໑໖. ປໂຍ

ປໂຍຊໂກ ໂຈທໂກ ພ຺ຍາປາຣໂກຕິ ອຕ຺ໂຖ ນນຸ ຈ ວຸຕ຺ຕິຍໍ ‘ກຕ຺ຕາຣໍ ປໂຍຊຍຕີ’ຕິ ວຸຕ຺ຕໍ ກຖໍ ປຍຸຊ຺ຊມານສ຺ສ ກຕ຺ຕຸຕ຺ຕໍຕິ ອາຫ- ‘ປຍຸຊ຺ຊມາໂນ’ຈ຺ຈາທິ. ນາວສ຺ສໍ ກິຣິຍາປວຕ຺ຕກຕ຺ເຕເນວ ໂຍຄ຺ຄຕາມຕ຺ເຕນປິ ກຕ຺ຕຸຕ຺ຕໍ ສິຍາຕິ ທສ຺ເສນ຺ໂຕ ອາຫ- ‘ກິຣິຍາຍ ໂຍຄ຺ໂຄ’ຕິອາທິ. ປາສາຓມ຺ພເລນຸຏ຺ຐາເປຕິ’ຈ຺ຈາທີສຸ ຫິ ໂຍຄ຺ຍຕາຍປິ ກຕ຺ຕຸຕ຺ຕາວສາໂຍສິຍາ, ໂກປນາຍໍ ປໂຍຊກພ຺ຍປາໂຣຕິ ອາຫ- ‘ເປສເນ’ຈ຺ຈາທິ. ທາສາທິໂນ ຫີນສ຺ສ ກຕ຺ຖຈິ ອຕ຺ເຖ ນິໂຍຊນໍ ເປສນໍ. ຄຸຣຸອາທິໂນ ສກ຺ກາຣປຸພ຺ພໍ ພ຺ຍາປາຣຓມຊ຺ເຌສນໍ. ຕໍ ເປສນຊ຺ເຌສນາທິກໍ ລກ຺ຂຓໍ ສຠາໂວ ຍສ຺ສ ໂສ ຕຖາ ວຸຕ຺ໂຕ.

ອາທິສທ຺ເທນ ອານຸກູລ຺ຍຠາຄິໂນ ພ຺ຍາປາຣສ຺ສ ຄຫຓໍ, ຕຖາ ຈ ‘ຠິກ຺ຂາ ວາສຍຕິ ກາຣີໂສ-ຊ຺ຌາເປສີ’ຕິ ສິຊ຺ຌຕິ. ຠິກ຺ຂາ ຫິ ປຈຸຣພ຺ຍຎ຺ຊນວຕີ ລພ຺ຠມານາ ວາສານຸກູລໍ ຕິຕ຺ຕິວິເສສມຸປຊນຍຕິ. ກາຣີໂສປິ ນິວາເຕ ປເທເສ ສຸຏ຺ຐຸ ປຊ຺ຊລິໂຕຊ຺ຌຍນວິໂຣຘິ ສີຕກຕມຸປທ຺ທວມປນຍນ຺ໂຕ-ຊ຺ຌຍນານຸກູລສາມຕ຺ຖິຍມາທຘາຕິ ຕໂຕ ເຕສມ຺ປິ ຍຸຕ຺ຕມ຺ປໂຍຊກຕ຺ຕນ຺ຕິ.

ປໂຍຊກພ຺ຍາປາເຣຕີທໍ ປຈ຺ຈຍວິເສສນໍ ວາ ສິຍາ ປກຕິວິເສສນໍ ວາ. ຕຕ຺ຖ ຍທິ ປກຕິວິເສສນໍ ສິຍາ, ຕທາ ປໂຍຊກພ຺ຍາປາເຣ ວຕ຺ຕມານາ ຓີຓາປີ ວິຘີຍນ຺ຕີຕິ (ຄມນໍ) ປຕິ ໂຍ ນິໂຍໂຄ ຕທຕ຺ໂຖ ຄມິ, ນ ຄຕ຺ຍຕ຺ໂຖ, ຕສ຺ສ ຈາຍໍ ປໂຍຊ຺ໂຊຕິ ‘ຄມຍຕິ ມາຓວກໍ ຄາມ’ນ຺ຕິ ຄຕ຺ຍຕ຺ຖສ຺ສ ປໂຍຊ຺ເຊ ‘‘ຄຕິໂພຘາຫາເຣ’’ຈ຺ຈາທິນາ (໒-໔) ວິຫິຕາ ທຸຕິຍາ ນ ປປ຺ໂປຕິ, ຕໂຕ ປກຕ຺ຍຕ຺ຖວິເສສນປກ຺ໂຂ ທຸຏ຺ໂຐຕິ ປຈ຺ຈຍວິເສສນປກ຺ຂໍ ທສ຺ເສຕຸມາຫ- ‘ປຈ຺ຈຍວິເສສນໍ ເວທໍ ນ ປກຕິວິເສສນ’ນ຺ຕິ.

ປໂຍຊກມຕ຺ຕຄ຺ຄຫເຓຕິ ມຕ຺ຕສທ຺ໂທ ສາມຎ຺ຎວາຈີ, ຍຖາ ‘ກຎ຺ຎາ ມຕ຺ຕໍ ວາຣຍຕີ’ຕິ. ກຕ຺ຕາຣໍ ໂຍ ປຍຸຊ຺ຊຕິ ໂຍ ຈ ກຣຓາທີນໍ ປໂຍຊໂກ ເຕສໍ ສາມຎ຺ເຎນ ຄຫເຓ ສຕີຕິ ອຕ຺ໂຖ. ພ຺ຍາປາເຣຕ຺ເວວາຕິ ປໂຍຊກຄ຺ຄຫຓມນ຺ຕເຣນ ພ຺ຍາປາເຣອິຈ຺ເຈວ ວຈນໍ ກຕ຺ຕພ຺ພໍ ສິຍາຕິ ຠາໂວ, ຕນ຺ຕິ ປໂຍຊກຄ຺ຄຫຓໍ, ວິສິຏ຺ໂຐ ວິສໂຍ ຍສ຺ສ ປໂຍຊກຄ຺ຄຫຓສ຺ສຕໍຕຖາວຸຕ຺ຕໍ. ໂກປນາຍໍວິສິຏ຺ໂຐ ວິສໂຍຈ຺ຈາຫ- ‘ໂຍ ໂລເກ’ອິຈ຺ຈາທິ. ອິໂຕວາຕິ ວກ຺ຂມານສ຺ສ ເຫຕຸໂນ ປຣາມາໂສ. ຕນ຺ຕິ ຈຸຣາທີຫິ ຓິວິຘານໍ. ເອວໍສທ຺ໂທ ວກ຺ຂມານາເປກ຺ໂຂ. ຕໍ ວິສຸໍ ຈຸຣາທີຫິ ຓິວິຘານເມວ ວກ຺ຂມານປ຺ປກາເຣນ ສຜລໍ ສິຍາ ນາຎ຺ຎຖາຕິ ອຕ຺ໂຖ. ຕເມວ ປກາຣໍ ທສ຺ເສຕິ‘ຍທິມິນາ’ຈ຺ຈາທິ.