໙. ປຐມອິຘໂລກິກສຸຕ຺ຕໍ

໔໙. ເອກໍ ສມຍໍ ຠຄວາ ສາວຕ຺ຖິຍໍ ວິຫຣຕິ ປຸພ຺ພາຣາເມ ມິຄາຣມາຕຸປາສາເທ. ອຖ ໂຂ ວິສາຂາ ມິຄາຣມາຕາ ເຍນ ຠຄວາ ເຕນຸປສງ຺ກມິ…ເປ…. ເອກມນ຺ຕໍ ນິສິນ຺ນໍ ໂຂ ວິສາຂໍ ມິຄາຣມາຕຣໍ ຠຄວາ ເອຕທໂວຈ –

‘‘ຈຕູຫິ ໂຂ, ວິສາເຂ, ຘມ຺ເມຫິ ສມນ຺ນາຄໂຕ ມາຕຸຄາໂມ ອິຘໂລກວິຊຍາຍ ປຏິປນ຺ໂນ ໂຫຕິ, ອຍໍສ ໂລໂກ ອາຣທ຺ໂຘ ໂຫຕິ. ກຕເມຫິ ຈຕູຫິ? ອິຘ, ວິສາເຂ, ມາຕຸຄາໂມ ສຸສໍວິຫິຕກມ຺ມນ຺ໂຕ ໂຫຕິ, ສງ຺ຄຫິຕປຣິຊໂນ, ຠຕ຺ຕຸ ມນາປໍ ຈຣຕິ, ສມ຺ຠຕໍ ອນຸຣກ຺ຂຕິ.

‘‘ກຖຎ຺ຈ, ວິສາເຂ, ມາຕຸຄາໂມ ສຸສໍວິຫິຕກມ຺ມນ຺ໂຕ ໂຫຕິ? ອິຘ, ວິສາເຂ, ມາຕຸຄາໂມ ເຍ ເຕ ຠຕ຺ຕຸ ອພ຺ຠນ຺ຕຣາ ກມ຺ມນ຺ຕາ – ອຸຓ຺ຓາຕິ ວາ ກປ຺ປາສາຕິ ວາ – ຕຕ຺ຖ ທກ຺ຂາ ໂຫຕິ ອນລສາ ຕຕ຺ຣຸປາຍາຍ ວີມໍສາຍ ສມນ຺ນາຄຕາ ອລໍ ກາຕຸໍ ອລໍ ສໍວິຘາຕຸໍ. ເອວໍ ໂຂ, ວິສາເຂ, ມາຕຸຄາໂມ ສຸສໍວິຫິຕກມ຺ມນ຺ໂຕ ໂຫຕິ.

‘‘ກຖຎ຺ຈ, ວິສາເຂ, ມາຕຸຄາໂມ ສງ຺ຄຫິຕປຣິຊໂນ ໂຫຕິ? ອິຘ, ວິສາເຂ, ມາຕຸຄາໂມ ໂຍ ໂສ ຠຕ຺ຕຸ ອພ຺ຠນ຺ຕໂຣ ອນ຺ໂຕຊໂນ – ທາສາຕິ ວາ ເປສ຺ສາຕິ ວາ ກມ຺ມກຣາຕິ ວາ – ເຕສໍ ກຕຎ຺ຈ ກຕໂຕ ຊານາຕິ ອກຕຎ຺ຈ ອກຕໂຕ ຊານາຕິ, ຄິລານການຎ຺ຈ ພລາພລໍ ຊານາຕິ ຂາທນີຍໍ ໂຠຊນີຍຎ຺ຈສ຺ສ ປຈ຺ຈໍເສນ ສໍວິຠຊຕິ. ເອວໍ ໂຂ, ວິສາເຂ, ມາຕຸຄາໂມ ສງ຺ຄຫິຕປຣິຊໂນ ໂຫຕິ.

