໑໐. ທຸຕິຍອິຘໂລກິກສຸຕ຺ຕໍ

໕໐. ‘‘ຈຕູຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ມາຕຸຄາໂມ ອິຘໂລກວິຊຍາຍ ປຏິປນ຺ໂນ ໂຫຕິ, ອຍໍສ ໂລໂກ ອາຣທ຺ໂຘ ໂຫຕິ. ກຕເມຫິ ຈຕູຫິ? ອິຘ, ຠິກ຺ຂເວ, ມາຕຸຄາໂມ ສຸສໍວິຫິຕກມ຺ມນ຺ໂຕ ໂຫຕິ, ສງ຺ຄຫິຕປຣິຊໂນ, ຠຕ຺ຕຸ ມນາປໍ ຈຣຕິ, ສມ຺ຠຕໍ ອນຸຣກ຺ຂຕິ.

‘‘ກຖຎ຺ຈ, ຠິກ຺ຂເວ, ມາຕຸຄາໂມ ສຸສໍວິຫິຕກມ຺ມນ຺ໂຕ ໂຫຕິ? ອິຘ, ຠິກ຺ຂເວ, ມາຕຸຄາໂມ ເຍ ເຕ ຠຕ຺ຕຸ ອພ຺ຠນ຺ຕຣາ ກມ຺ມນ຺ຕາ…ເປ… ເອວໍ ໂຂ, ຠິກ຺ຂເວ, ມາຕຸຄາໂມ ສຸສໍວິຫິຕກມ຺ມນ຺ໂຕ ໂຫຕິ.

‘‘ກຖຎ຺ຈ, ຠິກ຺ຂເວ, ມາຕຸຄາໂມ ສງ຺ຄຫິຕປຣິຊໂນ ໂຫຕິ? ອິຘ, ຠິກ຺ຂເວ, ມາຕຸຄາໂມ ໂຍ ໂສ ຠຕ຺ຕຸ ອພ຺ຠນ຺ຕໂຣ ອນ຺ໂຕຊໂນ…ເປ… ເອວໍ ໂຂ, ຠິກ຺ຂເວ, ມາຕຸຄາໂມ ສງ຺ຄຫິຕປຣິຊໂນ ໂຫຕິ.

‘‘ກຖຎ຺ຈ, ຠິກ຺ຂເວ, ມາຕຸຄາໂມ ຠຕ຺ຕຸ ມນາປໍ ຈຣຕິ? ອິຘ, ຠິກ຺ຂເວ, ມາຕຸຄາໂມ ຍໍ ຠຕ຺ຕຸ ອມນາປສງ຺ຂາຕໍ ຕໍ ຊີວິຕເຫຕຸປິ ນ ອຊ຺ຌາຈຣຕິ. ເອວໍ ໂຂ, ຠິກ຺ຂເວ, ມາຕຸຄາໂມ ຠຕ຺ຕຸ ມນາປໍ ຈຣຕິ.

‘‘ກຖຎ຺ຈ, ຠິກ຺ຂເວ, ມາຕຸຄາໂມ ສມ຺ຠຕໍ ອນຸຣກ຺ຂຕິ? ອິຘ, ຠິກ຺ຂເວ, ມາຕຸຄາໂມ ຍໍ ຠຕ຺ຕາ ອາຫຣຕິ…ເປ… ເອວໍ ໂຂ, ຠິກ຺ຂເວ, ມາຕຸຄາໂມ ສມ຺ຠຕໍ ອນຸຣກ຺ຂຕິ. ອິເມຫິ ໂຂ, ຠິກ຺ຂເວ, ຈຕູຫິ ຘມ຺ເມຫິ ສມນ຺ນາຄໂຕ ມາຕຸຄາໂມ ອິຘໂລກວິຊຍາຍ ປຏິປນ຺ໂນ ໂຫຕິ, ອຍໍສ ໂລໂກ ອາຣທ຺ໂຘ ໂຫຕິ.

‘‘ຈຕູຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ມາຕຸຄາໂມ ປຣໂລກວິຊຍາຍ ປຏິປນ຺ໂນ ໂຫຕິ, ປຣໂລໂກ ອາຣທ຺ໂຘ ໂຫຕິ. ກຕເມຫິ ຈຕູຫິ? ອິຘ, ຠິກ຺ຂເວ, ມາຕຸຄາໂມ ສທ຺ຘາສມ຺ປນ຺ໂນ ໂຫຕິ, ສີລສມ຺ປນ຺ໂນ ໂຫຕິ, ຈາຄສມ຺ປນ຺ໂນ ໂຫຕິ, ປຎ຺ຎາສມ຺ປນ຺ໂນ ໂຫຕິ.

