໕. ປຎ຺ຎາສຸຕ຺ຕໍ

໒໕. ‘‘ຍໂຕ ໂຂ, ຠິກ຺ຂເວ, ຠິກ຺ຂຸໂນ ປຎ຺ຎາຍ ຈິຕ຺ຕໍ ສຸປຣິຈິຕໍ ໂຫຕິ, ຕສ຺ເສຕໍ, ຠິກ຺ຂເວ, ຠິກ຺ຂຸໂນ ກລ຺ລໍ ວຈນາຍ – ‘ຂີຓາ ຊາຕິ, ວຸສິຕໍ ພ຺ຣຫ຺ມຈຣິຍໍ, ກຕໍ ກຣຓີຍໍ, ນາປຣໍ ອິຕ຺ຖຕ຺ຕາຍາຕິ ປຊານາມີ’’’ຕິ.

‘‘ກຖຎ຺ຈ, ຠິກ຺ຂເວ, ຠິກ຺ຂຸໂນ ປຎ຺ຎາຍ ຈິຕ຺ຕໍ ສຸປຣິຈິຕໍ ໂຫຕິ? ‘ວີຕຣາຄໍ ເມ ຈິຕ຺ຕ’ນ຺ຕິ ປຎ຺ຎາຍ ຈິຕ຺ຕໍ ສຸປຣິຈິຕໍ ໂຫຕິ; ‘ວີຕໂທສໍ ເມ ຈິຕ຺ຕ’ນ຺ຕິ ປຎ຺ຎາຍ ຈິຕ຺ຕໍ ສຸປຣິຈິຕໍ ໂຫຕິ; ‘ວີຕໂມຫໍ ເມ ຈິຕ຺ຕ’ນ຺ຕິ ປຎ຺ຎາຍ ຈິຕ຺ຕໍ ສຸປຣິຈິຕໍ ໂຫຕິ; ‘ອສຣາຄຘມ຺ມໍ ເມ ຈິຕ຺ຕ’ນ຺ຕິ ປຎ຺ຎາຍ ຈິຕ຺ຕໍ ສຸປຣິຈິຕໍ ໂຫຕິ; ‘ອສໂທສຘມ຺ມໍ ເມ ຈິຕ຺ຕ’ນ຺ຕິ ປຎ຺ຎາຍ ຈິຕ຺ຕໍ ສຸປຣິຈິຕໍ ໂຫຕິ; ‘ອສໂມຫຘມ຺ມໍ ເມ ຈິຕ຺ຕ’ນ຺ຕິ ປຎ຺ຎາຍ ຈິຕ຺ຕໍ ສຸປຣິຈິຕໍ ໂຫຕິ; ‘ອນາວຕ຺ຕິຘມ຺ມໍ ເມ ຈິຕ຺ຕໍ ກາມຠວາຍາ’ຕິ ປຎ຺ຎາຍ ຈິຕ຺ຕໍ ສຸປຣິຈິຕໍ ໂຫຕິ; ‘ອນາວຕ຺ຕິຘມ຺ມໍ ເມ ຈິຕ຺ຕໍ ຣູປຠວາຍາ’ຕິ ປຎ຺ຎາຍ ຈິຕ຺ຕໍ ສຸປຣິຈິຕໍ ໂຫຕິ; ‘ອນາວຕ຺ຕິຘມ຺ມໍ ເມ ຈິຕ຺ຕໍ ອຣູປຠວາຍາ’ຕິ ປຎ຺ຎາຍ ຈິຕ຺ຕໍ ສຸປຣິຈິຕໍ ໂຫຕິ. ຍໂຕ ໂຂ, ຠິກ຺ຂເວ, ຠິກ຺ຂຸໂນ ປຎ຺ຎາຍ ຈິຕ຺ຕໍ ສຸປຣິຈິຕໍ ໂຫຕິ, ຕສ຺ເສຕໍ, ຠິກ຺ຂເວ, ຠິກ຺ຂຸໂນ ກລ຺ລໍ ວຈນາຍ – ‘ຂີຓາ ຊາຕິ, ວຸສິຕໍ ພ຺ຣຫ຺ມຈຣິຍໍ, ກຕໍ ກຣຓີຍໍ, ນາປຣໍ ອິຕ຺ຖຕ຺ຕາຍາຕິ ປຊານາມີ’’’ຕິ. ປຎ຺ຈມໍ.