‘‘ກຖຎ຺ຈ, ວິສາເຂ, ມາຕຸຄາໂມ ຠຕ຺ຕຸ ມນາປໍ ຈຣຕິ? ອິຘ, ວິສາເຂ, ມາຕຸຄາໂມ ຍໍ ຠຕ຺ຕຸ ອມນາປສງ຺ຂາຕໍ ຕໍ ຊີວິຕເຫຕຸປິ ນ ອຊ຺ຌາຈຣຕິ. ເອວໍ ໂຂ, ວິສາເຂ, ມາຕຸຄາໂມ ຠຕ຺ຕຸ ມນາປໍ ຈຣຕິ.

‘‘ກຖຎ຺ຈ, ວິສາເຂ, ມາຕຸຄາໂມ ສມ຺ຠຕໍ ອນຸຣກ຺ຂຕິ? ອິຘ, ວິສາເຂ, ມາຕຸຄາໂມ ຍໍ ຠຕ຺ຕາ ອາຫຣຕິ ຘນໍ ວາ ຘຎ຺ຎໍ ວາ ຣຊຕໍ ວາ ຊາຕຣູປໍ ວາ ຕໍ ອາຣກ຺ເຂນ ຄຸຕ຺ຕິຍາ ສມ຺ປາເທຕິ, ຕຕ຺ຖ ຈ ໂຫຕິ ອຘຸຕ຺ຕີ ອເຖນີ ອໂສຓ຺ຑີ ອວິນາສິກາ. ເອວໍ ໂຂ, ວິສາເຂ, ມາຕຸຄາໂມ ສມ຺ຠຕໍ ອນຸຣກ຺ຂຕິ. ອິເມຫິ ໂຂ, ວິສາເຂ, ຈຕູຫິ ຘມ຺ເມຫິ ສມນ຺ນາຄໂຕ ມາຕຸຄາໂມ ອິຘໂລກວິຊຍາຍ ປຏິປນ຺ໂນ ໂຫຕິ, ອຍໍສ ໂລໂກ ອາຣທ຺ໂຘ ໂຫຕິ.

‘‘ຈຕູຫິ ໂຂ, ວິສາເຂ, ຘມ຺ເມຫິ ສມນ຺ນາຄໂຕ ມາຕຸຄາໂມ ປຣໂລກວິຊຍາຍ ປຏິປນ຺ໂນ ໂຫຕິ, ປຣໂລໂກ ອາຣທ຺ໂຘ ໂຫຕິ. ກຕເມຫິ ຈຕູຫິ? ອິຘ, ວິສາເຂ, ມາຕຸຄາໂມ ສທ຺ຘາສມ຺ປນ຺ໂນ ໂຫຕິ, ສີລສມ຺ປນ຺ໂນ ໂຫຕິ, ຈາຄສມ຺ປນ຺ໂນ ໂຫຕິ, ປຎ຺ຎາສມ຺ປນ຺ໂນ ໂຫຕິ.

‘‘ກຖຎ຺ຈ, ວິສາເຂ, ມາຕຸຄາໂມ ສທ຺ຘາສມ຺ປນ຺ໂນ ໂຫຕິ? ອິຘ, ວິສາເຂ, ມາຕຸຄາໂມ ສທ຺ໂຘ ໂຫຕິ, ສທ຺ທຫຕິ ຕຖາຄຕສ຺ສ ໂພຘິໍ – ‘ອິຕິປິ ໂສ ຠຄວາ ອຣຫໍ ສມ຺ມາສມ຺ພຸທ຺ໂຘ ວິຊ຺ຊາຈຣຓສມ຺ປນ຺ໂນ ສຸຄໂຕ ໂລກວິທູ ອນຸຕ຺ຕໂຣ ປຸຣິສທມ຺ມສາຣຖິ ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາ’ຕິ. ເອວໍ ໂຂ, ວິສາເຂ, ມາຕຸຄາໂມ ສທ຺ຘາສມ຺ປນ຺ໂນ ໂຫຕິ.