‘‘ກຖຎ຺ຈ, ຠິກ຺ຂເວ, ມາຕຸຄາໂມ ສທ຺ຘາສມ຺ປນ຺ໂນ ໂຫຕິ? ອິຘ, ຠິກ຺ຂເວ, ມາຕຸຄາໂມ ສທ຺ໂຘ ໂຫຕິ…ເປ… ເອວໍ ໂຂ, ຠິກ຺ຂເວ, ມາຕຸຄາໂມ ສທ຺ຘາສມ຺ປນ຺ໂນ ໂຫຕິ.

‘‘ກຖຎ຺ຈ, ຠິກ຺ຂເວ, ມາຕຸຄາໂມ ສີລສມ຺ປນ຺ໂນ ໂຫຕິ? ອິຘ, ຠິກ຺ຂເວ, ມາຕຸຄາໂມ ປາຓາຕິປາຕາ ປຏິວິຣໂຕ ໂຫຕິ…ເປ… ສຸຣາເມຣຍມຊ຺ຊປມາທຏ຺ຐານາ ປຏິວິຣໂຕ ໂຫຕິ. ເອວໍ ໂຂ, ຠິກ຺ຂເວ, ມາຕຸຄາໂມ ສີລສມ຺ປນ຺ໂນ ໂຫຕິ.

‘‘ກຖຎ຺ຈ, ຠິກ຺ຂເວ, ມາຕຸຄາໂມ ຈາຄສມ຺ປນ຺ໂນ ໂຫຕິ? ອິຘ, ຠິກ຺ຂເວ, ມາຕຸຄາໂມ ວິຄຕມລມຈ຺ເຉເຣນ ເຈຕສາ ອຄາຣໍ ອຊ຺ຌາວສຕິ…ເປ… ເອວໍ ໂຂ, ຠິກ຺ຂເວ, ມາຕຸຄາໂມ ຈາຄສມ຺ປນ຺ໂນ ໂຫຕິ.

‘‘ກຖຎ຺ຈ, ຠິກ຺ຂເວ, ມາຕຸຄາໂມ ປຎ຺ຎາສມ຺ປນ຺ໂນ ໂຫຕິ? ອິຘ, ຠິກ຺ຂເວ, ມາຕຸຄາໂມ ປຎ຺ຎວາ ໂຫຕິ…ເປ… ເອວໍ ໂຂ, ຠິກ຺ຂເວ, ມາຕຸຄາໂມ ປຎ຺ຎາສມ຺ປນ຺ໂນ ໂຫຕິ. ອິເມຫິ ໂຂ, ຠິກ຺ຂເວ, ຈຕູຫິ ຘມ຺ເມຫິ ສມນ຺ນາຄໂຕ ມາຕຸຄາໂມ ປຣໂລກວິຊຍາຍ ປຏິປນ຺ໂນ ໂຫຕິ, ປຣໂລໂກ ອາຣທ຺ໂຘ ໂຫຕີ’’ຕິ.

‘‘ສຸສໍວິຫິຕກມ຺ມນ຺ຕາ, ສງ຺ຄຫິຕປຣິຊ຺ຊນາ;

ຠຕ຺ຕຸ ມນາປໍ ຈຣຕິ, ສມ຺ຠຕໍ ອນຸຣກ຺ຂຕິ.

‘‘ສທ຺ຘາ ສີເລນ ສມ຺ປນ຺ນາ, ວທຎ຺ຎູ ວີຕມຈ຺ຉຣາ;

ນິຈ຺ຈໍ ມຄ຺ຄໍ ວິໂສເຘຕິ, ໂສຕ຺ຖານໍ ສມ຺ປຣາຍິກໍ.

‘‘ອິຈ຺ເຈເຕ ອຏ຺ຐ ຘມ຺ມາ ຈ, ຍສ຺ສາ ວິຊ຺ຊນ຺ຕິ ນາຣິຍາ;

ຕມ຺ປິ ສີລວຕິໍ ອາຫຸ, ຘມ຺ມຏ຺ຐໍ ສຈ຺ຈວາທິນິໍ.

‘‘ໂສຬສາກາຣສມ຺ປນ຺ນາ, ອຏ຺ຐງ຺ຄສຸສມາຄຕາ;

ຕາທິສີ ສີລວຕີ ອຸປາສິກາ, ອຸປປຊ຺ຊຕິ ເທວໂລກໍ ມນາປ’’ນ຺ຕິ. ທສມໍ;

ອຸໂປສຖວຄ຺ໂຄ ປຎ຺ຈໂມ.