໖. ອຸປມາ

ອຸປມີຍເຕ ປຣິຈ຺ຉິຊ຺ຊຕິ ສາຘີຍຕີຕ຺ຍຕ຺ໂຖ. ກີທິສນ຺ຕມຸປມານມິຈ຺ຈາຫ- ‘ປສິທ຺ຘສາຘມ຺ຍາ’ອິຈ຺ຈາທິ. ປສິທ຺ໂຘ ຄວາທິ, ຕສ຺ສ ສາຘມ຺ຍາ ສມານ ຣູປຕາຍ ຍມ຺ປສິທ຺ຘສ຺ສ ຄວຍາທິໂນ ສາຘິຍສ຺ສ ສາຘນໍ ຕມຸປມານນ຺ຕ຺ຍຕ຺ໂຖ. ສມາໂນ ຘມ຺ໂມ-ສ຺ເສຕິ ສຘມ຺ໂມ, ຄວາທິເຍວ. ຕສ຺ສ ຠາໂວ ສາຘມ຺ຍໍ. ສາຘ຺ຍເຕ ອຸປມີຍເຕ-ເນເນຕິ ສາຘນມຸປມານໍ ຄວາທິ. ສາຘຸເຕ ອຸປມີຍເຕຕິ ສາຘິໂຍ, ຄວຍາທິ. ຕສ຺ສ ສາຘນໍ ສາຘິຍສາຘນໍ.

ປຸຕ຺ຕມິວາຈຣຕີຕິ ເອຕ຺ຖ ‘ອາວສຖມາວສຕິ’ຈ຺ຈາໂທ ວິຍ ອາຘາຣຕ຺ຖສ຺ສ ວິຎ຺ຎາຍມານຕ຺ຕາ ປຸຕ຺ເຕ ວິຍ ມາຓວເກ ມຘຸຣນ຺ນປານທານາທິກມາຈຣຓໍ ກໂຣຕິຈ຺ເຈວມຕ຺ຖສມ຺ຠເວນ ທ຺ວິນ຺ນມ຺ປິ ອຸປມາໂນປເມຍ຺ຍຠາໂວຕ຺ຍວຄມຍິຕຸມາຫ- ‘ປຸຕ຺ເຕ’ອິຈ຺ຈາທິ. ປສິທ຺ເຘນ ສາຘນຠາເວນຸປມານຠູເຕ ປຸຕ຺ເຕ ອາຈຣຓມ຺ປິ ປສິທ຺ຘນ຺ຕິ ອາຫ- ‘ຕມ຺ປສິທ຺ຘ’ນ຺ຕິ. ຕທາຈຣເຓນ ເຕນ ອາຈຣເຓນ ປຸຕ຺ຕມາຓວກວິສຍມາຈຣຓໍ ວາ ປຸຕ຺ຕມາຓວກ ສທ຺ເທນຸປຈາຣໂຕ ຄເຫຕ຺ວາ ວິສຍີວເສນ ວິສຍຠາວໂວຫາໂຣຕິປິ ຍຸຊ຺ຊຕິ. ວາກ຺ຍຕ຺ໂຖ ປເນຕສ຺ມິໍ ປກ຺ເຂ ‘ປຸຕ຺ຕມິວ ປຸຕ຺ຕວິສຍ ມາຓວກມິວ ອາຈຣຕິ ມາຓວກວິສຍມາຈຣຓໍ ກໂຣຕີ’ຕິ, ວຸຕ຺ຕິຍນ຺ຕຸ ຍຖາວຸຕ຺ຕມຕ຺ຖທ຺ວຍໍ ຍຖາໂຍຄໍ ໂຍເຊຕ຺ວາ ເວທິຕພ຺ພໍ.

ນນຸ ຈ ຍຊ຺ຊຕ຺ໂຣປມາໂນປເມຍ຺ຍຠາໂວ ວຸຕ຺ຕິຍໍ ອີເຍເນວ ໂຊຕິໂຕຕິ ອິວສທ຺ໂທ ນິວຕ຺ຕເຕ, ຕໂທປມາໂນປເມຍ຺ຍຠາໂວ ປຸຕ຺ຕ ສທ຺ເທວ ວຕ຺ຕເຕ, ຕໍ ກຖມຸປເມຍ຺ຍວຈນສ຺ສ ມາຓວກສທ຺ທສ຺ສ ວຸຕ຺ຕຕ຺ຖສ຺ສ ປໂຍໂຄ ຍຸຕ຺ໂຕຈ຺ຈາສງ຺ກິຍາຫ- ‘ອຸປມານວຈນໂຕ’ຈ຺ຈາທິ.

ຕພ຺ພິສິຏ຺ຐາຈຣເຓຕິ ເຕໂນປມາເນນ ວິສິຏ຺ເຐ ອາຈຣເຓ. ອຸປມາໂນປເມຍ຺ຍຠາວສ຺ສານິວຕ຺ຕຕ຺ຕາຕິ ເອຕ຺ຖາຍມຘິປ຺ປາໂຍ ‘ອຸປມານ ວິສິຏ຺ຐາຈຣເຓ ອຸປມານວຈນໂຕ ອີຍສ຺ສ ວິຘາເນ ໂນປເມຍ຺ຍວຈນມນ຺ຕເຣໂນປມານວຈນສ຺ສ ປວຕ຺ຕີຕິ ອຸປມາໂນປເມຍ຺ຍຠາວສ຺ສານິວຕ຺ຕີ’’ຕິ. ອຎ຺ຎຖາຕິ ຍທ຺ຍຸປມາໂນປເມຍ຺ຍຠາວສ຺ສ ອີເຍເນວ ໂຊຕິຕຕ຺ຕາ ຕທນ຺ຕສ຺ສຸປເມຍ຺ເຍ ວຸຕ຺ຕິ ສິຍາຕ຺ຍຕ຺ໂຖ. ປພ຺ພຕາຍຕີຕິ ‘‘ກຕ຺ຕຸຕາໂຍ’’ຕິ (໕-໘) ອາໂຍ. ອຸປເມຍ຺ຍສ຺ສານິວຕ຺ຕຕ຺ຕາ ອຸປເມຍ຺ຍ ກຕ຺ຕຸສາມຎ຺ເຎ ຕິປ຺ປຈ຺ຈໂຍ.