘ເທວທຕ຺ຕສ຺ສິ’ຈ຺ຈາທິ. ກາຣຓມາຫ- ‘ສາມ຺ຍນ຺ຕເຣ’ຈ຺ຈາທິ. ເທວທຕ຺ຕສ຺ສ ຘຸຣຸໂນ ກຸລນ຺ຕິ ສາມ຺ຍນ຺ຕຣພ຺ຍວຈ຺ເຉທາຍ ເທວທຕ຺ຕສທ຺ທສ຺ໂສ ປາທານໂຕ ຄຸຣຸກຸລນ຺ຕິ ວຸຕ຺ຕິປເທນ ເທວທຕ຺ຕຕ຺ຖສ຺ສານ຺ໂຕ ຠາໂວຕິ ອຕ຺ໂຖ. ຕເມຕ຺ໂຖປິ ສມານນ຺ຕູປທສ຺ເສນ຺ໂຕ ອາຫ- ‘ຕເຖຫາປິ’ຈ຺ຈາທິ. ອຖາຕ຺ຕໂນ ປຸຕ຺ຕມິຈ຺ຉຕີຕ຺ເຍຕສ຺ມິໍ ວາກ຺ເຍ ປທສ຺ສານ຺ວາຂ຺ຍານໂຕ ອຕ຺ຕສທ຺ທສ຺ສາປ຺ຜໂຍໂຄ ກິນ຺ນ ສິຍາຕິ ທສ຺ເສຕຸມາຫ- ‘ນຈາປິ’ຈ຺ຈາທິ.

ປທສ຺ສາຕິ ປຸຕ຺ຕີຍາທິໂນ ປທສ຺ສ. ນຈາປິ ອປ຺ປໂຍໂຄຕິ ສມ຺ພນ຺ໂຘ. ກາຣຓມາຫ- ‘ອີຍນ຺ຕສ຺ສາ’ຕິອາທິ. ອີຍນ຺ໂຕ ປຸຕ຺ຕີຍາທິ, ນິໂຍຄໂຕ ນ ປປ຺ໂປຕີຕິ ສມ຺ພນ຺ໂຘ. ຕພ຺ພາຈີສທ຺ທປ຺ປໂຍຄນ຺ຕິ ອຎ຺ຎວາຈີສທ຺ທໂຍຄໍ. ສຸຕຄ຺ຄຫຓນ຺ຕິ ອສຸຕຕ຺ຕາຕິ ວຸຕ຺ຕສຸຕຄ຺ຄຫຓໍ. ອຕ຺ຖປ຺ປກຣຓາທ຺ຍຸປລກ຺ຂຓນ຺ຕ຺ຍເນນ ອຕ຺ຖໂຕ ປກຣຓາທິໂຕປິ ປຸຕ຺ຕສ຺ສຕ຺ຕ ນິຍຕາ ຄມ຺ຍເຕ, ສຸຕສທ຺ທສ຺ສ ຕຸ ຄຫຓມຸປລກ຺ຂຓຕ຺ຖນ຺ຕິ ວທຕິ.

ນນຸ ຈ ສຸຕ຺ເຕ ກມ຺ມາຕິ ວຸຕ຺ຕຕ຺ຕາ ກມ຺ມສມຸທາຍໂຕປີໂຍ ສິຍາ ຕ຺ຍາສງ຺ກິເຍວ (ມຠາ)ວໍ ສາຘຍມາຫ- ‘ກມ຺ມາ’ຕິອາທິ. ວຕ຺ຕຸໍ ອິຏ຺ຐາ ເອກສຂ຺ຍາ ຍສ຺ສ ກມ຺ມສາມຎ຺ຎສ຺ສ ຕໍ ຕຖາວຸຕ຺ຕໍ. ວຕ຺ຕຸມິຏ຺ເຐກ ສງ຺ຂ຺ຍສ຺ສ ຄຫຓມາຫ- ‘ກມ຺ມສມຸທາຍໂຕ’ຕິ. ກິມ຺ປນາວຍວໂຕ ນ ສິຍາ’ ມຫນ຺ຕມ຺ປຸຕ຺ຕມິຈ຺ຉຕີ’ຈ຺ຈຕ຺ຣ ປຸຕ຺ຕມິຈ຺ຈໂຕຈ຺ຈາສງ຺ກິຍາຫ ‘ອວຍວໂຕປິ ສາເປກ຺ຂຕ຺ຕາເຍວາ’ຕິ. ນ ຠຕີຕິ ສມ຺ພນ຺ໂຘ. ເອວຎ຺ຈຣຫິ ອິທມ຺ປິ ນ ສິຊ຺ຌຕີຕິ ໂຈເທນ຺ໂຕ ອາຫ ‘ຈຣຫິ’ຈ຺ຈາທິ. ມຫາ ຈາຍໍ ປຸຕ຺ໂຕເຈຕິ ມຫາປຸຕ຺ຕມິຈ຺ຉຕີຕິ ຍເທວໍ ກຣີຍຕິ ຕທາຍມ຺ປໂຍໂຄຕິ ທສ຺ເສນ຺ໂຕ ອາຫ- ‘ຠວິຕພ຺ພເມເວ’ຈ຺ຈາທິ.