‘‘ກຖຎ຺ຈ, ວິສາເຂ, ມາຕຸຄາໂມ ສີລສມ຺ປນ຺ໂນ ໂຫຕິ? ອິຘ, ວິສາເຂ, ມາຕຸຄາໂມ ປາຓາຕິປາຕາ ປຏິວິຣໂຕ ໂຫຕິ…ເປ… ສຸຣາເມຣຍມຊ຺ຊປມາທຏ຺ຐານາ ປຏິວິຣໂຕ ໂຫຕິ. ເອວໍ ໂຂ, ວິສາເຂ, ມາຕຸຄາໂມ ສີລສມ຺ປນ຺ໂນ ໂຫຕິ.

‘‘ກຖຎ຺ຈ, ວິສາເຂ, ມາຕຸຄາໂມ ຈາຄສມ຺ປນ຺ໂນ ໂຫຕິ? ອິຘ, ວິສາເຂ, ມາຕຸຄາໂມ ວິຄຕມລມຈ຺ເຉເຣນ ເຈຕສາ ອຄາຣໍ ອຊ຺ຌາວສຕິ ມຸຕ຺ຕຈາຄາ ປຍຕປາຓິນີ ໂວສ຺ສຄ຺ຄຣຕາ ຍາຈໂຍຄາ ທານສໍວິຠາຄຣຕາ. ເອວໍ ໂຂ, ວິສາເຂ, ມາຕຸຄາໂມ ຈາຄສມ຺ປນ຺ໂນ ໂຫຕິ.

‘‘ກຖຎ຺ຈ, ວິສາເຂ, ມາຕຸຄາໂມ ປຎ຺ຎາສມ຺ປນ຺ໂນ ໂຫຕິ? ອິຘ, ວິສາເຂ, ມາຕຸຄາໂມ ປຎ຺ຎວາ ໂຫຕິ…ເປ… ເອວໍ ໂຂ, ວິສາເຂ, ມາຕຸຄາໂມ ປຎ຺ຎາສມ຺ປນ຺ໂນ ໂຫຕິ. ອິເມຫິ ໂຂ, ວິສາເຂ, ຈຕູຫິ ຘມ຺ເມຫິ ສມນ຺ນາຄໂຕ ມາຕຸຄາໂມ ປຣໂລກວິຊຍາຍ ປຏິປນ຺ໂນ ໂຫຕິ, ປຣໂລໂກ ອາຣທ຺ໂຘ ໂຫຕີ’’ຕິ.

‘‘ສຸສໍວິຫິຕກມ຺ມນ຺ຕາ, ສງ຺ຄຫິຕປຣິຊ຺ຊນາ;

ຠຕ຺ຕຸ ມນາປໍ ຈຣຕິ, ສມ຺ຠຕໍ ອນຸຣກ຺ຂຕິ.

‘‘ສທ຺ຘາ ສີເລນ ສມ຺ປນ຺ນາ, ວທຎ຺ຎູ ວີຕມຈ຺ຉຣາ;

ນິຈ຺ຈໍ ມຄ຺ຄໍ ວິໂສເຘຕິ, ໂສຕ຺ຖານໍ ສມ຺ປຣາຍິກໍ.

‘‘ອິຈ຺ເຈເຕ ອຏ຺ຐ ຘມ຺ມາ ຈ, ຍສ຺ສາ ວິຊ຺ຊນ຺ຕິ ນາຣິຍາ;

ຕມ຺ປິ ສີລວຕິໍ ອາຫຸ, ຘມ຺ມຏ຺ຐໍ ສຈ຺ຈວາທິນິໍ.

‘‘ໂສຬສາກາຣສມ຺ປນ຺ນາ, ອຏ຺ຐງ຺ຄສຸສມາຄຕາ;

ຕາທິສີ ສີລວຕີ ອຸປາສິກາ;

ອຸປປຊ຺ຊຕິ ເທວໂລກໍ ມນາປ’’ນ຺ຕິ. ນວມໍ;